| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ಆಚರಿಯವತ್ತಕಥಾ
Ācariyavattakathā
೭೫. ಕಿನ್ತಾಯಂ ಭಿಕ್ಖು ಹೋತೀತಿ ಕಿಂ ತೇ ಅಯಂ ಭಿಕ್ಖು ಹೋತಿ। ಅಞ್ಞೇಹಿ ಓವದಿಯೋ ಅನುಸಾಸಿಯೋತಿ ಅಞ್ಞೇಹಿ ಓವದಿತಬ್ಬೋ ಚೇವ ಅನುಸಾಸಿತಬ್ಬೋ ಚ। ಬಾಹುಲ್ಲಾಯ ಆವತ್ತೋ ಯದಿದಂ ಗಣಬನ್ಧಿಕನ್ತಿ ಗಣಬನ್ಧೋ ಏತಸ್ಸ ಬಾಹುಲ್ಲಸ್ಸ ಅತ್ಥೀತಿ ಗಣಬನ್ಧಿಕಂ, ಬಾಹುಲ್ಲಂ। ಯಂ ಇದಂ ಗಣಬನ್ಧಿಕಂ ನಾಮ ಬಾಹುಲ್ಲಂ, ತದತ್ಥಾಯ ಅತಿಲಹುಂ ತ್ವಂ ಆಪನ್ನೋತಿ ವುತ್ತಂ ಹೋತಿ।
75.Kintāyaṃ bhikkhu hotīti kiṃ te ayaṃ bhikkhu hoti. Aññehi ovadiyo anusāsiyoti aññehi ovaditabbo ceva anusāsitabbo ca. Bāhullāya āvatto yadidaṃ gaṇabandhikanti gaṇabandho etassa bāhullassa atthīti gaṇabandhikaṃ, bāhullaṃ. Yaṃ idaṃ gaṇabandhikaṃ nāma bāhullaṃ, tadatthāya atilahuṃ tvaṃ āpannoti vuttaṃ hoti.
೭೬. ಅಬ್ಯತ್ತಾತಿ ಪಞ್ಞಾವೇಯ್ಯತ್ತಿಯೇನ ವಿರಹಿತಾ। ಅಞ್ಞತ್ತರೋಪಿ ಅಞ್ಞತಿತ್ಥಿಯಪುಬ್ಬೋತಿ ಪಸೂರೋ ಪರಿಬ್ಬಾಜಕೋ। ಸೋ ಕಿರ ‘‘ಧಮ್ಮಂ ಥೇನೇಸ್ಸಾಮೀ’’ತಿ ಉದಾಯಿತ್ಥೇರಸ್ಸ ಸನ್ತಿಕೇ ಪಬ್ಬಜಿತ್ವಾ ತೇನ ಸಹಧಮ್ಮಿಕಂ ವುಚ್ಚಮಾನೋ ತಸ್ಸ ವಾದಂ ಆರೋಪೇಸಿ। ಅನುಜಾನಾಮಿ ಭಿಕ್ಖವೇ ಬ್ಯತ್ತೇನ ಭಿಕ್ಖುನಾತಿಆದಿಮ್ಹಿ ಬ್ಯತ್ತೋ ಪುಬ್ಬೇ ಭಿಕ್ಖುನೋವಾದಕವಣ್ಣನಾಯಂ ವುತ್ತಲಕ್ಖಣೋಯೇವ। ಯೋ ಪನ ಅನ್ತೇವಾಸಿನೋ ವಾ ಸದ್ಧಿವಿಹಾರಿಕಸ್ಸ ವಾ ಗಿಲಾನಸ್ಸ ಸಕ್ಕೋತಿ ಉಪಟ್ಠಾನಾದೀನಿ ಕಾತುಂ, ಅಯಂ ಇಧ ಪಟಿಬಲೋತಿ ಅಧಿಪ್ಪೇತೋ। ವುತ್ತಮ್ಪಿ ಚೇತಂ –
76.Abyattāti paññāveyyattiyena virahitā. Aññattaropi aññatitthiyapubboti pasūro paribbājako. So kira ‘‘dhammaṃ thenessāmī’’ti udāyittherassa santike pabbajitvā tena sahadhammikaṃ vuccamāno tassa vādaṃ āropesi. Anujānāmi bhikkhave byattena bhikkhunātiādimhi byatto pubbe bhikkhunovādakavaṇṇanāyaṃ vuttalakkhaṇoyeva. Yo pana antevāsino vā saddhivihārikassa vā gilānassa sakkoti upaṭṭhānādīni kātuṃ, ayaṃ idha paṭibaloti adhippeto. Vuttampi cetaṃ –
