Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi

    ၁၉. ဧကူနဝီသတိမဝဂ္ဂော

    19. Ekūnavīsatimavaggo

    (၁၉၂) ၇. အစ္စန္တနိယာမကထာ

    (192) 7. Accantaniyāmakathā

    ၈၄၇. အတ္ထိ ပုထုဇ္ဇနသ္သ အစ္စန္တနိယာမတာတိ? အာမန္တာ။ မာတုဃာတကော အစ္စန္တနိယတော, ပိတုဃာတကော။ပေ.။ အရဟန္တဃာတကော။ပေ.။ ရုဟိရုပ္ပာဒကော ။ပေ.။ သင္ဃဘေဒကော အစ္စန္တနိယတောတိ? န ဟေဝံ ဝတ္တဗ္ဗေ။ပေ.။။

    847. Atthi puthujjanassa accantaniyāmatāti? Āmantā. Mātughātako accantaniyato, pitughātako…pe… arahantaghātako…pe… ruhiruppādako …pe… saṅghabhedako accantaniyatoti? Na hevaṃ vattabbe…pe….

    ၈၄၈. အတ္ထိ ပုထုဇ္ဇနသ္သ အစ္စန္တနိယာမတာတိ? အာမန္တာ။ အစ္စန္တနိယတသ္သ ပုဂ္ဂလသ္သ ဝိစိကိစ္ဆာ ဥပ္ပဇ္ဇေယ္ယာတိ? အာမန္တာ။ ဟဉ္စိ အစ္စန္တနိယတသ္သ ပုဂ္ဂလသ္သ ဝိစိကိစ္ဆာ ဥပ္ပဇ္ဇေယ္ယ, နော စ ဝတ ရေ ဝတ္တဗ္ဗေ – ‘‘အတ္ထိ ပုထုဇ္ဇနသ္သ အစ္စန္တနိယာမတာ’’တိ။

    848. Atthi puthujjanassa accantaniyāmatāti? Āmantā. Accantaniyatassa puggalassa vicikicchā uppajjeyyāti? Āmantā. Hañci accantaniyatassa puggalassa vicikicchā uppajjeyya, no ca vata re vattabbe – ‘‘atthi puthujjanassa accantaniyāmatā’’ti.

    အစ္စန္တနိယတသ္သ ပုဂ္ဂလသ္သ ဝိစိကိစ္ဆာ နုပ္ပဇ္ဇေယ္ယာတိ? အာမန္တာ။ ပဟီနာတိ? န ဟေဝံ ဝတ္တဗ္ဗေ။ပေ.။ ပဟီနာတိ? အာမန္တာ။ သောတာပတ္တိမဂ္ဂေနာတိ? န ဟေဝံ ဝတ္တဗ္ဗေ။ပေ.။ သကဒာဂာမိမဂ္ဂေန ။ပေ.။ အနာဂာမိမဂ္ဂေန။ပေ.။ အရဟတ္တမဂ္ဂေနာတိ? န ဟေဝံ ဝတ္တဗ္ဗေ။ပေ.။။

    Accantaniyatassa puggalassa vicikicchā nuppajjeyyāti? Āmantā. Pahīnāti? Na hevaṃ vattabbe…pe… pahīnāti? Āmantā. Sotāpattimaggenāti? Na hevaṃ vattabbe…pe… sakadāgāmimaggena …pe… anāgāmimaggena…pe… arahattamaggenāti? Na hevaṃ vattabbe…pe….

    ကတမေန မဂ္ဂေနာတိ? အကုသလေန မဂ္ဂေနာတိ။ အကုသလော မဂ္ဂော နိယ္ယာနိကော ခယဂာမီ ဗောဓဂာမီ အနာသဝော။ပေ.။ အသံကိလေသိကောတိ? န ဟေဝံ ဝတ္တဗ္ဗေ။ပေ.။ နနု အကုသလော မဂ္ဂော အနိယ္ယာနိကော။ပေ.။ သံကိလေသိကောတိ? အာမန္တာ။ ဟဉ္စိ အကုသလော မဂ္ဂော အနိယ္ယာနိကော။ပေ.။ သံကိလေသိကော, နော စ ဝတ ရေ ဝတ္တဗ္ဗေ – ‘‘အစ္စန္တနိယတသ္သ ပုဂ္ဂလသ္သ ဝိစိကိစ္ဆာ အကုသလေန မဂ္ဂေန ပဟီနာ’’တိ။

    Katamena maggenāti? Akusalena maggenāti. Akusalo maggo niyyāniko khayagāmī bodhagāmī anāsavo…pe… asaṃkilesikoti? Na hevaṃ vattabbe…pe… nanu akusalo maggo aniyyāniko…pe… saṃkilesikoti? Āmantā. Hañci akusalo maggo aniyyāniko…pe… saṃkilesiko, no ca vata re vattabbe – ‘‘accantaniyatassa puggalassa vicikicchā akusalena maggena pahīnā’’ti.

