| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
6. අච්‌ඡරාසඞ්‌ඝාතවග්‌ගො
6. Accharāsaṅghātavaggo
51. ‘‘පභස්‌සරමිදං , භික්‌ඛවෙ, චිත්‌තං. තඤ්‌ච ඛො ආගන්‌තුකෙහි උපක්‌කිලෙසෙහි උපක්‌කිලිට්‌ඨං. තං අස්‌සුතවා පුථුජ්‌ජනො යථාභූතං නප්‌පජානාති. තස්‌මා ‘අස්‌සුතවතො පුථුජ්‌ජනස්‌ස චිත්‌තභාවනා නත්‌ථී’ති වදාමී’’ති. පඨමං.
51. ‘‘Pabhassaramidaṃ , bhikkhave, cittaṃ. Tañca kho āgantukehi upakkilesehi upakkiliṭṭhaṃ. Taṃ assutavā puthujjano yathābhūtaṃ nappajānāti. Tasmā ‘assutavato puthujjanassa cittabhāvanā natthī’ti vadāmī’’ti. Paṭhamaṃ.
52. ‘‘පභස්‌සරමිදං , භික්‌ඛවෙ, චිත්‌තං. තඤ්‌ච ඛො ආගන්‌තුකෙහි උපක්‌කිලෙසෙහි විප්‌පමුත්‌තං. තං සුතවා අරියසාවකො යථාභූතං පජානාති. තස්‌මා ‘සුතවතො අරියසාවකස්‌ස චිත්‌තභාවනා අත්‌ථී’ති වදාමී’’ති. දුතියං.
52. ‘‘Pabhassaramidaṃ , bhikkhave, cittaṃ. Tañca kho āgantukehi upakkilesehi vippamuttaṃ. Taṃ sutavā ariyasāvako yathābhūtaṃ pajānāti. Tasmā ‘sutavato ariyasāvakassa cittabhāvanā atthī’ti vadāmī’’ti. Dutiyaṃ.
53. ‘‘අච්‌ඡරාසඞ්‌ඝාතමත්‌තම්‌පි චෙ, භික්‌ඛවෙ, භික්‌ඛු මෙත්‌තාචිත්‌තං 1 ආසෙවති; අයං වුච්‌චති, භික්‌ඛවෙ – ‘භික්‌ඛු අරිත්‌තජ්‌ඣානො විහරති සත්‌ථුසාසනකරො ඔවාදපතිකරො, අමොඝං රට්‌ඨපිණ්‌ඩං භුඤ්‌ජති’. කො පන වාදො යෙ නං බහුලීකරොන්‌තී’’ති! තතියං.
53. ‘‘Accharāsaṅghātamattampi ce, bhikkhave, bhikkhu mettācittaṃ 2 āsevati; ayaṃ vuccati, bhikkhave – ‘bhikkhu arittajjhāno viharati satthusāsanakaro ovādapatikaro, amoghaṃ raṭṭhapiṇḍaṃ bhuñjati’. Ko pana vādo ye naṃ bahulīkarontī’’ti! Tatiyaṃ.
54. ‘‘අච්‌ඡරාසඞ්‌ඝාතමත්‌තම්‌පි චෙ, භික්‌ඛවෙ, භික්‌ඛු මෙත්‌තාචිත්‌තං භාවෙති; අයං වුච්‌චති, භික්‌ඛවෙ – ‘භික්‌ඛු අරිත්‌තජ්‌ඣානො විහරති සත්‌ථුසාසනකරො ඔවාදපතිකරො, අමොඝං රට්‌ඨපිණ්‌ඩං භුඤ්‌ජති’. කො පන වාදො යෙ නං බහුලීකරොන්‌තී’’ති! චතුත්‌ථං.
54. ‘‘Accharāsaṅghātamattampi ce, bhikkhave, bhikkhu mettācittaṃ bhāveti; ayaṃ vuccati, bhikkhave – ‘bhikkhu arittajjhāno viharati satthusāsanakaro ovādapatikaro, amoghaṃ raṭṭhapiṇḍaṃ bhuñjati’. Ko pana vādo ye naṃ bahulīkarontī’’ti! Catutthaṃ.
55. ‘‘අච්‌ඡරාසඞ්‌ඝාතමත්‌තම්‌පි චෙ, භික්‌ඛවෙ, භික්‌ඛු මෙත්‌තාචිත්‌තං මනසි කරොති; අයං වුච්‌චති, භික්‌ඛවෙ – ‘භික්‌ඛු අරිත්‌තජ්‌ඣානො විහරති සත්‌ථුසාසනකරො ඔවාදපතිකරො අමොඝං රට්‌ඨපිණ්‌ඩං භුඤ්‌ජති’. කො පන වාදො යෙ නං බහුලීකරොන්‌තී’’ති! පඤ්‌චමං.
