| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ஆசரியவத்தகதா²வண்ணனா
Ācariyavattakathāvaṇṇanā
75. உபஸேனவத்து²ம்ஹி ஆசிண்ணந்தி சரிதங் வத்தங் அனுத⁴ம்மதா. கச்சி பி⁴க்கு² க²மனீயந்தி பி⁴க்கு² கச்சி துய்ஹங் இத³ங் சதுசக்கங் நவத்³வாரங் ஸரீரயந்தங் க²மனீயங் ஸக்கா க²மிதுங் ஸஹிதுங் பரிஹரிதுங், ந கிஞ்சி து³க்க²ங் உப்பாதே³தீதி. கச்சி யாபனீயந்தி கச்சி ஸப்³ப³கிச்சேஸு யாபேதுங் ஸக்கா, ந கிஞ்சி அந்தராயங் த³ஸ்ஸேதீதி. ஜானந்தாபி ததா²க³தாதிஏவமாதி³ யங் பரதோ ‘‘கதி வஸ்ஸோஸி த்வங் பி⁴க்கூ²’’திஆதி³னா புச்சி², தஸ்ஸ பரிஹாரத³ஸ்ஸனத்த²ங் வுத்தங். தத்ராயங் ஸங்கே²பத்தோ² – ததா²க³தா நாம ஜானந்தாபி ஸசே தாதி³ஸங் புச்சா²காரணங் ஹோதி, புச்ச²ந்தி. ஸசே பன தாதி³ஸங் புச்சா²காரணங் நத்தி², ஜானந்தாபி ந புச்ச²ந்தி. யஸ்மா பன பு³த்³தா⁴னங் அஜானநங் நாம நத்தி², தஸ்மா ‘‘அஜானந்தாபீ’’தி ந வுத்தங். காலங் விதி³த்வா புச்ச²ந்தீதி ஸசே தஸ்ஸா புச்சா²ய ஸோ காலோ ஹோதி, ஏவங் தங் காலங் விதி³த்வா புச்ச²ந்தி. ஸசே ந ஹோதி, ஏவம்பி காலங் விதி³த்வாவ ந புச்ச²ந்தி. ஏவங் புச்ச²ந்தாபி ச அத்த²ஸங்ஹிதங் ததா²க³தா புச்ச²ந்தி, யங் அத்த²னிஸ்ஸிதங் காரணனிஸ்ஸிதங், ததே³வ புச்ச²ந்தி, நோ அனத்த²ஸங்ஹிதங். கஸ்மா? யஸ்மா அனத்த²ஸங்ஹிதே ஸேதுகா⁴தோ ததா²க³தானங். ஸேது வுச்சதி மக்³கோ³, மக்³கே³னேவ தாதி³ஸஸ்ஸ வசனஸ்ஸ கா⁴தோ ஸமுச்சே²தோ³தி வுத்தங் ஹோதி.
75. Upasenavatthumhi āciṇṇanti caritaṃ vattaṃ anudhammatā. Kacci bhikkhu khamanīyanti bhikkhu kacci tuyhaṃ idaṃ catucakkaṃ navadvāraṃ sarīrayantaṃ khamanīyaṃ sakkā khamituṃ sahituṃ pariharituṃ, na kiñci dukkhaṃ uppādetīti. Kacci yāpanīyanti kacci sabbakiccesu yāpetuṃ sakkā, na kiñci antarāyaṃ dassetīti. Jānantāpi tathāgatātievamādi yaṃ parato ‘‘kati vassosi tvaṃ bhikkhū’’tiādinā pucchi, tassa parihāradassanatthaṃ vuttaṃ. Tatrāyaṃ saṅkhepattho – tathāgatā nāma jānantāpi sace tādisaṃ pucchākāraṇaṃ hoti, pucchanti. Sace pana tādisaṃ pucchākāraṇaṃ natthi, jānantāpi na pucchanti. Yasmā pana buddhānaṃ ajānanaṃ nāma natthi, tasmā ‘‘ajānantāpī’’ti na vuttaṃ. Kālaṃ viditvā pucchantīti sace tassā pucchāya so kālo hoti, evaṃ taṃ kālaṃ viditvā pucchanti. Sace na hoti, evampi kālaṃ viditvāva na pucchanti. Evaṃ pucchantāpi ca atthasaṃhitaṃ tathāgatā pucchanti, yaṃ atthanissitaṃ kāraṇanissitaṃ, tadeva pucchanti, no anatthasaṃhitaṃ. Kasmā? Yasmā anatthasaṃhite setughāto tathāgatānaṃ. Setu vuccati maggo, maggeneva tādisassa vacanassa ghāto samucchedoti vuttaṃ hoti.
இதா³னி அத்த²ஸங்ஹிதந்தி எத்த² யங் அத்த²னிஸ்ஸிதங் வசனங் ததா²க³தா புச்ச²ந்தி, தங் த³ஸ்ஸெந்தோ ‘‘த்³வீஹி ஆகாரேஹீ’’திஆதி³மாஹ. தத்த² ஆகாரேஹீதி காரணேஹி . த⁴ம்மங் வா தே³ஸெஸ்ஸாமாதி அட்டு²ப்பத்தியுத்தங் ஸுத்தங் வா புப்³ப³சரிதகாரணயுத்தங் ஜாதகங் வா கத²யிஸ்ஸாம. ஸாவகானங் வா ஸிக்கா²பத³ங் பஞ்ஞபெஸ்ஸாமாதி ஸாவகானங் வா தாய புச்சா²ய வீதிக்கமங் பாகடங் கத்வா க³ருகங் வா லஹுகங் வா ஸிக்கா²பத³ங் பஞ்ஞபெஸ்ஸாம ஆணங் ட²பெஸ்ஸாம. அதிலஹுந்தி அதிஸீக⁴ங்.
Idāni atthasaṃhitanti ettha yaṃ atthanissitaṃ vacanaṃ tathāgatā pucchanti, taṃ dassento ‘‘dvīhi ākārehī’’tiādimāha. Tattha ākārehīti kāraṇehi . Dhammaṃ vā desessāmāti aṭṭhuppattiyuttaṃ suttaṃ vā pubbacaritakāraṇayuttaṃ jātakaṃ vā kathayissāma. Sāvakānaṃ vā sikkhāpadaṃ paññapessāmāti sāvakānaṃ vā tāya pucchāya vītikkamaṃ pākaṭaṃ katvā garukaṃ vā lahukaṃ vā sikkhāpadaṃ paññapessāma āṇaṃ ṭhapessāma. Atilahunti atisīghaṃ.
76. அஞ்ஞதித்தி²யவத்து²ம்ஹி அஞ்ஞதித்தி²யபுப்³போ³தி புப்³பே³ அஞ்ஞதித்தி²யோ பூ⁴தோதி அஞ்ஞதித்தி²யபுப்³போ³. எத்த² (அ॰ நி॰ அட்ட²॰ 2.3.62) ச தித்த²ங் ஜானிதப்³ப³ங், தித்த²கரோ ஜானிதப்³போ³ , தித்தி²யா ஜானிதப்³பா³, தித்தி²யஸாவகா ஜானிதப்³பா³. தத்த² தித்த²ங் நாம த்³வாஸட்டி² தி³ட்டி²யோ. எத்த² ஹி ஸத்தா தரந்தி உப்பிலவந்தி உம்முஜ்ஜனிமுஜ்ஜங் கரொந்தி, தஸ்மா ‘‘தித்த²’’ந்தி வுச்சந்தி. தாஸங் தி³ட்டீ²னங் உப்பாதே³தா தித்த²கரோ நாம பூரணகஸ்ஸபாதி³கோ. தஸ்ஸ லத்³தி⁴ங் க³ஹெத்வா பப்³ப³ஜிதா தித்தி²யா நாம. தே ஹி தித்தே² ஜாதாதி தித்தி²யா, யதா²வுத்தங் வா தி³ட்டி²க³தஸங்கா²தங் தித்த²ங் ஏதேஸங் அத்தீ²தி தித்தி²கா, தித்தி²கா ஏவ தித்தி²யா. தேஸங் பச்சயதா³யகா தித்தி²யஸாவகாதி வேதி³தப்³பா³. ஸஹத⁴ம்மிகங் வுச்சமானோதி ஸஹத⁴ம்மிகேன வுச்சமானோ, கரணத்தே² உபயோக³வசனங். பஞ்சஹி ஸஹத⁴ம்மிகேஹி ஸிக்கி²தப்³ப³த்தா, தேஸங் வா ஸந்தகத்தா ‘‘ஸஹத⁴ம்மிக’’ந்தி லத்³த⁴னாமேன பு³த்³த⁴பஞ்ஞத்தேன ஸிக்கா²பதே³ன வுச்சமானோதி அத்தோ². பஸூரோதி தஸ்ஸ நாமங். பரிப்³பா³ஜகோதி கி³ஹிப³ந்த⁴னங் பஹாய பப்³ப³ஜ்ஜுபக³தோ.
