| Library / Tipiṭaka / තිපිටක • Tipiṭaka / මහාවිභඞ්‌ග • Mahāvibhaṅga |
8. අච්‌චෙකචීවරසික්‌ඛාපදං
8. Accekacīvarasikkhāpadaṃ
646. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන අඤ්‌ඤතරො මහාමත්‌තො පවාසං ගච්‌ඡන්‌තො භික්‌ඛූනං සන්‌තිකෙ දූතං පාහෙසි – ‘‘ආගච්‌ඡන්‌තු භදන්‌තා වස්‌සාවාසිකං දස්‌සාමී’’ති. භික්‌ඛූ – ‘වස්‌සංවුට්‌ඨානං භගවතා වස්‌සාවාසිකං අනුඤ්‌ඤාත’න්‌ති, කුක්‌කුච්‌චායන්‌තා නාගමංසු. අථ ඛො සො මහාමත්‌තො උජ්‌ඣායති ඛිය්‍යති විපාචෙති – ‘‘කථඤ්‌හි නාම භදන්‌තා මයා දූතෙ පහිතෙ නාගච්‌ඡිස්‌සන්‌ති! අහඤ්‌හි සෙනාය ගච්‌ඡාමි. දුජ්‌ජානං ජීවිතං දුජ්‌ජානං මරණ’’න්‌ති. අස්‌සොසුං ඛො භික්‌ඛූ තස්‌ස මහාමත්‌තස්‌ස උජ්‌ඣායන්‌තස්‌ස ඛිය්‍යන්‌තස්‌ස විපාචෙන්‌තස්‌ස. අථ ඛො තෙ භික්‌ඛූ භගවතො එතමත්‌ථං ආරොචෙසුං. අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘අනුජානාමි, භික්‌ඛවෙ, අච්‌චෙකචීවරං පටිග්‌ගහෙත්‌වා නික්‌ඛිපිතු’’න්‌ති.
646. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro mahāmatto pavāsaṃ gacchanto bhikkhūnaṃ santike dūtaṃ pāhesi – ‘‘āgacchantu bhadantā vassāvāsikaṃ dassāmī’’ti. Bhikkhū – ‘vassaṃvuṭṭhānaṃ bhagavatā vassāvāsikaṃ anuññāta’nti, kukkuccāyantā nāgamaṃsu. Atha kho so mahāmatto ujjhāyati khiyyati vipāceti – ‘‘kathañhi nāma bhadantā mayā dūte pahite nāgacchissanti! Ahañhi senāya gacchāmi. Dujjānaṃ jīvitaṃ dujjānaṃ maraṇa’’nti. Assosuṃ kho bhikkhū tassa mahāmattassa ujjhāyantassa khiyyantassa vipācentassa. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, accekacīvaraṃ paṭiggahetvā nikkhipitu’’nti.
647. තෙන ඛො පන සමයෙන භික්‌ඛූ – ‘‘භගවතා අනුඤ්‌ඤාතං අච්‌චෙකචීවරං පටිග්‌ගහෙත්‌වා නික්‌ඛිපිතු’’න්‌ති , අච්‌චෙකචීවරානි පටිග්‌ගහෙත්‌වා චීවරකාලසමයං අතික්‌කාමෙන්‌ති. තානි චීවරානි චීවරවංසෙ භණ්‌ඩිකාබද්‌ධානි තිට්‌ඨන්‌ති. අද්‌දස ඛො ආයස්‌මා ආනන්‌දො සෙනාසනචාරිකං ආහිණ්‌ඩන්‌තො තානි චීවරානි චීවරවංසෙ භණ්‌ඩිකාබද්‌ධානි. තිට්‌ඨන්‌තෙ දිස්‌වා භික්‌ඛූ එතදවොච – ‘‘කස්‌සිමානි, ආවුසො, චීවරානි චීවරවංසෙ භණ්‌ඩිකාබද්‌ධානි තිට්‌ඨන්‌තී’’ති? ‘‘අම්‌හාකං, ආවුසො, අච්‌චෙකචීවරානී’’ති. ‘‘කීවචිරං පනාවුසො, ඉමානි චීවරානි නික්‌ඛිත්‌තානී’’ති? අථ ඛො තෙ භික්‌ඛූ ආයස්‌මතො ආනන්‌දස්‌ස යථානික්‌ඛිත්‌තං ආරොචෙසුං. ආයස්‌මා ආනන්‌දො උජ්‌ඣායති ඛිය්‍යති විපාචෙති – ‘‘කථඤ්‌හි නාම භික්‌ඛූ අච්‌චෙකචීවරං පටිග්‌ගහෙත්‌වා චීවරකාලසමයං අතික්‌කාමෙස්‌සන්‌තී’’ති! අථ ඛො ආයස්‌මා ආනන්‌දො තෙ භික්‌ඛූ අනෙකපරියායෙන විගරහිත්‌වා භගවතො එතමත්‌ථං ආරොචෙසි…පෙ.… – ‘‘සච්‌චං කිර, භික්‌ඛවෙ, භික්‌ඛූ අච්‌චෙකචීවරං පටිග්‌ගහෙත්‌වා චීවරකාලසමයං අතික්‌කාමෙන්‌තී’’ති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම තෙ, භික්‌ඛවෙ, මොඝපුරිසා අච්‌චෙකචීවරං පටිග්‌ගහෙත්‌වා චීවරකාලසමයං අතික්‌කාමෙස්‌සන්‌ති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
647. Tena kho pana samayena bhikkhū – ‘‘bhagavatā anuññātaṃ accekacīvaraṃ paṭiggahetvā nikkhipitu’’nti , accekacīvarāni paṭiggahetvā cīvarakālasamayaṃ atikkāmenti. Tāni cīvarāni cīvaravaṃse bhaṇḍikābaddhāni tiṭṭhanti. Addasa kho āyasmā ānando senāsanacārikaṃ āhiṇḍanto tāni cīvarāni cīvaravaṃse bhaṇḍikābaddhāni. Tiṭṭhante disvā bhikkhū etadavoca – ‘‘kassimāni, āvuso, cīvarāni cīvaravaṃse bhaṇḍikābaddhāni tiṭṭhantī’’ti? ‘‘Amhākaṃ, āvuso, accekacīvarānī’’ti. ‘‘Kīvaciraṃ panāvuso, imāni cīvarāni nikkhittānī’’ti? Atha kho te bhikkhū āyasmato ānandassa yathānikkhittaṃ ārocesuṃ. Āyasmā ānando ujjhāyati khiyyati vipāceti – ‘‘kathañhi nāma bhikkhū accekacīvaraṃ paṭiggahetvā cīvarakālasamayaṃ atikkāmessantī’’ti! Atha kho āyasmā ānando te bhikkhū anekapariyāyena vigarahitvā bhagavato etamatthaṃ ārocesi…pe… – ‘‘saccaṃ kira, bhikkhave, bhikkhū accekacīvaraṃ paṭiggahetvā cīvarakālasamayaṃ atikkāmentī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā accekacīvaraṃ paṭiggahetvā cīvarakālasamayaṃ atikkāmessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
648. ‘‘දසාහානාගතං කත්‌තිකතෙමාසිකපුණ්‌ණමං භික්‌ඛුනො පනෙව අච්‌චෙකචීවරං උප්‌පජ්‌ජෙය්‍ය, අච්‌චෙකං මඤ්‌ඤමානෙන භික්‌ඛුනා පටිග්‌ගහෙතබ්‌බං, පටිග්‌ගහෙත්‌වා යාව චීවරකාලසමයං නික්‌ඛිපිතබ්‌බං. තතො චෙ උත්‌තරි නික්‌ඛිපෙය්‍ය, නිස්‌සග්‌ගියං පාචිත්‌තිය’’න්‌ති.
648.‘‘Dasāhānāgataṃ kattikatemāsikapuṇṇamaṃ bhikkhuno paneva accekacīvaraṃ uppajjeyya, accekaṃ maññamānena bhikkhunā paṭiggahetabbaṃ, paṭiggahetvā yāva cīvarakālasamayaṃ nikkhipitabbaṃ. Tato ce uttari nikkhipeyya, nissaggiyaṃ pācittiya’’nti.
649. දසාහානාගතන්‌ති දසාහානාගතාය පවාරණාය.
649.Dasāhānāgatanti dasāhānāgatāya pavāraṇāya.
කත්‌තිකතෙමාසිකපුණ්‌ණමන්‌ති පවාරණා කත්‌තිකා වුච්‌චති.
Kattikatemāsikapuṇṇamanti pavāraṇā kattikā vuccati.
