| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. அசேலகஸ்ஸபஸுத்தங்
7. Acelakassapasuttaṃ
17. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய ராஜக³ஹங் பிண்டா³ய பாவிஸி. அத்³த³ஸா கோ² அசேலோ கஸ்ஸபோ ப⁴க³வந்தங் தூ³ரதோவ ஆக³ச்ச²ந்தங். தி³ஸ்வான யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் அட்டா²ஸி. ஏகமந்தங் டி²தோ கோ² அசேலோ கஸ்ஸபோ ப⁴க³வந்தங் ஏதத³வோச – ‘‘புச்செ²ய்யாம மயங் ப⁴வந்தங் கோ³தமங் கஞ்சிதே³வ 1 தே³ஸங், ஸசே நோ ப⁴வங் கோ³தமோ ஓகாஸங் கரோதி பஞ்ஹஸ்ஸ வெய்யாகரணாயா’’தி.
17. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Atha kho bhagavā pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisi. Addasā kho acelo kassapo bhagavantaṃ dūratova āgacchantaṃ. Disvāna yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ aṭṭhāsi. Ekamantaṃ ṭhito kho acelo kassapo bhagavantaṃ etadavoca – ‘‘puccheyyāma mayaṃ bhavantaṃ gotamaṃ kañcideva 2 desaṃ, sace no bhavaṃ gotamo okāsaṃ karoti pañhassa veyyākaraṇāyā’’ti.
‘‘அகாலோ கோ² தாவ, கஸ்ஸப, பஞ்ஹஸ்ஸ; அந்தரக⁴ரங் பவிட்ட²ம்ஹா’’தி. து³தியம்பி கோ² அசேலோ கஸ்ஸபோ ப⁴க³வந்தங் ஏதத³வோச ‘‘புச்செ²ய்யாம மயங் ப⁴வந்தங் கோ³தமங் கஞ்சிதே³வ தே³ஸங், ஸசே நோ ப⁴வங் கோ³தமோ ஓகாஸங் கரோதி பஞ்ஹஸ்ஸ வெய்யாகரணாயா’’தி. ‘‘அகாலோ கோ² தாவ, கஸ்ஸப, பஞ்ஹஸ்ஸ; அந்தரக⁴ரங் பவிட்ட²ம்ஹா’’தி. ததியம்பி கோ² அசேலோ கஸ்ஸபோ…பே॰… அந்தரக⁴ரங் பவிட்ட²ம்ஹாதி. ஏவங் வுத்தே, அசேலோ கஸ்ஸபோ ப⁴க³வந்தங் ஏதத³வோச – ‘‘ந கோ² பன மயங் ப⁴வந்தங் கோ³தமங் ப³ஹுதே³வ புச்சி²துகாமா’’தி. ‘‘புச்ச², கஸ்ஸப, யதா³கங்க²ஸீ’’தி.
‘‘Akālo kho tāva, kassapa, pañhassa; antaragharaṃ paviṭṭhamhā’’ti. Dutiyampi kho acelo kassapo bhagavantaṃ etadavoca ‘‘puccheyyāma mayaṃ bhavantaṃ gotamaṃ kañcideva desaṃ, sace no bhavaṃ gotamo okāsaṃ karoti pañhassa veyyākaraṇāyā’’ti. ‘‘Akālo kho tāva, kassapa, pañhassa; antaragharaṃ paviṭṭhamhā’’ti. Tatiyampi kho acelo kassapo…pe… antaragharaṃ paviṭṭhamhāti. Evaṃ vutte, acelo kassapo bhagavantaṃ etadavoca – ‘‘na kho pana mayaṃ bhavantaṃ gotamaṃ bahudeva pucchitukāmā’’ti. ‘‘Puccha, kassapa, yadākaṅkhasī’’ti.
