| Library / Tipiṭaka / ਤਿਪਿਟਕ • Tipiṭaka / ਮਹਾવਿਭਙ੍ਗ-ਅਟ੍ਠਕਥਾ • Mahāvibhaṅga-aṭṭhakathā |
੮. ਅਚ੍ਚੇਕਚੀવਰਸਿਕ੍ਖਾਪਦવਣ੍ਣਨਾ
8. Accekacīvarasikkhāpadavaṇṇanā
੬੪੬-੯. ਤੇਨ ਸਮਯੇਨਾਤਿ ਅਚ੍ਚੇਕਚੀવਰਸਿਕ੍ਖਾਪਦਂ। ਤਤ੍ਥ ਦਸਾਹਾਨਾਗਤਨ੍ਤਿ ਦਸ ਅਹਾਨਿ ਦਸਾਹਂ, ਤੇਨ ਦਸਾਹੇਨ ਅਨਾਗਤਾ ਦਸਾਹਾਨਾਗਤਾ, ਦਸਾਹੇਨ ਅਸਮ੍ਪਤ੍ਤਾਤਿ ਅਤ੍ਥੋ, ਤਂ ਦਸਾਹਾਨਾਗਤਂ, ਅਚ੍ਚਨ੍ਤਸਂਯੋਗવਸੇਨ ਭੁਮ੍ਮਤ੍ਥੇ ਉਪਯੋਗવਚਨਂ, ਤੇਨੇવਸ੍ਸ ਪਦਭਾਜਨੇ ‘‘ਦਸਾਹਾਨਾਗਤਾਯਾ’’ਤਿ વੁਤ੍ਤਂ। ਪવਾਰਣਾਯਾਤਿ ਇਦਂ ਪਨ ਯਾ ਸਾ ਦਸਾਹਾਨਾਗਤਾਤਿ વੁਤ੍ਤਾ, ਤਂ ਸਰੂਪਤੋ ਦਸ੍ਸੇਤੁਂ ਅਸਮ੍ਮੋਹਤ੍ਥਂ ਅਨੁਪਯੋਗવਚਨਂ।
646-9.Tena samayenāti accekacīvarasikkhāpadaṃ. Tattha dasāhānāgatanti dasa ahāni dasāhaṃ, tena dasāhena anāgatā dasāhānāgatā, dasāhena asampattāti attho, taṃ dasāhānāgataṃ, accantasaṃyogavasena bhummatthe upayogavacanaṃ, tenevassa padabhājane ‘‘dasāhānāgatāyā’’ti vuttaṃ. Pavāraṇāyāti idaṃ pana yā sā dasāhānāgatāti vuttā, taṃ sarūpato dassetuṃ asammohatthaṃ anupayogavacanaṃ.
ਕਤ੍ਤਿਕਤੇਮਾਸਿਕਪੁਣ੍ਣਮਨ੍ਤਿ ਪਠਮਕਤ੍ਤਿਕਤੇਮਾਸਿਕਪੁਣ੍ਣਮਂ। ਇਧਾਪਿ ਪਠਮਪਦਸ੍ਸ ਅਨੁਪਯੋਗਤ੍ਤਾ ਪੁਰਿਮਨਯੇਨੇવ ਭੁਮ੍ਮਤ੍ਥੇ ਉਪਯੋਗવਚਨਂ। ਇਦਂ વੁਤ੍ਤਂ ਹੋਤਿ – ‘‘‘ਯਤੋ ਪਟ੍ਠਾਯ ਪਠਮਮਹਾਪવਾਰਣਾ ਦਸਾਹਾਨਾਗਤਾ’ਤਿ વੁਚ੍ਚਤਿ, ਸਚੇਪਿ ਤਾਨਿ ਦਿવਸਾਨਿ ਅਚ੍ਚਨ੍ਤਮੇવ ਭਿਕ੍ਖੁਨੋ ਅਚ੍ਚੇਕਚੀવਰਂ ਉਪ੍ਪਜ੍ਜੇਯ੍ਯ, ‘ਅਚ੍ਚੇਕਂ ਇਦ’ਨ੍ਤਿ ਜਾਨਮਾਨੇਨ ਭਿਕ੍ਖੁਨਾ ਸਬ੍ਬਮ੍ਪਿ ਪਟਿਗ੍ਗਹੇਤਬ੍ਬ’’ਨ੍ਤਿ। ਤੇਨ ਪવਾਰਣਾਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਿਤੋ ਪਠਾਯ ਉਪ੍ਪਨ੍ਨਸ੍ਸ ਚੀવਰਸ੍ਸ ਨਿਧਾਨਕਾਲੋ ਦਸ੍ਸਿਤੋ ਹੋਤਿ। ਕਾਮਞ੍ਚੇਸ ‘‘ਦਸਾਹਪਰਮਂ ਅਤਿਰੇਕਚੀવਰਂ ਧਾਰੇਤਬ੍ਬ’’ਨ੍ਤਿ ਇਮਿਨਾવ ਸਿਦ੍ਧੋ, ਅਤ੍ਥੁਪ੍ਪਤ੍ਤਿવਸੇਨ ਪਨ ਅਪੁਬ੍ਬਂ વਿਯ ਅਤ੍ਥਂ ਦਸ੍ਸੇਤ੍વਾ ਸਿਕ੍ਖਾਪਦਂ ਠਪਿਤਂ।
