| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၈. အစ္စေကစီဝရသိက္ခာပဒဝဏ္ဏနာ
8. Accekacīvarasikkhāpadavaṇṇanā
ပဌမပဒသ္သာတိ ‘‘ဒသာဟာနာဂတ’’န္တိ ပဒသ္သ။ ပုရိမနယေနေဝာတိ အစ္စန္တသံယောဂဝသေနေဝ။ တာနိ ဒိဝသာနီတိ တေသု ဒိဝသေသု။ အစ္စန္တမေဝာတိ နိရန္တရမေဝ, တေသု ဒသာဟေသု ယတ္ထ ကတ္ထစိ ဒိဝသေတိ ဝုတ္တံ ဟောတိ။ ပဝာရဏာမာသသ္သာတိ ပုဗ္ဗကတ္တိကမာသသ္သ။ သော ဟိ ဣဓ ပဌမပဝာရဏာယောဂတော ‘‘ပဝာရဏာမာသော’’တိ ဝုတ္တော။ ဇုဏ္ဟပက္ခပဉ္စမိတော ပဋ္ဌာယာတိ သုက္ကပက္ခပဉ္စမိံ အာဒိံ ကတ္ဝာ။ ပဝာရဏာမာသသ္သ ဇုဏ္ဟပက္ခပဉ္စမိတောတိ ဝာ ပဝာရဏာမာသသ္သ ပကာသနတော ပုရိမသ္သ ဇုဏ္ဟပက္ခသ္သ ပဉ္စမိတော ပဋ္ဌာယာတိ အတ္ထော။ ယော ပနေတ္ထ ‘‘ကာမဉ္စေသ (သာရတ္ထ. ဋီ. ၂.၆၅၀) ‘ဒသာဟပရမံ အတိရေကစီဝရံ ဓာရေတဗ္ဗ’န္တိ (ပာရာ. ၄၆၃) ဣမိနာဝ သိဒ္ဓော, အဋ္ဌုပ္ပတ္တိဝသေန ပန အပုဗ္ဗံ ဝိယ အတ္ထံ ဒသ္သေတ္ဝာ သိက္ခာပဒံ ဌပိတ’’န္တိ ပာဌော ဒိသ္သတိ, သော ပမာဒပာဌော ‘‘ဒသာဟာနာဂတ’’န္တိ ဣမိနာ ဝိရောဓတောတိ ဒဋ္ဌဗ္ဗံ။ ကိဉ္စ ‘‘ဇုဏ္ဟပက္ခပဉ္စမိတော ပဋ္ဌာယာ’’တိ ဝုတ္တတ္တာ အဋ္ဌကထာယေဝ ပုဗ္ဗာပရဝိရောဓောပိ သိယာ။
Paṭhamapadassāti ‘‘dasāhānāgata’’nti padassa. Purimanayenevāti accantasaṃyogavaseneva. Tāni divasānīti tesu divasesu. Accantamevāti nirantarameva, tesu dasāhesu yattha katthaci divaseti vuttaṃ hoti. Pavāraṇāmāsassāti pubbakattikamāsassa. So hi idha paṭhamapavāraṇāyogato ‘‘pavāraṇāmāso’’ti vutto. Juṇhapakkhapañcamito paṭṭhāyāti sukkapakkhapañcamiṃ ādiṃ katvā. Pavāraṇāmāsassa juṇhapakkhapañcamitoti vā pavāraṇāmāsassa pakāsanato purimassa juṇhapakkhassa pañcamito paṭṭhāyāti attho. Yo panettha ‘‘kāmañcesa (sārattha. ṭī. 2.650) ‘dasāhaparamaṃ atirekacīvaraṃ dhāretabba’nti (pārā. 463) imināva siddho, aṭṭhuppattivasena pana apubbaṃ viya atthaṃ dassetvā sikkhāpadaṃ ṭhapita’’nti pāṭho dissati, so pamādapāṭho ‘‘dasāhānāgata’’nti iminā virodhatoti daṭṭhabbaṃ. Kiñca ‘‘juṇhapakkhapañcamito paṭṭhāyā’’ti vuttattā aṭṭhakathāyeva pubbāparavirodhopi siyā.