‘‘கிங் நு கோ², போ⁴ கோ³தம, ‘ஸயங்கதங் து³க்க²’ந்தி? ‘மா ஹேவங், கஸ்ஸபா’தி ப⁴க³வா அவோச. ‘கிங் பன, போ⁴ கோ³தம, பரங்கதங் து³க்க²’ந்தி? ‘மா ஹேவங், கஸ்ஸபா’தி ப⁴க³வா அவோச. ‘கிங் நு கோ², போ⁴ கோ³தம, ஸயங்கதஞ்ச பரங்கதஞ்ச து³க்க²’ந்தி? ‘மா ஹேவங், கஸ்ஸபா’தி ப⁴க³வா அவோச. ‘கிங் பன போ⁴ கோ³தம, அஸயங்காரங் அபரங்காரங் அதி⁴ச்சஸமுப்பன்னங் து³க்க²’ந்தி? ‘மா ஹேவங், கஸ்ஸபா’தி ப⁴க³வா அவோச. ‘கிங் நு கோ², போ⁴ கோ³தம, நத்தி² து³க்க²’ந்தி? ‘ந கோ², கஸ்ஸப, நத்தி² து³க்க²ங். அத்தி² கோ², கஸ்ஸப, து³க்க²’ந்தி. ‘தேன ஹி ப⁴வங் கோ³தமோ து³க்க²ங் ந ஜானாதி, ந பஸ்ஸதீ’தி. ‘ந க்²வாஹங், கஸ்ஸப, து³க்க²ங் ந ஜானாமி, ந பஸ்ஸாமி. ஜானாமி க்²வாஹங், கஸ்ஸப, து³க்க²ங்; பஸ்ஸாமி க்²வாஹங், கஸ்ஸப, து³க்க²’’’ந்தி.
‘‘Kiṃ nu kho, bho gotama, ‘sayaṃkataṃ dukkha’nti? ‘Mā hevaṃ, kassapā’ti bhagavā avoca. ‘Kiṃ pana, bho gotama, paraṃkataṃ dukkha’nti? ‘Mā hevaṃ, kassapā’ti bhagavā avoca. ‘Kiṃ nu kho, bho gotama, sayaṃkatañca paraṃkatañca dukkha’nti? ‘Mā hevaṃ, kassapā’ti bhagavā avoca. ‘Kiṃ pana bho gotama, asayaṃkāraṃ aparaṃkāraṃ adhiccasamuppannaṃ dukkha’nti? ‘Mā hevaṃ, kassapā’ti bhagavā avoca. ‘Kiṃ nu kho, bho gotama, natthi dukkha’nti? ‘Na kho, kassapa, natthi dukkhaṃ. Atthi kho, kassapa, dukkha’nti. ‘Tena hi bhavaṃ gotamo dukkhaṃ na jānāti, na passatī’ti. ‘Na khvāhaṃ, kassapa, dukkhaṃ na jānāmi, na passāmi. Jānāmi khvāhaṃ, kassapa, dukkhaṃ; passāmi khvāhaṃ, kassapa, dukkha’’’nti.
‘‘கி நு கோ², போ⁴ கோ³தம, ‘ஸயங்கதங் து³க்க²’ந்தி இதி புட்டோ² ஸமானோ ‘மா ஹேவங், கஸ்ஸபா’தி வதே³ஸி. ‘கிங் பன, போ⁴ கோ³தம, பரங்கதங் து³க்க²’ந்தி இதி புட்டோ² ஸமானோ ‘மா ஹேவங், கஸ்ஸபா’தி வதே³ஸி. ‘கிங் நு கோ², போ⁴ கோ³தம, ஸயங்கதஞ்ச பரங்கதஞ்ச து³க்க²’ந்தி இதி புட்டோ² ஸமானோ ‘மா ஹேவங், கஸ்ஸபா’தி வதே³ஸி. ‘கிங் பன, போ⁴ கோ³தம, அஸயங்காரங் அபரங்காரங் அதி⁴ச்சஸமுப்பன்னங் து³க்க²’ந்தி இதி புட்டோ² ஸமானோ ‘மா ஹேவங், கஸ்ஸபா’தி வதே³ஸி. ‘கிங் நு கோ², போ⁴ கோ³தம, நத்தி² து³க்க²’ந்தி இதி புட்டோ² ஸமானோ ‘ந கோ², கஸ்ஸப, நத்தி² து³க்க²ங் , அத்தி² கோ², கஸ்ஸப, து³க்க²’ந்தி வதே³ஸி. ‘தேன ஹி ப⁴வங் கோ³தமோ து³க்க²ங் ந ஜானாதி ந பஸ்ஸதீ’தி இதி புட்டோ² ஸமானோ ‘ந க்²வாஹங், கஸ்ஸப, து³க்க²ங் ந ஜானாமி ந பஸ்ஸாமி. ஜானாமி க்²வாஹங், கஸ்ஸப, து³க்க²ங்; பஸ்ஸாமி க்²வாஹங், கஸ்ஸப, து³க்க²’ந்தி வதே³ஸி. ஆசிக்க²து ச 3 மே, ப⁴ந்தே, ப⁴க³வா து³க்க²ங். தே³ஸேது ச 4 மே, ப⁴ந்தே, ப⁴க³வா து³க்க²’’ந்தி.
