| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. அசேலகஸ்ஸபஸுத்தவண்ணனா
7. Acelakassapasuttavaṇṇanā
17. ஸத்தமே அசேலோ கஸ்ஸபோதி லிங்கே³ன அசேலோ நிச்சேலோ, நாமேன கஸ்ஸபோ. தூ³ரதோவாதி மஹதா பி⁴க்கு²ஸங்கே⁴ன பரிவுதங் ஆக³ச்ச²ந்தங் தூ³ரதோ ஏவ அத்³த³ஸ. கிஞ்சிதே³வ தே³ஸந்தி கிஞ்சிதே³வ காரணங். ஓகாஸந்தி பஞ்ஹப்³யாகரணஸ்ஸ க²ணங் காலங். அந்தரக⁴ரந்தி ‘‘ந பல்லத்தி²காய அந்தரக⁴ரே நிஸீதி³ஸ்ஸாமீ’’தி எத்த² அந்தோனிவேஸனங் அந்தரக⁴ரங். ‘‘ஒக்கி²த்தசக்கு² அந்தரக⁴ரே க³மிஸ்ஸாமீ’’தி எத்த² இந்த³கீ²லதோ பட்டா²ய அந்தோகா³மோ. இதா⁴பி அயமேவ அதி⁴ப்பேதோ. யதா³கங்க²ஸீதி யங் இச்ச²ஸி.
17. Sattame acelo kassapoti liṅgena acelo niccelo, nāmena kassapo. Dūratovāti mahatā bhikkhusaṅghena parivutaṃ āgacchantaṃ dūrato eva addasa. Kiñcideva desanti kiñcideva kāraṇaṃ. Okāsanti pañhabyākaraṇassa khaṇaṃ kālaṃ. Antaragharanti ‘‘na pallatthikāya antaraghare nisīdissāmī’’ti ettha antonivesanaṃ antaragharaṃ. ‘‘Okkhittacakkhu antaraghare gamissāmī’’ti ettha indakhīlato paṭṭhāya antogāmo. Idhāpi ayameva adhippeto. Yadākaṅkhasīti yaṃ icchasi.
கஸ்மா பன ப⁴க³வா கதே²துகாமோ யாவததியங் படிக்கி²பீதி? கா³ரவஜனநத்த²ங். தி³ட்டி²க³திகா ஹி கி²ப்பங் கதி²யமானே கா³ரவங் ந கரொந்தி, ‘‘ஸமணங் கோ³தமங் உபஸங்கமிதும்பி புச்சி²தும்பி ஸுகரங், புச்சி²தமத்தேயேவ கதே²தீ’’தி வசனம்பி ந ஸத்³த³ஹந்தி. த்³வே தயோ வாரே படிக்கி²த்தே பன கா³ரவங் கரொந்தி, ‘‘ஸமணங் கோ³தமங் உபஸங்கமிதும்பி பஞ்ஹங் புச்சி²தும்பி து³க்கர’’ந்தி யாவததியங் யாசிதே கதி²யமானங் ஸுஸ்ஸூஸந்தி ஸத்³த³ஹந்தி. இதி ப⁴க³வா ‘‘அயங் ஸுஸ்ஸூஸிஸ்ஸதி ஸத்³த³ஹிஸ்ஸதீ’’தி யாவததியங் யாசாபெத்வா கதே²ஸி. அபிச யதா² பி⁴ஸக்கோ தேலங் வா பா²ணிதங் வா பசந்தோ முது³பாகக²ரபாகானங் பாககாலங் ஆக³மயமானோ பாககாலங் அனதிக்கமித்வாவ ஓதாரேதி. ஏவங் ப⁴க³வா ஸத்தானங் ஞாணபரிபாகங் ஆக³மயமானோ ‘‘எத்தகேன காலேன இமஸ்ஸ ஞாணங் பரிபாகங் க³மிஸ்ஸதீ’’தி ஞத்வாவ யாவததியங் யாசாபேஸி.
