| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৮. অচ্চেকচীৰরসিক্খাপদৰণ্ণনা
8. Accekacīvarasikkhāpadavaṇṇanā
৬৪৬-৯. তেন সমযেনাতি অচ্চেকচীৰরসিক্খাপদং। তত্থ দসাহানাগতন্তি দস অহানি দসাহং, তেন দসাহেন অনাগতা দসাহানাগতা, দসাহেন অসম্পত্তাতি অত্থো, তং দসাহানাগতং, অচ্চন্তসংযোগৰসেন ভুম্মত্থে উপযোগৰচনং, তেনেৰস্স পদভাজনে ‘‘দসাহানাগতাযা’’তি ৰুত্তং। পৰারণাযাতি ইদং পন যা সা দসাহানাগতাতি ৰুত্তা, তং সরূপতো দস্সেতুং অসম্মোহত্থং অনুপযোগৰচনং।
646-9.Tena samayenāti accekacīvarasikkhāpadaṃ. Tattha dasāhānāgatanti dasa ahāni dasāhaṃ, tena dasāhena anāgatā dasāhānāgatā, dasāhena asampattāti attho, taṃ dasāhānāgataṃ, accantasaṃyogavasena bhummatthe upayogavacanaṃ, tenevassa padabhājane ‘‘dasāhānāgatāyā’’ti vuttaṃ. Pavāraṇāyāti idaṃ pana yā sā dasāhānāgatāti vuttā, taṃ sarūpato dassetuṃ asammohatthaṃ anupayogavacanaṃ.
কত্তিকতেমাসিকপুণ্ণমন্তি পঠমকত্তিকতেমাসিকপুণ্ণমং। ইধাপি পঠমপদস্স অনুপযোগত্তা পুরিমনযেনেৰ ভুম্মত্থে উপযোগৰচনং। ইদং ৰুত্তং হোতি – ‘‘‘যতো পট্ঠায পঠমমহাপৰারণা দসাহানাগতা’তি ৰুচ্চতি, সচেপি তানি দিৰসানি অচ্চন্তমেৰ ভিক্খুনো অচ্চেকচীৰরং উপ্পজ্জেয্য, ‘অচ্চেকং ইদ’ন্তি জানমানেন ভিক্খুনা সব্বম্পি পটিগ্গহেতব্ব’’ন্তি। তেন পৰারণামাসস্স জুণ্হপক্খপঞ্চমিতো পঠায উপ্পন্নস্স চীৰরস্স নিধানকালো দস্সিতো হোতি। কামঞ্চেস ‘‘দসাহপরমং অতিরেকচীৰরং ধারেতব্ব’’ন্তি ইমিনাৰ সিদ্ধো, অত্থুপ্পত্তিৰসেন পন অপুব্বং ৰিয অত্থং দস্সেত্ৰা সিক্খাপদং ঠপিতং।
Kattikatemāsikapuṇṇamanti paṭhamakattikatemāsikapuṇṇamaṃ. Idhāpi paṭhamapadassa anupayogattā purimanayeneva bhummatthe upayogavacanaṃ. Idaṃ vuttaṃ hoti – ‘‘‘yato paṭṭhāya paṭhamamahāpavāraṇā dasāhānāgatā’ti vuccati, sacepi tāni divasāni accantameva bhikkhuno accekacīvaraṃ uppajjeyya, ‘accekaṃ ida’nti jānamānena bhikkhunā sabbampi paṭiggahetabba’’nti. Tena pavāraṇāmāsassa juṇhapakkhapañcamito paṭhāya uppannassa cīvarassa nidhānakālo dassito hoti. Kāmañcesa ‘‘dasāhaparamaṃ atirekacīvaraṃ dhāretabba’’nti imināva siddho, atthuppattivasena pana apubbaṃ viya atthaṃ dassetvā sikkhāpadaṃ ṭhapitaṃ.
অচ্চেকচীৰরন্তি অচ্চাযিকচীৰরং ৰুচ্চতি, তস্স পন অচ্চাযিকভাৰং দস্সেতুং ‘‘সেনায ৰা গন্তুকামো হোতী’’তিআদি ৰুত্তং। তত্থ সদ্ধাতি ইমিনা সদ্ধামত্তকমেৰ দস্সিতং। পসাদোতি ইমিনা সুপ্পসন্না বলৰসদ্ধা। এতং অচ্চেকচীৰরং নামাতি এতং ইমেহি কারণেহি দাতুকামেন দূতং ৰা পেসেত্ৰা সযং ৰা আগন্ত্ৰা ‘‘ৰস্সাৰাসিকং দস্সামী’’তি এৰং আরোচিতং চীৰরং অচ্চেকচীৰরং নাম হোতী। ছট্ঠিতো পট্ঠায পন উপ্পন্নং অনচ্চেকচীৰরম্পি পচ্চুদ্ধরিত্ৰা ঠপিতচীৰরম্পি এতং পরিহারং লভতিযেৰ।
Accekacīvaranti accāyikacīvaraṃ vuccati, tassa pana accāyikabhāvaṃ dassetuṃ ‘‘senāya vā gantukāmo hotī’’tiādi vuttaṃ. Tattha saddhāti iminā saddhāmattakameva dassitaṃ. Pasādoti iminā suppasannā balavasaddhā. Etaṃ accekacīvaraṃ nāmāti etaṃ imehi kāraṇehi dātukāmena dūtaṃ vā pesetvā sayaṃ vā āgantvā ‘‘vassāvāsikaṃ dassāmī’’ti evaṃ ārocitaṃ cīvaraṃ accekacīvaraṃ nāma hotī. Chaṭṭhito paṭṭhāya pana uppannaṃ anaccekacīvarampi paccuddharitvā ṭhapitacīvarampi etaṃ parihāraṃ labhatiyeva.
