| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৬. অচ্ছরাসঙ্ঘাতৰগ্গো
6. Accharāsaṅghātavaggo
৫১. ‘‘পভস্সরমিদং , ভিক্খৰে, চিত্তং। তঞ্চ খো আগন্তুকেহি উপক্কিলেসেহি উপক্কিলিট্ঠং। তং অস্সুতৰা পুথুজ্জনো যথাভূতং নপ্পজানাতি। তস্মা ‘অস্সুতৰতো পুথুজ্জনস্স চিত্তভাৰনা নত্থী’তি ৰদামী’’তি। পঠমং।
51. ‘‘Pabhassaramidaṃ , bhikkhave, cittaṃ. Tañca kho āgantukehi upakkilesehi upakkiliṭṭhaṃ. Taṃ assutavā puthujjano yathābhūtaṃ nappajānāti. Tasmā ‘assutavato puthujjanassa cittabhāvanā natthī’ti vadāmī’’ti. Paṭhamaṃ.
৫২. ‘‘পভস্সরমিদং , ভিক্খৰে, চিত্তং। তঞ্চ খো আগন্তুকেহি উপক্কিলেসেহি ৰিপ্পমুত্তং। তং সুতৰা অরিযসাৰকো যথাভূতং পজানাতি। তস্মা ‘সুতৰতো অরিযসাৰকস্স চিত্তভাৰনা অত্থী’তি ৰদামী’’তি। দুতিযং।
52. ‘‘Pabhassaramidaṃ , bhikkhave, cittaṃ. Tañca kho āgantukehi upakkilesehi vippamuttaṃ. Taṃ sutavā ariyasāvako yathābhūtaṃ pajānāti. Tasmā ‘sutavato ariyasāvakassa cittabhāvanā atthī’ti vadāmī’’ti. Dutiyaṃ.
৫৩. ‘‘অচ্ছরাসঙ্ঘাতমত্তম্পি চে, ভিক্খৰে, ভিক্খু মেত্তাচিত্তং 1 আসেৰতি; অযং ৰুচ্চতি, ভিক্খৰে – ‘ভিক্খু অরিত্তজ্ঝানো ৰিহরতি সত্থুসাসনকরো ওৰাদপতিকরো, অমোঘং রট্ঠপিণ্ডং ভুঞ্জতি’। কো পন ৰাদো যে নং বহুলীকরোন্তী’’তি! ততিযং।
53. ‘‘Accharāsaṅghātamattampi ce, bhikkhave, bhikkhu mettācittaṃ 2 āsevati; ayaṃ vuccati, bhikkhave – ‘bhikkhu arittajjhāno viharati satthusāsanakaro ovādapatikaro, amoghaṃ raṭṭhapiṇḍaṃ bhuñjati’. Ko pana vādo ye naṃ bahulīkarontī’’ti! Tatiyaṃ.
৫৪. ‘‘অচ্ছরাসঙ্ঘাতমত্তম্পি চে, ভিক্খৰে, ভিক্খু মেত্তাচিত্তং ভাৰেতি; অযং ৰুচ্চতি, ভিক্খৰে – ‘ভিক্খু অরিত্তজ্ঝানো ৰিহরতি সত্থুসাসনকরো ওৰাদপতিকরো, অমোঘং রট্ঠপিণ্ডং ভুঞ্জতি’। কো পন ৰাদো যে নং বহুলীকরোন্তী’’তি! চতুত্থং।
54. ‘‘Accharāsaṅghātamattampi ce, bhikkhave, bhikkhu mettācittaṃ bhāveti; ayaṃ vuccati, bhikkhave – ‘bhikkhu arittajjhāno viharati satthusāsanakaro ovādapatikaro, amoghaṃ raṭṭhapiṇḍaṃ bhuñjati’. Ko pana vādo ye naṃ bahulīkarontī’’ti! Catutthaṃ.
৫৫. ‘‘অচ্ছরাসঙ্ঘাতমত্তম্পি চে, ভিক্খৰে, ভিক্খু মেত্তাচিত্তং মনসি করোতি; অযং ৰুচ্চতি, ভিক্খৰে – ‘ভিক্খু অরিত্তজ্ঝানো ৰিহরতি সত্থুসাসনকরো ওৰাদপতিকরো অমোঘং রট্ঠপিণ্ডং ভুঞ্জতি’। কো পন ৰাদো যে নং বহুলীকরোন্তী’’তি! পঞ্চমং।
55. ‘‘Accharāsaṅghātamattampi ce, bhikkhave, bhikkhu mettācittaṃ manasi karoti; ayaṃ vuccati, bhikkhave – ‘bhikkhu arittajjhāno viharati satthusāsanakaro ovādapatikaro amoghaṃ raṭṭhapiṇḍaṃ bhuñjati’. Ko pana vādo ye naṃ bahulīkarontī’’ti! Pañcamaṃ.
