| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
8. අච්‌චෙකචීවරසික්‌ඛාපදවණ්‌ණනා
8. Accekacīvarasikkhāpadavaṇṇanā
646-9. තෙන සමයෙනාති අච්‌චෙකචීවරසික්‌ඛාපදං. තත්‌ථ දසාහානාගතන්‌ති දස අහානි දසාහං, තෙන දසාහෙන අනාගතා දසාහානාගතා, දසාහෙන අසම්‌පත්‌තාති අත්‌ථො, තං දසාහානාගතං, අච්‌චන්‌තසංයොගවසෙන භුම්‌මත්‌ථෙ උපයොගවචනං, තෙනෙවස්‌ස පදභාජනෙ ‘‘දසාහානාගතායා’’ති වුත්‌තං. පවාරණායාති ඉදං පන යා සා දසාහානාගතාති වුත්‌තා, තං සරූපතො දස්‌සෙතුං අසම්‌මොහත්‌ථං අනුපයොගවචනං.
646-9.Tena samayenāti accekacīvarasikkhāpadaṃ. Tattha dasāhānāgatanti dasa ahāni dasāhaṃ, tena dasāhena anāgatā dasāhānāgatā, dasāhena asampattāti attho, taṃ dasāhānāgataṃ, accantasaṃyogavasena bhummatthe upayogavacanaṃ, tenevassa padabhājane ‘‘dasāhānāgatāyā’’ti vuttaṃ. Pavāraṇāyāti idaṃ pana yā sā dasāhānāgatāti vuttā, taṃ sarūpato dassetuṃ asammohatthaṃ anupayogavacanaṃ.
කත්‌තිකතෙමාසිකපුණ්‌ණමන්‌ති පඨමකත්‌තිකතෙමාසිකපුණ්‌ණමං. ඉධාපි පඨමපදස්‌ස අනුපයොගත්‌තා පුරිමනයෙනෙව භුම්‌මත්‌ථෙ උපයොගවචනං. ඉදං වුත්‌තං හොති – ‘‘‘යතො පට්‌ඨාය පඨමමහාපවාරණා දසාහානාගතා’ති වුච්‌චති, සචෙපි තානි දිවසානි අච්‌චන්‌තමෙව භික්‌ඛුනො අච්‌චෙකචීවරං උප්‌පජ්‌ජෙය්‍ය, ‘අච්‌චෙකං ඉද’න්‌ති ජානමානෙන භික්‌ඛුනා සබ්‌බම්‌පි පටිග්‌ගහෙතබ්‌බ’’න්‌ති. තෙන පවාරණාමාසස්‌ස ජුණ්‌හපක්‌ඛපඤ්‌චමිතො පඨාය උප්‌පන්‌නස්‌ස චීවරස්‌ස නිධානකාලො දස්‌සිතො හොති. කාමඤ්‌චෙස ‘‘දසාහපරමං අතිරෙකචීවරං ධාරෙතබ්‌බ’’න්‌ති ඉමිනාව සිද්‌ධො, අත්‌ථුප්‌පත්‌තිවසෙන පන අපුබ්‌බං විය අත්‌ථං දස්‌සෙත්‌වා සික්‌ඛාපදං ඨපිතං.
Kattikatemāsikapuṇṇamanti paṭhamakattikatemāsikapuṇṇamaṃ. Idhāpi paṭhamapadassa anupayogattā purimanayeneva bhummatthe upayogavacanaṃ. Idaṃ vuttaṃ hoti – ‘‘‘yato paṭṭhāya paṭhamamahāpavāraṇā dasāhānāgatā’ti vuccati, sacepi tāni divasāni accantameva bhikkhuno accekacīvaraṃ uppajjeyya, ‘accekaṃ ida’nti jānamānena bhikkhunā sabbampi paṭiggahetabba’’nti. Tena pavāraṇāmāsassa juṇhapakkhapañcamito paṭhāya uppannassa cīvarassa nidhānakālo dassito hoti. Kāmañcesa ‘‘dasāhaparamaṃ atirekacīvaraṃ dhāretabba’’nti imināva siddho, atthuppattivasena pana apubbaṃ viya atthaṃ dassetvā sikkhāpadaṃ ṭhapitaṃ.
අච්‌චෙකචීවරන්‌ති අච්‌චායිකචීවරං වුච්‌චති, තස්‌ස පන අච්‌චායිකභාවං දස්‌සෙතුං ‘‘සෙනාය වා ගන්‌තුකාමො හොතී’’තිආදි වුත්‌තං. තත්‌ථ සද්‌ධාති ඉමිනා සද්‌ධාමත්‌තකමෙව දස්‌සිතං. පසාදොති ඉමිනා සුප්‌පසන්‌නා බලවසද්‌ධා. එතං අච්‌චෙකචීවරං නාමාති එතං ඉමෙහි කාරණෙහි දාතුකාමෙන දූතං වා පෙසෙත්‌වා සයං වා ආගන්‌ත්‌වා ‘‘වස්‌සාවාසිකං දස්‌සාමී’’ති එවං ආරොචිතං චීවරං අච්‌චෙකචීවරං නාම හොතී. ඡට්‌ඨිතො පට්‌ඨාය පන උප්‌පන්‌නං අනච්‌චෙකචීවරම්‌පි පච්‌චුද්‌ධරිත්‌වා ඨපිතචීවරම්‌පි එතං පරිහාරං ලභතියෙව.
