| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၆. အစ္ဆရာသုတ္တဝဏ္ဏနာ
6. Accharāsuttavaṇṇanā
၄၆. ‘‘အစ္ဆရာဂဏသင္ဃုဋ္ဌ’’န္တိ ဂာထာ ဒေဝပုတ္တေန ယေနာဓိပ္ပာယေန ဂာယိတာ, သော အနုပုဗ္ဗိကထာယ ဝိနာ န ပညာယတီတိ တံ အာဂမနတော ပဋ္ဌာယ ကထေန္တော ‘‘အယံ ကိရ ဒေဝပုတ္တော’’တိအာဒိမာဟ။ တတ္ထ သာသနေတိ ဣမသ္သေဝ သတ္ထုသာသနေ။ ကမ္မာကမ္မန္တိ ကမ္မဝိနိစ္ဆယံ။ အတ္ထပုရေက္ခာရတာယ အပ္ပကိစ္စတာယ စ သလ္လဟုကဝုတ္တိကော။ သယနသ္သ ကောဋ္ဌာသောတိ ဒိဝသံ ပုရိမယာမဉ္စ ဘာဝနာနုယောဂဝသေန ကိလန္တကာယသ္သ သမသ္သာသနတ္ထံ သေယ္ယာယ ဥပဂမနဘာဂော အနုညာတော။
46. ‘‘Accharāgaṇasaṅghuṭṭha’’nti gāthā devaputtena yenādhippāyena gāyitā, so anupubbikathāya vinā na paññāyatīti taṃ āgamanato paṭṭhāya kathento ‘‘ayaṃ kira devaputto’’tiādimāha. Tattha sāsaneti imasseva satthusāsane. Kammākammanti kammavinicchayaṃ. Atthapurekkhāratāya appakiccatāya ca sallahukavuttiko. Sayanassa koṭṭhāsoti divasaṃ purimayāmañca bhāvanānuyogavasena kilantakāyassa samassāsanatthaṃ seyyāya upagamanabhāgo anuññāto.
အဗ္ဘန္တရေတိ ကုစ္ဆိယံ ဘတ္တသ္သ ပရိတ္တတာယ သတ္ထကဝာတာတိ တိက္ခဘာဝေန သတ္ထကာ ဝိယ ကန္တနကာ ဝာတာ။ ဓုရသ္မိံယေဝာတိ ကိလေသမာရေန ယုဒ္ဓေ ဧဝ။ ဝိမုတ္တာယတနသီသေ ဌတ္ဝာ ဓမ္မံ ဒေသေန္တော ဝာ။ ဥပနိသ္သယမန္ဒတာယ အပရိပက္ကဉာဏတာယ အာသဝက္ခယံ အပ္ပတ္တော ကာလံ ကတ္ဝာတိ ယောဇနာ။ ဥပရိ ဌိတန္တိ ပရိက္ခာရဘာဝေန ဒိဗ္ဗဒုသ္သူပရိ ဌိတံ။ တထေဝ အဋ္ဌာသီတိ တာဟိ တထာ ဝုတ္တေပိ ယထာ တတော ပုဗ္ဗေ, တထေဝ အဋ္ဌာသိ။ သုဝဏ္ဏပဋ္ဋန္တိ နိဗ္ဗုဒ္ဓေ ပဋိဇိနိတ္ဝာ လဒ္ဓဗ္ဗသုဝဏ္ဏပဋ္ဋံ။ ဝီတိက္ကမသ္သ အကတတ္တာ အသမ္ဘိန္နေနေဝ သီလေန။ ယသ္မာ တသ္မိံ သတ္ထု သန္တိကံ အာဂစ္ဆန္တေ တာပိ တေန သဒ္ဓိံ အာဂမံသု တသ္မာ ‘‘အစ္ဆရာသင္ဃပရိဝုတော’’တိ ဝုတ္တံ။
Abbhantareti kucchiyaṃ bhattassa parittatāya satthakavātāti tikkhabhāvena satthakā viya kantanakā vātā. Dhurasmiṃyevāti kilesamārena yuddhe eva. Vimuttāyatanasīse ṭhatvā dhammaṃ desento vā. Upanissayamandatāya aparipakkañāṇatāya āsavakkhayaṃ appatto kālaṃ katvāti yojanā. Upari ṭhitanti parikkhārabhāvena dibbadussūpari ṭhitaṃ. Tatheva aṭṭhāsīti tāhi tathā vuttepi yathā tato pubbe, tatheva aṭṭhāsi. Suvaṇṇapaṭṭanti nibbuddhe paṭijinitvā laddhabbasuvaṇṇapaṭṭaṃ. Vītikkamassa akatattā asambhinneneva sīlena. Yasmā tasmiṃ satthu santikaṃ āgacchante tāpi tena saddhiṃ āgamaṃsu tasmā ‘‘accharāsaṅghaparivuto’’ti vuttaṃ.
