| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੬. ਅਚ੍ਛਰਾਸੁਤ੍ਤવਣ੍ਣਨਾ
6. Accharāsuttavaṇṇanā
੪੬. ‘‘ਅਚ੍ਛਰਾਗਣਸਙ੍ਘੁਟ੍ਠ’’ਨ੍ਤਿ ਗਾਥਾ ਦੇવਪੁਤ੍ਤੇਨ ਯੇਨਾਧਿਪ੍ਪਾਯੇਨ ਗਾਯਿਤਾ, ਸੋ ਅਨੁਪੁਬ੍ਬਿਕਥਾਯ વਿਨਾ ਨ ਪਞ੍ਞਾਯਤੀਤਿ ਤਂ ਆਗਮਨਤੋ ਪਟ੍ਠਾਯ ਕਥੇਨ੍ਤੋ ‘‘ਅਯਂ ਕਿਰ ਦੇવਪੁਤ੍ਤੋ’’ਤਿਆਦਿਮਾਹ। ਤਤ੍ਥ ਸਾਸਨੇਤਿ ਇਮਸ੍ਸੇવ ਸਤ੍ਥੁਸਾਸਨੇ। ਕਮ੍ਮਾਕਮ੍ਮਨ੍ਤਿ ਕਮ੍ਮવਿਨਿਚ੍ਛਯਂ। ਅਤ੍ਥਪੁਰੇਕ੍ਖਾਰਤਾਯ ਅਪ੍ਪਕਿਚ੍ਚਤਾਯ ਚ ਸਲ੍ਲਹੁਕવੁਤ੍ਤਿਕੋ। ਸਯਨਸ੍ਸ ਕੋਟ੍ਠਾਸੋਤਿ ਦਿવਸਂ ਪੁਰਿਮਯਾਮਞ੍ਚ ਭਾવਨਾਨੁਯੋਗવਸੇਨ ਕਿਲਨ੍ਤਕਾਯਸ੍ਸ ਸਮਸ੍ਸਾਸਨਤ੍ਥਂ ਸੇਯ੍ਯਾਯ ਉਪਗਮਨਭਾਗੋ ਅਨੁਞ੍ਞਾਤੋ।
46. ‘‘Accharāgaṇasaṅghuṭṭha’’nti gāthā devaputtena yenādhippāyena gāyitā, so anupubbikathāya vinā na paññāyatīti taṃ āgamanato paṭṭhāya kathento ‘‘ayaṃ kira devaputto’’tiādimāha. Tattha sāsaneti imasseva satthusāsane. Kammākammanti kammavinicchayaṃ. Atthapurekkhāratāya appakiccatāya ca sallahukavuttiko. Sayanassa koṭṭhāsoti divasaṃ purimayāmañca bhāvanānuyogavasena kilantakāyassa samassāsanatthaṃ seyyāya upagamanabhāgo anuññāto.
ਅਬ੍ਭਨ੍ਤਰੇਤਿ ਕੁਚ੍ਛਿਯਂ ਭਤ੍ਤਸ੍ਸ ਪਰਿਤ੍ਤਤਾਯ ਸਤ੍ਥਕવਾਤਾਤਿ ਤਿਕ੍ਖਭਾવੇਨ ਸਤ੍ਥਕਾ વਿਯ ਕਨ੍ਤਨਕਾ વਾਤਾ। ਧੁਰਸ੍ਮਿਂਯੇવਾਤਿ ਕਿਲੇਸਮਾਰੇਨ ਯੁਦ੍ਧੇ ਏવ। વਿਮੁਤ੍ਤਾਯਤਨਸੀਸੇ ਠਤ੍વਾ ਧਮ੍ਮਂ ਦੇਸੇਨ੍ਤੋ વਾ। ਉਪਨਿਸ੍ਸਯਮਨ੍ਦਤਾਯ ਅਪਰਿਪਕ੍ਕਞਾਣਤਾਯ ਆਸવਕ੍ਖਯਂ ਅਪ੍ਪਤ੍ਤੋ ਕਾਲਂ ਕਤ੍વਾਤਿ ਯੋਜਨਾ। ਉਪਰਿ ਠਿਤਨ੍ਤਿ ਪਰਿਕ੍ਖਾਰਭਾવੇਨ ਦਿਬ੍ਬਦੁਸ੍ਸੂਪਰਿ ਠਿਤਂ। ਤਥੇવ ਅਟ੍ਠਾਸੀਤਿ ਤਾਹਿ ਤਥਾ વੁਤ੍ਤੇਪਿ ਯਥਾ ਤਤੋ ਪੁਬ੍ਬੇ, ਤਥੇવ ਅਟ੍ਠਾਸਿ। ਸੁવਣ੍ਣਪਟ੍ਟਨ੍ਤਿ ਨਿਬ੍ਬੁਦ੍ਧੇ ਪਟਿਜਿਨਿਤ੍વਾ ਲਦ੍ਧਬ੍ਬਸੁવਣ੍ਣਪਟ੍ਟਂ। વੀਤਿਕ੍ਕਮਸ੍ਸ ਅਕਤਤ੍ਤਾ ਅਸਮ੍ਭਿਨ੍ਨੇਨੇવ ਸੀਲੇਨ। ਯਸ੍ਮਾ ਤਸ੍ਮਿਂ ਸਤ੍ਥੁ ਸਨ੍ਤਿਕਂ ਆਗਚ੍ਛਨ੍ਤੇ ਤਾਪਿ ਤੇਨ ਸਦ੍ਧਿਂ ਆਗਮਂਸੁ ਤਸ੍ਮਾ ‘‘ਅਚ੍ਛਰਾਸਙ੍ਘਪਰਿવੁਤੋ’’ਤਿ વੁਤ੍ਤਂ।
