| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৭. অচ্চন্তনিযামকথাৰণ্ণনা
7. Accantaniyāmakathāvaṇṇanā
৮৪৭. ইদানি অচ্চন্তনিযামকথা নাম হোতি। তত্থ যেসং ‘‘সকিং নিমুগ্গো নিমুগ্গোৰ হোতী’’তি (অ॰ নি॰ ৭.১৫) সুত্তং নিস্সায ‘‘অত্থি পুথুজ্জনস্স অচ্চন্তনিযামতা’’তি লদ্ধি, সেয্যথাপি একচ্চানং উত্তরাপথকানং, তে সন্ধায পুচ্ছা সকৰাদিস্স, পটিঞ্ঞা ইতরস্স। মাতুঘাতকোতিআদি ‘‘নিযতমিচ্ছাদিট্ঠিকস্স চ মাতুঘাতকাদীনঞ্চ সমানে মিচ্ছত্তনিযামে মাতুঘাতকাদীহিপি তে অচ্চন্তনিযতেহি ভৰিতব্ব’’ন্তি চোদনত্থং ৰুত্তং। ইতরো ‘‘নিযতমিচ্ছাদিট্ঠিকো সংসারখাণুকো ভৰন্তরেপি নিযতোৰ ইমে পন একস্মিঞ্ঞেৰ অত্তভাৰে’’তি লদ্ধিযা ন হেৰন্তি পটিক্খিপতি ।
847. Idāni accantaniyāmakathā nāma hoti. Tattha yesaṃ ‘‘sakiṃ nimuggo nimuggova hotī’’ti (a. ni. 7.15) suttaṃ nissāya ‘‘atthi puthujjanassa accantaniyāmatā’’ti laddhi, seyyathāpi ekaccānaṃ uttarāpathakānaṃ, te sandhāya pucchā sakavādissa, paṭiññā itarassa. Mātughātakotiādi ‘‘niyatamicchādiṭṭhikassa ca mātughātakādīnañca samāne micchattaniyāme mātughātakādīhipi te accantaniyatehi bhavitabba’’nti codanatthaṃ vuttaṃ. Itaro ‘‘niyatamicchādiṭṭhiko saṃsārakhāṇuko bhavantarepi niyatova ime pana ekasmiññeva attabhāve’’ti laddhiyā na hevanti paṭikkhipati .
৮৪৮. ৰিচিকিচ্ছা উপ্পজ্জেয্যাতি ‘‘অযং নিযতো ৰা নো ৰা’’তি এৰং উপ্পজ্জেয্যাতি পুচ্ছতি। ইতরো অনুপ্পত্তিকারণং অপস্সন্তো পটিজানাতি। নুপ্পজ্জেয্যাতি পুট্ঠো পন যং দিট্ঠিং আসেৰন্তো নিযামং ওক্কন্তো, তত্থ অনুপ্পত্তিং সন্ধায পটিজানাতি। ততো পহীনাতি পুট্ঠো মগ্গেন অপ্পহীনত্তা পটিক্খিপতি, তং দিট্ঠিং আরব্ভ অসমুদাচারতো পটিজানাতি। অথ নং যস্মা পহানং নাম ৰিনা অরিযমগ্গেন নত্থি, তস্মা তস্স ৰসেন চোদেতুং সোতাপত্তিমগ্গেনাতিআদিমাহ। সো একমগ্গেনাপি অপ্পহীনত্তা পটিক্খিপতি। পুন কতমেনাতি পুট্ঠো মিচ্ছামগ্গং সন্ধায অকুসলেনাতিআদিমাহ।
848. Vicikicchā uppajjeyyāti ‘‘ayaṃ niyato vā no vā’’ti evaṃ uppajjeyyāti pucchati. Itaro anuppattikāraṇaṃ apassanto paṭijānāti. Nuppajjeyyāti puṭṭho pana yaṃ diṭṭhiṃ āsevanto niyāmaṃ okkanto, tattha anuppattiṃ sandhāya paṭijānāti. Tato pahīnāti puṭṭho maggena appahīnattā paṭikkhipati, taṃ diṭṭhiṃ ārabbha asamudācārato paṭijānāti. Atha naṃ yasmā pahānaṃ nāma vinā ariyamaggena natthi, tasmā tassa vasena codetuṃ sotāpattimaggenātiādimāha. So ekamaggenāpi appahīnattā paṭikkhipati. Puna katamenāti puṭṭho micchāmaggaṃ sandhāya akusalenātiādimāha.
