| Library / Tipiṭaka / තිපිටක • Tipiṭaka / මහාවග්‌ග-අට්‌ඨකථා • Mahāvagga-aṭṭhakathā |
ආචරියවත්‌තකථා
Ācariyavattakathā
75. කින්‌තායං භික්‌ඛු හොතීති කිං තෙ අයං භික්‌ඛු හොති. අඤ්‌ඤෙහි ඔවදියො අනුසාසියොති අඤ්‌ඤෙහි ඔවදිතබ්‌බො චෙව අනුසාසිතබ්‌බො ච. බාහුල්‌ලාය ආවත්‌තො යදිදං ගණබන්‌ධිකන්‌ති ගණබන්‌ධො එතස්‌ස බාහුල්‌ලස්‌ස අත්‌ථීති ගණබන්‌ධිකං, බාහුල්‌ලං. යං ඉදං ගණබන්‌ධිකං නාම බාහුල්‌ලං, තදත්‌ථාය අතිලහුං ත්‌වං ආපන්‌නොති වුත්‌තං හොති.
75.Kintāyaṃ bhikkhu hotīti kiṃ te ayaṃ bhikkhu hoti. Aññehi ovadiyo anusāsiyoti aññehi ovaditabbo ceva anusāsitabbo ca. Bāhullāya āvatto yadidaṃ gaṇabandhikanti gaṇabandho etassa bāhullassa atthīti gaṇabandhikaṃ, bāhullaṃ. Yaṃ idaṃ gaṇabandhikaṃ nāma bāhullaṃ, tadatthāya atilahuṃ tvaṃ āpannoti vuttaṃ hoti.
76. අබ්‍යත්‌තාති පඤ්‌ඤාවෙය්‍යත්‌තියෙන විරහිතා. අඤ්‌ඤත්‌තරොපි අඤ්‌ඤතිත්‌ථියපුබ්‌බොති පසූරො පරිබ්‌බාජකො. සො කිර ‘‘ධම්‌මං ථෙනෙස්‌සාමී’’ති උදායිත්‌ථෙරස්‌ස සන්‌තිකෙ පබ්‌බජිත්‌වා තෙන සහධම්‌මිකං වුච්‌චමානො තස්‌ස වාදං ආරොපෙසි. අනුජානාමි භික්‌ඛවෙ බ්‍යත්‌තෙන භික්‌ඛුනාතිආදිම්‌හි බ්‍යත්‌තො පුබ්‌බෙ භික්‌ඛුනොවාදකවණ්‌ණනායං වුත්‌තලක්‌ඛණොයෙව. යො පන අන්‌තෙවාසිනො වා සද්‌ධිවිහාරිකස්‌ස වා ගිලානස්‌ස සක්‌කොති උපට්‌ඨානාදීනි කාතුං, අයං ඉධ පටිබලොති අධිප්‌පෙතො. වුත්‌තම්‌පි චෙතං –
76.Abyattāti paññāveyyattiyena virahitā. Aññattaropi aññatitthiyapubboti pasūro paribbājako. So kira ‘‘dhammaṃ thenessāmī’’ti udāyittherassa santike pabbajitvā tena sahadhammikaṃ vuccamāno tassa vādaṃ āropesi. Anujānāmi bhikkhave byattena bhikkhunātiādimhi byatto pubbe bhikkhunovādakavaṇṇanāyaṃ vuttalakkhaṇoyeva. Yo pana antevāsino vā saddhivihārikassa vā gilānassa sakkoti upaṭṭhānādīni kātuṃ, ayaṃ idha paṭibaloti adhippeto. Vuttampi cetaṃ –
‘‘පඤ්‌චහුපාලි , අඞ්‌ගෙහි සමන්‌නාගතෙන භික්‌ඛුනා උපසම්‌පාදෙතබ්‌බං, නිස්‌සයො දාතබ්‌බො, සාමණෙරො උපට්‌ඨාපෙතබ්‌බො. කතමෙහි පඤ්‌චහි? පටිබලො හොති අන්‌තෙවාසිං වා සද්‌ධිවිහාරිං වා ගිලානං උපට්‌ඨාතුං වා උපට්‌ඨාපෙතුං වා, අනභිරතං වූපකාසෙතුං වා වූපකාසාපෙතුං වා, උප්‌පන්‌නං කුක්‌කුච්‌චං ධම්‌මතො විනොදෙතුං, අභිධම්‌මෙ විනෙතුං, අභිවිනයෙ විනෙතූ’’න්‌ති (පරි. 418).
‘‘Pañcahupāli , aṅgehi samannāgatena bhikkhunā upasampādetabbaṃ, nissayo dātabbo, sāmaṇero upaṭṭhāpetabbo. Katamehi pañcahi? Paṭibalo hoti antevāsiṃ vā saddhivihāriṃ vā gilānaṃ upaṭṭhātuṃ vā upaṭṭhāpetuṃ vā, anabhirataṃ vūpakāsetuṃ vā vūpakāsāpetuṃ vā, uppannaṃ kukkuccaṃ dhammato vinodetuṃ, abhidhamme vinetuṃ, abhivinaye vinetū’’nti (pari. 418).
77. පක්‌ඛසඞ්‌කන්‌තෙසූති තිත්‌ථියපක්‌ඛසඞ්‌කන්‌තෙසු. අනුජානාමි භික්‌ඛවෙ ආචරියන්‌ති ආචාරසමාචාරසික්‌ඛාපනකං ආචරියං අනුජානාමි. ආචරියො භික්‌ඛවෙ අන්‌තෙවාසිකම්‌හීතිආදි සබ්‌බං ‘‘උපජ්‌ඣායො භික්‌ඛවෙ සද්‌ධිවිහාරිකම්‌හී’’තිආදිනා නයෙන වුත්‌තවසෙනෙව වෙදිතබ්‌බං. නාමමත්‌තමෙව හි එත්‌ථ නානං.
77.Pakkhasaṅkantesūti titthiyapakkhasaṅkantesu. Anujānāmi bhikkhave ācariyanti ācārasamācārasikkhāpanakaṃ ācariyaṃ anujānāmi. Ācariyo bhikkhave antevāsikamhītiādi sabbaṃ ‘‘upajjhāyo bhikkhave saddhivihārikamhī’’tiādinā nayena vuttavaseneva veditabbaṃ. Nāmamattameva hi ettha nānaṃ.
ආචරියවත්‌තකථා නිට්‌ඨිතා.
Ācariyavattakathā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 18. ආචරියවත්‌තකථා • 18. Ācariyavattakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / ආචරියවත්‌තකථාවණ්‌ණනා • Ācariyavattakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ආචරියවත්‌තකථාවණ්‌ණනා • Ācariyavattakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ආචරියවත්‌තකථාවණ්‌ණනා • Ācariyavattakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 18. ආචරියවත්‌තකථා • 18. Ācariyavattakathā