Abbhantareti kucchiyaṃ bhattassa parittatāya satthakavātāti tikkhabhāvena satthakā viya kantanakā vātā. Dhurasmiṃyevāti kilesamārena yuddhe eva. Vimuttāyatanasīse ṭhatvā dhammaṃ desento vā. Upanissayamandatāya aparipakkañāṇatāya āsavakkhayaṃ appatto kālaṃ katvāti yojanā. Upari ṭhitanti parikkhārabhāvena dibbadussūpari ṭhitaṃ. Tatheva aṭṭhāsīti tāhi tathā vuttepi yathā tato pubbe, tatheva aṭṭhāsi. Suvaṇṇapaṭṭanti nibbuddhe paṭijinitvā laddhabbasuvaṇṇapaṭṭaṃ. Vītikkamassa akatattā asambhinneneva sīlena. Yasmā tasmiṃ satthu santikaṃ āgacchante tāpi tena saddhiṃ āgamaṃsu tasmā ‘‘accharāsaṅghaparivuto’’ti vuttaṃ.
ਸਙ੍ਘੋਸਿਤਨ੍ਤਿ ਸਙ੍ਗਮ੍ਮ ਘੋਸਿਤਂ, ਤਤ੍ਥ ਤਤ੍ਥ ਅਚ੍ਛਰਾਨਂ ਗੀਤਸਦ੍ਦવਸੇਨ ਘੋਸਿਤਂ। ਪਿਸਾਚਗਣਂ ਕਤ੍વਾ વਦਤਿ ਅਚ੍ਛਨ੍ਦਰਾਗਤਾਯ। ਨਿਯਾਮਚਿਤ੍ਤਤਾਯਾਤਿ ਸਮ੍ਮਤ੍ਤਨਿਯਾਮੇ ਨਿਨ੍ਨਚਿਤ੍ਤਤਾਯ। ਗਰੁਭਾવੇਨਾਤਿ ਤਾਸਂ વਸੇ ਅવਤ੍ਤਨਤੋ ਗਰੁਟ੍ਠਾਨਭਾવੇਨ। ਯਾਤ੍ਰਾਤਿ ਨਿਬ੍ਬਾਨਂ ਪਤਿ ਯਾਤ੍ਰਾ। ਤਂ ਪਨ વਟ੍ਟਤੋ ਨਿਗ੍ਗਮਨਂ ਹੋਤੀਤਿ ਆਹ ‘‘ਕਥਂ ਨਿਗ੍ਗਮਨਂ ਭવਿਸ੍ਸਤੀ’’ਤਿ।
Saṅghositanti saṅgamma ghositaṃ, tattha tattha accharānaṃ gītasaddavasena ghositaṃ. Pisācagaṇaṃ katvā vadati acchandarāgatāya. Niyāmacittatāyāti sammattaniyāme ninnacittatāya. Garubhāvenāti tāsaṃ vase avattanato garuṭṭhānabhāvena. Yātrāti nibbānaṃ pati yātrā. Taṃ pana vaṭṭato niggamanaṃ hotīti āha ‘‘kathaṃ niggamanaṃ bhavissatī’’ti.