‘‘ಪಞ್ಚಹುಪಾಲಿ , ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಉಪಸಮ್ಪಾದೇತಬ್ಬಂ, ನಿಸ್ಸಯೋ ದಾತಬ್ಬೋ, ಸಾಮಣೇರೋ ಉಪಟ್ಠಾಪೇತಬ್ಬೋ। ಕತಮೇಹಿ ಪಞ್ಚಹಿ? ಪಟಿಬಲೋ ಹೋತಿ ಅನ್ತೇವಾಸಿಂ ವಾ ಸದ್ಧಿವಿಹಾರಿಂ ವಾ ಗಿಲಾನಂ ಉಪಟ್ಠಾತುಂ ವಾ ಉಪಟ್ಠಾಪೇತುಂ ವಾ, ಅನಭಿರತಂ ವೂಪಕಾಸೇತುಂ ವಾ ವೂಪಕಾಸಾಪೇತುಂ ವಾ, ಉಪ್ಪನ್ನಂ ಕುಕ್ಕುಚ್ಚಂ ಧಮ್ಮತೋ ವಿನೋದೇತುಂ, ಅಭಿಧಮ್ಮೇ ವಿನೇತುಂ, ಅಭಿವಿನಯೇ ವಿನೇತೂ’’ನ್ತಿ (ಪರಿ॰ ೪೧೮)।
‘‘Pañcahupāli , aṅgehi samannāgatena bhikkhunā upasampādetabbaṃ, nissayo dātabbo, sāmaṇero upaṭṭhāpetabbo. Katamehi pañcahi? Paṭibalo hoti antevāsiṃ vā saddhivihāriṃ vā gilānaṃ upaṭṭhātuṃ vā upaṭṭhāpetuṃ vā, anabhirataṃ vūpakāsetuṃ vā vūpakāsāpetuṃ vā, uppannaṃ kukkuccaṃ dhammato vinodetuṃ, abhidhamme vinetuṃ, abhivinaye vinetū’’nti (pari. 418).
೭೭. ಪಕ್ಖಸಙ್ಕನ್ತೇಸೂತಿ ತಿತ್ಥಿಯಪಕ್ಖಸಙ್ಕನ್ತೇಸು। ಅನುಜಾನಾಮಿ ಭಿಕ್ಖವೇ ಆಚರಿಯನ್ತಿ ಆಚಾರಸಮಾಚಾರಸಿಕ್ಖಾಪನಕಂ ಆಚರಿಯಂ ಅನುಜಾನಾಮಿ। ಆಚರಿಯೋ ಭಿಕ್ಖವೇ ಅನ್ತೇವಾಸಿಕಮ್ಹೀತಿಆದಿ ಸಬ್ಬಂ ‘‘ಉಪಜ್ಝಾಯೋ ಭಿಕ್ಖವೇ ಸದ್ಧಿವಿಹಾರಿಕಮ್ಹೀ’’ತಿಆದಿನಾ ನಯೇನ ವುತ್ತವಸೇನೇವ ವೇದಿತಬ್ಬಂ। ನಾಮಮತ್ತಮೇವ ಹಿ ಏತ್ಥ ನಾನಂ।
77.Pakkhasaṅkantesūti titthiyapakkhasaṅkantesu. Anujānāmi bhikkhave ācariyanti ācārasamācārasikkhāpanakaṃ ācariyaṃ anujānāmi. Ācariyo bhikkhave antevāsikamhītiādi sabbaṃ ‘‘upajjhāyo bhikkhave saddhivihārikamhī’’tiādinā nayena vuttavaseneva veditabbaṃ. Nāmamattameva hi ettha nānaṃ.
ಆಚರಿಯವತ್ತಕಥಾ ನಿಟ್ಠಿತಾ।
Ācariyavattakathā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೧೮. ಆಚರಿಯವತ್ತಕಥಾ • 18. Ācariyavattakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಆಚರಿಯವತ್ತಕಥಾವಣ್ಣನಾ • Ācariyavattakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಆಚರಿಯವತ್ತಕಥಾವಣ್ಣನಾ • Ācariyavattakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಆಚರಿಯವತ್ತಕಥಾವಣ್ಣನಾ • Ācariyavattakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧೮. ಆಚರಿಯವತ್ತಕಥಾ • 18. Ācariyavattakathā
