| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੭. ਅਚੇਲਕਸ੍ਸਪਸੁਤ੍ਤવਣ੍ਣਨਾ
7. Acelakassapasuttavaṇṇanā
੧੭. ਸਤ੍ਤਮੇ ਅਚੇਲੋ ਕਸ੍ਸਪੋਤਿ ਲਿਙ੍ਗੇਨ ਅਚੇਲੋ ਨਿਚ੍ਚੇਲੋ, ਨਾਮੇਨ ਕਸ੍ਸਪੋ। ਦੂਰਤੋવਾਤਿ ਮਹਤਾ ਭਿਕ੍ਖੁਸਙ੍ਘੇਨ ਪਰਿવੁਤਂ ਆਗਚ੍ਛਨ੍ਤਂ ਦੂਰਤੋ ਏવ ਅਦ੍ਦਸ। ਕਿਞ੍ਚਿਦੇવ ਦੇਸਨ੍ਤਿ ਕਿਞ੍ਚਿਦੇવ ਕਾਰਣਂ। ਓਕਾਸਨ੍ਤਿ ਪਞ੍ਹਬ੍ਯਾਕਰਣਸ੍ਸ ਖਣਂ ਕਾਲਂ। ਅਨ੍ਤਰਘਰਨ੍ਤਿ ‘‘ਨ ਪਲ੍ਲਤ੍ਥਿਕਾਯ ਅਨ੍ਤਰਘਰੇ ਨਿਸੀਦਿਸ੍ਸਾਮੀ’’ਤਿ ਏਤ੍ਥ ਅਨ੍ਤੋਨਿવੇਸਨਂ ਅਨ੍ਤਰਘਰਂ। ‘‘ਓਕ੍ਖਿਤ੍ਤਚਕ੍ਖੁ ਅਨ੍ਤਰਘਰੇ ਗਮਿਸ੍ਸਾਮੀ’’ਤਿ ਏਤ੍ਥ ਇਨ੍ਦਖੀਲਤੋ ਪਟ੍ਠਾਯ ਅਨ੍ਤੋਗਾਮੋ। ਇਧਾਪਿ ਅਯਮੇવ ਅਧਿਪ੍ਪੇਤੋ। ਯਦਾਕਙ੍ਖਸੀਤਿ ਯਂ ਇਚ੍ਛਸਿ।
17. Sattame acelo kassapoti liṅgena acelo niccelo, nāmena kassapo. Dūratovāti mahatā bhikkhusaṅghena parivutaṃ āgacchantaṃ dūrato eva addasa. Kiñcideva desanti kiñcideva kāraṇaṃ. Okāsanti pañhabyākaraṇassa khaṇaṃ kālaṃ. Antaragharanti ‘‘na pallatthikāya antaraghare nisīdissāmī’’ti ettha antonivesanaṃ antaragharaṃ. ‘‘Okkhittacakkhu antaraghare gamissāmī’’ti ettha indakhīlato paṭṭhāya antogāmo. Idhāpi ayameva adhippeto. Yadākaṅkhasīti yaṃ icchasi.
ਕਸ੍ਮਾ ਪਨ ਭਗવਾ ਕਥੇਤੁਕਾਮੋ ਯਾવਤਤਿਯਂ ਪਟਿਕ੍ਖਿਪੀਤਿ? ਗਾਰવਜਨਨਤ੍ਥਂ। ਦਿਟ੍ਠਿਗਤਿਕਾ ਹਿ ਖਿਪ੍ਪਂ ਕਥਿਯਮਾਨੇ ਗਾਰવਂ ਨ ਕਰੋਨ੍ਤਿ, ‘‘ਸਮਣਂ ਗੋਤਮਂ ਉਪਸਙ੍ਕਮਿਤੁਮ੍ਪਿ ਪੁਚ੍ਛਿਤੁਮ੍ਪਿ ਸੁਕਰਂ, ਪੁਚ੍ਛਿਤਮਤ੍ਤੇਯੇવ ਕਥੇਤੀ’’ਤਿ વਚਨਮ੍ਪਿ ਨ ਸਦ੍ਦਹਨ੍ਤਿ। ਦ੍વੇ ਤਯੋ વਾਰੇ ਪਟਿਕ੍ਖਿਤ੍ਤੇ ਪਨ ਗਾਰવਂ ਕਰੋਨ੍ਤਿ, ‘‘ਸਮਣਂ ਗੋਤਮਂ ਉਪਸਙ੍ਕਮਿਤੁਮ੍ਪਿ ਪਞ੍ਹਂ ਪੁਚ੍ਛਿਤੁਮ੍ਪਿ ਦੁਕ੍ਕਰ’’ਨ੍ਤਿ ਯਾવਤਤਿਯਂ ਯਾਚਿਤੇ ਕਥਿਯਮਾਨਂ ਸੁਸ੍ਸੂਸਨ੍ਤਿ ਸਦ੍ਦਹਨ੍ਤਿ। ਇਤਿ ਭਗવਾ ‘‘ਅਯਂ ਸੁਸ੍ਸੂਸਿਸ੍ਸਤਿ ਸਦ੍ਦਹਿਸ੍ਸਤੀ’’ਤਿ ਯਾવਤਤਿਯਂ ਯਾਚਾਪੇਤ੍વਾ ਕਥੇਸਿ। ਅਪਿਚ ਯਥਾ ਭਿਸਕ੍ਕੋ ਤੇਲਂ વਾ ਫਾਣਿਤਂ વਾ ਪਚਨ੍ਤੋ ਮੁਦੁਪਾਕਖਰਪਾਕਾਨਂ ਪਾਕਕਾਲਂ ਆਗਮਯਮਾਨੋ ਪਾਕਕਾਲਂ ਅਨਤਿਕ੍ਕਮਿਤ੍વਾવ ਓਤਾਰੇਤਿ। ਏવਂ ਭਗવਾ ਸਤ੍ਤਾਨਂ ਞਾਣਪਰਿਪਾਕਂ ਆਗਮਯਮਾਨੋ ‘‘ਏਤ੍ਤਕੇਨ ਕਾਲੇਨ ਇਮਸ੍ਸ ਞਾਣਂ ਪਰਿਪਾਕਂ ਗਮਿਸ੍ਸਤੀ’’ਤਿ ਞਤ੍વਾવ ਯਾવਤਤਿਯਂ ਯਾਚਾਪੇਸਿ।
Kasmā pana bhagavā kathetukāmo yāvatatiyaṃ paṭikkhipīti? Gāravajananatthaṃ. Diṭṭhigatikā hi khippaṃ kathiyamāne gāravaṃ na karonti, ‘‘samaṇaṃ gotamaṃ upasaṅkamitumpi pucchitumpi sukaraṃ, pucchitamatteyeva kathetī’’ti vacanampi na saddahanti. Dve tayo vāre paṭikkhitte pana gāravaṃ karonti, ‘‘samaṇaṃ gotamaṃ upasaṅkamitumpi pañhaṃ pucchitumpi dukkara’’nti yāvatatiyaṃ yācite kathiyamānaṃ sussūsanti saddahanti. Iti bhagavā ‘‘ayaṃ sussūsissati saddahissatī’’ti yāvatatiyaṃ yācāpetvā kathesi. Apica yathā bhisakko telaṃ vā phāṇitaṃ vā pacanto mudupākakharapākānaṃ pākakālaṃ āgamayamāno pākakālaṃ anatikkamitvāva otāreti. Evaṃ bhagavā sattānaṃ ñāṇaparipākaṃ āgamayamāno ‘‘ettakena kālena imassa ñāṇaṃ paripākaṃ gamissatī’’ti ñatvāva yāvatatiyaṃ yācāpesi.
ਮਾ ਹੇવਂ, ਕਸ੍ਸਪਾਤਿ, ਕਸ੍ਸਪ, ਮਾ ਏવਂ ਭਣਿ। ਸਯਂਕਤਂ ਦੁਕ੍ਖਨ੍ਤਿ ਹਿ વਤ੍ਤੁਂ ਨ વਟ੍ਟਤਿ, ਅਤ੍ਤਾ ਨਾਮ ਕੋਚਿ ਦੁਕ੍ਖਸ੍ਸ ਕਾਰਕੋ ਨਤ੍ਥੀਤਿ ਦੀਪੇਤਿ। ਪਰਤੋਪਿ ਏਸੇવ ਨਯੋ। ਅਧਿਚ੍ਚਸਮੁਪ੍ਪਨ੍ਨਨ੍ਤਿ ਅਕਾਰਣੇਨ ਯਦਿਚ੍ਛਾਯ ਉਪ੍ਪਨ੍ਨਂ। ਇਤਿ ਪੁਟ੍ਠੋ ਸਮਾਨੋਤਿ ਕਸ੍ਮਾ ਏવਮਾਹ? ਏવਂ ਕਿਰਸ੍ਸ ਅਹੋਸਿ – ‘‘ਅਯਂ ‘ਸਯਂਕਤਂ ਦੁਕ੍ਖ’ਨ੍ਤਿਆਦਿਨਾ ਪੁਟ੍ਠੋ ‘ਮਾ ਹੇવ’ਨ੍ਤਿ વਦਤਿ, ‘ਨਤ੍ਥੀ’ਤਿ ਪੁਟ੍ਠੋ ‘ਅਤ੍ਥੀ’ਤਿ વਦਤਿ। ‘ਭવਂ ਗੋਤਮੋ ਦੁਕ੍ਖਂ ਨ ਜਾਨਾਤਿ ਨ ਪਸ੍ਸਤੀ’ਤਿ ਪੁਟ੍ਠੋ ‘ਜਾਨਾਮਿ ਖ੍વਾਹ’ਨ੍ਤਿ વਦਤਿ। ਕਿਞ੍ਚਿ ਨੁ ਖੋ ਮਯਾ વਿਰਜ੍ਝਿਤ੍વਾ ਪੁਚ੍ਛਿਤੋ’’ਤਿ ਮੂਲਤੋ ਪਟ੍ਠਾਯ ਅਤ੍ਤਨੋ ਪੁਚ੍ਛਮੇવ ਸੋਧੇਨ੍ਤੋ ਏવਮਾਹ। ਆਚਿਕ੍ਖਤੁ ਚ ਮੇ, ਭਨ੍ਤੇ, ਭਗવਾਤਿ ਇਧ ਸਤ੍ਥਰਿ ਸਞ੍ਜਾਤਗਾਰવੋ ‘‘ਭવ’’ਨ੍ਤਿ ਅવਤ੍વਾ ‘‘ਭਗવਾ’’ਤਿ વਦਤਿ।
Mā hevaṃ, kassapāti, kassapa, mā evaṃ bhaṇi. Sayaṃkataṃ dukkhanti hi vattuṃ na vaṭṭati, attā nāma koci dukkhassa kārako natthīti dīpeti. Paratopi eseva nayo. Adhiccasamuppannanti akāraṇena yadicchāya uppannaṃ. Iti puṭṭho samānoti kasmā evamāha? Evaṃ kirassa ahosi – ‘‘ayaṃ ‘sayaṃkataṃ dukkha’ntiādinā puṭṭho ‘mā heva’nti vadati, ‘natthī’ti puṭṭho ‘atthī’ti vadati. ‘Bhavaṃ gotamo dukkhaṃ na jānāti na passatī’ti puṭṭho ‘jānāmi khvāha’nti vadati. Kiñci nu kho mayā virajjhitvā pucchito’’ti mūlato paṭṭhāya attano pucchameva sodhento evamāha. Ācikkhatu ca me, bhante, bhagavāti idha satthari sañjātagāravo ‘‘bhava’’nti avatvā ‘‘bhagavā’’ti vadati.
ਸੋ ਕਰੋਤੀਤਿਆਦਿ, ‘‘ਸਯਂਕਤਂ ਦੁਕ੍ਖ’’ਨ੍ਤਿ ਲਦ੍ਧਿਯਾ ਪਟਿਸੇਧਨਤ੍ਥਂ વੁਤ੍ਤਂ। ਏਤ੍ਥ ਚ ਸਤੋਤਿ ਇਦਂ ਭੁਮ੍ਮਤ੍ਥੇ ਸਾਮਿવਚਨਂ, ਤਸ੍ਮਾ ਏવਮਤ੍ਥੋ ਦਟ੍ਠਬ੍ਬੋ – ਸੋ ਕਰੋਤਿ ਸੋ ਪਟਿਸਂવੇਦਯਤੀਤਿ ਖੋ, ਕਸ੍ਸਪ, ਆਦਿਮ੍ਹਿਯੇવ ਏવਂ ਸਤਿ ਪਚ੍ਛਾ ਸਯਂਕਤਂ ਦੁਕ੍ਖਨ੍ਤਿ ਅਯਂ ਲਦ੍ਧਿ ਹੋਤਿ। ਏਤ੍ਥ ਚ ਦੁਕ੍ਖਨ੍ਤਿ વਟ੍ਟਦੁਕ੍ਖਂ ਅਧਿਪ੍ਪੇਤਂ। ਇਤਿ વਦਨ੍ਤਿ ਏਤਸ੍ਸ ਪੁਰਿਮੇਨ ਆਦਿਸਦ੍ਦੇਨ ਅਨਨ੍ਤਰੇਨ ਚ ਸਸ੍ਸਤਸਦ੍ਦੇਨ ਸਮ੍ਬਨ੍ਧੋ ਹੋਤਿ। ‘‘ਦੀਪੇਤਿ ਗਣ੍ਹਾਤੀ’’ਤਿ ਅਯਂ ਪਨੇਤ੍ਥ ਪਾਠਸੇਸੋ। ਇਦਞ੍ਹਿ વੁਤ੍ਤਂ ਹੋਤਿ – ਇਤਿ ਏવਂ વਦਨ੍ਤੋ ਆਦਿਤੋવ ਸਸ੍ਸਤਂ ਦੀਪੇਤਿ, ਸਸ੍ਸਤਂ ਗਣ੍ਹਾਤਿ। ਕਸ੍ਮਾ? ਤਸ੍ਸ ਹਿ ਤਂ ਦਸ੍ਸਨਂ ਏਤਂ ਪਰੇਤਿ, ਕਾਰਕਞ੍ਚ વੇਦਕਞ੍ਚ ਏਕਮੇવ ