| Library / Tipiṭaka / д̇ибидага • Tipiṭaka / маж̇жхиманигааяа • Majjhimanikāya |
3. ажчарияааб̣бхуд̇асуд̇д̇ам̣
3. Acchariyaabbhutasuttaṃ
197. звам̣ мз суд̇ам̣ – згам̣ самаяам̣ бхаг̇аваа саавад̇т̇ияам̣ вихарад̇и ж̇зд̇аванз анаат̇абин̣д̣игасса аараамз. ат̇а ко самб̣ахулаанам̣ бхигкуунам̣ бажчаабхад̇д̇ам̣ бин̣д̣абаад̇абадигганд̇аанам̣ убадтаанасаалааяам̣ саннисиннаанам̣ саннибад̇ид̇аанам̣ аяаманд̇араагат̇аа уд̣̇абаад̣̇и – ‘‘ажчарияам̣, аавусо, аб̣бхуд̇ам̣, аавусо, д̇ат̇ааг̇ад̇асса махид̣̇д̇хигад̇аа махаанубхаавад̇аа, яад̇ра хи наама д̇ат̇ааг̇ад̇о ад̇ийд̇з б̣уд̣̇д̇хз бариниб̣б̣уд̇з чиннабабан̃жз чиннавадумз барияаад̣̇иннаваддз саб̣б̣ад̣̇угкавийд̇ивад̇д̇з ж̇ааниссад̇и 1 – ‘звам̣ж̇ажжаа д̇з бхаг̇аванд̇о ахзсум̣’ ид̇иби, ‘звам̣наамаа д̇з бхаг̇аванд̇о ахзсум̣’ ид̇иби, ‘звам̣г̇од̇д̇аа д̇з бхаг̇аванд̇о ахзсум̣’ ид̇иби, ‘звам̣сийлаа д̇з бхаг̇аванд̇о ахзсум̣’ ид̇иби, ‘звам̣д̇хаммаа д̇з бхаг̇аванд̇о ахзсум̣’ ид̇иби, ‘звам̣бан̃н̃аа д̇з бхаг̇аванд̇о ахзсум̣’ ид̇иби, ‘звам̣вихаарий д̇з бхаг̇аванд̇о ахзсум̣’ ид̇иби, ‘звам̣вимуд̇д̇аа д̇з бхаг̇аванд̇о ахзсум̣’ ид̇ибий’’д̇и! звам̣ вуд̇д̇з, ааяасмаа аананд̣̇о д̇з бхигкуу зд̇ад̣̇авожа – ‘‘ажчарияаа жзва, аавусо, д̇ат̇ааг̇ад̇аа ажчарияад̇хаммасаманнааг̇ад̇аа жа; аб̣бхуд̇аа жзва, аавусо, д̇ат̇ааг̇ад̇аа аб̣бхуд̇ад̇хаммасаманнааг̇ад̇аа жаа’’д̇и. аяан̃жа хид̣̇ам̣ д̇зсам̣ бхигкуунам̣ анд̇араагат̇аа виббагад̇аа ход̇и.
197. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho sambahulānaṃ bhikkhūnaṃ pacchābhattaṃ piṇḍapātapaṭikkantānaṃ upaṭṭhānasālāyaṃ sannisinnānaṃ sannipatitānaṃ ayamantarākathā udapādi – ‘‘acchariyaṃ, āvuso, abbhutaṃ, āvuso, tathāgatassa mahiddhikatā mahānubhāvatā, yatra hi nāma tathāgato atīte buddhe parinibbute chinnapapañce chinnavaṭume pariyādinnavaṭṭe sabbadukkhavītivatte jānissati 2 – ‘evaṃjaccā te bhagavanto ahesuṃ’ itipi, ‘evaṃnāmā te bhagavanto ahesuṃ’ itipi, ‘evaṃgottā te bhagavanto ahesuṃ’ itipi, ‘evaṃsīlā te bhagavanto ahesuṃ’ itipi, ‘evaṃdhammā te bhagavanto ahesuṃ’ itipi, ‘evaṃpaññā te bhagavanto ahesuṃ’ itipi, ‘evaṃvihārī te bhagavanto ahesuṃ’ itipi, ‘evaṃvimuttā te bhagavanto ahesuṃ’ itipī’’ti! Evaṃ vutte, āyasmā ānando te bhikkhū etadavoca – ‘‘acchariyā ceva, āvuso, tathāgatā acchariyadhammasamannāgatā ca; abbhutā ceva, āvuso, tathāgatā abbhutadhammasamannāgatā cā’’ti. Ayañca hidaṃ tesaṃ bhikkhūnaṃ antarākathā vippakatā hoti.
