| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya |
(੧੦) ੫. ਲੋਣਕਪਲ੍ਲવਗ੍ਗੋ
(10) 5. Loṇakapallavaggo
੧. ਅਚ੍ਚਾਯਿਕਸੁਤ੍ਤਂ
1. Accāyikasuttaṃ
੯੩. ‘‘ਤੀਣਿਮਾਨਿ , ਭਿਕ੍ਖવੇ, ਕਸ੍ਸਕਸ੍ਸ ਗਹਪਤਿਸ੍ਸ ਅਚ੍ਚਾਯਿਕਾਨਿ ਕਰਣੀਯਾਨਿ। ਕਤਮਾਨਿ ਤੀਣਿ? ਇਧ, ਭਿਕ੍ਖવੇ, ਕਸ੍ਸਕੋ ਗਹਪਤਿ ਸੀਘਂ ਸੀਘਂ ਖੇਤ੍ਤਂ ਸੁਕਟ੍ਠਂ ਕਰੋਤਿ ਸੁਮਤਿਕਤਂ। ਸੀਘਂ ਸੀਘਂ ਖੇਤ੍ਤਂ ਸੁਕਟ੍ਠਂ ਕਰਿਤ੍વਾ ਸੁਮਤਿਕਤਂ ਸੀਘਂ ਸੀਘਂ ਬੀਜਾਨਿ ਪਤਿਟ੍ਠਾਪੇਤਿ। ਸੀਘਂ ਸੀਘਂ ਬੀਜਾਨਿ ਪਤਿਟ੍ਠਾਪੇਤ੍વਾ ਸੀਘਂ ਸੀਘਂ ਉਦਕਂ ਅਭਿਨੇਤਿਪਿ ਅਪਨੇਤਿਪਿ। ਇਮਾਨਿ ਖੋ, ਭਿਕ੍ਖવੇ, ਤੀਣਿ ਕਸ੍ਸਕਸ੍ਸ ਗਹਪਤਿਸ੍ਸ ਅਚ੍ਚਾਯਿਕਾਨਿ ਕਰਣੀਯਾਨਿ। ਤਸ੍ਸ ਖੋ ਤਂ, ਭਿਕ੍ਖવੇ, ਕਸ੍ਸਕਸ੍ਸ ਗਹਪਤਿਸ੍ਸ ਨਤ੍ਥਿ ਸਾ ਇਦ੍ਧਿ વਾ ਆਨੁਭਾવੋ વਾ – ‘ਅਜ੍ਜੇવ ਮੇ ਧਞ੍ਞਾਨਿ ਜਾਯਨ੍ਤੁ, ਸ੍વੇવ ਗਬ੍ਭੀਨਿ ਹੋਨ੍ਤੁ, ਉਤ੍ਤਰਸ੍વੇવ ਪਚ੍ਚਨ੍ਤੂ’ਤਿ। ਅਥ ਖੋ, ਭਿਕ੍ਖવੇ, ਹੋਤਿ ਸੋ ਸਮਯੋ ਯਂ ਤਸ੍ਸ ਕਸ੍ਸਕਸ੍ਸ ਗਹਪਤਿਸ੍ਸ ਤਾਨਿ ਧਞ੍ਞਾਨਿ ਉਤੁਪਰਿਣਾਮੀਨਿ ਜਾਯਨ੍ਤਿਪਿ ਗਬ੍ਭੀਨਿਪਿ ਹੋਨ੍ਤਿ ਪਚ੍ਚਨ੍ਤਿਪਿ।
93. ‘‘Tīṇimāni , bhikkhave, kassakassa gahapatissa accāyikāni karaṇīyāni. Katamāni tīṇi? Idha, bhikkhave, kassako gahapati sīghaṃ sīghaṃ khettaṃ sukaṭṭhaṃ karoti sumatikataṃ. Sīghaṃ sīghaṃ khettaṃ sukaṭṭhaṃ karitvā sumatikataṃ sīghaṃ sīghaṃ bījāni patiṭṭhāpeti. Sīghaṃ sīghaṃ bījāni patiṭṭhāpetvā sīghaṃ sīghaṃ udakaṃ abhinetipi apanetipi. Imāni kho, bhikkhave, tīṇi kassakassa gahapatissa accāyikāni karaṇīyāni. Tassa kho taṃ, bhikkhave, kassakassa gahapatissa natthi sā iddhi vā ānubhāvo vā – ‘ajjeva me dhaññāni jāyantu, sveva gabbhīni hontu, uttarasveva paccantū’ti. Atha kho, bhikkhave, hoti so samayo yaṃ tassa kassakassa gahapatissa tāni dhaññāni utupariṇāmīni jāyantipi gabbhīnipi honti paccantipi.
