| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৫. অচেলকৰগ্গো
5. Acelakavaggo
১. অচেলকসিক্খাপদৰণ্ণনা
1. Acelakasikkhāpadavaṇṇanā
অচেলকস্সাতি যস্স কস্সচি পব্বজ্জাসমাপন্নস্স নগ্গস্স। পরিব্বাজকস্সাতি ঠপেত্ৰা ভিক্খুঞ্চ সামণেরঞ্চ অৰসেসস্স যস্স কস্সচি পব্বজ্জাসমাপন্নস্স। পরিব্বাজিকাযাতি ঠপেত্ৰা ভিক্খুনিং, সিক্খমানং, সামণেরিঞ্চ অৰসেসায যায কাযচি পব্বজ্জাসমাপন্নায। এতে চ সব্বে অঞ্ঞতিত্থিযা ৰেদিতব্বা। তেনাহ ‘‘এতেসং অচেলকাদীনং অঞ্ঞতিত্থিযান’’ন্তি।
Acelakassāti yassa kassaci pabbajjāsamāpannassa naggassa. Paribbājakassāti ṭhapetvā bhikkhuñca sāmaṇerañca avasesassa yassa kassaci pabbajjāsamāpannassa. Paribbājikāyāti ṭhapetvā bhikkhuniṃ, sikkhamānaṃ, sāmaṇeriñca avasesāya yāya kāyaci pabbajjāsamāpannāya. Ete ca sabbe aññatitthiyā veditabbā. Tenāha ‘‘etesaṃ acelakādīnaṃ aññatitthiyāna’’nti.
তেসন্তি অঞ্ঞতিত্থিযানং। ভাজনং নিক্খিপিত্ৰাতি আমিসভরিতং ভাজনং নিক্খিপিত্ৰা। বাহিরালেপন্তি তেলাদিং।
Tesanti aññatitthiyānaṃ. Bhājanaṃ nikkhipitvāti āmisabharitaṃ bhājanaṃ nikkhipitvā. Bāhirālepanti telādiṃ.
অচেলকাদযো যস্মা, তিত্থিযাৰ মতা ইধ।
Acelakādayo yasmā, titthiyāva matā idha;
তস্মা তিত্থিযনামেন, তিকচ্ছেদো কতো তযো॥
Tasmā titthiyanāmena, tikacchedo kato tayo.
অতিত্থিযস্স নগ্গস্স, তথা তিত্থিযলিঙ্গিনো।
Atitthiyassa naggassa, tathā titthiyaliṅgino;
গহট্ঠস্সাপি ভিক্খুস্স, কপ্পতীতি ৰিনিচ্ছযো॥
Gahaṭṭhassāpi bhikkhussa, kappatīti vinicchayo.
অতিত্থিযস্স চিত্তেন, তিত্থিযস্স চ লিঙ্গিনো।
Atitthiyassa cittena, titthiyassa ca liṅgino;
সোতাপন্নাদিনো দাতুং, কপ্পতীতীধ নো মতি॥
Sotāpannādino dātuṃ, kappatītīdha no mati.
অচেলকসিক্খাপদৰণ্ণনা নিট্ঠিতা।
Acelakasikkhāpadavaṇṇanā niṭṭhitā.
