| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. அச்சயஸுத்தங்
4. Accayasuttaṃ
270. ஸாவத்தி²யங்…பே॰… ஆராமே. தேன கோ² பன ஸமயேன த்³வே பி⁴க்கூ² ஸம்பயோஜேஸுங். தத்ரேகோ பி⁴க்கு² அச்சஸரா. அத² கோ² ஸோ பி⁴க்கு² தஸ்ஸ பி⁴க்கு²னோ ஸந்திகே அச்சயங் அச்சயதோ தே³ஸேதி; ஸோ பி⁴க்கு² நப்படிக்³க³ண்ஹாதி. அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘இத⁴, ப⁴ந்தே, த்³வே பி⁴க்கூ² ஸம்பயோஜேஸுங், தத்ரேகோ பி⁴க்கு² அச்சஸரா . அத² கோ² ஸோ, ப⁴ந்தே, பி⁴க்கு² தஸ்ஸ பி⁴க்கு²னோ ஸந்திகே அச்சயங் அச்சயதோ தே³ஸேதி, ஸோ பி⁴க்கு² நப்படிக்³க³ண்ஹாதீ’’தி.
270. Sāvatthiyaṃ…pe… ārāme. Tena kho pana samayena dve bhikkhū sampayojesuṃ. Tatreko bhikkhu accasarā. Atha kho so bhikkhu tassa bhikkhuno santike accayaṃ accayato deseti; so bhikkhu nappaṭiggaṇhāti. Atha kho sambahulā bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha, bhante, dve bhikkhū sampayojesuṃ, tatreko bhikkhu accasarā . Atha kho so, bhante, bhikkhu tassa bhikkhuno santike accayaṃ accayato deseti, so bhikkhu nappaṭiggaṇhātī’’ti.
‘‘த்³வேமே, பி⁴க்க²வே, பா³லா. யோ ச அச்சயங் அச்சயதோ ந பஸ்ஸதி, யோ ச அச்சயங் தே³ஸெந்தஸ்ஸ யதா²த⁴ம்மங் நப்படிக்³க³ண்ஹா’’தி – இமே கோ², பி⁴க்க²வே, த்³வே பா³லா. ‘‘த்³வேமே, பி⁴க்க²வே, பண்டி³தா. யோ ச அச்சயங் அச்சயதோ பஸ்ஸதி, யோ ச அச்சயங் தே³ஸெந்தஸ்ஸ யதா²த⁴ம்மங் படிக்³க³ண்ஹா’’தி – இமே கோ², பி⁴க்க²வே, த்³வே பண்டி³தா.
‘‘Dveme, bhikkhave, bālā. Yo ca accayaṃ accayato na passati, yo ca accayaṃ desentassa yathādhammaṃ nappaṭiggaṇhā’’ti – ime kho, bhikkhave, dve bālā. ‘‘Dveme, bhikkhave, paṇḍitā. Yo ca accayaṃ accayato passati, yo ca accayaṃ desentassa yathādhammaṃ paṭiggaṇhā’’ti – ime kho, bhikkhave, dve paṇḍitā.
‘‘பூ⁴தபுப்³ப³ங் , பி⁴க்க²வே, ஸக்கோ தே³வானமிந்தோ³ ஸுத⁴ம்மாயங் ஸபா⁴யங் தே³வே தாவதிங்ஸே அனுனயமானோ தாயங் வேலாயங் இமங் கா³த²ங் அபா⁴ஸி –
‘‘Bhūtapubbaṃ , bhikkhave, sakko devānamindo sudhammāyaṃ sabhāyaṃ deve tāvatiṃse anunayamāno tāyaṃ velāyaṃ imaṃ gāthaṃ abhāsi –
‘‘கோதோ⁴ வோ வஸமாயாது, மா ச மித்தேஹி வோ ஜரா;
‘‘Kodho vo vasamāyātu, mā ca mittehi vo jarā;
அக³ரஹியங் மா க³ரஹித்த², மா ச பா⁴ஸித்த² பேஸுணங்;
Agarahiyaṃ mā garahittha, mā ca bhāsittha pesuṇaṃ;
அத² பாபஜனங் கோதோ⁴, பப்³ப³தோவாபி⁴மத்³த³தீ’’தி.
Atha pāpajanaṃ kodho, pabbatovābhimaddatī’’ti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. அச்சயஸுத்தவண்ணனா • 4. Accayasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. அச்சயஸுத்தவண்ணனா • 4. Accayasuttavaṇṇanā
