| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
5. අචෙලකවග්‌ගො
5. Acelakavaggo
1. අචෙලකසික්‌ඛාපදවණ්‌ණනා
1. Acelakasikkhāpadavaṇṇanā
අචෙලකස්‌සාති යස්‌ස කස්‌සචි පබ්‌බජ්‌ජාසමාපන්‌නස්‌ස නග්‌ගස්‌ස. පරිබ්‌බාජකස්‌සාති ඨපෙත්‌වා භික්‌ඛුඤ්‌ච සාමණෙරඤ්‌ච අවසෙසස්‌ස යස්‌ස කස්‌සචි පබ්‌බජ්‌ජාසමාපන්‌නස්‌ස. පරිබ්‌බාජිකායාති ඨපෙත්‌වා භික්‌ඛුනිං, සික්‌ඛමානං, සාමණෙරිඤ්‌ච අවසෙසාය යාය කායචි පබ්‌බජ්‌ජාසමාපන්‌නාය. එතෙ ච සබ්‌බෙ අඤ්‌ඤතිත්‌ථියා වෙදිතබ්‌බා. තෙනාහ ‘‘එතෙසං අචෙලකාදීනං අඤ්‌ඤතිත්‌ථියාන’’න්‌ති.
Acelakassāti yassa kassaci pabbajjāsamāpannassa naggassa. Paribbājakassāti ṭhapetvā bhikkhuñca sāmaṇerañca avasesassa yassa kassaci pabbajjāsamāpannassa. Paribbājikāyāti ṭhapetvā bhikkhuniṃ, sikkhamānaṃ, sāmaṇeriñca avasesāya yāya kāyaci pabbajjāsamāpannāya. Ete ca sabbe aññatitthiyā veditabbā. Tenāha ‘‘etesaṃ acelakādīnaṃ aññatitthiyāna’’nti.
තෙසන්‌ති අඤ්‌ඤතිත්‌ථියානං. භාජනං නික්‌ඛිපිත්‌වාති ආමිසභරිතං භාජනං නික්‌ඛිපිත්‌වා. බාහිරාලෙපන්‌ති තෙලාදිං.
Tesanti aññatitthiyānaṃ. Bhājanaṃ nikkhipitvāti āmisabharitaṃ bhājanaṃ nikkhipitvā. Bāhirālepanti telādiṃ.
අචෙලකාදයො යස්‌මා, තිත්‌ථියාව මතා ඉධ;
Acelakādayo yasmā, titthiyāva matā idha;
තස්‌මා තිත්‌ථියනාමෙන, තිකච්‌ඡෙදො කතො තයො.
Tasmā titthiyanāmena, tikacchedo kato tayo.
අතිත්‌ථියස්‌ස නග්‌ගස්‌ස, තථා තිත්‌ථියලිඞ්‌ගිනො;
Atitthiyassa naggassa, tathā titthiyaliṅgino;
ගහට්‌ඨස්‌සාපි භික්‌ඛුස්‌ස, කප්‌පතීති විනිච්‌ඡයො.
Gahaṭṭhassāpi bhikkhussa, kappatīti vinicchayo.
අතිත්‌ථියස්‌ස චිත්‌තෙන, තිත්‌ථියස්‌ස ච ලිඞ්‌ගිනො;
Atitthiyassa cittena, titthiyassa ca liṅgino;
සොතාපන්‌නාදිනො දාතුං, කප්‌පතීතීධ නො මති.
Sotāpannādino dātuṃ, kappatītīdha no mati.
අචෙලකසික්‌ඛාපදවණ්‌ණනා නිට්‌ඨිතා.
Acelakasikkhāpadavaṇṇanā niṭṭhitā.