අච්‌චෙකචීවරං නාම සෙනාය වා ගන්‌තුකාමො හොති, පවාසං වා ගන්‌තුකාමො හොති, ගිලානො වා හොති, ගබ්‌භිනී වා හොති, අස්‌සද්‌ධස්‌ස වා සද්‌ධා උප්‌පන්‌නා හොති, අප්‌පසන්‌නස්‌ස වා පසාදො උප්‌පන්‌නො හොති, සො චෙ භික්‌ඛූනං සන්‌තිකෙ දූතං පහිණෙය්‍ය – ‘‘ආගච්‌ඡන්‌තු භදන්‌තා වස්‌සාවාසිකං දස්‌සාමී’’ති, එතං අච්‌චෙකචීවරං නාම.
Accekacīvaraṃ nāma senāya vā gantukāmo hoti, pavāsaṃ vā gantukāmo hoti, gilāno vā hoti, gabbhinī vā hoti, assaddhassa vā saddhā uppannā hoti, appasannassa vā pasādo uppanno hoti, so ce bhikkhūnaṃ santike dūtaṃ pahiṇeyya – ‘‘āgacchantu bhadantā vassāvāsikaṃ dassāmī’’ti, etaṃ accekacīvaraṃ nāma.
අච්‌චෙකං මඤ්‌ඤමානෙන භික්‌ඛුනා පටිග්‌ගහෙතබ්‌බං පටිග්‌ගහෙත්‌වා යාව චීවරකාලසමයං නික්‌ඛිපිතබ්‌බන්‌ති සඤ්‌ඤාණං කත්‌වා නික්‌ඛිපිතබ්‌බං – ‘‘ඉදං අච්‌චෙකචීවර’’න්‌ති.
Accekaṃ maññamānena bhikkhunā paṭiggahetabbaṃ paṭiggahetvā yāva cīvarakālasamayaṃ nikkhipitabbanti saññāṇaṃ katvā nikkhipitabbaṃ – ‘‘idaṃ accekacīvara’’nti.
චීවරකාලසමයො නාම අනත්‌ථතෙ කථිනෙ වස්‌සානස්‌ස පච්‌ඡිමො මාසො, අත්‌ථතෙ කථිනෙ පඤ්‌චමාසා.
Cīvarakālasamayo nāma anatthate kathine vassānassa pacchimo māso, atthate kathine pañcamāsā.
තතො චෙ උත්‌තරි නික්‌ඛිපෙය්‍යාති අනත්‌ථතෙ කථිනෙ වස්‌සානස්‌ස පච්‌ඡිමං දිවසං අතික්‌කාමෙති, නිස්‌සග්‌ගියං පාචිත්‌තියං 1. අත්‌ථතෙ කථිනෙ කථිනුද්‌ධාරදිවසං අතික්‌කාමෙති, නිස්‌සග්‌ගියං හොති. නිස්‌සජ්‌ජිතබ්‌බං සඞ්‌ඝස්‌ස වා ගණස්‌ස වා පුග්‌ගලස්‌ස වා. එවඤ්‌ච පන, භික්‌ඛවෙ, නිස්‌සජ්‌ජිතබ්‌බං…පෙ.… ඉදං මෙ, භන්‌තෙ, අච්‌චෙකචීවරං චීවරකාලසමයං අතික්‌කාමිතං නිස්‌සග්‌ගියං. ඉමාහං සඞ්‌ඝස්‌ස නිස්‌සජ්‌ජාමීති…පෙ.… දදෙය්‍යාති…පෙ.… දදෙය්‍යුන්‌ති…පෙ.… ආයස්‌මතො දම්‌මීති.