‘‘ਏવਮੇવਂ ਖੋ, ਭਿਕ੍ਖવੇ, ਤੀਣਿਮਾਨਿ ਭਿਕ੍ਖੁਸ੍ਸ ਅਚ੍ਚਾਯਿਕਾਨਿ ਕਰਣੀਯਾਨਿ। ਕਤਮਾਨਿ ਤੀਣਿ? ਅਧਿਸੀਲਸਿਕ੍ਖਾਸਮਾਦਾਨਂ, ਅਧਿਚਿਤ੍ਤਸਿਕ੍ਖਾਸਮਾਦਾਨਂ, ਅਧਿਪਞ੍ਞਾਸਿਕ੍ਖਾਸਮਾਦਾਨਂ – ਇਮਾਨਿ ਖੋ, ਭਿਕ੍ਖવੇ, ਤੀਣਿ ਭਿਕ੍ਖੁਸ੍ਸ ਅਚ੍ਚਾਯਿਕਾਨਿ ਕਰਣੀਯਾਨਿ। ਤਸ੍ਸ ਖੋ ਤਂ, ਭਿਕ੍ਖવੇ, ਭਿਕ੍ਖੁਨੋ ਨਤ੍ਥਿ ਸਾ ਇਦ੍ਧਿ વਾ ਅਨੁਭਾવੋ વਾ – ‘ਅਜ੍ਜੇવ ਮੇ ਅਨੁਪਾਦਾਯ ਆਸવੇਹਿ ਚਿਤ੍ਤਂ વਿਮੁਚ੍ਚਤੁ ਸ੍વੇ વਾ ਉਤ੍ਤਰਸ੍વੇ વਾ’ਤਿ। ਅਥ ਖੋ, ਭਿਕ੍ਖવੇ, ਹੋਤਿ ਸੋ ਸਮਯੋ ਯਂ ਤਸ੍ਸ ਭਿਕ੍ਖੁਨੋ ਅਧਿਸੀਲਮ੍ਪਿ ਸਿਕ੍ਖਤੋ ਅਧਿਚਿਤ੍ਤਮ੍ਪਿ ਸਿਕ੍ਖਤੋ ਅਧਿਪਞ੍ਞਮ੍ਪਿ ਸਿਕ੍ਖਤੋ ਅਨੁਪਾਦਾਯ ਆਸવੇਹਿ ਚਿਤ੍ਤਂ વਿਮੁਚ੍ਚਤਿ।
‘‘Evamevaṃ kho, bhikkhave, tīṇimāni bhikkhussa accāyikāni karaṇīyāni. Katamāni tīṇi? Adhisīlasikkhāsamādānaṃ, adhicittasikkhāsamādānaṃ, adhipaññāsikkhāsamādānaṃ – imāni kho, bhikkhave, tīṇi bhikkhussa accāyikāni karaṇīyāni. Tassa kho taṃ, bhikkhave, bhikkhuno natthi sā iddhi vā anubhāvo vā – ‘ajjeva me anupādāya āsavehi cittaṃ vimuccatu sve vā uttarasve vā’ti. Atha kho, bhikkhave, hoti so samayo yaṃ tassa bhikkhuno adhisīlampi sikkhato adhicittampi sikkhato adhipaññampi sikkhato anupādāya āsavehi cittaṃ vimuccati.
‘‘ਤਸ੍ਮਾਤਿਹ, ਭਿਕ੍ਖવੇ, ਏવਂ ਸਿਕ੍ਖਿਤਬ੍ਬਂ – ‘ਤਿਬ੍ਬੋ ਨੋ ਛਨ੍ਦੋ ਭવਿਸ੍ਸਤਿ ਅਧਿਸੀਲਸਿਕ੍ਖਾਸਮਾਦਾਨੇ, ਤਿਬ੍ਬੋ ਛਨ੍ਦੋ ਭવਿਸ੍ਸਤਿ ਅਧਿਚਿਤ੍ਤਸਿਕ੍ਖਾਸਮਾਦਾਨੇ , ਤਿਬ੍ਬੋ ਛਨ੍ਦੋ ਭવਿਸ੍ਸਤਿ ਅਧਿਪਞ੍ਞਾਸਿਕ੍ਖਾਸਮਾਦਾਨੇ’ਤਿ। ਏવਞ੍ਹਿ વੋ, ਭਿਕ੍ਖવੇ, ਸਿਕ੍ਖਿਤਬ੍ਬ’’ਨ੍ਤਿ। ਪਠਮਂ।
‘‘Tasmātiha, bhikkhave, evaṃ sikkhitabbaṃ – ‘tibbo no chando bhavissati adhisīlasikkhāsamādāne, tibbo chando bhavissati adhicittasikkhāsamādāne , tibbo chando bhavissati adhipaññāsikkhāsamādāne’ti. Evañhi vo, bhikkhave, sikkhitabba’’nti. Paṭhamaṃ.
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੧. ਅਚ੍ਚਾਯਿਕਸੁਤ੍ਤવਣ੍ਣਨਾ • 1. Accāyikasuttavaṇṇanā
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੧. ਅਚ੍ਚਾਯਿਕਸੁਤ੍ਤવਣ੍ਣਨਾ • 1. Accāyikasuttavaṇṇanā