Accekacīvaranti accāyikacīvaraṃ vuccati, tassa pana accāyikabhāvaṃ dassetuṃ ‘‘senāya vā gantukāmo hotī’’tiādi vuttaṃ. Tattha saddhāti iminā saddhāmattakameva dassitaṃ. Pasādoti iminā suppasannā balavasaddhā. Etaṃ accekacīvaraṃ nāmāti etaṃ imehi kāraṇehi dātukāmena dūtaṃ vā pesetvā sayaṃ vā āgantvā ‘‘vassāvāsikaṃ dassāmī’’ti evaṃ ārocitaṃ cīvaraṃ accekacīvaraṃ nāma hotī. Chaṭṭhito paṭṭhāya pana uppannaṃ anaccekacīvarampi paccuddharitvā ṭhapitacīvarampi etaṃ parihāraṃ labhatiyeva.
සඤ්‌ඤාණං කත්‌වා නික්‌ඛිපිතබ්‌බන්‌ති කිඤ්‌චි නිමිත්‌තං කත්‌වා ඨපෙතබ්‌බං. කස්‌මා එතං වුත්‌තං? යදි හි තං පුරෙ පවාරණාය විභජන්‌ති. යෙන ගහිතං, තෙන ඡින්‌නවස්‌සෙන න භවිතබ්‌බං. සචෙ පන හොති, තං චීවරං සඞ්‌ඝිකමෙව හොති. තතො සල්‌ලක්‌ඛෙත්‌වා සුඛං දාතුං භවිස්‌සතීති.
Saññāṇaṃ katvā nikkhipitabbanti kiñci nimittaṃ katvā ṭhapetabbaṃ. Kasmā etaṃ vuttaṃ? Yadi hi taṃ pure pavāraṇāya vibhajanti. Yena gahitaṃ, tena chinnavassena na bhavitabbaṃ. Sace pana hoti, taṃ cīvaraṃ saṅghikameva hoti. Tato sallakkhetvā sukhaṃ dātuṃ bhavissatīti.
650. අච්‌චෙකචීවරෙ අච්‌චෙකචීවරසඤ්‌ඤීති එවමාදි විභජිත්‌වා ගහිතමෙව සන්‌ධාය වුත්‌තං. සචෙ පන අවිභත්‌තං හොති, සඞ්‌ඝස්‌ස වා භණ්‌ඩාගාරෙ, චීවරසමයාතික්‌කමෙපි අනාපත්‌ති. ඉති අතිරෙකචීවරස්‌ස දසාහං පරිහාරො. අකතස්‌ස වස්‌සිකසාටිකචීවරස්‌ස අනත්‌ථතෙ කථිනෙ පඤ්‌ච මාසා, වස්‌සෙ උක්‌කඩ්‌ඪිතෙ ඡ මාසා, අත්‌ථතෙ කථිනෙ අපරෙ චත්‌තාරො මාසා. හෙමන්‌තස්‌ස පච්‌ඡිමෙ දිවසෙ මූලචීවරාධිට්‌ඨානවසෙන අපරොපි එකො මාසොති එකාදස මාසා පරිහාරො. සතියා පච්‌චාසාය මූලචීවරස්‌ස එකො මාසො, අච්‌චෙකචීවරස්‌ස අනත්‌ථතෙ කථිනෙ එකාදසදිවසාධිකො මාසො, අත්‌ථතෙ කථිනෙ එකාදසදිවසාධිකා පඤ්‌ච මාසා, තතො පරං එකදිවසම්‌පි පරිහාරො නත්‌ථීති වෙදිතබ්‌බං.
650.Accekacīvare accekacīvarasaññīti evamādi vibhajitvā gahitameva sandhāya vuttaṃ. Sace pana avibhattaṃ hoti, saṅghassa vā bhaṇḍāgāre, cīvarasamayātikkamepi anāpatti. Iti atirekacīvarassa dasāhaṃ parihāro. Akatassa vassikasāṭikacīvarassa anatthate kathine pañca māsā, vasse ukkaḍḍhite cha māsā, atthate kathine apare cattāro māsā. Hemantassa pacchime divase mūlacīvarādhiṭṭhānavasena aparopi eko māsoti ekādasa māsā parihāro. Satiyā paccāsāya mūlacīvarassa eko māso, accekacīvarassa anatthate kathine ekādasadivasādhiko māso, atthate kathine ekādasadivasādhikā pañca māsā, tato paraṃ ekadivasampi parihāro natthīti veditabbaṃ.
අනච්‌චෙකචීවරෙති අච්‌චෙකචීවරසදිසෙ අඤ්‌ඤස්‌මිං. සෙසමෙත්‌ථ උත්‌තානත්‌ථමෙවාති.
Anaccekacīvareti accekacīvarasadise aññasmiṃ. Sesamettha uttānatthamevāti.
කථිනසමුට්‌ඨානං – අකිරියං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මවචීකම්‌මං, තිචිත්‌තං, තිවෙදනන්‌ති.
Kathinasamuṭṭhānaṃ – akiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ, ticittaṃ, tivedananti.
අච්‌චෙකචීවරසික්‌ඛාපදවණ්‌ණනා නිට්‌ඨිතා.
Accekacīvarasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 8. අච්‌චෙකචීවරසික්‌ඛාපදං • 8. Accekacīvarasikkhāpadaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 8. අච්‌චෙකචීවරසික්‌ඛාපදවණ්‌ණනා • 8. Accekacīvarasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 8. අච්‌චෙකචීවරසික්‌ඛාපදවණ්‌ණනා • 8. Accekacīvarasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 8. අච්‌චෙකචීවරසික්‌ඛාපදවණ්‌ණනා • 8. Accekacīvarasikkhāpadavaṇṇanā