55. ‘‘Accharāsaṅghātamattampi ce, bhikkhave, bhikkhu mettācittaṃ manasi karoti; ayaṃ vuccati, bhikkhave – ‘bhikkhu arittajjhāno viharati satthusāsanakaro ovādapatikaro amoghaṃ raṭṭhapiṇḍaṃ bhuñjati’. Ko pana vādo ye naṃ bahulīkarontī’’ti! Pañcamaṃ.
56. ‘‘යෙ කෙචි, භික්‌ඛවෙ, ධම්‌මා අකුසලා අකුසලභාගියා අකුසලපක්‌ඛිකා, සබ්‌බෙ තෙ මනොපුබ්‌බඞ්‌ගමා. මනො තෙසං ධම්‌මානං පඨමං උප්‌පජ්‌ජති, අන්‌වදෙව අකුසලා ධම්‌මා’’ති. ඡට්‌ඨං.
56. ‘‘Ye keci, bhikkhave, dhammā akusalā akusalabhāgiyā akusalapakkhikā, sabbe te manopubbaṅgamā. Mano tesaṃ dhammānaṃ paṭhamaṃ uppajjati, anvadeva akusalā dhammā’’ti. Chaṭṭhaṃ.
57. ‘‘යෙ කෙචි, භික්‌ඛවෙ, ධම්‌මා කුසලා කුසලභාගියා කුසලපක්‌ඛිකා, සබ්‌බෙ තෙ මනොපුබ්‌බඞ්‌ගමා. මනො තෙසං ධම්‌මානං පඨමං උප්‌පජ්‌ජති, අන්‌වදෙව කුසලා ධම්‌මා’’ති. සත්‌තමං.
57. ‘‘Ye keci, bhikkhave, dhammā kusalā kusalabhāgiyā kusalapakkhikā, sabbe te manopubbaṅgamā. Mano tesaṃ dhammānaṃ paṭhamaṃ uppajjati, anvadeva kusalā dhammā’’ti. Sattamaṃ.
58. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යෙන අනුප්‌පන්‌නා වා අකුසලා ධම්‌මා උප්‌පජ්‌ජන්‌ති උප්‌පන්‌නා වා කුසලා ධම්‌මා පරිහායන්‌ති යථයිදං, භික්‌ඛවෙ, පමාදො. පමත්‌තස්‌ස, භික්‌ඛවෙ, අනුප්‌පන්‌නා චෙව අකුසලා ධම්‌මා උප්‌පජ්‌ජන්‌ති උප්‌පන්‌නා ච කුසලා ධම්‌මා පරිහායන්‌තී’’ති. අට්‌ඨමං.
58. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ, bhikkhave, pamādo. Pamattassa, bhikkhave, anuppannā ceva akusalā dhammā uppajjanti uppannā ca kusalā dhammā parihāyantī’’ti. Aṭṭhamaṃ.
59. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යෙන අනුප්‌පන්‌නා වා කුසලා ධම්‌මා උප්‌පජ්‌ජන්‌ති උප්‌පන්‌නා වා අකුසලා ධම්‌මා පරිහායන්‌ති යථයිදං, භික්‌ඛවෙ, අප්‌පමාදො. අප්‌පමත්‌තස්‌ස, භික්‌ඛවෙ, අනුප්‌පන්‌නා චෙව කුසලා ධම්‌මා උප්‌පජ්‌ජන්‌ති උප්‌පන්‌නා ච අකුසලා ධම්‌මා පරිහායන්‌තී’’ති. නවමං.
59. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṃ, bhikkhave, appamādo. Appamattassa, bhikkhave, anuppannā ceva kusalā dhammā uppajjanti uppannā ca akusalā dhammā parihāyantī’’ti. Navamaṃ.
60. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යෙන අනුප්‌පන්‌නා වා අකුසලා ධම්‌මා උප්‌පජ්‌ජන්‌ති උප්‌පන්‌නා වා කුසලා ධම්‌මා පරිහායන්‌ති යථයිදං, භික්‌ඛවෙ, කොසජ්‌ජං. කුසීතස්‌ස, භික්‌ඛවෙ, අනුප්‌පන්‌නා චෙව අකුසලා ධම්‌මා උප්‌පජ්‌ජන්‌ති උප්‌පන්‌නා ච කුසලා ධම්‌මා පරිහායන්‌තී’’ති. දසමං.
60. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ, bhikkhave, kosajjaṃ. Kusītassa, bhikkhave, anuppannā ceva akusalā dhammā uppajjanti uppannā ca kusalā dhammā parihāyantī’’ti. Dasamaṃ.
අච්‌ඡරාසඞ්‌ඝාතවග්‌ගො ඡට්‌ඨො.
Accharāsaṅghātavaggo chaṭṭho.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 6. අච්‌ඡරාසඞ්‌ඝාතවග්‌ගවණ්‌ණනා • 6. Accharāsaṅghātavaggavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6. අච්‌ඡරාසඞ්‌ඝාතවග්‌ගවණ්‌ණනා • 6. Accharāsaṅghātavaggavaṇṇanā