Kattikatemāsikapuṇṇamanti paṭhamakattikatemāsikapuṇṇamaṃ. Idhāpi paṭhamapadassa anupayogattā purimanayeneva bhummatthe upayogavacanaṃ. Idaṃ vuttaṃ hoti – ‘‘‘yato paṭṭhāya paṭhamamahāpavāraṇā dasāhānāgatā’ti vuccati, sacepi tāni divasāni accantameva bhikkhuno accekacīvaraṃ uppajjeyya, ‘accekaṃ ida’nti jānamānena bhikkhunā sabbampi paṭiggahetabba’’nti. Tena pavāraṇāmāsassa juṇhapakkhapañcamito paṭhāya uppannassa cīvarassa nidhānakālo dassito hoti. Kāmañcesa ‘‘dasāhaparamaṃ atirekacīvaraṃ dhāretabba’’nti imināva siddho, atthuppattivasena pana apubbaṃ viya atthaṃ dassetvā sikkhāpadaṃ ṭhapitaṃ.
ਅਚ੍ਚੇਕਚੀવਰਨ੍ਤਿ ਅਚ੍ਚਾਯਿਕਚੀવਰਂ વੁਚ੍ਚਤਿ, ਤਸ੍ਸ ਪਨ ਅਚ੍ਚਾਯਿਕਭਾવਂ ਦਸ੍ਸੇਤੁਂ ‘‘ਸੇਨਾਯ વਾ ਗਨ੍ਤੁਕਾਮੋ ਹੋਤੀ’’ਤਿਆਦਿ વੁਤ੍ਤਂ। ਤਤ੍ਥ ਸਦ੍ਧਾਤਿ ਇਮਿਨਾ ਸਦ੍ਧਾਮਤ੍ਤਕਮੇવ ਦਸ੍ਸਿਤਂ। ਪਸਾਦੋਤਿ ਇਮਿਨਾ ਸੁਪ੍ਪਸਨ੍ਨਾ ਬਲવਸਦ੍ਧਾ। ਏਤਂ ਅਚ੍ਚੇਕਚੀવਰਂ ਨਾਮਾਤਿ ਏਤਂ ਇਮੇਹਿ ਕਾਰਣੇਹਿ ਦਾਤੁਕਾਮੇਨ ਦੂਤਂ વਾ ਪੇਸੇਤ੍વਾ ਸਯਂ વਾ ਆਗਨ੍ਤ੍વਾ ‘‘વਸ੍ਸਾવਾਸਿਕਂ ਦਸ੍ਸਾਮੀ’’ਤਿ ਏવਂ ਆਰੋਚਿਤਂ ਚੀવਰਂ ਅਚ੍ਚੇਕਚੀવਰਂ ਨਾਮ ਹੋਤੀ। ਛਟ੍ਠਿਤੋ ਪਟ੍ਠਾਯ ਪਨ ਉਪ੍ਪਨ੍ਨਂ ਅਨਚ੍ਚੇਕਚੀવਰਮ੍ਪਿ ਪਚ੍ਚੁਦ੍ਧਰਿਤ੍વਾ ਠਪਿਤਚੀવਰਮ੍ਪਿ ਏਤਂ ਪਰਿਹਾਰਂ ਲਭਤਿਯੇવ।
Accekacīvaranti accāyikacīvaraṃ vuccati, tassa pana accāyikabhāvaṃ dassetuṃ ‘‘senāya vā gantukāmo hotī’’tiādi vuttaṃ. Tattha saddhāti iminā saddhāmattakameva dassitaṃ. Pasādoti iminā suppasannā balavasaddhā. Etaṃ accekacīvaraṃ nāmāti etaṃ imehi kāraṇehi dātukāmena dūtaṃ vā pesetvā sayaṃ vā āgantvā ‘‘vassāvāsikaṃ dassāmī’’ti evaṃ ārocitaṃ cīvaraṃ accekacīvaraṃ nāma hotī. Chaṭṭhito paṭṭhāya pana uppannaṃ anaccekacīvarampi paccuddharitvā ṭhapitacīvarampi etaṃ parihāraṃ labhatiyeva.