ਅਤਿਸਲ੍ਲੇਖਤੇવਾਤਿ ਅਤਿવਿਯ ਕਿਲੇਸਾਨਂ ਸਲ੍ਲੇਖਿਤવੁਤ੍ਤਿਕੋ। ਅਕਤਾਭਿਨਿવੇਸਸ੍ਸਾਤਿ ਭਾવਨਮਨਨੁਯੁਤ੍ਤਸ੍ਸ ਅਨਾਰਦ੍ਧવਿਪਸ੍ਸਕਸ੍ਸ। ਕਾਰਕਸ੍ਸਾਤਿ ਸੁਗਤੋવਾਦਕਾਰਕਸ੍ਸ ਸਮ੍ਮਾਪਟਿਪਜ੍ਜਤੋ। ਸੁਞ੍ਞਤਾવਿਪਸ੍ਸਨਨ੍ਤਿ ਸੁਞ੍ਞਤਾਦੀਪਨਂ વਿਪਸ੍ਸਨਂ ਦੁਚ੍ਚਰਿਤਤਣ੍ਹਾਯ ਦੂਰੀਕਰਣੇਨ ਏਕવਿਹਾਰਿਤਾਯ। ਏਕੋ ਮਗ੍ਗੋ ਅਸ੍ਸਾਤਿ ਲੋਕੁਤ੍ਤਰਮਗ੍ਗੋ ਏવ ਅਸ੍ਸ ਅਨਾਗਤੋ, ਪੁਬ੍ਬਭਾਗਮਗ੍ਗੋ ਪਨ ਕਤਪਰਿਚਯੋਤਿ ਅਤ੍ਥੋ।
Atisallekhatevāti ativiya kilesānaṃ sallekhitavuttiko. Akatābhinivesassāti bhāvanamananuyuttassa anāraddhavipassakassa. Kārakassāti sugatovādakārakassa sammāpaṭipajjato. Suññatāvipassananti suññatādīpanaṃ vipassanaṃ duccaritataṇhāya dūrīkaraṇena ekavihāritāya. Eko maggo assāti lokuttaramaggo eva assa anāgato, pubbabhāgamaggo pana kataparicayoti attho.
ਕਾਯવਙ੍ਕਾਦੀਨਨ੍ਤਿ ਕਾਯਦੁਚ੍ਚਰਿਤਾਦੀਨਂ ਅਭਾવਤੋ ਸਮੁਚ੍ਛਿਨ੍ਦਨੇਨ ਅਨੁਪਲਬ੍ਭਨਤੋ। ਨਤ੍ਥਿ ਏਤ੍ਥ ਭਯਂ, ਅਸ੍ਮਿਂ વਾ ਅਧਿਗਤੇ ਪੁਗ੍ਗਲਸ੍ਸ ਨਤ੍ਥਿ ਭਯਨ੍ਤਿ ਅਭਯਂ ਨਾਮ। ਸਂਸਾਰਕਨ੍ਤਾਰਂ ਅਤਿਕ੍ਕਮਿਤ੍વਾ ਨਿਬ੍ਬਾਨਸਙ੍ਖਾਤਂ ਖੇਮਂ ਅਮਤਟ੍ਠਾਨਂ ਗਮਨੇ ਸੁਗਤਸਾਰਥਿਨਾ ਸੁਸਜ੍ਜਿਤਯਾਨਭਾવਤੋ ਰਥੋ ਅਕੂਜਨੋਤਿ ਅਟ੍ਠਙ੍ਗਿਕੋ ਮਗ੍ਗੋવ ਅਧਿਪ੍ਪੇਤੋ। ਧਮ੍ਮਤੋ ਅਨਪੇਤਤਾਯ ਅਪਰਾਪਰੁਪ੍ਪਤ੍ਤਿਯਾ ਚ ਧਮ੍ਮਚਕ੍ਕੇਹਿ।
Kāyavaṅkādīnanti kāyaduccaritādīnaṃ abhāvato samucchindanena anupalabbhanato. Natthi ettha bhayaṃ, asmiṃ vā adhigate puggalassa natthi bhayanti abhayaṃ nāma. Saṃsārakantāraṃ atikkamitvā nibbānasaṅkhātaṃ khemaṃ amataṭṭhānaṃ gamane sugatasārathinā susajjitayānabhāvato ratho akūjanoti aṭṭhaṅgiko maggova adhippeto. Dhammato anapetatāya aparāparuppattiyā ca dhammacakkehi.
