| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၅. အစေလကဝဂ္ဂော
5. Acelakavaggo
၁. အစေလကသိက္ခာပဒဝဏ္ဏနာ
1. Acelakasikkhāpadavaṇṇanā
အစေလကသ္သာတိ ယသ္သ ကသ္သစိ ပဗ္ဗဇ္ဇာသမာပန္နသ္သ နဂ္ဂသ္သ။ ပရိဗ္ဗာဇကသ္သာတိ ဌပေတ္ဝာ ဘိက္ခုဉ္စ သာမဏေရဉ္စ အဝသေသသ္သ ယသ္သ ကသ္သစိ ပဗ္ဗဇ္ဇာသမာပန္နသ္သ။ ပရိဗ္ဗာဇိကာယာတိ ဌပေတ္ဝာ ဘိက္ခုနိံ, သိက္ခမာနံ, သာမဏေရိဉ္စ အဝသေသာယ ယာယ ကာယစိ ပဗ္ဗဇ္ဇာသမာပန္နာယ။ ဧတေ စ သဗ္ဗေ အညတိတ္ထိယာ ဝေဒိတဗ္ဗာ။ တေနာဟ ‘‘ဧတေသံ အစေလကာဒီနံ အညတိတ္ထိယာန’’န္တိ။
Acelakassāti yassa kassaci pabbajjāsamāpannassa naggassa. Paribbājakassāti ṭhapetvā bhikkhuñca sāmaṇerañca avasesassa yassa kassaci pabbajjāsamāpannassa. Paribbājikāyāti ṭhapetvā bhikkhuniṃ, sikkhamānaṃ, sāmaṇeriñca avasesāya yāya kāyaci pabbajjāsamāpannāya. Ete ca sabbe aññatitthiyā veditabbā. Tenāha ‘‘etesaṃ acelakādīnaṃ aññatitthiyāna’’nti.
တေသန္တိ အညတိတ္ထိယာနံ။ ဘာဇနံ နိက္ခိပိတ္ဝာတိ အာမိသဘရိတံ ဘာဇနံ နိက္ခိပိတ္ဝာ။ ဗာဟိရာလေပန္တိ တေလာဒိံ။
Tesanti aññatitthiyānaṃ. Bhājanaṃ nikkhipitvāti āmisabharitaṃ bhājanaṃ nikkhipitvā. Bāhirālepanti telādiṃ.
အစေလကာဒယော ယသ္မာ၊ တိတ္ထိယာဝ မတာ ဣဓ။
Acelakādayo yasmā, titthiyāva matā idha;
တသ္မာ တိတ္ထိယနာမေန၊ တိကစ္ဆေဒော ကတော တယော။
Tasmā titthiyanāmena, tikacchedo kato tayo.
အတိတ္ထိယသ္သ နဂ္ဂသ္သ၊ တထာ တိတ္ထိယလိင္ဂိနော။
Atitthiyassa naggassa, tathā titthiyaliṅgino;
ဂဟဋ္ဌသ္သာပိ ဘိက္ခုသ္သ၊ ကပ္ပတီတိ ဝိနိစ္ဆယော။
Gahaṭṭhassāpi bhikkhussa, kappatīti vinicchayo.
အတိတ္ထိယသ္သ စိတ္တေန၊ တိတ္ထိယသ္သ စ လိင္ဂိနော။
Atitthiyassa cittena, titthiyassa ca liṅgino;
သောတာပန္နာဒိနော ဒာတုံ၊ ကပ္ပတီတီဓ နော မတိ။
Sotāpannādino dātuṃ, kappatītīdha no mati.
အစေလကသိက္ခာပဒဝဏ္ဏနာ နိဋ္ဌိတာ။
Acelakasikkhāpadavaṇṇanā niṭṭhitā.