Kasmā pana bhagavā kathetukāmo yāvatatiyaṃ paṭikkhipīti? Gāravajananatthaṃ. Diṭṭhigatikā hi khippaṃ kathiyamāne gāravaṃ na karonti, ‘‘samaṇaṃ gotamaṃ upasaṅkamitumpi pucchitumpi sukaraṃ, pucchitamatteyeva kathetī’’ti vacanampi na saddahanti. Dve tayo vāre paṭikkhitte pana gāravaṃ karonti, ‘‘samaṇaṃ gotamaṃ upasaṅkamitumpi pañhaṃ pucchitumpi dukkara’’nti yāvatatiyaṃ yācite kathiyamānaṃ sussūsanti saddahanti. Iti bhagavā ‘‘ayaṃ sussūsissati saddahissatī’’ti yāvatatiyaṃ yācāpetvā kathesi. Apica yathā bhisakko telaṃ vā phāṇitaṃ vā pacanto mudupākakharapākānaṃ pākakālaṃ āgamayamāno pākakālaṃ anatikkamitvāva otāreti. Evaṃ bhagavā sattānaṃ ñāṇaparipākaṃ āgamayamāno ‘‘ettakena kālena imassa ñāṇaṃ paripākaṃ gamissatī’’ti ñatvāva yāvatatiyaṃ yācāpesi.
மா ஹேவங், கஸ்ஸபாதி, கஸ்ஸப, மா ஏவங் ப⁴ணி. ஸயங்கதங் து³க்க²ந்தி ஹி வத்துங் ந வட்டதி, அத்தா நாம கோசி து³க்க²ஸ்ஸ காரகோ நத்தீ²தி தீ³பேதி. பரதோபி ஏஸேவ நயோ. அதி⁴ச்சஸமுப்பன்னந்தி அகாரணேன யதி³ச்சா²ய உப்பன்னங். இதி புட்டோ² ஸமானோதி கஸ்மா ஏவமாஹ? ஏவங் கிரஸ்ஸ அஹோஸி – ‘‘அயங் ‘ஸயங்கதங் து³க்க²’ந்திஆதி³னா புட்டோ² ‘மா ஹேவ’ந்தி வத³தி, ‘நத்தீ²’தி புட்டோ² ‘அத்தீ²’தி வத³தி. ‘ப⁴வங் கோ³தமோ து³க்க²ங் ந ஜானாதி ந பஸ்ஸதீ’தி புட்டோ² ‘ஜானாமி க்²வாஹ’ந்தி வத³தி. கிஞ்சி நு கோ² மயா விரஜ்ஜி²த்வா புச்சி²தோ’’தி மூலதோ பட்டா²ய அத்தனோ புச்ச²மேவ ஸோதெ⁴ந்தோ ஏவமாஹ. ஆசிக்க²து ச மே, ப⁴ந்தே, ப⁴க³வாதி இத⁴ ஸத்த²ரி ஸஞ்ஜாதகா³ரவோ ‘‘ப⁴வ’’ந்தி அவத்வா ‘‘ப⁴க³வா’’தி வத³தி.
Mā hevaṃ, kassapāti, kassapa, mā evaṃ bhaṇi. Sayaṃkataṃ dukkhanti hi vattuṃ na vaṭṭati, attā nāma koci dukkhassa kārako natthīti dīpeti. Paratopi eseva nayo. Adhiccasamuppannanti akāraṇena yadicchāya uppannaṃ. Iti puṭṭho samānoti kasmā evamāha? Evaṃ kirassa ahosi – ‘‘ayaṃ ‘sayaṃkataṃ dukkha’ntiādinā puṭṭho ‘mā heva’nti vadati, ‘natthī’ti puṭṭho ‘atthī’ti vadati. ‘Bhavaṃ gotamo dukkhaṃ na jānāti na passatī’ti puṭṭho ‘jānāmi khvāha’nti vadati. Kiñci nu kho mayā virajjhitvā pucchito’’ti mūlato paṭṭhāya attano pucchameva sodhento evamāha. Ācikkhatu ca me, bhante, bhagavāti idha satthari sañjātagāravo ‘‘bhava’’nti avatvā ‘‘bhagavā’’ti vadati.