Tatoce uttari nikkhipeyyāti anatthate kathine vassānassa pacchimaṃ divasaṃ atikkāmeti, nissaggiyaṃ pācittiyaṃ 2. Atthate kathine kathinuddhāradivasaṃ atikkāmeti, nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, accekacīvaraṃ cīvarakālasamayaṃ atikkāmitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
650. අච්‌චෙකචීවරෙ අච්‌චෙකචීවරසඤ්‌ඤී චීවරකාලසමයං අතික්‌කාමෙති, නිස්‌සග්‌ගියං පාචිත්‌තියං. අච්‌චෙකචීවරෙ වෙමතිකො චීවරකාලසමයං අතික්‌කාමෙති, නිස්‌සග්‌ගියං පාචිත්‌තියං. අච්‌චෙකචීවරෙ අනච්‌චෙකචීවරසඤ්‌ඤී චීවරකාලසමයං අතික්‌කාමෙති, නිස්‌සග්‌ගියං පාචිත්‌තියං. අනධිට්‌ඨිතෙ අධිට්‌ඨිතසඤ්‌ඤී …පෙ.… අවිකප්‌පිතෙ විකප්‌පිතසඤ්‌ඤී… අවිස්‌සජ්‌ජිතෙ විස්‌සජ්‌ජිතසඤ්‌ඤී… අනට්‌ඨෙ නට්‌ඨසඤ්‌ඤී… අවිනට්‌ඨෙ විනට්‌ඨසඤ්‌ඤී… අදඩ්‌ඪෙ දඩ්‌ඪසඤ්‌ඤී… අවිලුත්‌තෙ විලුත්‌තසඤ්‌ඤී චීවරකාලසමයං අතික්‌කාමෙති, නිස්‌සග්‌ගියං පාචිත්‌තියං.
650. Accekacīvare accekacīvarasaññī cīvarakālasamayaṃ atikkāmeti, nissaggiyaṃ pācittiyaṃ. Accekacīvare vematiko cīvarakālasamayaṃ atikkāmeti, nissaggiyaṃ pācittiyaṃ. Accekacīvare anaccekacīvarasaññī cīvarakālasamayaṃ atikkāmeti, nissaggiyaṃ pācittiyaṃ. Anadhiṭṭhite adhiṭṭhitasaññī …pe… avikappite vikappitasaññī… avissajjite vissajjitasaññī… anaṭṭhe naṭṭhasaññī… avinaṭṭhe vinaṭṭhasaññī… adaḍḍhe daḍḍhasaññī… avilutte viluttasaññī cīvarakālasamayaṃ atikkāmeti, nissaggiyaṃ pācittiyaṃ.
නිස්‌සග්‌ගියං චීවරං අනිස්‌සජ්‌ජිත්‌වා පරිභුඤ්‌ජති, ආපත්‌ති දුක්‌කටස්‌ස. අනච්‌චෙකචීවරෙ අච්‌චෙකචීවරසඤ්‌ඤී, ආපත්‌ති දුක්‌කටස්‌ස. අනච්‌චෙකචීවරෙ වෙමතිකො, ආපත්‌ති දුක්‌කටස්‌ස. අනච්‌චෙකචීවරෙ අනච්‌චෙකචීවරසඤ්‌ඤී, අනාපත්‌ති.
Nissaggiyaṃ cīvaraṃ anissajjitvā paribhuñjati, āpatti dukkaṭassa. Anaccekacīvare accekacīvarasaññī, āpatti dukkaṭassa. Anaccekacīvare vematiko, āpatti dukkaṭassa. Anaccekacīvare anaccekacīvarasaññī, anāpatti.
651. අනාපත්‌ති – අන්‌තොසමයෙ අධිට්‌ඨෙති, විකප්‌පෙති, විස්‌සජ්‌ජෙති, නස්‌සති, විනස්‌සති, ඩය්‌හති, අච්‌ඡින්‌දිත්‌වා ගණ්‌හන්‌ති, විස්‌සාසං ගණ්‌හන්‌ති, උම්‌මත්‌තකස්‌ස, ආදිකම්‌මිකස්‌සාති.
651. Anāpatti – antosamaye adhiṭṭheti, vikappeti, vissajjeti, nassati, vinassati, ḍayhati, acchinditvā gaṇhanti, vissāsaṃ gaṇhanti, ummattakassa, ādikammikassāti.
අච්‌චෙකචීවරසික්‌ඛාපදං නිට්‌ඨිතං අට්‌ඨමං.
Accekacīvarasikkhāpadaṃ niṭṭhitaṃ aṭṭhamaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 8. අච්‌චෙකචීවරසික්‌ඛාපදවණ්‌ණනා • 8. Accekacīvarasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 8. අච්‌චෙකචීවරසික්‌ඛාපදවණ්‌ණනා • 8. Accekacīvarasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 8. අච්‌චෙකචීවරසික්‌ඛාපදවණ්‌ණනා • 8. Accekacīvarasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 8. අච්‌චෙකචීවරසික්‌ඛාපදවණ්‌ණනා • 8. Accekacīvarasikkhāpadavaṇṇanā