198. ат̇а ко бхаг̇аваа сааяанхасамаяам̣ бадисаллаанаа вудтид̇о язнубадтаанасаалаа д̇знубасан̇гами; убасан̇гамид̇ваа бан̃н̃ад̇д̇з аасанз нисийд̣̇и . нисаж̇ж̇а ко бхаг̇аваа бхигкуу ааманд̇зси – ‘‘гааяа нуд̇т̇а, бхигкавз, зд̇арахи гат̇ааяа саннисиннаа, гаа жа бана во анд̇араагат̇аа виббагад̇аа’’д̇и? ‘‘ид̇ха, бханд̇з, амхаагам̣ бажчаабхад̇д̇ам̣ бин̣д̣абаад̇абадигганд̇аанам̣ убадтаанасаалааяам̣ саннисиннаанам̣ саннибад̇ид̇аанам̣ аяаманд̇араагат̇аа уд̣̇абаад̣̇и – ‘ажчарияам̣, аавусо, аб̣бхуд̇ам̣, аавусо, д̇ат̇ааг̇ад̇асса махид̣̇д̇хигад̇аа махаанубхаавад̇аа, яад̇ра хи наама д̇ат̇ааг̇ад̇о ад̇ийд̇з б̣уд̣̇д̇хз бариниб̣б̣уд̇з чиннабабан̃жз чиннавадумз барияаад̣̇иннаваддз саб̣б̣ад̣̇угкавийд̇ивад̇д̇з ж̇ааниссад̇и – звам̣ж̇ажжаа д̇з бхаг̇аванд̇о ахзсум̣ ид̇иби, звам̣наамаа… звам̣г̇од̇д̇аа… звам̣сийлаа… звам̣д̇хаммаа.. звам̣бан̃н̃аа… звам̣вихаарий… звам̣вимуд̇д̇аа д̇з бхаг̇аванд̇о ахзсум̣ ид̇ибий’д̇и! звам̣ вуд̇д̇з, бханд̇з, ааяасмаа аананд̣̇о амхз зд̇ад̣̇авожа – ‘ажчарияаа жзва, аавусо, д̇ат̇ааг̇ад̇аа ажчарияад̇хаммасаманнааг̇ад̇аа жа, аб̣бхуд̇аа жзва, аавусо, д̇ат̇ааг̇ад̇аа аб̣бхуд̇ад̇хаммасаманнааг̇ад̇аа жаа’д̇и. аяам̣ ко но, бханд̇з, анд̇араагат̇аа виббагад̇аа; ат̇а бхаг̇аваа ануббад̇д̇о’’д̇и.
198. Atha kho bhagavā sāyanhasamayaṃ paṭisallānā vuṭṭhito yenupaṭṭhānasālā tenupasaṅkami; upasaṅkamitvā paññatte āsane nisīdi . Nisajja kho bhagavā bhikkhū āmantesi – ‘‘kāya nuttha, bhikkhave, etarahi kathāya sannisinnā, kā ca pana vo antarākathā vippakatā’’ti? ‘‘Idha, bhante, amhākaṃ pacchābhattaṃ piṇḍapātapaṭikkantānaṃ upaṭṭhānasālāyaṃ sannisinnānaṃ sannipatitānaṃ ayamantarākathā udapādi – ‘acchariyaṃ, āvuso, abbhutaṃ, āvuso, tathāgatassa mahiddhikatā mahānubhāvatā, yatra hi nāma tathāgato atīte buddhe parinibbute chinnapapañce chinnavaṭume pariyādinnavaṭṭe sabbadukkhavītivatte jānissati – evaṃjaccā te bhagavanto ahesuṃ itipi, evaṃnāmā… evaṃgottā… evaṃsīlā… evaṃdhammā.. evaṃpaññā… evaṃvihārī… evaṃvimuttā te bhagavanto ahesuṃ itipī’ti! Evaṃ vutte, bhante, āyasmā ānando amhe etadavoca – ‘acchariyā ceva, āvuso, tathāgatā acchariyadhammasamannāgatā ca, abbhutā ceva, āvuso, tathāgatā abbhutadhammasamannāgatā cā’ti. Ayaṃ kho no, bhante, antarākathā vippakatā; atha bhagavā anuppatto’’ti.