৫৬. ‘‘যে কেচি, ভিক্খৰে, ধম্মা অকুসলা অকুসলভাগিযা অকুসলপক্খিকা, সব্বে তে মনোপুব্বঙ্গমা। মনো তেসং ধম্মানং পঠমং উপ্পজ্জতি, অন্ৰদেৰ অকুসলা ধম্মা’’তি। ছট্ঠং।
56. ‘‘Ye keci, bhikkhave, dhammā akusalā akusalabhāgiyā akusalapakkhikā, sabbe te manopubbaṅgamā. Mano tesaṃ dhammānaṃ paṭhamaṃ uppajjati, anvadeva akusalā dhammā’’ti. Chaṭṭhaṃ.
৫৭. ‘‘যে কেচি, ভিক্খৰে, ধম্মা কুসলা কুসলভাগিযা কুসলপক্খিকা, সব্বে তে মনোপুব্বঙ্গমা। মনো তেসং ধম্মানং পঠমং উপ্পজ্জতি, অন্ৰদেৰ কুসলা ধম্মা’’তি। সত্তমং।
57. ‘‘Ye keci, bhikkhave, dhammā kusalā kusalabhāgiyā kusalapakkhikā, sabbe te manopubbaṅgamā. Mano tesaṃ dhammānaṃ paṭhamaṃ uppajjati, anvadeva kusalā dhammā’’ti. Sattamaṃ.
৫৮. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা অকুসলা ধম্মা উপ্পজ্জন্তি উপ্পন্না ৰা কুসলা ধম্মা পরিহাযন্তি যথযিদং, ভিক্খৰে, পমাদো। পমত্তস্স, ভিক্খৰে, অনুপ্পন্না চেৰ অকুসলা ধম্মা উপ্পজ্জন্তি উপ্পন্না চ কুসলা ধম্মা পরিহাযন্তী’’তি। অট্ঠমং।
58. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ, bhikkhave, pamādo. Pamattassa, bhikkhave, anuppannā ceva akusalā dhammā uppajjanti uppannā ca kusalā dhammā parihāyantī’’ti. Aṭṭhamaṃ.
৫৯. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা কুসলা ধম্মা উপ্পজ্জন্তি উপ্পন্না ৰা অকুসলা ধম্মা পরিহাযন্তি যথযিদং, ভিক্খৰে, অপ্পমাদো। অপ্পমত্তস্স, ভিক্খৰে, অনুপ্পন্না চেৰ কুসলা ধম্মা উপ্পজ্জন্তি উপ্পন্না চ অকুসলা ধম্মা পরিহাযন্তী’’তি। নৰমং।
59. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṃ, bhikkhave, appamādo. Appamattassa, bhikkhave, anuppannā ceva kusalā dhammā uppajjanti uppannā ca akusalā dhammā parihāyantī’’ti. Navamaṃ.
৬০. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা অকুসলা ধম্মা উপ্পজ্জন্তি উপ্পন্না ৰা কুসলা ধম্মা পরিহাযন্তি যথযিদং, ভিক্খৰে, কোসজ্জং। কুসীতস্স, ভিক্খৰে, অনুপ্পন্না চেৰ অকুসলা ধম্মা উপ্পজ্জন্তি উপ্পন্না চ কুসলা ধম্মা পরিহাযন্তী’’তি। দসমং।
60. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ, bhikkhave, kosajjaṃ. Kusītassa, bhikkhave, anuppannā ceva akusalā dhammā uppajjanti uppannā ca kusalā dhammā parihāyantī’’ti. Dasamaṃ.
অচ্ছরাসঙ্ঘাতৰগ্গো ছট্ঠো।
Accharāsaṅghātavaggo chaṭṭho.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৬. অচ্ছরাসঙ্ঘাতৰগ্গৰণ্ণনা • 6. Accharāsaṅghātavaggavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৬. অচ্ছরাসঙ্ঘাতৰগ্গৰণ্ণনা • 6. Accharāsaṅghātavaggavaṇṇanā