သင္ဃောသိတန္တိ သင္ဂမ္မ ဃောသိတံ, တတ္ထ တတ္ထ အစ္ဆရာနံ ဂီတသဒ္ဒဝသေန ဃောသိတံ။ ပိသာစဂဏံ ကတ္ဝာ ဝဒတိ အစ္ဆန္ဒရာဂတာယ။ နိယာမစိတ္တတာယာတိ သမ္မတ္တနိယာမေ နိန္နစိတ္တတာယ။ ဂရုဘာဝေနာတိ တာသံ ဝသေ အဝတ္တနတော ဂရုဋ္ဌာနဘာဝေန။ ယာတ္ရာတိ နိဗ္ဗာနံ ပတိ ယာတ္ရာ။ တံ ပန ဝဋ္ဋတော နိဂ္ဂမနံ ဟောတီတိ အာဟ ‘‘ကထံ နိဂ္ဂမနံ ဘဝိသ္သတီ’’တိ။
Saṅghositanti saṅgamma ghositaṃ, tattha tattha accharānaṃ gītasaddavasena ghositaṃ. Pisācagaṇaṃ katvā vadati acchandarāgatāya. Niyāmacittatāyāti sammattaniyāme ninnacittatāya. Garubhāvenāti tāsaṃ vase avattanato garuṭṭhānabhāvena. Yātrāti nibbānaṃ pati yātrā. Taṃ pana vaṭṭato niggamanaṃ hotīti āha ‘‘kathaṃ niggamanaṃ bhavissatī’’ti.
အတိသလ္လေခတေဝာတိ အတိဝိယ ကိလေသာနံ သလ္လေခိတဝုတ္တိကော။ အကတာဘိနိဝေသသ္သာတိ ဘာဝနမနနုယုတ္တသ္သ အနာရဒ္ဓဝိပသ္သကသ္သ။ ကာရကသ္သာတိ သုဂတောဝာဒကာရကသ္သ သမ္မာပဋိပဇ္ဇတော။ သုညတာဝိပသ္သနန္တိ သုညတာဒီပနံ ဝိပသ္သနံ ဒုစ္စရိတတဏ္ဟာယ ဒူရီကရဏေန ဧကဝိဟာရိတာယ။ ဧကော မဂ္ဂော အသ္သာတိ လောကုတ္တရမဂ္ဂော ဧဝ အသ္သ အနာဂတော, ပုဗ္ဗဘာဂမဂ္ဂော ပန ကတပရိစယောတိ အတ္ထော။
Atisallekhatevāti ativiya kilesānaṃ sallekhitavuttiko. Akatābhinivesassāti bhāvanamananuyuttassa anāraddhavipassakassa. Kārakassāti sugatovādakārakassa sammāpaṭipajjato. Suññatāvipassananti suññatādīpanaṃ vipassanaṃ duccaritataṇhāya dūrīkaraṇena ekavihāritāya. Eko maggo assāti lokuttaramaggo eva assa anāgato, pubbabhāgamaggo pana kataparicayoti attho.
