| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
(๑๐) ๕. โลณกปลฺลวโคฺค
(10) 5. Loṇakapallavaggo
๑. อจฺจายิกสุตฺตวณฺณนา
1. Accāyikasuttavaṇṇanā
๙๓. ปญฺจมสฺส ปฐเม อจฺจายิกานีติ อติปาติกานิฯ กรณียานีติ อวสฺสกิจฺจานิฯ ยญฺหิ น อวสฺสํ กาตพฺพํ, ตํ กิจฺจนฺติ วุจฺจติฯ อวสฺสํ กาตพฺพํ กรณียํ นามฯ สีฆํ สีฆนฺติ เวเคน เวเคนฯ ตสฺส โข ตนฺติ เอตฺถ ตนฺติ นิปาตมตฺตํฯ นตฺถิ สา อิทฺธิ วา อานุภาโว วาติ สา วา อิทฺธิ โส วา อานุภาโว นตฺถิฯ อุตฺตรเสฺวติ ตติยทิวเสฯ อุตุปริณามินีติ ลทฺธอุตุปริณามานิ หุตฺวาฯ ชายนฺติปีติ ตติยทิวเส นิกฺขนฺตเสตงฺกุรานิ โหนฺติ, สตฺตาเห ปเตฺต นีลงฺกุรานิ โหนฺติฯ คพฺภีนิปิ โหนฺตีติ ทิยฑฺฒมาสํ ปตฺวา คหิตคพฺภานิ โหนฺติฯ ปจฺจนฺติปีติ ตโย มาเส ปตฺวา ปจฺจนฺติฯ อิทานิ ยสฺมา พุทฺธานํ คหปติเกน วา สเสฺสหิ วา อโตฺถ นตฺถิ, สาสเน ปน ตปฺปฎิรูปกํ ปุคฺคลํ วา อตฺถํ วา ทเสฺสตุํ ตํ ตํ โอปมฺมํ อาหรนฺติฯ ตสฺมา ยมตฺถํ ทเสฺสตุกาเมน เอตํ อาภตํ, ตํ ทเสฺสโนฺต เอวเมว โขติอาทิมาหฯ ตํ อตฺถโต อุตฺตานเมวฯ สิกฺขา ปน อิธาปิ มิสฺสิกา เอว กถิตาฯ
93. Pañcamassa paṭhame accāyikānīti atipātikāni. Karaṇīyānīti avassakiccāni. Yañhi na avassaṃ kātabbaṃ, taṃ kiccanti vuccati. Avassaṃ kātabbaṃ karaṇīyaṃ nāma. Sīghaṃ sīghanti vegena vegena. Tassa kho tanti ettha tanti nipātamattaṃ. Natthi sā iddhi vā ānubhāvo vāti sā vā iddhi so vā ānubhāvo natthi. Uttarasveti tatiyadivase. Utupariṇāminīti laddhautupariṇāmāni hutvā. Jāyantipīti tatiyadivase nikkhantasetaṅkurāni honti, sattāhe patte nīlaṅkurāni honti. Gabbhīnipi hontīti diyaḍḍhamāsaṃ patvā gahitagabbhāni honti. Paccantipīti tayo māse patvā paccanti. Idāni yasmā buddhānaṃ gahapatikena vā sassehi vā attho natthi, sāsane pana tappaṭirūpakaṃ puggalaṃ vā atthaṃ vā dassetuṃ taṃ taṃ opammaṃ āharanti. Tasmā yamatthaṃ dassetukāmena etaṃ ābhataṃ, taṃ dassento evameva khotiādimāha. Taṃ atthato uttānameva. Sikkhā pana idhāpi missikā eva kathitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๑. อจฺจายิกสุตฺตํ • 1. Accāyikasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑. อจฺจายิกสุตฺตวณฺณนา • 1. Accāyikasuttavaṇṇanā
