| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
8. அச்சேகசீவரஸிக்கா²பத³வண்ணனா
8. Accekacīvarasikkhāpadavaṇṇanā
பட²மபத³ஸ்ஸாதி ‘‘த³ஸாஹானாக³த’’ந்தி பத³ஸ்ஸ. புரிமனயேனேவாதி அச்சந்தஸங்யோக³வஸேனேவ. தானி தி³வஸானீதி தேஸு தி³வஸேஸு. அச்சந்தமேவாதி நிரந்தரமேவ, தேஸு த³ஸாஹேஸு யத்த² கத்த²சி தி³வஸேதி வுத்தங் ஹோதி. பவாரணாமாஸஸ்ஸாதி புப்³ப³கத்திகமாஸஸ்ஸ. ஸோ ஹி இத⁴ பட²மபவாரணாயோக³தோ ‘‘பவாரணாமாஸோ’’தி வுத்தோ. ஜுண்ஹபக்க²பஞ்சமிதோ பட்டா²யாதி ஸுக்கபக்க²பஞ்சமிங் ஆதி³ங் கத்வா. பவாரணாமாஸஸ்ஸ ஜுண்ஹபக்க²பஞ்சமிதோதி வா பவாரணாமாஸஸ்ஸ பகாஸனதோ புரிமஸ்ஸ ஜுண்ஹபக்க²ஸ்ஸ பஞ்சமிதோ பட்டா²யாதி அத்தோ². யோ பனெத்த² ‘‘காமஞ்சேஸ (ஸாரத்த²॰ டீ॰ 2.650) ‘த³ஸாஹபரமங் அதிரேகசீவரங் தா⁴ரேதப்³ப³’ந்தி (பாரா॰ 463) இமினாவ ஸித்³தோ⁴, அட்டு²ப்பத்திவஸேன பன அபுப்³ப³ங் விய அத்த²ங் த³ஸ்ஸெத்வா ஸிக்கா²பத³ங் ட²பித’’ந்தி பாடோ² தி³ஸ்ஸதி, ஸோ பமாத³பாடோ² ‘‘த³ஸாஹானாக³த’’ந்தி இமினா விரோத⁴தோதி த³ட்ட²ப்³ப³ங். கிஞ்ச ‘‘ஜுண்ஹபக்க²பஞ்சமிதோ பட்டா²யா’’தி வுத்தத்தா அட்ட²கதா²யேவ புப்³பா³பரவிரோதோ⁴பி ஸியா.
Paṭhamapadassāti ‘‘dasāhānāgata’’nti padassa. Purimanayenevāti accantasaṃyogavaseneva. Tāni divasānīti tesu divasesu. Accantamevāti nirantarameva, tesu dasāhesu yattha katthaci divaseti vuttaṃ hoti. Pavāraṇāmāsassāti pubbakattikamāsassa. So hi idha paṭhamapavāraṇāyogato ‘‘pavāraṇāmāso’’ti vutto. Juṇhapakkhapañcamito paṭṭhāyāti sukkapakkhapañcamiṃ ādiṃ katvā. Pavāraṇāmāsassa juṇhapakkhapañcamitoti vā pavāraṇāmāsassa pakāsanato purimassa juṇhapakkhassa pañcamito paṭṭhāyāti attho. Yo panettha ‘‘kāmañcesa (sārattha. ṭī. 2.650) ‘dasāhaparamaṃ atirekacīvaraṃ dhāretabba’nti (pārā. 463) imināva siddho, aṭṭhuppattivasena pana apubbaṃ viya atthaṃ dassetvā sikkhāpadaṃ ṭhapita’’nti pāṭho dissati, so pamādapāṭho ‘‘dasāhānāgata’’nti iminā virodhatoti daṭṭhabbaṃ. Kiñca ‘‘juṇhapakkhapañcamito paṭṭhāyā’’ti vuttattā aṭṭhakathāyeva pubbāparavirodhopi siyā.
