| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. অচ্চেন্তিসুত্তৰণ্ণনা
4. Accentisuttavaṇṇanā
৪. কালযন্তি খেপেন্তীতি কালা। পুরেভত্তাদযো হি কালা ধম্মপ্পৰত্তিমত্ততায পরমত্থতো অৰিজ্জমানাপি লোকসঙ্কেতমত্তসিদ্ধা তস্সাযেৰ ধম্মপ্পৰত্তিযা গতগতায অনিৰত্তনতো তং তং ধম্মপ্পৰত্তিং খেপেন্তা ৰিনাসযন্তা ৰিয সযঞ্চ তাহি সদ্ধিং অচ্চেন্তা ৰিয হোন্তি। তেনাহ – ‘‘কালো ঘসতি ভূতানি, সব্বানেৰ সহত্তনা’’তি (জা॰ ১.২.১৯০)। ‘‘তরযন্তি রত্তিযো’’তি এত্থাপি ৰুত্তনযেনেৰ অত্থো ৰেদিতব্বো। ‘‘এতং ভযং মরণে পেক্খমানো’’তি ৰুচ্চমানত্তা পুগ্গলং মরণূপগমনায তরযন্তীতি অত্থো ৰুত্তো। ৰযোগুণাতি এত্থ কোট্ঠাসা গুণা। তিত্থিযানং হি চরিমচিত্তেন সকলচিত্তে ৰযসমূহে ৰযসমঞ্ঞাতি আহ – ‘‘পঠমমজ্ঝিমপচ্ছিমৰযানং গুণা, রাসযোতি অত্থো’’তি। আনিসংসট্ঠো গুণট্ঠো ‘‘ৰাকচিরং নিৰাসেসিং, দ্ৰাদসগুণমুপাগত’’ন্তিআদীসু (বু॰ ৰং॰ ২.৩০) ৰিয। ‘‘তন্দিগুণাহং করিস্সামি, দিগুণং দিগুণং ৰদ্ধেয্যা’’তি চ এৰমাদীসু পন তব্ভাৰৰুত্তিঅত্থো গুণট্ঠো।
4. Kālayanti khepentīti kālā. Purebhattādayo hi kālā dhammappavattimattatāya paramatthato avijjamānāpi lokasaṅketamattasiddhā tassāyeva dhammappavattiyā gatagatāya anivattanato taṃ taṃ dhammappavattiṃ khepentā vināsayantā viya sayañca tāhi saddhiṃ accentā viya honti. Tenāha – ‘‘kālo ghasati bhūtāni, sabbāneva sahattanā’’ti (jā. 1.2.190). ‘‘Tarayanti rattiyo’’ti etthāpi vuttanayeneva attho veditabbo. ‘‘Etaṃ bhayaṃ maraṇe pekkhamāno’’ti vuccamānattā puggalaṃ maraṇūpagamanāya tarayantīti attho vutto. Vayoguṇāti ettha koṭṭhāsā guṇā. Titthiyānaṃ hi carimacittena sakalacitte vayasamūhe vayasamaññāti āha – ‘‘paṭhamamajjhimapacchimavayānaṃ guṇā, rāsayoti attho’’ti. Ānisaṃsaṭṭho guṇaṭṭho ‘‘vākaciraṃ nivāsesiṃ, dvādasaguṇamupāgata’’ntiādīsu (bu. vaṃ. 2.30) viya. ‘‘Tandiguṇāhaṃ karissāmi, diguṇaṃ diguṇaṃ vaddheyyā’’ti ca evamādīsu pana tabbhāvavuttiattho guṇaṭṭho.
