| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
5. අචෙලකවග්‌ගො
5. Acelakavaggo
1. අචෙලකසික්‌ඛාපදවණ්‌ණනා
1. Acelakasikkhāpadavaṇṇanā
269. අචෙලකවග්‌ගස්‌ස 9 පඨමසික්‌ඛාපදෙ – පරිවෙසනන්‌ති පරිවිසනට්‌ඨානං. පරිබ්‌බාජකසමාපන්‌නොති පබ්‌බජ්‌ජං සමාපන්‌නො. දෙති ආපත්‌ති පාචිත්‌තියස්‌සාති සමතිත්‌තිකං යාගුපත්‌තං එකපයොගෙන දෙති, එකං පාචිත්‌තියං. අවච්‌ඡින්‌දිත්‌වා අවච්‌ඡින්‌දිත්‌වා දෙති, පයොගෙ පයොගෙ පාචිත්‌තියං. එසෙව නයො පූවභත්‌තාදීසු. තිත්‌ථියෙ අතිත්‌ථියසඤ්‌ඤීති මාතා වා පිතා වා තිත්‌ථියෙසු පබ්‌බජති, තෙසං මාතාපිතුසඤ්‌ඤාය දෙන්‌තස්‌සාපි පාචිත්‌තියමෙව හොති. දාපෙතීති අනුපසම්‌පන්‌නෙන දාපෙති.
269. Acelakavaggassa 9 paṭhamasikkhāpade – parivesananti parivisanaṭṭhānaṃ. Paribbājakasamāpannoti pabbajjaṃ samāpanno. Deti āpatti pācittiyassāti samatittikaṃ yāgupattaṃ ekapayogena deti, ekaṃ pācittiyaṃ. Avacchinditvā avacchinditvā deti, payoge payoge pācittiyaṃ. Eseva nayo pūvabhattādīsu. Titthiye atitthiyasaññīti mātā vā pitā vā titthiyesu pabbajati, tesaṃ mātāpitusaññāya dentassāpi pācittiyameva hoti. Dāpetīti anupasampannena dāpeti.
273. උපනික්‌ඛිපිත්‌වා දෙතීති තථාරූපෙ භාජනෙ ඨපෙත්‌වා තං භාජනං තෙසං සන්‌තිකෙ භූමියං නික්‌ඛිපිත්‌වා දෙති, තෙසං වා භාජනං නික්‌ඛිපාපෙත්‌වා තත්‌ථ දෙති, පත්‌තං ආධාරකෙ වා භූමියං වා ඨපෙත්‌වාපි ‘‘ඉතො ගණ්‌හථා’’ති වත්‌තුං වට්‌ටති. සචෙ තිත්‌ථියො වදති ‘‘මය්‌හං නාම ඉදං සන්‌තකං, ඉධ න ආකිරථා’’ති ආකිරිතබ්‌බං. තස්‌ස සන්‌තකත්‌තා සහත්‌ථා දානං නාම න හොති. සෙසමෙත්‌ථ උත්‌තානමෙව.
273.Upanikkhipitvā detīti tathārūpe bhājane ṭhapetvā taṃ bhājanaṃ tesaṃ santike bhūmiyaṃ nikkhipitvā deti, tesaṃ vā bhājanaṃ nikkhipāpetvā tattha deti, pattaṃ ādhārake vā bhūmiyaṃ vā ṭhapetvāpi ‘‘ito gaṇhathā’’ti vattuṃ vaṭṭati. Sace titthiyo vadati ‘‘mayhaṃ nāma idaṃ santakaṃ, idha na ākirathā’’ti ākiritabbaṃ. Tassa santakattā sahatthā dānaṃ nāma na hoti. Sesamettha uttānameva.
එළකලොමසමුට්‌ඨානං – කිරියං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මං, තිචිත්‌තං, තිවෙදනන්‌ති.
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
අචෙලකසික්‌ඛාපදං පඨමං.
Acelakasikkhāpadaṃ paṭhamaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 5. අචෙලකවග්‌ගො • 5. Acelakavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 1. අචෙලකසික්‌ඛාපදවණ්‌ණනා • 1. Acelakasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 1. අචෙලකසික්‌ඛාපදවණ්‌ණනා • 1. Acelakasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. අචෙලකසික්‌ඛාපදවණ්‌ණනා • 1. Acelakasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 1. අචෙලකසික්‌ඛාපද-අත්‌ථයොජනා • 1. Acelakasikkhāpada-atthayojanā