ကာယဝင္ကာဒီနန္တိ ကာယဒုစ္စရိတာဒီနံ အဘာဝတော သမုစ္ဆိန္ဒနေန အနုပလဗ္ဘနတော။ နတ္ထိ ဧတ္ထ ဘယံ, အသ္မိံ ဝာ အဓိဂတေ ပုဂ္ဂလသ္သ နတ္ထိ ဘယန္တိ အဘယံ နာမ။ သံသာရကန္တာရံ အတိက္ကမိတ္ဝာ နိဗ္ဗာနသင္ခာတံ ခေမံ အမတဋ္ဌာနံ ဂမနေ သုဂတသာရထိနာ သုသဇ္ဇိတယာနဘာဝတော ရထော အကူဇနောတိ အဋ္ဌင္ဂိကော မဂ္ဂောဝ အဓိပ္ပေတော။ ဓမ္မတော အနပေတတာယ အပရာပရုပ္ပတ္တိယာ စ ဓမ္မစက္ကေဟိ။
Kāyavaṅkādīnanti kāyaduccaritādīnaṃ abhāvato samucchindanena anupalabbhanato. Natthi ettha bhayaṃ, asmiṃ vā adhigate puggalassa natthi bhayanti abhayaṃ nāma. Saṃsārakantāraṃ atikkamitvā nibbānasaṅkhātaṃ khemaṃ amataṭṭhānaṃ gamane sugatasārathinā susajjitayānabhāvato ratho akūjanoti aṭṭhaṅgiko maggova adhippeto. Dhammato anapetatāya aparāparuppattiyā ca dhammacakkehi.
ဩတ္တပ္ပမ္ပိ ဂဟိတမေဝ အဝိနာဘာဝာ။ အပာလမ္ဗောတိ အဝသ္သယော။ ပရိဝာရောတိ ပရိက္ခာရော အဘိသင္ခရဏတော။ မဂ္ဂသ္သ ကရဏဋ္ဌာနေ ဓမ္မော တပ္ပရိယာပန္နာ သမ္မာဒိဋ္ဌိ။ အနိစ္စာဒိဝသေနာတိ အနိစ္စာနုပသ္သနာဒိဝသေန။ သောဓိတေသု ဝဇ္ဈမာနေသု။ ဘူမိလဒ္ဓဝဋ္ဋန္တိ ဘူမိလဒ္ဓသင္ခာတံ ဝဋ္ဋံ။ တတ္ထ ဝိပသ္သနာယ ပဝတ္တိဋ္ဌာနဘာဝတော ပဉ္စက္ခန္ဓာ ဘူမိ နာမ, ဝဋ္ဋမယကမ္မဘာဝတော တတ္ထ ဥပ္ပဇ္ဇနာရဟံ ကိလေသဇာတံ ဘူမိလဒ္ဓဝဋ္ဋံ။ ပရိဇာနမာနာတိ ပရိစ္ဆိန္ဒနဝသေန သမတိက္ကမဝသေန ဇာနမာနာ ပဋိဝိဇ္ဈန္တီ။
Ottappampi gahitameva avinābhāvā. Apālamboti avassayo. Parivāroti parikkhāro abhisaṅkharaṇato. Maggassa karaṇaṭṭhāne dhammo tappariyāpannā sammādiṭṭhi. Aniccādivasenāti aniccānupassanādivasena. Sodhitesu vajjhamānesu. Bhūmiladdhavaṭṭanti bhūmiladdhasaṅkhātaṃ vaṭṭaṃ. Tattha vipassanāya pavattiṭṭhānabhāvato pañcakkhandhā bhūmi nāma, vaṭṭamayakammabhāvato tattha uppajjanārahaṃ kilesajātaṃ bhūmiladdhavaṭṭaṃ. Parijānamānāti paricchindanavasena samatikkamavasena jānamānā paṭivijjhantī.
ကသ္မာ ဒေဝပုတ္တော သောတာပတ္တိဖလေယေဝ ပတိဋ္ဌာသိ, နနု စ သာ ဒေသနာ ဘဂဝတာ စတုမဂ္ဂပ္ပဓာနဘာဝေန ပဝတ္တိတာတိ အာဟ ‘‘ယထာ ဟီ’’တိအာဒိ။
Kasmā devaputto sotāpattiphaleyeva patiṭṭhāsi, nanu ca sā desanā bhagavatā catumaggappadhānabhāvena pavattitāti āha ‘‘yathā hī’’tiādi.
အစ္ဆရာသုတ္တဝဏ္ဏနာ နိဋ္ဌိတာ။
Accharāsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၆. အစ္ဆရာသုတ္တံ • 6. Accharāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၆. အစ္ဆရာသုတ္တဝဏ္ဏနာ • 6. Accharāsuttavaṇṇanā
