| Library / Tipiṭaka / तिपिटक • Tipiṭaka / महाविभङ्ग-अट्ठकथा • Mahāvibhaṅga-aṭṭhakathā |
५. अचेलकवग्गो
5. Acelakavaggo
१. अचेलकसिक्खापदवण्णना
1. Acelakasikkhāpadavaṇṇanā
२६९. अचेलकवग्गस्स ९ पठमसिक्खापदे – परिवेसनन्ति परिविसनट्ठानं। परिब्बाजकसमापन्नोति पब्बज्जं समापन्नो। देति आपत्ति पाचित्तियस्साति समतित्तिकं यागुपत्तं एकपयोगेन देति, एकं पाचित्तियं। अवच्छिन्दित्वा अवच्छिन्दित्वा देति, पयोगे पयोगे पाचित्तियं। एसेव नयो पूवभत्तादीसु। तित्थिये अतित्थियसञ्ञीति माता वा पिता वा तित्थियेसु पब्बजति, तेसं मातापितुसञ्ञाय देन्तस्सापि पाचित्तियमेव होति। दापेतीति अनुपसम्पन्नेन दापेति।
269. Acelakavaggassa 9 paṭhamasikkhāpade – parivesananti parivisanaṭṭhānaṃ. Paribbājakasamāpannoti pabbajjaṃ samāpanno. Deti āpatti pācittiyassāti samatittikaṃ yāgupattaṃ ekapayogena deti, ekaṃ pācittiyaṃ. Avacchinditvā avacchinditvā deti, payoge payoge pācittiyaṃ. Eseva nayo pūvabhattādīsu. Titthiye atitthiyasaññīti mātā vā pitā vā titthiyesu pabbajati, tesaṃ mātāpitusaññāya dentassāpi pācittiyameva hoti. Dāpetīti anupasampannena dāpeti.
२७३. उपनिक्खिपित्वा देतीति तथारूपे भाजने ठपेत्वा तं भाजनं तेसं सन्तिके भूमियं निक्खिपित्वा देति, तेसं वा भाजनं निक्खिपापेत्वा तत्थ देति, पत्तं आधारके वा भूमियं वा ठपेत्वापि ‘‘इतो गण्हथा’’ति वत्तुं वट्टति। सचे तित्थियो वदति ‘‘मय्हं नाम इदं सन्तकं, इध न आकिरथा’’ति आकिरितब्बं। तस्स सन्तकत्ता सहत्था दानं नाम न होति। सेसमेत्थ उत्तानमेव।
273.Upanikkhipitvā detīti tathārūpe bhājane ṭhapetvā taṃ bhājanaṃ tesaṃ santike bhūmiyaṃ nikkhipitvā deti, tesaṃ vā bhājanaṃ nikkhipāpetvā tattha deti, pattaṃ ādhārake vā bhūmiyaṃ vā ṭhapetvāpi ‘‘ito gaṇhathā’’ti vattuṃ vaṭṭati. Sace titthiyo vadati ‘‘mayhaṃ nāma idaṃ santakaṃ, idha na ākirathā’’ti ākiritabbaṃ. Tassa santakattā sahatthā dānaṃ nāma na hoti. Sesamettha uttānameva.
एळकलोमसमुट्ठानं – किरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, तिचित्तं, तिवेदनन्ति।
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
अचेलकसिक्खापदं पठमं।
Acelakasikkhāpadaṃ paṭhamaṃ.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / ५. अचेलकवग्गो • 5. Acelakavaggo
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / १. अचेलकसिक्खापदवण्णना • 1. Acelakasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / १. अचेलकसिक्खापदवण्णना • 1. Acelakasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / १. अचेलकसिक्खापदवण्णना • 1. Acelakasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / १. अचेलकसिक्खापद-अत्थयोजना • 1. Acelakasikkhāpada-atthayojanā