ஸோ கரோதீதிஆதி³, ‘‘ஸயங்கதங் து³க்க²’’ந்தி லத்³தி⁴யா படிஸேத⁴னத்த²ங் வுத்தங். எத்த² ச ஸதோதி இத³ங் பு⁴ம்மத்தே² ஸாமிவசனங், தஸ்மா ஏவமத்தோ² த³ட்ட²ப்³போ³ – ஸோ கரோதி ஸோ படிஸங்வேத³யதீதி கோ², கஸ்ஸப, ஆதி³ம்ஹியேவ ஏவங் ஸதி பச்சா² ஸயங்கதங் து³க்க²ந்தி அயங் லத்³தி⁴ ஹோதி. எத்த² ச து³க்க²ந்தி வட்டது³க்க²ங் அதி⁴ப்பேதங். இதி வத³ந்தி ஏதஸ்ஸ புரிமேன ஆதி³ஸத்³தே³ன அனந்தரேன ச ஸஸ்ஸதஸத்³தே³ன ஸம்ப³ந்தோ⁴ ஹோதி. ‘‘தீ³பேதி க³ண்ஹாதீ’’தி அயங் பனெத்த² பாட²ஸேஸோ. இத³ஞ்ஹி வுத்தங் ஹோதி – இதி ஏவங் வத³ந்தோ ஆதி³தோவ ஸஸ்ஸதங் தீ³பேதி, ஸஸ்ஸதங் க³ண்ஹாதி. கஸ்மா? தஸ்ஸ ஹி தங் த³ஸ்ஸனங் ஏதங் பரேதி, காரகஞ்ச வேத³கஞ்ச ஏகமேவ க³ண்ஹந்தங் ஏதங் ஸஸ்ஸதங் உபக³ச்ச²தீதி அத்தோ².
So karotītiādi, ‘‘sayaṃkataṃ dukkha’’nti laddhiyā paṭisedhanatthaṃ vuttaṃ. Ettha ca satoti idaṃ bhummatthe sāmivacanaṃ, tasmā evamattho daṭṭhabbo – so karoti so paṭisaṃvedayatīti kho, kassapa, ādimhiyeva evaṃ sati pacchā sayaṃkataṃ dukkhanti ayaṃ laddhi hoti. Ettha ca dukkhanti vaṭṭadukkhaṃ adhippetaṃ. Iti vadanti etassa purimena ādisaddena anantarena ca sassatasaddena sambandho hoti. ‘‘Dīpeti gaṇhātī’’ti ayaṃ panettha pāṭhaseso. Idañhi vuttaṃ hoti – iti evaṃ vadanto āditova sassataṃ dīpeti, sassataṃ gaṇhāti. Kasmā? Tassa hi taṃ dassanaṃ etaṃ pareti, kārakañca vedakañca ekameva gaṇhantaṃ etaṃ sassataṃ upagacchatīti attho.
