| Library / Tipiṭaka / д̇ибидага • Tipiṭaka / бан̃жабагаран̣а-анудийгаа • Pañcapakaraṇa-anuṭīkā |
7. ажжанд̇анияаамагат̇ааван̣н̣анаа
7. Accantaniyāmakathāvaṇṇanā
847. яам̣ ‘‘згаваарам̣ нимуг̇г̇о д̇ат̇аа нимуг̇г̇ова ход̇и, зд̇асса буна бхавад̇о вудтаанам̣ наама над̇т̇ий’’д̇и адтагат̇ааяам̣ ааг̇ад̇ам̣, со бана аажарияаваад̣̇о, на адтагат̇аанаяод̇и д̣̇ассзнд̇о ‘‘д̇ааяа ж̇аад̇ияаа…бз… ман̃н̃амаано’’д̇и ааха. д̇ад̇т̇а д̇ааяа ж̇аад̇ияаад̇и яассам̣ ж̇аад̇ияам̣ буг̇г̇ало гаммааваран̣аад̣̇иааваран̣зхи саманнааг̇ад̇о ход̇и, д̇ааяа ж̇аад̇ияаа. сам̣сааракаан̣угабхааво вассабхан̃н̃аад̣̇ийнам̣ вияа магкалиаад̣̇ийнам̣ вияа жа д̣̇адтаб̣б̣о. со жа ахзд̇угаад̣̇имижчаад̣̇ассанасса палабхаавзнзва взд̣̇ид̇аб̣б̣о, на ажжанд̇анияаамасса наама гассажи ад̇т̇ибхаавад̇о. яат̇аа хи вимужжанд̇асса гожи нияаамо наама над̇т̇и табзд̇ваа маг̇г̇зна бхавабарижчзд̣̇ам̣, звам̣ авимужжанд̇ассаби гожи сам̣сааранияаамо наама над̇т̇и. д̇аад̣̇исасса бана мижчаад̣̇ассанасса б̣алавабхаавз абаримид̇агаббабарижчзд̣̇з жирад̇арам̣ сам̣саараббаб̣анд̇хо ход̇и, абааяуубабад̇д̇и жа яад̇т̇а сам̣сааракаан̣усаман̃н̃аа.
847. Yaṃ ‘‘ekavāraṃ nimuggo tathā nimuggova hoti, etassa puna bhavato vuṭṭhānaṃ nāma natthī’’ti aṭṭhakathāyaṃ āgataṃ, so pana ācariyavādo, na aṭṭhakathānayoti dassento ‘‘tāya jātiyā…pe… maññamāno’’ti āha. Tattha tāya jātiyāti yassaṃ jātiyaṃ puggalo kammāvaraṇādiāvaraṇehi samannāgato hoti, tāya jātiyā. Saṃsārakhāṇukabhāvo vassabhaññādīnaṃ viya makkhaliādīnaṃ viya ca daṭṭhabbo. So ca ahetukādimicchādassanassa phalabhāveneva veditabbo, na accantaniyāmassa nāma kassaci atthibhāvato. Yathā hi vimuccantassa koci niyāmo nāma natthi ṭhapetvā maggena bhavaparicchedaṃ, evaṃ avimuccantassapi koci saṃsāraniyāmo nāma natthi. Tādisassa pana micchādassanassa balavabhāve aparimitakappaparicchede cirataraṃ saṃsārappabandho hoti, apāyūpapatti ca yattha saṃsārakhāṇusamaññā.
яам̣ банзгз вад̣̇анд̇и ‘‘ад̇т̇зва ажжанд̇ам̣ сам̣сарид̇аа ананд̇ад̇д̇аа сад̇д̇анигааяассаа’’д̇и, д̇амби абун̃н̃аб̣ахулам̣ сад̇д̇асанд̇аанам̣ санд̇хааяа вуд̇д̇ам̣ сияаа. на хи маад̇угхаад̇агаад̣̇ийнам̣ д̇знад̇д̇абхаавзна саммад̇д̇анияаамоггамананд̇арааяабхууд̇о мижчад̇д̇анияаамо вияа сад̇д̇аанам̣ вимуд̇д̇анд̇арааяагаро сам̣сааранияаамо наама над̇т̇и. яаава бана на маг̇г̇апаласса убаниссаяо убалаб̣бхад̇и, д̇аава сам̣сааро абарижчинно. яад̣̇аа жа со убалад̣̇д̇хо, д̇ад̣̇аа со барижчинно зваад̇и д̣̇адтаб̣б̣ам̣.