အစ္စေကစီဝရန္တိ အစ္စာယိကစီဝရံ ဝုစ္စတိ, သော စ အစ္စာယိကဘာဝော ဒာယကသ္သ ဂမိကာဒိဘာဝေနာတိ ဒသ္သေတုံ ‘‘ဂမိကဂိလာနဂဗ္ဘိနိအဘိနဝုပ္ပန္နသဒ္ဓာနံ ပုဂ္ဂလာန’’န္တိအာဒိ ဝုတ္တံ။ တတ္ထ ဂမိကော နာမ ‘‘သေနာယ ဝာ ဂန္တုကာမော ဟောတိ, ပဝာသံ ဝာ ဂန္တုကာမော ဟောတီ’’တိ (ပာရာ. ၆၄၉) ဝုတ္တော။ အညတရေန ‘‘ဝသ္သာဝာသိကံ ဒသ္သာမီ’’တိ ဧဝံ အာရောစေတ္ဝာ ဒိန္နန္တိ ဂမိကာဒီနံ အညတရေန ဂမနာဒီဟိ ကာရဏေဟိ ဒာတုကာမေန ဒူတံ ဝာ ပေသေတ္ဝာ, သယံ ဝာ အာဂန္တ္ဝာ ‘‘ဝသ္သာဝာသိကံ ဒသ္သာမီ’’တိ ဧဝံ အာရောစေတ္ဝာ ဒိန္နံ စီဝရံ။ ဧတ္ထ စ ‘‘ဣဒံ မေ, ဘန္တေ, အစ္စေကစီဝရံ စီဝရကာလသမယံ အတိက္ကာမိတံ နိသ္သဂ္ဂိယ’’န္တိ (ပာရာ. ၆၄၉) ဣမိနာ နယေန နိသ္သဇ္ဇနဝိဓာနံ ဝေဒိတဗ္ဗံ။
Accekacīvaranti accāyikacīvaraṃ vuccati, so ca accāyikabhāvo dāyakassa gamikādibhāvenāti dassetuṃ ‘‘gamikagilānagabbhiniabhinavuppannasaddhānaṃ puggalāna’’ntiādi vuttaṃ. Tattha gamiko nāma ‘‘senāya vā gantukāmo hoti, pavāsaṃ vā gantukāmo hotī’’ti (pārā. 649) vutto. Aññatarena ‘‘vassāvāsikaṃ dassāmī’’ti evaṃ ārocetvā dinnanti gamikādīnaṃ aññatarena gamanādīhi kāraṇehi dātukāmena dūtaṃ vā pesetvā, sayaṃ vā āgantvā ‘‘vassāvāsikaṃ dassāmī’’ti evaṃ ārocetvā dinnaṃ cīvaraṃ. Ettha ca ‘‘idaṃ me, bhante, accekacīvaraṃ cīvarakālasamayaṃ atikkāmitaṃ nissaggiya’’nti (pārā. 649) iminā nayena nissajjanavidhānaṃ veditabbaṃ.
သေသန္တိ ‘‘သာဓာရဏပညတ္တီ’’တိအာဒိကံ။ အယံ ပန ဝိသေသော – တတ္ထ အတိရေကစီဝရေ အတိရေကစီဝရသညိအာဒိနော ဒသာဟာတိက္ကမော, ဣဓ အစ္စေကစီဝရေ အစ္စေကစီဝရသညိအာဒိနော စီဝရကာလာတိက္ကမော။ တထာ အနစ္စေကစီဝရေ အစ္စေကစီဝရသညိနော, ဝေမတိကသ္သ စ ဒုက္ကဋံ။ ဇာတိပ္ပမာဏသမ္ပန္နသ္သ အစ္စေကစီဝရသ္သ အတ္တနော သန္တကတာ, ဒသာဟာနာဂတာယ ကတ္တိကတေမာသိကပုဏ္ဏမာယ ဥပ္ပန္နဘာဝော, အနဓိဋ္ဌိတအဝိကပ္ပိတတာ, စီဝရကာလာတိက္ကမောတိ စတုရင္ဂဘာဝောဝ ဧတ္ထ ဝိသေသော။
Sesanti ‘‘sādhāraṇapaññattī’’tiādikaṃ. Ayaṃ pana viseso – tattha atirekacīvare atirekacīvarasaññiādino dasāhātikkamo, idha accekacīvare accekacīvarasaññiādino cīvarakālātikkamo. Tathā anaccekacīvare accekacīvarasaññino, vematikassa ca dukkaṭaṃ. Jātippamāṇasampannassa accekacīvarassa attano santakatā, dasāhānāgatāya kattikatemāsikapuṇṇamāya uppannabhāvo, anadhiṭṭhitaavikappitatā, cīvarakālātikkamoti caturaṅgabhāvova ettha viseso.
အစ္စေကစီဝရသိက္ခာပဒဝဏ္ဏနာ နိဋ္ဌိတာ။
Accekacīvarasikkhāpadavaṇṇanā niṭṭhitā.
