| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. অচ্চযসুত্তং
4. Accayasuttaṃ
২৭০. সাৰত্থিযং…পে॰… আরামে। তেন খো পন সমযেন দ্ৰে ভিক্খূ সম্পযোজেসুং। তত্রেকো ভিক্খু অচ্চসরা। অথ খো সো ভিক্খু তস্স ভিক্খুনো সন্তিকে অচ্চযং অচ্চযতো দেসেতি; সো ভিক্খু নপ্পটিগ্গণ্হাতি। অথ খো সম্বহুলা ভিক্খূ যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে ভিক্খূ ভগৰন্তং এতদৰোচুং – ‘‘ইধ, ভন্তে, দ্ৰে ভিক্খূ সম্পযোজেসুং, তত্রেকো ভিক্খু অচ্চসরা । অথ খো সো, ভন্তে, ভিক্খু তস্স ভিক্খুনো সন্তিকে অচ্চযং অচ্চযতো দেসেতি, সো ভিক্খু নপ্পটিগ্গণ্হাতী’’তি।
270. Sāvatthiyaṃ…pe… ārāme. Tena kho pana samayena dve bhikkhū sampayojesuṃ. Tatreko bhikkhu accasarā. Atha kho so bhikkhu tassa bhikkhuno santike accayaṃ accayato deseti; so bhikkhu nappaṭiggaṇhāti. Atha kho sambahulā bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha, bhante, dve bhikkhū sampayojesuṃ, tatreko bhikkhu accasarā . Atha kho so, bhante, bhikkhu tassa bhikkhuno santike accayaṃ accayato deseti, so bhikkhu nappaṭiggaṇhātī’’ti.
‘‘দ্ৰেমে, ভিক্খৰে, বালা। যো চ অচ্চযং অচ্চযতো ন পস্সতি, যো চ অচ্চযং দেসেন্তস্স যথাধম্মং নপ্পটিগ্গণ্হা’’তি – ইমে খো, ভিক্খৰে, দ্ৰে বালা। ‘‘দ্ৰেমে, ভিক্খৰে, পণ্ডিতা। যো চ অচ্চযং অচ্চযতো পস্সতি, যো চ অচ্চযং দেসেন্তস্স যথাধম্মং পটিগ্গণ্হা’’তি – ইমে খো, ভিক্খৰে, দ্ৰে পণ্ডিতা।
‘‘Dveme, bhikkhave, bālā. Yo ca accayaṃ accayato na passati, yo ca accayaṃ desentassa yathādhammaṃ nappaṭiggaṇhā’’ti – ime kho, bhikkhave, dve bālā. ‘‘Dveme, bhikkhave, paṇḍitā. Yo ca accayaṃ accayato passati, yo ca accayaṃ desentassa yathādhammaṃ paṭiggaṇhā’’ti – ime kho, bhikkhave, dve paṇḍitā.
‘‘ভূতপুব্বং , ভিক্খৰে, সক্কো দেৰানমিন্দো সুধম্মাযং সভাযং দেৰে তাৰতিংসে অনুনযমানো তাযং ৰেলাযং ইমং গাথং অভাসি –
‘‘Bhūtapubbaṃ , bhikkhave, sakko devānamindo sudhammāyaṃ sabhāyaṃ deve tāvatiṃse anunayamāno tāyaṃ velāyaṃ imaṃ gāthaṃ abhāsi –
‘‘কোধো ৰো ৰসমাযাতু, মা চ মিত্তেহি ৰো জরা।
‘‘Kodho vo vasamāyātu, mā ca mittehi vo jarā;
অগরহিযং মা গরহিত্থ, মা চ ভাসিত্থ পেসুণং।
Agarahiyaṃ mā garahittha, mā ca bhāsittha pesuṇaṃ;
অথ পাপজনং কোধো, পব্বতোৰাভিমদ্দতী’’তি॥
Atha pāpajanaṃ kodho, pabbatovābhimaddatī’’ti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. অচ্চযসুত্তৰণ্ণনা • 4. Accayasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. অচ্চযসুত্তৰণ্ণনা • 4. Accayasuttavaṇṇanā
