| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
៥. អចេលកវគ្គោ
5. Acelakavaggo
១. អចេលកសិក្ខាបទវណ្ណនា
1. Acelakasikkhāpadavaṇṇanā
អចេលកស្សាតិ យស្ស កស្សចិ បព្ពជ្ជាសមាបន្នស្ស នគ្គស្ស។ បរិព្ពាជកស្សាតិ ឋបេត្វា ភិក្ខុញ្ច សាមណេរញ្ច អវសេសស្ស យស្ស កស្សចិ បព្ពជ្ជាសមាបន្នស្ស។ បរិព្ពាជិកាយាតិ ឋបេត្វា ភិក្ខុនិំ, សិក្ខមានំ, សាមណេរិញ្ច អវសេសាយ យាយ កាយចិ បព្ពជ្ជាសមាបន្នាយ។ ឯតេ ច សព្ពេ អញ្ញតិត្ថិយា វេទិតព្ពា។ តេនាហ ‘‘ឯតេសំ អចេលកាទីនំ អញ្ញតិត្ថិយាន’’ន្តិ។
Acelakassāti yassa kassaci pabbajjāsamāpannassa naggassa. Paribbājakassāti ṭhapetvā bhikkhuñca sāmaṇerañca avasesassa yassa kassaci pabbajjāsamāpannassa. Paribbājikāyāti ṭhapetvā bhikkhuniṃ, sikkhamānaṃ, sāmaṇeriñca avasesāya yāya kāyaci pabbajjāsamāpannāya. Ete ca sabbe aññatitthiyā veditabbā. Tenāha ‘‘etesaṃ acelakādīnaṃ aññatitthiyāna’’nti.
តេសន្តិ អញ្ញតិត្ថិយានំ។ ភាជនំ និក្ខិបិត្វាតិ អាមិសភរិតំ ភាជនំ និក្ខិបិត្វា។ ពាហិរាលេបន្តិ តេលាទិំ។
Tesanti aññatitthiyānaṃ. Bhājanaṃ nikkhipitvāti āmisabharitaṃ bhājanaṃ nikkhipitvā. Bāhirālepanti telādiṃ.
អចេលកាទយោ យស្មា, តិត្ថិយាវ មតា ឥធ;
Acelakādayo yasmā, titthiyāva matā idha;
តស្មា តិត្ថិយនាមេន, តិកច្ឆេទោ កតោ តយោ។
Tasmā titthiyanāmena, tikacchedo kato tayo.
អតិត្ថិយស្ស នគ្គស្ស, តថា តិត្ថិយលិង្គិនោ;
Atitthiyassa naggassa, tathā titthiyaliṅgino;
គហដ្ឋស្សាបិ ភិក្ខុស្ស, កប្បតីតិ វិនិច្ឆយោ។
Gahaṭṭhassāpi bhikkhussa, kappatīti vinicchayo.
អតិត្ថិយស្ស ចិត្តេន, តិត្ថិយស្ស ច លិង្គិនោ;
Atitthiyassa cittena, titthiyassa ca liṅgino;
សោតាបន្នាទិនោ ទាតុំ, កប្បតីតីធ នោ មតិ។
Sotāpannādino dātuṃ, kappatītīdha no mati.
អចេលកសិក្ខាបទវណ្ណនា និដ្ឋិតា។
Acelakasikkhāpadavaṇṇanā niṭṭhitā.