ਓਤ੍ਤਪ੍ਪਮ੍ਪਿ ਗਹਿਤਮੇવ ਅવਿਨਾਭਾવਾ। ਅਪਾਲਮ੍ਬੋਤਿ ਅવਸ੍ਸਯੋ। ਪਰਿવਾਰੋਤਿ ਪਰਿਕ੍ਖਾਰੋ ਅਭਿਸਙ੍ਖਰਣਤੋ। ਮਗ੍ਗਸ੍ਸ ਕਰਣਟ੍ਠਾਨੇ ਧਮ੍ਮੋ ਤਪ੍ਪਰਿਯਾਪਨ੍ਨਾ ਸਮ੍ਮਾਦਿਟ੍ਠਿ। ਅਨਿਚ੍ਚਾਦਿવਸੇਨਾਤਿ ਅਨਿਚ੍ਚਾਨੁਪਸ੍ਸਨਾਦਿવਸੇਨ। ਸੋਧਿਤੇਸੁ વਜ੍ਝਮਾਨੇਸੁ। ਭੂਮਿਲਦ੍ਧવਟ੍ਟਨ੍ਤਿ ਭੂਮਿਲਦ੍ਧਸਙ੍ਖਾਤਂ વਟ੍ਟਂ। ਤਤ੍ਥ વਿਪਸ੍ਸਨਾਯ ਪવਤ੍ਤਿਟ੍ਠਾਨਭਾવਤੋ ਪਞ੍ਚਕ੍ਖਨ੍ਧਾ ਭੂਮਿ ਨਾਮ, વਟ੍ਟਮਯਕਮ੍ਮਭਾવਤੋ ਤਤ੍ਥ ਉਪ੍ਪਜ੍ਜਨਾਰਹਂ ਕਿਲੇਸਜਾਤਂ ਭੂਮਿਲਦ੍ਧવਟ੍ਟਂ। ਪਰਿਜਾਨਮਾਨਾਤਿ ਪਰਿਚ੍ਛਿਨ੍ਦਨવਸੇਨ ਸਮਤਿਕ੍ਕਮવਸੇਨ ਜਾਨਮਾਨਾ ਪਟਿવਿਜ੍ਝਨ੍ਤੀ।
Ottappampi gahitameva avinābhāvā. Apālamboti avassayo. Parivāroti parikkhāro abhisaṅkharaṇato. Maggassa karaṇaṭṭhāne dhammo tappariyāpannā sammādiṭṭhi. Aniccādivasenāti aniccānupassanādivasena. Sodhitesu vajjhamānesu. Bhūmiladdhavaṭṭanti bhūmiladdhasaṅkhātaṃ vaṭṭaṃ. Tattha vipassanāya pavattiṭṭhānabhāvato pañcakkhandhā bhūmi nāma, vaṭṭamayakammabhāvato tattha uppajjanārahaṃ kilesajātaṃ bhūmiladdhavaṭṭaṃ. Parijānamānāti paricchindanavasena samatikkamavasena jānamānā paṭivijjhantī.
ਕਸ੍ਮਾ ਦੇવਪੁਤ੍ਤੋ ਸੋਤਾਪਤ੍ਤਿਫਲੇਯੇવ ਪਤਿਟ੍ਠਾਸਿ, ਨਨੁ ਚ ਸਾ ਦੇਸਨਾ ਭਗવਤਾ ਚਤੁਮਗ੍ਗਪ੍ਪਧਾਨਭਾવੇਨ ਪવਤ੍ਤਿਤਾਤਿ ਆਹ ‘‘ਯਥਾ ਹੀ’’ਤਿਆਦਿ।
Kasmā devaputto sotāpattiphaleyeva patiṭṭhāsi, nanu ca sā desanā bhagavatā catumaggappadhānabhāvena pavattitāti āha ‘‘yathā hī’’tiādi.
ਅਚ੍ਛਰਾਸੁਤ੍ਤવਣ੍ਣਨਾ ਨਿਟ੍ਠਿਤਾ।
Accharāsuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੬. ਅਚ੍ਛਰਾਸੁਤ੍ਤਂ • 6. Accharāsuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੬. ਅਚ੍ਛਰਾਸੁਤ੍ਤવਣ੍ਣਨਾ • 6. Accharāsuttavaṇṇanā