அச்சேகசீவரந்தி அச்சாயிகசீவரங் வுச்சதி, ஸோ ச அச்சாயிகபா⁴வோ தா³யகஸ்ஸ க³மிகாதி³பா⁴வேனாதி த³ஸ்ஸேதுங் ‘‘க³மிககி³லானக³ப்³பி⁴னிஅபி⁴னவுப்பன்னஸத்³தா⁴னங் புக்³க³லான’’ந்திஆதி³ வுத்தங். தத்த² க³மிகோ நாம ‘‘ஸேனாய வா க³ந்துகாமோ ஹோதி, பவாஸங் வா க³ந்துகாமோ ஹோதீ’’தி (பாரா॰ 649) வுத்தோ. அஞ்ஞதரேன ‘‘வஸ்ஸாவாஸிகங் த³ஸ்ஸாமீ’’தி ஏவங் ஆரோசெத்வா தி³ன்னந்தி க³மிகாதீ³னங் அஞ்ஞதரேன க³மனாதீ³ஹி காரணேஹி தா³துகாமேன தூ³தங் வா பேஸெத்வா, ஸயங் வா ஆக³ந்த்வா ‘‘வஸ்ஸாவாஸிகங் த³ஸ்ஸாமீ’’தி ஏவங் ஆரோசெத்வா தி³ன்னங் சீவரங். எத்த² ச ‘‘இத³ங் மே, ப⁴ந்தே, அச்சேகசீவரங் சீவரகாலஸமயங் அதிக்காமிதங் நிஸ்ஸக்³கி³ய’’ந்தி (பாரா॰ 649) இமினா நயேன நிஸ்ஸஜ்ஜனவிதா⁴னங் வேதி³தப்³ப³ங்.
Accekacīvaranti accāyikacīvaraṃ vuccati, so ca accāyikabhāvo dāyakassa gamikādibhāvenāti dassetuṃ ‘‘gamikagilānagabbhiniabhinavuppannasaddhānaṃ puggalāna’’ntiādi vuttaṃ. Tattha gamiko nāma ‘‘senāya vā gantukāmo hoti, pavāsaṃ vā gantukāmo hotī’’ti (pārā. 649) vutto. Aññatarena ‘‘vassāvāsikaṃ dassāmī’’ti evaṃ ārocetvā dinnanti gamikādīnaṃ aññatarena gamanādīhi kāraṇehi dātukāmena dūtaṃ vā pesetvā, sayaṃ vā āgantvā ‘‘vassāvāsikaṃ dassāmī’’ti evaṃ ārocetvā dinnaṃ cīvaraṃ. Ettha ca ‘‘idaṃ me, bhante, accekacīvaraṃ cīvarakālasamayaṃ atikkāmitaṃ nissaggiya’’nti (pārā. 649) iminā nayena nissajjanavidhānaṃ veditabbaṃ.
ஸேஸந்தி ‘‘ஸாதா⁴ரணபஞ்ஞத்தீ’’திஆதி³கங். அயங் பன விஸேஸோ – தத்த² அதிரேகசீவரே அதிரேகசீவரஸஞ்ஞிஆதி³னோ த³ஸாஹாதிக்கமோ, இத⁴ அச்சேகசீவரே அச்சேகசீவரஸஞ்ஞிஆதி³னோ சீவரகாலாதிக்கமோ. ததா² அனச்சேகசீவரே அச்சேகசீவரஸஞ்ஞினோ, வேமதிகஸ்ஸ ச து³க்கடங். ஜாதிப்பமாணஸம்பன்னஸ்ஸ அச்சேகசீவரஸ்ஸ அத்தனோ ஸந்தகதா, த³ஸாஹானாக³தாய கத்திகதேமாஸிகபுண்ணமாய உப்பன்னபா⁴வோ, அனதி⁴ட்டி²தஅவிகப்பிததா, சீவரகாலாதிக்கமோதி சதுரங்க³பா⁴வோவ எத்த² விஸேஸோ.
Sesanti ‘‘sādhāraṇapaññattī’’tiādikaṃ. Ayaṃ pana viseso – tattha atirekacīvare atirekacīvarasaññiādino dasāhātikkamo, idha accekacīvare accekacīvarasaññiādino cīvarakālātikkamo. Tathā anaccekacīvare accekacīvarasaññino, vematikassa ca dukkaṭaṃ. Jātippamāṇasampannassa accekacīvarassa attano santakatā, dasāhānāgatāya kattikatemāsikapuṇṇamāya uppannabhāvo, anadhiṭṭhitaavikappitatā, cīvarakālātikkamoti caturaṅgabhāvova ettha viseso.
அச்சேகசீவரஸிக்கா²பத³வண்ணனா நிட்டி²தா.
Accekacīvarasikkhāpadavaṇṇanā niṭṭhitā.