ਸਞ੍ਞਾਣਂ ਕਤ੍વਾ ਨਿਕ੍ਖਿਪਿਤਬ੍ਬਨ੍ਤਿ ਕਿਞ੍ਚਿ ਨਿਮਿਤ੍ਤਂ ਕਤ੍વਾ ਠਪੇਤਬ੍ਬਂ। ਕਸ੍ਮਾ ਏਤਂ વੁਤ੍ਤਂ? ਯਦਿ ਹਿ ਤਂ ਪੁਰੇ ਪવਾਰਣਾਯ વਿਭਜਨ੍ਤਿ। ਯੇਨ ਗਹਿਤਂ, ਤੇਨ ਛਿਨ੍ਨવਸ੍ਸੇਨ ਨ ਭવਿਤਬ੍ਬਂ। ਸਚੇ ਪਨ ਹੋਤਿ, ਤਂ ਚੀવਰਂ ਸਙ੍ਘਿਕਮੇવ ਹੋਤਿ। ਤਤੋ ਸਲ੍ਲਕ੍ਖੇਤ੍વਾ ਸੁਖਂ ਦਾਤੁਂ ਭવਿਸ੍ਸਤੀਤਿ।
Saññāṇaṃ katvā nikkhipitabbanti kiñci nimittaṃ katvā ṭhapetabbaṃ. Kasmā etaṃ vuttaṃ? Yadi hi taṃ pure pavāraṇāya vibhajanti. Yena gahitaṃ, tena chinnavassena na bhavitabbaṃ. Sace pana hoti, taṃ cīvaraṃ saṅghikameva hoti. Tato sallakkhetvā sukhaṃ dātuṃ bhavissatīti.
੬੫੦. ਅਚ੍ਚੇਕਚੀવਰੇ ਅਚ੍ਚੇਕਚੀવਰਸਞ੍ਞੀਤਿ ਏવਮਾਦਿ વਿਭਜਿਤ੍વਾ ਗਹਿਤਮੇવ ਸਨ੍ਧਾਯ વੁਤ੍ਤਂ। ਸਚੇ ਪਨ ਅવਿਭਤ੍ਤਂ ਹੋਤਿ, ਸਙ੍ਘਸ੍ਸ વਾ ਭਣ੍ਡਾਗਾਰੇ, ਚੀવਰਸਮਯਾਤਿਕ੍ਕਮੇਪਿ ਅਨਾਪਤ੍ਤਿ। ਇਤਿ ਅਤਿਰੇਕਚੀવਰਸ੍ਸ ਦਸਾਹਂ ਪਰਿਹਾਰੋ। ਅਕਤਸ੍ਸ વਸ੍ਸਿਕਸਾਟਿਕਚੀવਰਸ੍ਸ ਅਨਤ੍ਥਤੇ ਕਥਿਨੇ ਪਞ੍ਚ ਮਾਸਾ, વਸ੍ਸੇ ਉਕ੍ਕਡ੍ਢਿਤੇ ਛ ਮਾਸਾ, ਅਤ੍ਥਤੇ ਕਥਿਨੇ ਅਪਰੇ ਚਤ੍ਤਾਰੋ ਮਾਸਾ। ਹੇਮਨ੍ਤਸ੍ਸ ਪਚ੍ਛਿਮੇ ਦਿવਸੇ ਮੂਲਚੀવਰਾਧਿਟ੍ਠਾਨવਸੇਨ ਅਪਰੋਪਿ ਏਕੋ ਮਾਸੋਤਿ ਏਕਾਦਸ ਮਾਸਾ ਪਰਿਹਾਰੋ। ਸਤਿਯਾ ਪਚ੍ਚਾਸਾਯ ਮੂਲਚੀવਰਸ੍ਸ ਏਕੋ ਮਾਸੋ, ਅਚ੍ਚੇਕਚੀવਰਸ੍ਸ ਅਨਤ੍ਥਤੇ ਕਥਿਨੇ ਏਕਾਦਸਦਿવਸਾਧਿਕੋ ਮਾਸੋ, ਅਤ੍ਥਤੇ ਕਥਿਨੇ ਏਕਾਦਸਦਿવਸਾਧਿਕਾ ਪਞ੍ਚ ਮਾਸਾ, ਤਤੋ ਪਰਂ ਏਕਦਿવਸਮ੍ਪਿ ਪਰਿਹਾਰੋ ਨਤ੍ਥੀਤਿ વੇਦਿਤਬ੍ਬਂ।
650.Accekacīvare accekacīvarasaññīti evamādi vibhajitvā gahitameva sandhāya vuttaṃ. Sace pana avibhattaṃ hoti, saṅghassa vā bhaṇḍāgāre, cīvarasamayātikkamepi anāpatti. Iti atirekacīvarassa dasāhaṃ parihāro. Akatassa vassikasāṭikacīvarassa anatthate