76. Aññatitthiyavatthumhi aññatitthiyapubboti pubbe aññatitthiyo bhūtoti aññatitthiyapubbo. Ettha (a. ni. aṭṭha. 2.3.62) ca titthaṃ jānitabbaṃ, titthakaro jānitabbo , titthiyā jānitabbā, titthiyasāvakā jānitabbā. Tattha titthaṃ nāma dvāsaṭṭhi diṭṭhiyo. Ettha hi sattā taranti uppilavanti ummujjanimujjaṃ karonti, tasmā ‘‘tittha’’nti vuccanti. Tāsaṃ diṭṭhīnaṃ uppādetā titthakaro nāma pūraṇakassapādiko. Tassa laddhiṃ gahetvā pabbajitā titthiyā nāma. Te hi titthe jātāti titthiyā, yathāvuttaṃ vā diṭṭhigatasaṅkhātaṃ titthaṃ etesaṃ atthīti titthikā, titthikā eva titthiyā. Tesaṃ paccayadāyakā titthiyasāvakāti veditabbā. Sahadhammikaṃ vuccamānoti sahadhammikena vuccamāno, karaṇatthe upayogavacanaṃ. Pañcahi sahadhammikehi sikkhitabbattā, tesaṃ vā santakattā ‘‘sahadhammika’’nti laddhanāmena buddhapaññattena sikkhāpadena vuccamānoti attho. Pasūroti tassa nāmaṃ. Paribbājakoti gihibandhanaṃ pahāya pabbajjupagato.
தங்யேவ தித்தா²யதனந்தி எத்த² த்³வாஸட்டி²தி³ட்டி²ஸங்கா²தங் தித்த²மேவ ஆயதனந்தி தித்தா²யதனங், தித்த²ங் வா ஏதேஸங் அத்தீ²தி தித்தி²னோ, தித்தி²யா, தேஸங் ஆயதனந்திபி தித்தா²யதனங். ஆயதனந்தி ச ‘‘அஸ்ஸானங் கம்போ³ஜோ ஆயதனங், கு³ன்னங் த³க்கி²ணபதோ² ஆயதன’’ந்தி எத்த² ஸஞ்ஜாதிட்டா²னங் ஆயதனங் நாம.
Taṃyeva titthāyatananti ettha dvāsaṭṭhidiṭṭhisaṅkhātaṃ titthameva āyatananti titthāyatanaṃ, titthaṃ vā etesaṃ atthīti titthino, titthiyā, tesaṃ āyatanantipi titthāyatanaṃ. Āyatananti ca ‘‘assānaṃ kambojo āyatanaṃ, gunnaṃ dakkhiṇapatho āyatana’’nti ettha sañjātiṭṭhānaṃ āyatanaṃ nāma.