‘‘Ki nu kho, bho gotama, ‘sayaṃkataṃ dukkha’nti iti puṭṭho samāno ‘mā hevaṃ, kassapā’ti vadesi. ‘Kiṃ pana, bho gotama, paraṃkataṃ dukkha’nti iti puṭṭho samāno ‘mā hevaṃ, kassapā’ti vadesi. ‘Kiṃ nu kho, bho gotama, sayaṃkatañca paraṃkatañca dukkha’nti iti puṭṭho samāno ‘mā hevaṃ, kassapā’ti vadesi. ‘Kiṃ pana, bho gotama, asayaṃkāraṃ aparaṃkāraṃ adhiccasamuppannaṃ dukkha’nti iti puṭṭho samāno ‘mā hevaṃ, kassapā’ti vadesi. ‘Kiṃ nu kho, bho gotama, natthi dukkha’nti iti puṭṭho samāno ‘na kho, kassapa, natthi dukkhaṃ , atthi kho, kassapa, dukkha’nti vadesi. ‘Tena hi bhavaṃ gotamo dukkhaṃ na jānāti na passatī’ti iti puṭṭho samāno ‘na khvāhaṃ, kassapa, dukkhaṃ na jānāmi na passāmi. Jānāmi khvāhaṃ, kassapa, dukkhaṃ; passāmi khvāhaṃ, kassapa, dukkha’nti vadesi. Ācikkhatu ca 5 me, bhante, bhagavā dukkhaṃ. Desetu ca 6 me, bhante, bhagavā dukkha’’nti.
‘‘‘ஸோ கரோதி ஸோ படிஸங்வேத³யதீ’தி 7 கோ², கஸ்ஸப, ஆதி³தோ ஸதோ ‘ஸயங்கதங் து³க்க²’ந்தி இதி வத³ங் ஸஸ்ஸதங் ஏதங் பரேதி. ‘அஞ்ஞோ கரோதி அஞ்ஞோ படிஸங்வேத³யதீ’தி கோ², கஸ்ஸப, வேத³னாபி⁴துன்னஸ்ஸ ஸதோ ‘பரங்கதங் து³க்க²’ந்தி இதி வத³ங் உச்சே²த³ங் ஏதங் பரேதி. ஏதே தே, கஸ்ஸப, உபோ⁴ அந்தே அனுபக³ம்ம மஜ்ஜே²ன ததா²க³தோ த⁴ம்மங் தே³ஸேதி – ‘அவிஜ்ஜாபச்சயா ஸங்கா²ரா; ஸங்கா²ரபச்சயா விஞ்ஞாணங்…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. அவிஜ்ஜாய த்வேவ அஸேஸவிராக³னிரோதா⁴ ஸங்கா²ரனிரோதோ⁴; ஸங்கா²ரனிரோதா⁴ விஞ்ஞாணனிரோதோ⁴…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’’தி.
‘‘‘So karoti so paṭisaṃvedayatī’ti 8 kho, kassapa, ādito sato ‘sayaṃkataṃ dukkha’nti iti vadaṃ sassataṃ etaṃ pareti. ‘Añño karoti añño paṭisaṃvedayatī’ti kho, kassapa, vedanābhitunnassa sato ‘paraṃkataṃ dukkha’nti iti vadaṃ ucchedaṃ etaṃ pareti. Ete te, kassapa, ubho ante anupagamma majjhena tathāgato dhammaṃ deseti – ‘avijjāpaccayā saṅkhārā; saṅkhārapaccayā viññāṇaṃ…pe… evametassa kevalassa dukkhakkhandhassa samudayo hoti. Avijjāya tveva asesavirāganirodhā saṅkhāranirodho; saṅkhāranirodhā viññāṇanirodho…pe… evametassa kevalassa dukkhakkhandhassa nirodho hotī’’’ti.