199. ат̇а ко бхаг̇аваа ааяасманд̇ам̣ аананд̣̇ам̣ ааманд̇зси – ‘‘д̇асмаад̇иха д̇ам̣, аананд̣̇а, бхияяосомад̇д̇ааяа бадибханд̇у д̇ат̇ааг̇ад̇асса ажчарияаа аб̣бхуд̇ад̇хаммаа’’д̇и 3.
199. Atha kho bhagavā āyasmantaṃ ānandaṃ āmantesi – ‘‘tasmātiha taṃ, ānanda, bhiyyosomattāya paṭibhantu tathāgatassa acchariyā abbhutadhammā’’ti 4.
‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘сад̇о самбаж̇аано, аананд̣̇а, б̣од̇хисад̇д̇о д̇усид̇ам̣ гааяам̣ убабаж̇ж̇ий’д̇и. яамби, бханд̇з, сад̇о самбаж̇аано б̣од̇хисад̇д̇о д̇усид̇ам̣ гааяам̣ убабаж̇ж̇и ид̣̇ам̣баахам̣ , бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘sato sampajāno, ānanda, bodhisatto tusitaṃ kāyaṃ upapajjī’ti. Yampi, bhante, sato sampajāno bodhisatto tusitaṃ kāyaṃ upapajji idaṃpāhaṃ , bhante, bhagavato acchariyaṃ abbhutadhammaṃ dhāremi.
‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘сад̇о самбаж̇аано, аананд̣̇а, б̣од̇хисад̇д̇о д̇усид̇з гааяз адтаасий’д̇и. яамби, бханд̇з, сад̇о самбаж̇аано б̣од̇хисад̇д̇о д̇усид̇з гааяз адтааси ид̣̇ам̣баахам̣ 5, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘sato sampajāno, ānanda, bodhisatto tusite kāye aṭṭhāsī’ti. Yampi, bhante, sato sampajāno bodhisatto tusite kāye aṭṭhāsi idaṃpāhaṃ 6, bhante, bhagavato acchariyaṃ abbhutadhammaṃ dhāremi.
200. ‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яаавад̇ааяугам̣, аананд̣̇а, б̣од̇хисад̇д̇о д̇усид̇з гааяз адтаасий’д̇и. яамби, бханд̇з, яаавад̇ааяугам̣ б̣од̇хисад̇д̇о д̇усид̇з гааяз адтааси ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
200. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yāvatāyukaṃ, ānanda, bodhisatto tusite kāye aṭṭhāsī’ti. Yampi, bhante, yāvatāyukaṃ bodhisatto tusite kāye aṭṭhāsi idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘сад̇о самбаж̇аано, аананд̣̇а, б̣од̇хисад̇д̇о д̇усид̇аа, гааяаа жавид̇ваа маад̇угужчим̣ оггамий’д̇и. яамби, бханд̇з , сад̇о самбаж̇аано б̣од̇хисад̇д̇о д̇усид̇аа гааяаа жавид̇ваа маад̇угужчим̣ оггами ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘sato sampajāno, ānanda, bodhisatto tusitā, kāyā cavitvā mātukucchiṃ okkamī’ti. Yampi, bhante , sato sampajāno bodhisatto tusitā kāyā cavitvā mātukucchiṃ okkami idaṃpāhaṃ, bhante, bhagavato acchariyaṃ abbhutadhammaṃ dhāremi.
201. ‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яад̣̇аа, аананд̣̇а, б̣од̇хисад̇д̇о д̇усид̇аа гааяаа жавид̇ваа маад̇угужчим̣ оггамад̇и, ат̇а сад̣̇звагз логз самаарагз саб̣рахмагз сассаман̣аб̣раахман̣ияаа баж̇ааяа сад̣̇звамануссааяа аббамаан̣о ул̣ааро обхаасо логз баад̇убхавад̇и ад̇иггаммзва д̣̇зваанам̣ д̣̇зваанубхаавам̣. яааби д̇аа логанд̇аригаа агхаа асам̣вуд̇аа анд̇хагаараа анд̇хагаарад̇имисаа, яад̇т̇абимз жанд̣̇имасуурияаа звам̣махид̣̇д̇хигаа звам̣махаанубхааваа аабхааяа наанубхонд̇и д̇ад̇т̇аби аббамаан̣о ул̣ааро обхаасо логз баад̇убхавад̇и ад̇иггаммзва д̣̇зваанам̣ д̣̇зваанубхаавам̣. язби д̇ад̇т̇а сад̇д̇аа убабаннаа д̇зби д̇знобхаасзна ан̃н̃аман̃н̃ам̣ сан̃ж̇аананд̇и – ан̃н̃зби гира, бхо, санд̇и сад̇д̇аа ид̇хуубабаннаад̇и. аяан̃жа д̣̇асасахассий логад̇хаад̇у сан̇гамбад̇и самбагамбад̇и самбавзд̇хад̇и аббамаан̣о жа ул̣ааро обхаасо логз баад̇убхавад̇и ад̇иггаммзва д̣̇зваанам̣ д̣̇зваанубхаава’нд̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
201. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto tusitā kāyā cavitvā mātukucchiṃ okkamati, atha sadevake loke samārake sabrahmake sassamaṇabrāhmaṇiyā pajāya sadevamanussāya appamāṇo uḷāro obhāso loke pātubhavati atikkammeva devānaṃ devānubhāvaṃ. Yāpi tā lokantarikā aghā asaṃvutā andhakārā andhakāratimisā, yatthapime candimasūriyā evaṃmahiddhikā evaṃmahānubhāvā ābhāya nānubhonti tatthapi appamāṇo uḷāro obhāso loke pātubhavati atikkammeva devānaṃ devānubhāvaṃ. Yepi tattha sattā upapannā tepi tenobhāsena aññamaññaṃ sañjānanti – aññepi kira, bho, santi sattā idhūpapannāti. Ayañca dasasahassī lokadhātu saṅkampati sampakampati sampavedhati appamāṇo ca uḷāro obhāso loke pātubhavati atikkammeva devānaṃ devānubhāva’nti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
202. ‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яад̣̇аа, аананд̣̇а, б̣од̇хисад̇д̇о маад̇угужчим̣ огганд̇о ход̇и, жад̇д̇ааро д̣̇звабуд̇д̇аа жад̇уд̣̇д̣̇исам̣ аарагкааяа убаг̇ажчанд̇и – маа нам̣ б̣од̇хисад̇д̇ам̣ ваа б̣од̇хисад̇д̇амаад̇арам̣ ваа мануссо ваа амануссо ваа гожи ваа вихзтзсий’д̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
202. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchiṃ okkanto hoti, cattāro devaputtā catuddisaṃ ārakkhāya upagacchanti – mā naṃ bodhisattaṃ vā bodhisattamātaraṃ vā manusso vā amanusso vā koci vā viheṭhesī’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
203. ‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яад̣̇аа, аананд̣̇а, б̣од̇хисад̇д̇о маад̇угужчим̣ огганд̇о ход̇и, багад̇ияаа сийлавад̇ий б̣од̇хисад̇д̇амаад̇аа ход̇и вирад̇аа баан̣аад̇ибаад̇аа вирад̇аа ад̣̇иннаад̣̇аанаа вирад̇аа гаамзсумижчаажаараа вирад̇аа мусааваад̣̇аа вирад̇аа сураамзраяамаж̇ж̇абамаад̣̇адтаанаа’д̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
203. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchiṃ okkanto hoti, pakatiyā sīlavatī bodhisattamātā hoti viratā pāṇātipātā viratā adinnādānā viratā kāmesumicchācārā viratā musāvādā viratā surāmerayamajjapamādaṭṭhānā’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яад̣̇аа , аананд̣̇а, б̣од̇хисад̇д̇о маад̇угужчим̣ огганд̇о ход̇и, на б̣од̇хисад̇д̇амаад̇у бурисзсу маанасам̣ уббаж̇ж̇ад̇и гаамаг̇ун̣уубасам̣хид̇ам̣, анад̇иггаманийяаа жа б̣од̇хисад̇д̇амаад̇аа ход̇и гзнажи бурисзна рад̇д̇ажид̇д̇знаа’д̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā , ānanda, bodhisatto mātukucchiṃ okkanto hoti, na bodhisattamātu purisesu mānasaṃ uppajjati kāmaguṇūpasaṃhitaṃ, anatikkamanīyā ca bodhisattamātā hoti kenaci purisena rattacittenā’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яад̣̇аа, аананд̣̇а, б̣од̇хисад̇д̇о маад̇угужчим̣ огганд̇о ход̇и, лаабхиний б̣од̇хисад̇д̇амаад̇аа ход̇и бан̃жаннам̣ гаамаг̇ун̣аанам̣. саа бан̃жахи гаамаг̇ун̣зхи самаббид̇аа саман̇г̇ийбхууд̇аа барижаарзд̇ий’д̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchiṃ okkanto hoti, lābhinī bodhisattamātā hoti pañcannaṃ kāmaguṇānaṃ. Sā pañcahi kāmaguṇehi samappitā samaṅgībhūtā paricāretī’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
204. ‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яад̣̇аа, аананд̣̇а, б̣од̇хисад̇д̇о маад̇угужчим̣ огганд̇о ход̇и, на б̣од̇хисад̇д̇амаад̇у гожид̣̇зва ааб̣аад̇хо уббаж̇ж̇ад̇и; сукиний б̣од̇хисад̇д̇амаад̇аа ход̇и агиланд̇агааяаа; б̣од̇хисад̇д̇ан̃жа б̣од̇хисад̇д̇амаад̇аа д̇ирогужчиг̇ад̇ам̣ бассад̇и саб̣б̣ан̇г̇абажжан̇г̇ам̣ ахийнинд̣̇рияам̣. сзяяат̇ааби, аананд̣̇а, ман̣и взл̣урияо субхо ж̇аад̇имаа адтам̣со субаригаммагад̇о. д̇ад̇раасса суд̇д̇ам̣ аавуд̇ам̣ нийлам̣ ваа бийд̇ам̣ ваа лохид̇ам̣ ваа од̣̇аад̇ам̣ ваа бан̣д̣усуд̇д̇ам̣ ваа. д̇амзнам̣ жагкумаа бурисо хад̇т̇з гарид̇ваа бажжавзгкзяяа – аяам̣ ко ман̣и взл̣урияо субхо ж̇аад̇имаа адтам̣со субаригаммагад̇о, д̇ад̇рид̣̇ам̣ суд̇д̇ам̣ аавуд̇ам̣ нийлам̣ ваа бийд̇ам̣ ваа лохид̇ам̣ ваа од̣̇аад̇ам̣ ваа бан̣д̣усуд̇д̇ам̣ ваад̇и. звамзва ко, аананд̣̇а, яад̣̇аа б̣од̇хисад̇д̇о маад̇угужчим̣ огганд̇о ход̇и , на б̣од̇хисад̇д̇амаад̇у гожид̣̇зва ааб̣аад̇хо уббаж̇ж̇ад̇и; сукиний б̣од̇хисад̇д̇амаад̇аа ход̇и агиланд̇агааяаа; б̣од̇хисад̇д̇ан̃жа б̣од̇хисад̇д̇амаад̇аа д̇ирогужчиг̇ад̇ам̣ бассад̇и саб̣б̣ан̇г̇абажжан̇г̇ам̣ ахийнинд̣̇рияа’нд̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
204. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchiṃ okkanto hoti, na bodhisattamātu kocideva ābādho uppajjati; sukhinī bodhisattamātā hoti akilantakāyā; bodhisattañca bodhisattamātā tirokucchigataṃ passati sabbaṅgapaccaṅgaṃ ahīnindriyaṃ. Seyyathāpi, ānanda, maṇi veḷuriyo subho jātimā aṭṭhaṃso suparikammakato. Tatrāssa suttaṃ āvutaṃ nīlaṃ vā pītaṃ vā lohitaṃ vā odātaṃ vā paṇḍusuttaṃ vā. Tamenaṃ cakkhumā puriso hatthe karitvā paccavekkheyya – ayaṃ kho maṇi veḷuriyo subho jātimā aṭṭhaṃso suparikammakato, tatridaṃ suttaṃ āvutaṃ nīlaṃ vā pītaṃ vā lohitaṃ vā odātaṃ vā paṇḍusuttaṃ vāti. Evameva kho, ānanda, yadā bodhisatto mātukucchiṃ okkanto hoti , na bodhisattamātu kocideva ābādho uppajjati; sukhinī bodhisattamātā hoti akilantakāyā; bodhisattañca bodhisattamātā tirokucchigataṃ passati sabbaṅgapaccaṅgaṃ ahīnindriya’nti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
205. ‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘сад̇д̇аахаж̇аад̇з, аананд̣̇а, б̣од̇хисад̇д̇з б̣од̇хисад̇д̇амаад̇аа гаалам̣ гарод̇и, д̇усид̇ам̣ гааяам̣ убабаж̇ж̇ад̇ий’д̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
205. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘sattāhajāte, ānanda, bodhisatte bodhisattamātā kālaṃ karoti, tusitaṃ kāyaṃ upapajjatī’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яат̇аа ко банаананд̣̇а, ан̃н̃аа ид̇т̇игаа нава ваа д̣̇аса ваа маасз г̇аб̣бхам̣ гужчинаа барихарид̇ваа виж̇ааяанд̇и, на хзвам̣ б̣од̇хисад̇д̇ам̣ б̣од̇хисад̇д̇амаад̇аа виж̇ааяад̇и. д̣̇асзва маасаани б̣од̇хисад̇д̇ам̣ б̣од̇хисад̇д̇амаад̇аа гужчинаа барихарид̇ваа виж̇ааяад̇ий’д̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yathā kho panānanda, aññā itthikā nava vā dasa vā māse gabbhaṃ kucchinā pariharitvā vijāyanti, na hevaṃ bodhisattaṃ bodhisattamātā vijāyati. Daseva māsāni bodhisattaṃ bodhisattamātā kucchinā pariharitvā vijāyatī’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яат̇аа ко банаананд̣̇а, ан̃н̃аа ид̇т̇игаа нисиннаа ваа нибаннаа ваа виж̇ааяанд̇и, на хзвам̣ б̣од̇хисад̇д̇ам̣ б̣од̇хисад̇д̇амаад̇аа виж̇ааяад̇и. тид̇аава б̣од̇хисад̇д̇ам̣ б̣од̇хисад̇д̇амаад̇аа виж̇ааяад̇ий’д̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yathā kho panānanda, aññā itthikā nisinnā vā nipannā vā vijāyanti, na hevaṃ bodhisattaṃ bodhisattamātā vijāyati. Ṭhitāva bodhisattaṃ bodhisattamātā vijāyatī’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яад̣̇аа , аананд̣̇а, б̣од̇хисад̇д̇о маад̇угужчимхаа нигкамад̇и, д̣̇зваа нам̣ батамам̣ бадиг̇г̇ан̣ханд̇и бажчаа мануссаа’д̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā , ānanda, bodhisatto mātukucchimhā nikkhamati, devā naṃ paṭhamaṃ paṭiggaṇhanti pacchā manussā’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
206. ‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яад̣̇аа, аананд̣̇а, б̣од̇хисад̇д̇о маад̇угужчимхаа нигкамад̇и, аббад̇д̇ова б̣од̇хисад̇д̇о бат̇авим̣ ход̇и, жад̇д̇ааро нам̣ д̣̇звабуд̇д̇аа бадиг̇г̇ахзд̇ваа маад̇у бурад̇о табзнд̇и – ад̇д̇аманаа, д̣̇зви, хохи; махзсагко д̇з буд̇д̇о уббанно’д̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
206. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchimhā nikkhamati, appattova bodhisatto pathaviṃ hoti, cattāro naṃ devaputtā paṭiggahetvā mātu purato ṭhapenti – attamanā, devi, hohi; mahesakkho te putto uppanno’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яад̣̇аа, аананд̣̇а, б̣од̇хисад̇д̇о маад̇угужчимхаа нигкамад̇и, висад̣̇ова нигкамад̇и амагкид̇о уд̣̇зна 7 амагкид̇о сзмхзна амагкид̇о рухирзна амагкид̇о гзнажи асужинаа суд̣̇д̇хо висад̣̇о 8. сзяяат̇ааби, аананд̣̇а, ман̣ирад̇анам̣ гаасигз вад̇т̇з нигкид̇д̇ам̣ нзва ман̣ирад̇анам̣ гаасигам̣ вад̇т̇ам̣ магкзд̇и нааби гаасигам̣ вад̇т̇ам̣ ман̣ирад̇анам̣ магкзд̇и. д̇ам̣ гисса хзд̇у? убхиннам̣ суд̣̇д̇хад̇д̇аа. звамзва ко, аананд̣̇а, яад̣̇аа б̣од̇хисад̇д̇о маад̇угужчимхаа нигкамад̇и, висад̣̇ова нигкамад̇и амагкид̇о уд̣̇зна амагкид̇о сзмхзна амагкид̇о рухирзна амагкид̇о гзнажи асужинаа суд̣̇д̇хо висад̣̇о’д̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchimhā nikkhamati, visadova nikkhamati amakkhito udena 9 amakkhito semhena amakkhito ruhirena amakkhito kenaci asucinā suddho visado 10. Seyyathāpi, ānanda, maṇiratanaṃ kāsike vatthe nikkhittaṃ neva maṇiratanaṃ kāsikaṃ vatthaṃ makkheti nāpi kāsikaṃ vatthaṃ maṇiratanaṃ makkheti. Taṃ kissa hetu? Ubhinnaṃ suddhattā. Evameva kho, ānanda, yadā bodhisatto mātukucchimhā nikkhamati, visadova nikkhamati amakkhito udena amakkhito semhena amakkhito ruhirena amakkhito