    ၈၄၉. သသ္သတဒိဋ္ဌိယာ နိယတသ္သ ပုဂ္ဂလသ္သ ဥစ္ဆေဒဒိဋ္ဌိ ဥပ္ပဇ္ဇေယ္ယာတိ? အာမန္တာ။ ဟဉ္စိ သသ္သတဒိဋ္ဌိယာ နိယတသ္သ ပုဂ္ဂလသ္သ ဥစ္ဆေဒဒိဋ္ဌိ ဥပ္ပဇ္ဇေယ္ယ, နော စ ဝတ ရေ ဝတ္တဗ္ဗေ – ‘‘အတ္ထိ ပုထုဇ္ဇနသ္သ အစ္စန္တနိယာမတာ’’တိ။

    849. Sassatadiṭṭhiyā niyatassa puggalassa ucchedadiṭṭhi uppajjeyyāti? Āmantā. Hañci sassatadiṭṭhiyā niyatassa puggalassa ucchedadiṭṭhi uppajjeyya, no ca vata re vattabbe – ‘‘atthi puthujjanassa accantaniyāmatā’’ti.

    သသ္သတဒိဋ္ဌိယာ နိယတသ္သ ပုဂ္ဂလသ္သ ဥစ္ဆေဒဒိဋ္ဌိ နုပ္ပဇ္ဇေယ္ယာတိ ? အာမန္တာ။ ပဟီနာတိ? န ဟေဝံ ဝတ္တဗ္ဗေ။ပေ.။ ပဟီနာတိ? အာမန္တာ။ သောတာပတ္တိမဂ္ဂေနာတိ? န ဟေဝံ ဝတ္တဗ္ဗေ။ပေ.။ သကဒာဂာမိမဂ္ဂေန။ပေ.။ အနာဂာမိမဂ္ဂေန။ပေ.။ အရဟတ္တမဂ္ဂေနာတိ? န ဟေဝံ ဝတ္တဗ္ဗေ။ပေ.။။

    Sassatadiṭṭhiyā niyatassa puggalassa ucchedadiṭṭhi nuppajjeyyāti ? Āmantā. Pahīnāti? Na hevaṃ vattabbe…pe… pahīnāti? Āmantā. Sotāpattimaggenāti? Na hevaṃ vattabbe…pe… sakadāgāmimaggena…pe… anāgāmimaggena…pe… arahattamaggenāti? Na hevaṃ vattabbe…pe….

    ကတမေန မဂ္ဂေနာတိ? အကုသလေန မဂ္ဂေန။ အကုသလော မဂ္ဂော။ပေ.။ နော စ ဝတ ရေ ဝတ္တဗ္ဗေ – ‘‘သသ္သတဒိဋ္ဌိယာ နိယတသ္သ ပုဂ္ဂလသ္သ ဥစ္ဆေဒဒိဋ္ဌိ အကုသလေန မဂ္ဂေန ပဟီနာ’’တိ။

    Katamena maggenāti? Akusalena maggena. Akusalo maggo…pe… no ca vata re vattabbe – ‘‘sassatadiṭṭhiyā niyatassa puggalassa ucchedadiṭṭhi akusalena maggena pahīnā’’ti.

    ၈၅၀. ဥစ္ဆေဒဒိဋ္ဌိယာ နိယတသ္သ ပုဂ္ဂလသ္သ သသ္သတဒိဋ္ဌိ ဥပ္ပဇ္ဇေယ္ယာတိ? အာမန္တာ။ ဟဉ္စိ ဥစ္ဆေဒဒိဋ္ဌိယာ နိယတသ္သ ပုဂ္ဂလသ္သ သသ္သတဒိဋ္ဌိ ဥပ္ပဇ္ဇေယ္ယ, နော စ ဝတ ရေ ဝတ္တဗ္ဗေ – ‘‘အတ္ထိ ပုထုဇ္ဇနသ္သ အစ္စန္တနိယာမတာ’’တိ။

    850. Ucchedadiṭṭhiyā niyatassa puggalassa sassatadiṭṭhi uppajjeyyāti? Āmantā. Hañci ucchedadiṭṭhiyā niyatassa puggalassa sassatadiṭṭhi uppajjeyya, no ca vata re vattabbe – ‘‘atthi puthujjanassa accantaniyāmatā’’ti.