সঞ্ঞাণং কত্ৰা নিক্খিপিতব্বন্তি কিঞ্চি নিমিত্তং কত্ৰা ঠপেতব্বং। কস্মা এতং ৰুত্তং? যদি হি তং পুরে পৰারণায ৰিভজন্তি। যেন গহিতং, তেন ছিন্নৰস্সেন ন ভৰিতব্বং। সচে পন হোতি, তং চীৰরং সঙ্ঘিকমেৰ হোতি। ততো সল্লক্খেত্ৰা সুখং দাতুং ভৰিস্সতীতি।
Saññāṇaṃ katvā nikkhipitabbanti kiñci nimittaṃ katvā ṭhapetabbaṃ. Kasmā etaṃ vuttaṃ? Yadi hi taṃ pure pavāraṇāya vibhajanti. Yena gahitaṃ, tena chinnavassena na bhavitabbaṃ. Sace pana hoti, taṃ cīvaraṃ saṅghikameva hoti. Tato sallakkhetvā sukhaṃ dātuṃ bhavissatīti.
৬৫০. অচ্চেকচীৰরে অচ্চেকচীৰরসঞ্ঞীতি এৰমাদি ৰিভজিত্ৰা গহিতমেৰ সন্ধায ৰুত্তং। সচে পন অৰিভত্তং হোতি, সঙ্ঘস্স ৰা ভণ্ডাগারে, চীৰরসমযাতিক্কমেপি অনাপত্তি। ইতি অতিরেকচীৰরস্স দসাহং পরিহারো। অকতস্স ৰস্সিকসাটিকচীৰরস্স অনত্থতে কথিনে পঞ্চ মাসা, ৰস্সে উক্কড্ঢিতে ছ মাসা, অত্থতে কথিনে অপরে চত্তারো মাসা। হেমন্তস্স পচ্ছিমে দিৰসে মূলচীৰরাধিট্ঠানৰসেন অপরোপি একো মাসোতি একাদস মাসা পরিহারো। সতিযা পচ্চাসায মূলচীৰরস্স একো মাসো, অচ্চেকচীৰরস্স অনত্থতে কথিনে একাদসদিৰসাধিকো মাসো, অত্থতে কথিনে একাদসদিৰসাধিকা পঞ্চ মাসা, ততো পরং একদিৰসম্পি পরিহারো নত্থীতি ৰেদিতব্বং।
650.Accekacīvare accekacīvarasaññīti evamādi vibhajitvā gahitameva sandhāya vuttaṃ. Sace pana avibhattaṃ hoti, saṅghassa vā bhaṇḍāgāre, cīvarasamayātikkamepi anāpatti. Iti atirekacīvarassa dasāhaṃ parihāro. Akatassa vassikasāṭikacīvarassa anatthate kathine pañca māsā, vasse ukkaḍḍhite cha māsā, atthate kathine apare cattāro māsā. Hemantassa pacchime divase mūlacīvarādhiṭṭhānavasena aparopi eko māsoti ekādasa māsā parihāro. Satiyā paccāsāya mūlacīvarassa eko māso, accekacīvarassa anatthate kathine ekādasadivasādhiko māso, atthate kathine ekādasadivasādhikā pañca māsā, tato paraṃ ekadivasampi parihāro natthīti veditabbaṃ.
অনচ্চেকচীৰরেতি অচ্চেকচীৰরসদিসে অঞ্ঞস্মিং। সেসমেত্থ উত্তানত্থমেৰাতি।
Anaccekacīvareti accekacīvarasadise aññasmiṃ. Sesamettha uttānatthamevāti.
কথিনসমুট্ঠানং – অকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মৰচীকম্মং, তিচিত্তং, তিৰেদনন্তি।
Kathinasamuṭṭhānaṃ – akiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ, ticittaṃ, tivedananti.
অচ্চেকচীৰরসিক্খাপদৰণ্ণনা নিট্ঠিতা।
Accekacīvarasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৮. অচ্চেকচীৰরসিক্খাপদং • 8. Accekacīvarasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৮. অচ্চেকচীৰরসিক্খাপদৰণ্ণনা • 8. Accekacīvarasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৮. অচ্চেকচীৰরসিক্খাপদৰণ্ণনা • 8. Accekacīvarasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৮. অচ্চেকচীৰরসিক্খাপদৰণ্ণনা • 8. Accekacīvarasikkhāpadavaṇṇanā