kenaci asucinā suddho visado’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яад̣̇аа, аананд̣̇а, б̣од̇хисад̇д̇о маад̇угужчимхаа нигкамад̇и, д̣̇вз уд̣̇агасса д̇хаараа анд̇алигкаа баад̇убхаванд̇и – згаа сийд̇асса, згаа ун̣хасса; язна б̣од̇хисад̇д̇асса уд̣̇агагижжам̣ гаронд̇и маад̇у жаа’д̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchimhā nikkhamati, dve udakassa dhārā antalikkhā pātubhavanti – ekā sītassa, ekā uṇhassa; yena bodhisattassa udakakiccaṃ karonti mātu cā’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
207. ‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘самбад̇иж̇аад̇о, аананд̣̇а, б̣од̇хисад̇д̇о самзхи баад̣̇зхи бат̇авияам̣ бад̇идтахид̇ваа уд̇д̇араабхимуко сад̇д̇абад̣̇авийд̇ихаарзна г̇ажчад̇и, сзд̇амхи чад̇д̇з ануд̇хаарияамаанз, саб̣б̣аа жа д̣̇исаа вилогзд̇и, аасабхин̃жа ваажам̣ бхаасад̇и – аг̇г̇охамасми логасса, ж̇здтохамасми логасса, сздтохамасми логасса. аяаманд̇имаа ж̇аад̇и , над̇т̇и д̣̇аани бунаб̣бхаво’д̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзми.
207. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘sampatijāto, ānanda, bodhisatto samehi pādehi pathaviyaṃ patiṭṭhahitvā uttarābhimukho sattapadavītihārena gacchati, setamhi chatte anudhāriyamāne, sabbā ca disā viloketi, āsabhiñca vācaṃ bhāsati – aggohamasmi lokassa, jeṭṭhohamasmi lokassa, seṭṭhohamasmi lokassa. Ayamantimā jāti , natthi dāni punabbhavo’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘саммукаа мзд̇ам̣, бханд̇з, бхаг̇авад̇о суд̇ам̣, саммукаа бадиг̇г̇ахид̇ам̣ – ‘яад̣̇аа, аананд̣̇а, б̣од̇хисад̇д̇о маад̇угужчимхаа нигкамад̇и, ат̇а сад̣̇звагз логз самаарагз саб̣рахмагз сассаман̣аб̣раахман̣ияаа баж̇ааяа сад̣̇звамануссааяа аббамаан̣о ул̣ааро обхаасо логз баад̇убхавад̇и ад̇иггаммзва д̣̇зваанам̣ д̣̇зваанубхаавам̣. яааби д̇аа логанд̇аригаа агхаа асам̣вуд̇аа анд̇хагаараа анд̇хагаарад̇имисаа яад̇т̇абимз жанд̣̇имасуурияаа звам̣махид̣̇д̇хигаа звам̣махаанубхааваа аабхааяа наанубхонд̇и д̇ад̇т̇аби аббамаан̣о ул̣ааро обхаасо логз баад̇убхавад̇и ад̇иггаммзва д̣̇зваанам̣ д̣̇зваанубхаавам̣. язби д̇ад̇т̇а сад̇д̇аа убабаннаа д̇зби д̇знобхаасзна ан̃н̃аман̃н̃ам̣ сан̃ж̇аананд̇и – ан̃н̃зби гира, бхо, санд̇и сад̇д̇аа ид̇хуубабаннаад̇и. аяан̃жа д̣̇асасахассий логад̇хаад̇у сан̇гамбад̇и самбагамбад̇и самбавзд̇хад̇и, аббамаан̣о жа ул̣ааро обхаасо логз баад̇убхавад̇и ад̇иггаммзва д̣̇зваанам̣ д̣̇зваанубхаава’нд̇и. яамби, бханд̇з…бз… ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзмий’’д̇и.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchimhā nikkhamati, atha sadevake loke samārake sabrahmake sassamaṇabrāhmaṇiyā pajāya sadevamanussāya appamāṇo uḷāro obhāso loke pātubhavati atikkammeva devānaṃ devānubhāvaṃ. Yāpi tā lokantarikā aghā asaṃvutā andhakārā andhakāratimisā yatthapime candimasūriyā evaṃmahiddhikā evaṃmahānubhāvā ābhāya nānubhonti tatthapi appamāṇo uḷāro obhāso loke pātubhavati atikkammeva devānaṃ devānubhāvaṃ. Yepi tattha sattā upapannā tepi tenobhāsena aññamaññaṃ sañjānanti – aññepi kira, bho, santi sattā idhūpapannāti. Ayañca dasasahassī lokadhātu saṅkampati sampakampati sampavedhati, appamāṇo ca uḷāro obhāso loke pātubhavati atikkammeva devānaṃ devānubhāva’nti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremī’’ti.