৮৪৯. উচ্ছেদদিট্ঠি উপ্পজ্জেয্যাতি দুতিযনিযামুপ্পত্তিং পুচ্ছতি। ইতরো যস্মা ‘‘যেপি তে ওক্কলা ৰযভিঞ্ঞা নত্থিকৰাদা অকিরিযৰাদা অহেতুকৰাদা’’তি (ম॰ নি॰ ৩.১৪৩) ৰচনতো তিস্সোপি নিযতমিচ্ছাদিট্ঠিযো একস্স উপ্পজ্জন্তি, তস্মা পটিজানাতি।
849. Ucchedadiṭṭhi uppajjeyyāti dutiyaniyāmuppattiṃ pucchati. Itaro yasmā ‘‘yepi te okkalā vayabhiññā natthikavādā akiriyavādā ahetukavādā’’ti (ma. ni. 3.143) vacanato tissopi niyatamicchādiṭṭhiyo ekassa uppajjanti, tasmā paṭijānāti.
৮৫০. অথ নং ‘‘ন চ নাম সো অচ্চন্তনিযামো’’তি চোদেতুং হঞ্চীতিআদিমাহ। অচ্চন্তনিযতস্স হি দুতিযনিযামো নিরত্থকো। নুপ্পজ্জেয্যাতি পঞ্হে যং সস্সতদিট্ঠিযা সস্সতন্তি গহিতং, তদেৰ উচ্ছিজ্জিস্সতীতি গহেত্ৰা অনুপ্পত্তিং সন্ধায পটিজানাতি। পহীনাতি পুট্ঠো মগ্গেন অপ্পহীনত্তা পটিক্খিপতি, ৰুত্তনযেন অনুপ্পজ্জনতো পটিজানাতি। সস্সতদিট্ঠি উপ্পজ্জেয্যাতিআদীসুপি এসেৰ নযো। সেসং ৰিচিকিচ্ছাৰারে ৰুত্তনযমেৰ।
850. Atha naṃ ‘‘na ca nāma so accantaniyāmo’’ti codetuṃ hañcītiādimāha. Accantaniyatassa hi dutiyaniyāmo niratthako. Nuppajjeyyāti pañhe yaṃ sassatadiṭṭhiyā sassatanti gahitaṃ, tadeva ucchijjissatīti gahetvā anuppattiṃ sandhāya paṭijānāti. Pahīnāti puṭṭho maggena appahīnattā paṭikkhipati, vuttanayena anuppajjanato paṭijānāti. Sassatadiṭṭhi uppajjeyyātiādīsupi eseva nayo. Sesaṃ vicikicchāvāre vuttanayameva.
৮৫১-৮৫২. ন ৰত্তব্বন্তি পুচ্ছা পরৰাদিস্স, সুত্তস্স অত্থিতায পটিঞ্ঞা সকৰাদিস্স। ন পন সো ভৰন্তরেপি নিমুগ্গোৰ। ইমস্মিঞ্ঞেৰ হি ভৰে অভব্বো সো তং দিট্ঠিং পজহিতুন্তি অযমেত্থ অধিপ্পাযো, তস্মা অসাধকমেতন্তি। সব্বকালং উম্মুজ্জিত্ৰা নিমুজ্জতীতিআদি ৰচনমত্তে অভিনিৰেসং অকত্ৰা অত্থো পরিযেসিতব্বোতি দস্সনত্থং ৰুত্তন্তি।
851-852. Na vattabbanti pucchā paravādissa, suttassa atthitāya paṭiññā sakavādissa. Na pana so bhavantarepi nimuggova. Imasmiññeva hi bhave abhabbo so taṃ diṭṭhiṃ pajahitunti ayamettha adhippāyo, tasmā asādhakametanti. Sabbakālaṃ ummujjitvā nimujjatītiādi vacanamatte abhinivesaṃ akatvā attho pariyesitabboti dassanatthaṃ vuttanti.
অচ্চন্তনিযামকথাৰণ্ণনা।
Accantaniyāmakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১৯২) ৭. অচ্চন্তনিযামকথা • (192) 7. Accantaniyāmakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৭. অচ্চন্তনিযামকথাৰণ্ণনা • 7. Accantaniyāmakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৭. অচ্চন্তনিযামকথাৰণ্ণনা • 7. Accantaniyāmakathāvaṇṇanā