‘‘অসঙ্খ্যেয্যানি নামানি, সগুণেন মহেসিনো।
‘‘Asaṅkhyeyyāni nāmāni, saguṇena mahesino;
গুণেন নামমুদ্ধেয্যং, অপি নাম সহস্সতো’’তি॥ (ধ॰ স॰ অট্ঠ॰ ১৩১৩; উদা॰ ৫৩; পটি॰ ম॰ অট্ঠ॰ ১.১.৭৬) –
Guṇena nāmamuddheyyaṃ, api nāma sahassato’’ti. (dha. sa. aṭṭha. 1313; udā. 53; paṭi. ma. aṭṭha. 1.1.76) –
আদীসু পসংসট্ঠো গুণট্ঠো দট্ঠব্বো। ‘‘ৰযোগুণা অনুপুব্বং জহন্তী’’তি এত্থ অত্থো ‘‘অচ্চেন্তি কালা’’তি এত্থ ৰুত্তনযো এৰ। পঠমমজ্ঝিমৰযাতি পঠমগ্গহণঞ্চেত্থ ৰযস্স গতস্স অপুনরাৰত্তিদস্সনত্থং কতং। তেনেৰাহ – ‘‘মরণক্খণে পন তযোপি ৰযা জহন্তেৰা’’তি।
Ādīsu pasaṃsaṭṭho guṇaṭṭho daṭṭhabbo. ‘‘Vayoguṇā anupubbaṃ jahantī’’ti ettha attho ‘‘accenti kālā’’ti ettha vuttanayo eva. Paṭhamamajjhimavayāti paṭhamaggahaṇañcettha vayassa gatassa apunarāvattidassanatthaṃ kataṃ. Tenevāha – ‘‘maraṇakkhaṇe pana tayopi vayā jahantevā’’ti.
এত্থ চ পাল়িযং ‘‘অচ্চেন্তি কালা’’তি সামঞ্ঞতো কালস্স অপগমনং দস্সিতং, পুন তং ৰিসেসতোপি দস্সেতুং ইতরদ্ৰযং ৰুত্তং। অট্ঠকথাযং পন মুদিন্দ্রিযস্স ৰসেন ‘‘ৰযোগুণা অনুপুব্বং জহন্তী’’তি ৰুত্তং, মজ্ঝিমিন্দ্রিযস্স ৰসেন ‘‘তরযন্তি রত্তিযো’’তি ৰুত্তন্তি অধিপ্পাযেন ‘‘কালাতি পুরেভত্তাদযো কালা’’তি ৰুত্তং। তস্মা তত্থ আদি-সদ্দেন পচ্ছাভত্তপঠমযাম-মুহুত্তকালাদি-কালকোট্ঠাসো এৰ অণুপভেদো কালৰিভাগো গহিতোতি ৰেদিতব্বো। সেসন্তি ইধ দ্ৰীসু গাথাসু পচ্ছিমদ্ধো। সো হি ইধ অত্থতো অধিগতত্তা অনন্তরসুত্তে চ ৰুত্তত্তা অতিদিসিতো।
Ettha ca pāḷiyaṃ ‘‘accenti kālā’’ti sāmaññato kālassa apagamanaṃ dassitaṃ, puna taṃ visesatopi dassetuṃ itaradvayaṃ vuttaṃ. Aṭṭhakathāyaṃ pana mudindriyassa vasena ‘‘vayoguṇā anupubbaṃ jahantī’’ti vuttaṃ, majjhimindriyassa vasena ‘‘tarayanti rattiyo’’ti vuttanti adhippāyena ‘‘kālāti purebhattādayo kālā’’ti vuttaṃ. Tasmā tattha ādi-saddena pacchābhattapaṭhamayāma-muhuttakālādi-kālakoṭṭhāso eva aṇupabhedo kālavibhāgo gahitoti veditabbo. Sesanti idha dvīsu gāthāsu pacchimaddho. So hi idha atthato adhigatattā anantarasutte ca vuttattā atidisito.
অচ্চেন্তিসুত্তৰণ্ণনা নিট্ঠিতা।
Accentisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. অচ্চেন্তিসুত্তং • 4. Accentisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. অচ্চেন্তিসুত্তৰণ্ণনা • 4. Accentisuttavaṇṇanā