அஞ்ஞோ கரோதீதிஆதி³ பன ‘‘பரங்கதங் து³க்க²’’ந்தி லத்³தி⁴யா படிஸேத⁴னத்த²ங் வுத்தங். ‘‘ஆதி³தோ ஸதோ’’தி இத³ங் பன இதா⁴பி ஆஹரிதப்³ப³ங். அயஞ்ஹெத்த² அத்தோ² – அஞ்ஞோ கரோதி அஞ்ஞோ படிஸங்வேதி³யதீதி கோ² பன, கஸ்ஸப, ஆதி³ம்ஹியேவ ஏவங் ஸதி, பச்சா² ‘‘காரகோ இதே⁴வ உச்சி²ஜ்ஜதி, தேன கதங் அஞ்ஞோ படிஸங்வேதி³யதீ’’தி ஏவங் உப்பன்னாய உச்சே²த³தி³ட்டி²யா ஸத்³தி⁴ங் ஸம்பயுத்தாய வேத³னாய அபி⁴துன்னஸ்ஸ வித்³த⁴ஸ்ஸ ஸதோ ‘‘பரங்கதங் து³க்க²’’ந்தி அயங் லத்³தி⁴ ஹோதீதி. இதி வத³ந்திஆதி³ வுத்தனயேனேவ யோஜேதப்³ப³ங். தத்ராயங் யோஜனா – ஏவஞ்ச வத³ந்தோ ஆதி³தோவ உச்சே²த³ங் தீ³பேதி, உச்சே²த³ங் க³ண்ஹாதி. கஸ்மா? தஸ்ஸ ஹி தங் த³ஸ்ஸனங் ஏதங் பரேதி, ஏதங் உச்சே²த³ங் உபக³ச்ச²தீதி அத்தோ².
Añño karotītiādi pana ‘‘paraṃkataṃ dukkha’’nti laddhiyā paṭisedhanatthaṃ vuttaṃ. ‘‘Ādito sato’’ti idaṃ pana idhāpi āharitabbaṃ. Ayañhettha attho – añño karoti añño paṭisaṃvediyatīti kho pana, kassapa, ādimhiyeva evaṃ sati, pacchā ‘‘kārako idheva ucchijjati, tena kataṃ añño paṭisaṃvediyatī’’ti evaṃ uppannāya ucchedadiṭṭhiyā saddhiṃ sampayuttāya vedanāya abhitunnassa viddhassa sato ‘‘paraṃkataṃ dukkha’’nti ayaṃ laddhi hotīti. Iti vadantiādi vuttanayeneva yojetabbaṃ. Tatrāyaṃ yojanā – evañca vadanto āditova ucchedaṃ dīpeti, ucchedaṃ gaṇhāti. Kasmā? Tassa hi taṃ dassanaṃ etaṃ pareti, etaṃ ucchedaṃ upagacchatīti attho.
ஏதே தேதி யே ஸஸ்ஸதுச்சே²த³ஸங்கா²தே உபோ⁴ அந்தே (அனுபக³ம்ம ததா²க³தோ த⁴ம்மங் தே³ஸேதி, ஏதே தே, கஸ்ஸப, உபோ⁴ அந்தே) அனுபக³ம்ம பஹாய அனல்லீயித்வா மஜ்ஜே²ன ததா²க³தோ த⁴ம்மங் தே³ஸேதி, மஜ்ஜி²மாய படிபதா³ய டி²தோ தே³ஸேதீதி அத்தோ². கதரங் த⁴ம்மந்தி சே? யதி³த³ங் அவிஜ்ஜாபச்சயா ஸங்கா²ராதி. எத்த² ஹி காரணதோ ப²லங், காரணனிரோதே⁴ன சஸ்ஸ நிரோதோ⁴ தீ³பிதோ, ந கோசி காரகோ வா வேத³கோ வா நித்³தி³ட்டோ². எத்தாவதா ஸேஸபஞ்ஹா படிஸேதி⁴தா ஹொந்தி. உபோ⁴ அந்தே அனுபக³ம்மாதி இமினா ஹி ததியபஞ்ஹோ படிக்கி²த்தோ. அவிஜ்ஜாபச்சயா ஸங்கா²ராதி இமினா அதி⁴ச்சஸமுப்பன்னதா சேவ அஜானநஞ்ச படிக்கி²த்தந்தி வேதி³தப்³ப³ங்.