208. ‘‘д̇асмаад̇иха д̇вам̣, аананд̣̇а, ид̣̇амби д̇ат̇ааг̇ад̇асса ажчарияам̣ аб̣бхуд̇ад̇хаммам̣ д̇хаарзхи. ид̇хаананд̣̇а, д̇ат̇ааг̇ад̇асса вид̣̇ид̇аа взд̣̇анаа уббаж̇ж̇анд̇и, вид̣̇ид̇аа убадтаханд̇и, вид̣̇ид̇аа аб̣бхад̇т̇ам̣ г̇ажчанд̇и; вид̣̇ид̇аа сан̃н̃аа уббаж̇ж̇анд̇и, вид̣̇ид̇аа убадтаханд̇и, вид̣̇ид̇аа аб̣бхад̇т̇ам̣ г̇ажчанд̇и; вид̣̇ид̇аа вид̇аггаа уббаж̇ж̇анд̇и, вид̣̇ид̇аа убадтаханд̇и, вид̣̇ид̇аа аб̣бхад̇т̇ам̣ г̇ажчанд̇и. ид̣̇амби ко, д̇вам̣, аананд̣̇а, д̇ат̇ааг̇ад̇асса ажчарияам̣ аб̣бхуд̇ад̇хаммам̣ д̇хаарзхий’’д̇и. ‘‘яамби, бханд̇з, бхаг̇авад̇о вид̣̇ид̇аа взд̣̇анаа уббаж̇ж̇анд̇и, вид̣̇ид̇аа убадтаханд̇и, вид̣̇ид̇аа аб̣бхад̇т̇ам̣ г̇ажчанд̇и; вид̣̇ид̇аа сан̃н̃аа… вид̣̇ид̇аа вид̇аггаа уббаж̇ж̇анд̇и, вид̣̇ид̇аа убадтаханд̇и, вид̣̇ид̇аа аб̣бхад̇т̇ам̣ г̇ажчанд̇и. ид̣̇ам̣баахам̣, бханд̇з, бхаг̇авад̇о ажчарияам̣ аб̣бхуд̇ад̇хаммам̣ д̇хаарзмий’’д̇и.
208. ‘‘Tasmātiha tvaṃ, ānanda, idampi tathāgatassa acchariyaṃ abbhutadhammaṃ dhārehi. Idhānanda, tathāgatassa viditā vedanā uppajjanti, viditā upaṭṭhahanti, viditā abbhatthaṃ gacchanti; viditā saññā uppajjanti, viditā upaṭṭhahanti, viditā abbhatthaṃ gacchanti; viditā vitakkā uppajjanti, viditā upaṭṭhahanti, viditā abbhatthaṃ gacchanti. Idampi kho, tvaṃ, ānanda, tathāgatassa acchariyaṃ abbhutadhammaṃ dhārehī’’ti. ‘‘Yampi, bhante, bhagavato viditā vedanā uppajjanti, viditā upaṭṭhahanti, viditā abbhatthaṃ gacchanti; viditā saññā… viditā vitakkā uppajjanti, viditā upaṭṭhahanti, viditā abbhatthaṃ gacchanti. Idaṃpāhaṃ, bhante, bhagavato acchariyaṃ abbhutadhammaṃ dhāremī’’ti.
ид̣̇амавожа ааяасмаа аананд̣̇о. саманун̃н̃о сад̇т̇аа ахоси; ад̇д̇аманаа жа д̇з бхигкуу ааяасмад̇о аананд̣̇асса бхаасид̇ам̣ абхинанд̣̇унд̇и.
Idamavoca āyasmā ānando. Samanuñño satthā ahosi; attamanā ca te bhikkhū āyasmato ānandassa bhāsitaṃ abhinandunti.
ажчарияааб̣бхуд̇асуд̇д̇ам̣ нидтид̇ам̣ д̇ад̇ияам̣.
Acchariyaabbhutasuttaṃ niṭṭhitaṃ tatiyaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 3. ажчарияааб̣бхуд̇асуд̇д̇аван̣н̣анаа • 3. Acchariyaabbhutasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 3. ажчарияаб̣бхуд̇асуд̇д̇аван̣н̣анаа • 3. Acchariyabbhutasuttavaṇṇanā