    ဥစ္ဆေဒဒိဋ္ဌိယာ နိယတသ္သ ပုဂ္ဂလသ္သ သသ္သတဒိဋ္ဌိ နုပ္ပဇ္ဇေယ္ယာတိ? အာမန္တာ။ ပဟီနာတိ? န ဟေဝံ ဝတ္တဗ္ဗေ။ပေ.။ ပဟီနာတိ? အာမန္တာ။ သောတာပတ္တိမဂ္ဂေနာတိ ? န ဟေဝံ ဝတ္တဗ္ဗေ ။ပေ.။ သကဒာဂာမိမဂ္ဂေန။ပေ.။ အနာဂာမိမဂ္ဂေန။ပေ.။ အရဟတ္တမဂ္ဂေနာတိ? န ဟေဝံ ဝတ္တဗ္ဗေ။ပေ.။။

    Ucchedadiṭṭhiyā niyatassa puggalassa sassatadiṭṭhi nuppajjeyyāti? Āmantā. Pahīnāti? Na hevaṃ vattabbe…pe… pahīnāti? Āmantā. Sotāpattimaggenāti ? Na hevaṃ vattabbe …pe… sakadāgāmimaggena…pe… anāgāmimaggena…pe… arahattamaggenāti? Na hevaṃ vattabbe…pe….

    ကတမေန မဂ္ဂေနာတိ? အကုသလေန မဂ္ဂေနာတိ။ အကုသလော မဂ္ဂော။ပေ.။ နော စ ဝတ ရေ ဝတ္တဗ္ဗေ – ‘‘ဥစ္ဆေဒဒိဋ္ဌိယာ နိယတသ္သ ပုဂ္ဂလသ္သ သသ္သတဒိဋ္ဌိ အကုသလေန မဂ္ဂေန ပဟီနာ’’တိ။

    Katamena maggenāti? Akusalena maggenāti. Akusalo maggo…pe… no ca vata re vattabbe – ‘‘ucchedadiṭṭhiyā niyatassa puggalassa sassatadiṭṭhi akusalena maggena pahīnā’’ti.

    ၈၅၁. န ဝတ္တဗ္ဗံ – ‘‘အတ္ထိ ပုထုဇ္ဇနသ္သ အစ္စန္တနိယာမတာ’’တိ? အာမန္တာ။ နနု ဝုတ္တံ ဘဂဝတာ – ‘‘ဣဓ, ဘိက္ခဝေ, ဧကစ္စော ပုဂ္ဂလော သမန္နာဂတော ဟောတိ ဧကန္တကာဠကေဟိ အကုသလေဟိ ဓမ္မေဟိ, သော 1 သကိံ နိမုဂ္ဂော နိမုဂ္ဂောဝ ဟောတီ’’တိ 2! အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ ပုထုဇ္ဇနသ္သ အစ္စန္တနိယာမတာတိ။

    851. Na vattabbaṃ – ‘‘atthi puthujjanassa accantaniyāmatā’’ti? Āmantā. Nanu vuttaṃ bhagavatā – ‘‘idha, bhikkhave, ekacco puggalo samannāgato hoti ekantakāḷakehi akusalehi dhammehi, so 3 sakiṃ nimuggo nimuggova hotī’’ti 4! Attheva suttantoti? Āmantā. Tena hi atthi puthujjanassa accantaniyāmatāti.

    ၈၅၂. ဝုတ္တံ ဘဂဝတာ – ‘‘ဣဓ, ဘိက္ခဝေ, ဧကစ္စော ပုဂ္ဂလော သမန္နာဂတော ဟောတိ ဧကန္တကာဠကေဟိ အကုသလေဟိ ဓမ္မေဟိ, သော သကိံ နိမုဂ္ဂော နိမုဂ္ဂောဝ ဟောတီ’’တိ ကတ္ဝာ တေန စ ကာရဏေန အတ္ထိ ပုထုဇ္ဇနသ္သ အစ္စန္တနိယာမတာတိ? အာမန္တာ။ ဝုတ္တံ ဘဂဝတာ – ‘‘ဣဓ, ဘိက္ခဝေ, ဧကစ္စော ပုဂ္ဂလော ဥမ္မုဇ္ဇိတ္ဝာ နိမုဇ္ဇတီ’’တိ 5! အတ္ထေဝ သုတ္တန္တောတိ? အာမန္တာ။ သဗ္ဗကာလံ ဥမ္မုဇ္ဇိတ္ဝာ နိမုဇ္ဇတီတိ? န ဟေဝံ ဝတ္တဗ္ဗေ။ပေ.။။