Ete teti ye sassatucchedasaṅkhāte ubho ante (anupagamma tathāgato dhammaṃ deseti, ete te, kassapa, ubho ante) anupagamma pahāya anallīyitvā majjhena tathāgato dhammaṃ deseti, majjhimāya paṭipadāya ṭhito desetīti attho. Kataraṃ dhammanti ce? Yadidaṃ avijjāpaccayā saṅkhārāti. Ettha hi kāraṇato phalaṃ, kāraṇanirodhena cassa nirodho dīpito, na koci kārako vā vedako vā niddiṭṭho. Ettāvatā sesapañhā paṭisedhitā honti. Ubho ante anupagammāti iminā hi tatiyapañho paṭikkhitto. Avijjāpaccayā saṅkhārāti iminā adhiccasamuppannatā ceva ajānanañca paṭikkhittanti veditabbaṃ.
லபெ⁴ய்யந்தி இத³ங் ஸோ ப⁴க³வதோ ஸந்திகே பி⁴க்கு²பா⁴வங் பத்த²யமானோ ஆஹ. அத² ப⁴க³வா யோனேன க²ந்த⁴கே தித்தி²யபரிவாஸோ (மஹாவ॰ 86) பஞ்ஞத்தோ, யங் அஞ்ஞதித்தி²யபுப்³போ³ ஸாமணேரபூ⁴மியங் டி²தோ ‘‘அஹங், ப⁴ந்தே, இத்த²ன்னாமோ அஞ்ஞதித்தி²யபுப்³போ³ இமஸ்மிங் த⁴ம்மவினயே ஆகங்கா²மி உபஸம்பத³ங். ஸ்வாஹங், ப⁴ந்தே, ஸங்க⁴ங் சத்தாரோ மாஸே பரிவாஸங் யாசாமீ’’திஆதி³னா நயேன ஸமாதி³யித்வா பரிவஸதி, தங் ஸந்தா⁴ய யோ கோ², கஸ்ஸப, அஞ்ஞதித்தி²யபுப்³போ³திஆதி³மாஹ. தத்த² பப்³ப³ஜ்ஜந்தி வசனஸிலிட்ட²தாவஸேன வுத்தங். அபரிவஸித்வாயேவ ஹி பப்³ப³ஜ்ஜங் லப⁴தி. உபஸம்பத³த்தி²கேன பன நாதிகாலேன கா³மப்பவேஸனாதீ³னி அட்ட² வத்தானி பூரெந்தேன பரிவஸிதப்³ப³ங். ஆரத்³த⁴சித்தாதி அட்ட²வத்தபூரணேன துட்ட²சித்தா. அயமெத்த² ஸங்கே²போ, வித்தா²ரதோ பனேஸ தித்தி²யபரிவாஸோ ஸமந்தபாஸாதி³காய வினயட்ட²கதா²ய பப்³ப³ஜ்ஜக்க²ந்த⁴கவண்ணனாயங் (மஹாவ॰ அட்ட²॰ 86) வுத்தனயேனேவ வேதி³தப்³போ³.
Labheyyanti idaṃ so bhagavato santike bhikkhubhāvaṃ patthayamāno āha. Atha bhagavā yonena khandhake titthiyaparivāso (mahāva. 86) paññatto, yaṃ aññatitthiyapubbo sāmaṇerabhūmiyaṃ ṭhito ‘‘ahaṃ, bhante, itthannāmo aññatitthiyapubbo imasmiṃ dhammavinaye ākaṅkhāmi upasampadaṃ. Svāhaṃ, bhante, saṅghaṃ cattāro māse parivāsaṃ yācāmī’’tiādinā nayena samādiyitvā parivasati, taṃ sandhāya yo kho, kassapa, aññatitthiyapubbotiādimāha. Tattha pabbajjanti vacanasiliṭṭhatāvasena vuttaṃ. Aparivasitvāyeva hi pabbajjaṃ labhati. Upasampadatthikena pana nātikālena gāmappavesanādīni aṭṭha vattāni pūrentena parivasitabbaṃ. Āraddhacittāti aṭṭhavattapūraṇena tuṭṭhacittā. Ayamettha saṅkhepo, vitthārato panesa titthiyaparivāso samantapāsādikāya vinayaṭṭhakathāya pabbajjakkhandhakavaṇṇanāyaṃ (mahāva. aṭṭha. 86) vuttanayeneva veditabbo.
அபிச மயாதி அயமெத்த² பாடோ², அஞ்ஞத்த² பன ‘‘அபிச மெத்தா²’’தி. புக்³க³லவேமத்ததா விதி³தாதி புக்³க³லனானத்தங் விதி³தங். ‘‘அயங் புக்³க³லோ பரிவாஸாரஹோ, அயங் ந பரிவாஸாரஹோ’’தி இத³ங் மய்ஹங் பாகடந்தி த³ஸ்ஸேதி. ததோ கஸ்ஸபோ சிந்தேஸி – ‘‘அஹோ அச்ச²ரியங் பு³த்³த⁴ஸாஸனங், யத்த² ஏவங் க⁴ங்ஸித்வா கொட்டெத்வா யுத்தமேவ க³ண்ஹந்தி, அயுத்தங் ச²ட்³டெ³ந்தீ’’தி. ததோ ஸுட்டு²தரங் பப்³ப³ஜ்ஜாய ஸஞ்ஜாதுஸ்ஸாஹோ ஸசே, ப⁴ந்தேதிஆதி³மாஹ. அத² ப⁴க³வா தஸ்ஸ திப்³ப³ச்ச²ந்த³தங் விதி³த்வா ‘‘ந கஸ்ஸபோ பரிவாஸங் அரஹதீ’’தி அஞ்ஞதரங் பி⁴க்கு²ங் ஆமந்தேஸி – ‘‘க³ச்ச², பி⁴க்கு², கஸ்ஸபங் நஹாபெத்வா பப்³பா³ஜெத்வா ஆனேஹீ’’தி. ஸோ ததா² கத்வா தங் பப்³பா³ஜெத்வா ப⁴க³வதோ ஸந்திகங் அக³மாஸி. ப⁴க³வா க³ணே நிஸீதி³த்வா உபஸம்பாதே³ஸி. தேன வுத்தங் அலத்த² கோ² அசேலோ கஸ்ஸபோ ப⁴க³வதோ ஸந்திகே பப்³ப³ஜ்ஜங், அலத்த² உபஸம்பத³ந்தி. அசிரூபஸம்பன்னோதிஆதி³ ஸேஸங் ப்³ராஹ்மணஸங்யுத்தே (ஸங்॰ நி॰ 1.187) வுத்தமேவாதி. ஸத்தமங்.
Apica mayāti ayamettha pāṭho, aññattha pana ‘‘apica metthā’’ti. Puggalavemattatā viditāti puggalanānattaṃ viditaṃ. ‘‘Ayaṃ puggalo parivāsāraho, ayaṃ na parivāsāraho’’ti idaṃ mayhaṃ pākaṭanti dasseti. Tato kassapo cintesi – ‘‘aho acchariyaṃ buddhasāsanaṃ, yattha evaṃ ghaṃsitvā koṭṭetvā yuttameva gaṇhanti, ayuttaṃ chaḍḍentī’’ti. Tato suṭṭhutaraṃ pabbajjāya sañjātussāho sace, bhantetiādimāha. Atha bhagavā tassa tibbacchandataṃ viditvā ‘‘na kassapo parivāsaṃ arahatī’’ti aññataraṃ bhikkhuṃ āmantesi – ‘‘gaccha, bhikkhu, kassapaṃ nahāpetvā pabbājetvā ānehī’’ti. So tathā katvā taṃ pabbājetvā bhagavato santikaṃ agamāsi. Bhagavā gaṇe nisīditvā upasampādesi. Tena vuttaṃ alattha kho acelo kassapo bhagavato santike pabbajjaṃ, alattha upasampadanti. Acirūpasampannotiādi sesaṃ brāhmaṇasaṃyutte (saṃ. ni. 1.187) vuttamevāti. Sattamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. அசேலகஸ்ஸபஸுத்தங் • 7. Acelakassapasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. அசேலகஸ்ஸபஸுத்தவண்ணனா • 7. Acelakassapasuttavaṇṇanā