‘‘மனோரமே ஆயதனே, ஸேவந்தி நங் விஹங்க³மா;
‘‘Manorame āyatane, sevanti naṃ vihaṅgamā;
சா²யங் சா²யத்தி²னோ யந்தி, ப²லத்த²ங் ப²லபோ⁴ஜினோ’’தி. (அ॰ நி॰ 5.38) –
Chāyaṃ chāyatthino yanti, phalatthaṃ phalabhojino’’ti. (a. ni. 5.38) –
எத்த² ஸமோஸரணட்டா²னங். ‘‘பஞ்சிமானி, பி⁴க்க²வே, விமுத்தாயதனானீ’’தி (அ॰ நி॰ 5.26) எத்த² காரணங், தங் இத⁴ ஸப்³ப³ம்பி லப்³ப⁴தி. ஸப்³பே³பி ஹி தி³ட்டி²க³திகா ஸஞ்ஜாயமானா இமாஸுயேவ த்³வாஸட்டி²யா தி³ட்டீ²ஸு ஸஞ்ஜாயந்தி, ஸமோஸரமானாபி ஏதாஸுயேவ ஸமோஸரந்தி ஸன்னிபதந்தி, தி³ட்டி²க³திகபா⁴வே ச நேஸங் இமாயேவ த்³வாஸட்டி² தி³ட்டி²யோ காரணங், தஸ்மா யதா²வுத்தங் தித்த²மேவ ஸஞ்ஜாதிஆதி³னா அத்தே²ன ஆயதனந்தி தித்தா²யதனங், தேனேவத்தே²ன தித்தீ²னங் ஆயதனந்திபி தித்தா²யதனங்.
Ettha samosaraṇaṭṭhānaṃ. ‘‘Pañcimāni, bhikkhave, vimuttāyatanānī’’ti (a. ni. 5.26) ettha kāraṇaṃ, taṃ idha sabbampi labbhati. Sabbepi hi diṭṭhigatikā sañjāyamānā imāsuyeva dvāsaṭṭhiyā diṭṭhīsu sañjāyanti, samosaramānāpi etāsuyeva samosaranti sannipatanti, diṭṭhigatikabhāve ca nesaṃ imāyeva dvāsaṭṭhi diṭṭhiyo kāraṇaṃ, tasmā yathāvuttaṃ titthameva sañjātiādinā atthena āyatananti titthāyatanaṃ, tenevatthena titthīnaṃ āyatanantipi titthāyatanaṃ.
ஆயஸ்மதோ நிஸ்ஸாய வச்சா²மீதி எத்த² ஆயஸ்மதோதி உபயோக³த்தே² ஸாமிவசனங், ஆயஸ்மந்தங் நிஸ்ஸாய வஸிஸ்ஸாமீதி அத்தோ². ப்³யத்தோ…பே॰… வுத்தலக்க²ணோயேவாதி பரிஸுபட்டா²பகப³ஹுஸ்ஸுதங் ஸந்தா⁴ய வத³தி. பஞ்சஹுபாலி அங்கே³ஹீதிஆதீ³ஸு யங் வத்தப்³ப³ங், தங் பரதோ ஆவி ப⁴விஸ்ஸதி.
Āyasmato nissāya vacchāmīti ettha āyasmatoti upayogatthe sāmivacanaṃ, āyasmantaṃ nissāya vasissāmīti attho. Byatto…pe… vuttalakkhaṇoyevāti parisupaṭṭhāpakabahussutaṃ sandhāya vadati. Pañcahupāli aṅgehītiādīsu yaṃ vattabbaṃ, taṃ parato āvi bhavissati.
ஆசரியவத்தகதா²வண்ணனா நிட்டி²தா.
Ācariyavattakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 18. ஆசரியவத்தகதா² • 18. Ācariyavattakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஆசரியவத்தகதா² • Ācariyavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஆசரியவத்தகதா²வண்ணனா • Ācariyavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஆசரியவத்தகதா²வண்ணனா • Ācariyavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 18. ஆசரியவத்தகதா² • 18. Ācariyavattakathā