ஏவங் வுத்தே, அசேலோ கஸ்ஸபோ ப⁴க³வந்தங் ஏதத³வோச – ‘‘அபி⁴க்கந்தங், ப⁴ந்தே, அபி⁴க்கந்தங், ப⁴ந்தே! ஸெய்யதா²பி, ப⁴ந்தே, நிக்குஜ்ஜிதங் வா உக்குஜ்ஜெய்ய…பே॰… சக்கு²மந்தோ ரூபானி த³க்க²ந்தீதி; ஏவமேவங் ப⁴க³வதா அனேகபரியாயேன த⁴ம்மோ பகாஸிதோ. ஏஸாஹங், ப⁴ந்தே, ப⁴க³வந்தங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. லபெ⁴ய்யாஹங், ப⁴ந்தே, ப⁴க³வதோ ஸந்திகே பப்³ப³ஜ்ஜங், லபெ⁴ய்யங் உபஸம்பத³’’ந்தி.
Evaṃ vutte, acelo kassapo bhagavantaṃ etadavoca – ‘‘abhikkantaṃ, bhante, abhikkantaṃ, bhante! Seyyathāpi, bhante, nikkujjitaṃ vā ukkujjeyya…pe… cakkhumanto rūpāni dakkhantīti; evamevaṃ bhagavatā anekapariyāyena dhammo pakāsito. Esāhaṃ, bhante, bhagavantaṃ saraṇaṃ gacchāmi dhammañca bhikkhusaṅghañca. Labheyyāhaṃ, bhante, bhagavato santike pabbajjaṃ, labheyyaṃ upasampada’’nti.
‘‘ஸசே , ப⁴ந்தே, அஞ்ஞதித்தி²யபுப்³போ³ இமஸ்மிங் த⁴ம்மவினயே ஆகங்க²தி பப்³ப³ஜ்ஜங், ஆகங்க²தி உபஸம்பத³ங், சத்தாரோ மாஸே பரிவஸதி. சதுன்னங் மாஸானங் அச்சயேன 13 (பரிவுத்த²பரிவாஸங்) ஆரத்³த⁴சித்தா பி⁴க்கூ² 14 பப்³பா³ஜெந்தி உபஸம்பாதெ³ந்தி பி⁴க்கு²பா⁴வாய. அஹங் சத்தாரி வஸ்ஸானி பரிவஸிஸ்ஸாமி , சதுன்னங் வஸ்ஸானங் அச்சயேன 15 (பரிவுத்த²பரிவாஸங்) ஆரத்³த⁴சித்தா பி⁴க்கூ² பப்³பா³ஜெந்து உபஸம்பாதெ³ந்து பி⁴க்கு²பா⁴வாயா’’தி.
‘‘Sace , bhante, aññatitthiyapubbo imasmiṃ dhammavinaye ākaṅkhati pabbajjaṃ, ākaṅkhati upasampadaṃ, cattāro māse parivasati. Catunnaṃ māsānaṃ accayena 16 (parivutthaparivāsaṃ) āraddhacittā bhikkhū 17 pabbājenti upasampādenti bhikkhubhāvāya. Ahaṃ cattāri vassāni parivasissāmi , catunnaṃ vassānaṃ accayena 18 (parivutthaparivāsaṃ) āraddhacittā bhikkhū pabbājentu upasampādentu bhikkhubhāvāyā’’ti.
அலத்த² கோ² அசேலோ கஸ்ஸபோ ப⁴க³வதோ ஸந்திகே பப்³ப³ஜ்ஜங், அலத்த² உபஸம்பத³ங். அசிரூபஸம்பன்னோ ச பனாயஸ்மா கஸ்ஸபோ ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘‘கீ²ணா ஜாதி வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’’தி அப்³ப⁴ஞ்ஞாஸி. அஞ்ஞதரோ ச பனாயஸ்மா கஸ்ஸபோ அரஹதங் அஹோஸீதி. ஸத்தமங்.
Alattha kho acelo kassapo bhagavato santike pabbajjaṃ, alattha upasampadaṃ. Acirūpasampanno ca panāyasmā kassapo eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘‘Khīṇā jāti vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti abbhaññāsi. Aññataro ca panāyasmā kassapo arahataṃ ahosīti. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. அசேலகஸ்ஸபஸுத்தவண்ணனா • 7. Acelakassapasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. அசேலகஸ்ஸபஸுத்தவண்ணனா • 7. Acelakassapasuttavaṇṇanā