kathine pañca māsā, vasse ukkaḍḍhite cha māsā, atthate kathine apare cattāro māsā. Hemantassa pacchime divase mūlacīvarādhiṭṭhānavasena aparopi eko māsoti ekādasa māsā parihāro. Satiyā paccāsāya mūlacīvarassa eko māso, accekacīvarassa anatthate kathine ekādasadivasādhiko māso, atthate kathine ekādasadivasādhikā pañca māsā, tato paraṃ ekadivasampi parihāro natthīti veditabbaṃ.
ਅਨਚ੍ਚੇਕਚੀવਰੇਤਿ ਅਚ੍ਚੇਕਚੀવਰਸਦਿਸੇ ਅਞ੍ਞਸ੍ਮਿਂ। ਸੇਸਮੇਤ੍ਥ ਉਤ੍ਤਾਨਤ੍ਥਮੇવਾਤਿ।
Anaccekacīvareti accekacīvarasadise aññasmiṃ. Sesamettha uttānatthamevāti.
ਕਥਿਨਸਮੁਟ੍ਠਾਨਂ – ਅਕਿਰਿਯਂ, ਨੋਸਞ੍ਞਾવਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿવਜ੍ਜਂ, ਕਾਯਕਮ੍ਮવਚੀਕਮ੍ਮਂ, ਤਿਚਿਤ੍ਤਂ, ਤਿવੇਦਨਨ੍ਤਿ।
Kathinasamuṭṭhānaṃ – akiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ, ticittaṃ, tivedananti.
ਅਚ੍ਚੇਕਚੀવਰਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Accekacīvarasikkhāpadavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਮਹਾવਿਭਙ੍ਗ • Mahāvibhaṅga / ੮. ਅਚ੍ਚੇਕਚੀવਰਸਿਕ੍ਖਾਪਦਂ • 8. Accekacīvarasikkhāpadaṃ
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ੮. ਅਚ੍ਚੇਕਚੀવਰਸਿਕ੍ਖਾਪਦવਣ੍ਣਨਾ • 8. Accekacīvarasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ੮. ਅਚ੍ਚੇਕਚੀવਰਸਿਕ੍ਖਾਪਦવਣ੍ਣਨਾ • 8. Accekacīvarasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ੮. ਅਚ੍ਚੇਕਚੀવਰਸਿਕ੍ਖਾਪਦવਣ੍ਣਨਾ • 8. Accekacīvarasikkhāpadavaṇṇanā