    852. Vuttaṃ bhagavatā – ‘‘idha, bhikkhave, ekacco puggalo samannāgato hoti ekantakāḷakehi akusalehi dhammehi, so sakiṃ nimuggo nimuggova hotī’’ti katvā tena ca kāraṇena atthi puthujjanassa accantaniyāmatāti? Āmantā. Vuttaṃ bhagavatā – ‘‘idha, bhikkhave, ekacco puggalo ummujjitvā nimujjatī’’ti 6! Attheva suttantoti? Āmantā. Sabbakālaṃ ummujjitvā nimujjatīti? Na hevaṃ vattabbe…pe….

    ဝုတ္တံ ဘဂဝတာ – ‘‘ဣဓ, ဘိက္ခဝေ, ဧကစ္စော ပုဂ္ဂလော သမန္နာဂတော ဟောတိ ဧကန္တကာဠကေဟိ အကုသလေဟိ ဓမ္မေဟိ, သော သကိံ နိမုဂ္ဂော နိမုဂ္ဂောဝ ဟောတီ’’တိ – ကတ္ဝာ တေန စ ကာရဏေန အတ္ထိ ပုထုဇ္ဇနသ္သ အစ္စန္တနိယာမတာတိ? အာမန္တာ။ ဝုတ္တံ ဘဂဝတာ – ‘‘ဣဓ, ဘိက္ခဝေ, ဧကစ္စော ပုဂ္ဂလော ဥမ္မုဇ္ဇိတ္ဝာ ဌိတော ဟောတိ, ဥမ္မုဇ္ဇိတ္ဝာ ဝိပသ္သတိ ဝိလောကေတိ, ဥမ္မုဇ္ဇိတ္ဝာ ပတရတိ, ဥမ္မုဇ္ဇိတ္ဝာ ပတိဂာဓပ္ပတ္တော ဟောတီ’’တိ 7! အတ္ထေဝ သုတ္တန္တောတိ? အာမန္တာ။ သဗ္ဗကာလံ ဥမ္မုဇ္ဇိတ္ဝာ ပတိဂာဓပ္ပတ္တော ဟောတီတိ? န ဟေဝံ ဝတ္တဗ္ဗေ။ပေ.။။

    Vuttaṃ bhagavatā – ‘‘idha, bhikkhave, ekacco puggalo samannāgato hoti ekantakāḷakehi akusalehi dhammehi, so sakiṃ nimuggo nimuggova hotī’’ti – katvā tena ca kāraṇena atthi puthujjanassa accantaniyāmatāti? Āmantā. Vuttaṃ bhagavatā – ‘‘idha, bhikkhave, ekacco puggalo ummujjitvā ṭhito hoti, ummujjitvā vipassati viloketi, ummujjitvā patarati, ummujjitvā patigādhappatto hotī’’ti 8! Attheva suttantoti? Āmantā. Sabbakālaṃ ummujjitvā patigādhappatto hotīti? Na hevaṃ vattabbe…pe….

    အစ္စန္တနိယာမကထာ နိဋ္ဌိတာ။

    Accantaniyāmakathā niṭṭhitā.




    Next: (၁၉၃) ၈. ဣန္ဒ္ရိယကထာ • (193) 8. Indriyakathā




    Footnotes:
    1. ဧဝံ ခော ဘိက္ခဝေ ပုဂ္ဂလော (အ. နိ. ၇.၁၅)
    2. အ. နိ. ၇.၁၅
    3. evaṃ kho bhikkhave puggalo (a. ni. 7.15)
    4. a. ni. 7.15
    5. အ. နိ. ၇.၁၅
    6. a. ni. 7.15
    7. အ. နိ. ၇.၁၅
    8. a. ni. 7.15



    Related texts:



    အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၇. အစ္စန္တနိယာမကထာဝဏ္ဏနာ • 7. Accantaniyāmakathāvaṇṇanā

    ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၇. အစ္စန္တနိယာမကထာဝဏ္ဏနာ • 7. Accantaniyāmakathāvaṇṇanā

    ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၇. အစ္စန္တနိယာမကထာဝဏ္ဏနာ • 7. Accantaniyāmakathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact