| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
(១០) ៥. លោណកបល្លវគ្គោ
(10) 5. Loṇakapallavaggo
១. អច្ចាយិកសុត្តវណ្ណនា
1. Accāyikasuttavaṇṇanā
៩៣. បញ្ចមស្ស បឋមេ អច្ចាយិកានីតិ អតិបាតិកានិ។ ករណីយានីតិ អវស្សកិច្ចានិ។ យញ្ហិ ន អវស្សំ កាតព្ពំ, តំ កិច្ចន្តិ វុច្ចតិ។ អវស្សំ កាតព្ពំ ករណីយំ នាម។ សីឃំ សីឃន្តិ វេគេន វេគេន។ តស្ស ខោ តន្តិ ឯត្ថ តន្តិ និបាតមត្តំ។ នត្ថិ សា ឥទ្ធិ វា អានុភាវោ វាតិ សា វា ឥទ្ធិ សោ វា អានុភាវោ នត្ថិ។ ឧត្តរស្វេតិ តតិយទិវសេ។ ឧតុបរិណាមិនីតិ លទ្ធឧតុបរិណាមានិ ហុត្វា។ ជាយន្តិបីតិ តតិយទិវសេ និក្ខន្តសេតង្កុរានិ ហោន្តិ, សត្តាហេ បត្តេ នីលង្កុរានិ ហោន្តិ។ គព្ភីនិបិ ហោន្តីតិ ទិយឌ្ឍមាសំ បត្វា គហិតគព្ភានិ ហោន្តិ។ បច្ចន្តិបីតិ តយោ មាសេ បត្វា បច្ចន្តិ។ ឥទានិ យស្មា ពុទ្ធានំ គហបតិកេន វា សស្សេហិ វា អត្ថោ នត្ថិ, សាសនេ បន តប្បដិរូបកំ បុគ្គលំ វា អត្ថំ វា ទស្សេតុំ តំ តំ ឱបម្មំ អាហរន្តិ។ តស្មា យមត្ថំ ទស្សេតុកាមេន ឯតំ អាភតំ, តំ ទស្សេន្តោ ឯវមេវ ខោតិអាទិមាហ។ តំ អត្ថតោ ឧត្តានមេវ។ សិក្ខា បន ឥធាបិ មិស្សិកា ឯវ កថិតា។
93. Pañcamassa paṭhame accāyikānīti atipātikāni. Karaṇīyānīti avassakiccāni. Yañhi na avassaṃ kātabbaṃ, taṃ kiccanti vuccati. Avassaṃ kātabbaṃ karaṇīyaṃ nāma. Sīghaṃ sīghanti vegena vegena. Tassa kho tanti ettha tanti nipātamattaṃ. Natthi sā iddhi vā ānubhāvo vāti sā vā iddhi so vā ānubhāvo natthi. Uttarasveti tatiyadivase. Utupariṇāminīti laddhautupariṇāmāni hutvā. Jāyantipīti tatiyadivase nikkhantasetaṅkurāni honti, sattāhe patte nīlaṅkurāni honti. Gabbhīnipi hontīti diyaḍḍhamāsaṃ patvā gahitagabbhāni honti. Paccantipīti tayo māse patvā paccanti. Idāni yasmā buddhānaṃ gahapatikena vā sassehi vā attho natthi, sāsane pana tappaṭirūpakaṃ puggalaṃ vā atthaṃ vā dassetuṃ taṃ taṃ opammaṃ āharanti. Tasmā yamatthaṃ dassetukāmena etaṃ ābhataṃ, taṃ dassento evameva khotiādimāha. Taṃ atthato uttānameva. Sikkhā pana idhāpi missikā eva kathitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១. អច្ចាយិកសុត្តំ • 1. Accāyikasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១. អច្ចាយិកសុត្តវណ្ណនា • 1. Accāyikasuttavaṇṇanā