Yaṃ paneke vadanti ‘‘attheva accantaṃ saṃsaritā anantattā sattanikāyassā’’ti, tampi apuññabahulaṃ sattasantānaṃ sandhāya vuttaṃ siyā. Na hi mātughātakādīnaṃ tenattabhāvena sammattaniyāmokkamanantarāyabhūto micchattaniyāmo viya sattānaṃ vimuttantarāyakaro saṃsāraniyāmo nāma natthi. Yāva pana na maggaphalassa upanissayo upalabbhati, tāva saṃsāro aparicchinno. Yadā ca so upaladdho, tadā so paricchinno evāti daṭṭhabbaṃ.
яат̇аа нияад̇асаммаад̣̇ассанам̣, звам̣ нияад̇амижчаад̣̇ассанзнаби сависаяз згам̣саг̇аахавасзна уггам̣саг̇ад̇зна бхавид̇аб̣б̣анд̇и д̇зна саманнааг̇ад̇асса буг̇г̇аласса сад̇и ажжанд̇анияаамз гат̇ам̣ д̇асмим̣ абхинивзсависаяз анзгам̣саг̇аахо уббаж̇ж̇зяяа, абхинивзсанд̇арам̣ ваа вируд̣̇д̇хам̣ яад̣̇и уббаж̇ж̇зяяа, ажжанд̇анияаамо зва на сияаад̇и баал̣ияам̣ вижигижчуббад̇д̇инияааманд̇аруббад̇д̇ижод̣̇анаа гад̇аа. на хи вижигижчаа вияа саммад̇д̇анияад̇абуг̇г̇алаанам̣ яат̇ааггамам̣ мижчад̇д̇асаммад̇д̇анияад̇абуг̇г̇алаанам̣ саммад̇д̇амижчад̇д̇анияад̇аа д̇хаммаа гад̣̇аажиби уббаж̇ж̇анд̇и, авируд̣̇д̇хам̣ бана нияааманд̇арамзва ход̇ийд̇и аананд̇ариганд̇арам̣ вияа мижчаад̣̇ассананд̇арам̣ самаанаж̇аад̇игам̣ на нивад̇д̇зд̇ийд̇и вируд̣̇д̇хам̣язва д̣̇ассзд̇ум̣ баал̣ияам̣ вижигижчаа вияа сассад̇ужчзд̣̇ад̣̇идтияо зва уд̣̇д̇хадаа. звамзд̇т̇а вижигижчуббад̇д̇инияааманд̇аруббад̇д̇ийнам̣ нияааманд̇аруббад̇д̇инивад̇д̇агабхааво взд̣̇ид̇аб̣б̣о, ажжанд̇анияаамо жа нивад̇д̇иссад̇ийд̇и жа вируд̣̇д̇хамзд̇анд̇и бана ‘‘вижаарзд̇ваава г̇ахзд̇аб̣б̣аа’’д̇и вуд̇д̇ам̣ сияаа.
Yathā niyatasammādassanaṃ, evaṃ niyatamicchādassanenapi savisaye ekaṃsagāhavasena ukkaṃsagatena bhavitabbanti tena samannāgatassa puggalassa sati accantaniyāme kathaṃ tasmiṃ abhinivesavisaye anekaṃsagāho uppajjeyya, abhinivesantaraṃ vā viruddhaṃ yadi uppajjeyya, accantaniyāmo eva na siyāti pāḷiyaṃ vicikicchuppattiniyāmantaruppatticodanā katā. Na hi vicikicchā viya sammattaniyatapuggalānaṃ yathākkamaṃ micchattasammattaniyatapuggalānaṃ sammattamicchattaniyatā dhammā kadācipi uppajjanti, aviruddhaṃ pana niyāmantarameva hotīti ānantarikantaraṃ viya micchādassanantaraṃ samānajātikaṃ na nivattetīti viruddhaṃyeva dassetuṃ pāḷiyaṃ vicikicchā viya sassatucchedadiṭṭhiyo eva uddhaṭā. Evamettha vicikicchuppattiniyāmantaruppattīnaṃ niyāmantaruppattinivattakabhāvo veditabbo, accantaniyāmo ca nivattissatīti ca viruddhametanti pana ‘‘vicāretvāva gahetabbā’’ti vuttaṃ siyā.
ажжанд̇анияаамагат̇ааван̣н̣анаа нидтид̇аа.
Accantaniyāmakathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / гат̇аавад̇т̇убаал̣и • Kathāvatthupāḷi / (192) 7. ажжанд̇анияаамагат̇аа • (192) 7. Accantaniyāmakathā
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 7. ажжанд̇анияаамагат̇ааван̣н̣анаа • 7. Accantaniyāmakathāvaṇṇanā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 7. ажжанд̇анияаамагат̇ааван̣н̣анаа • 7. Accantaniyāmakathāvaṇṇanā
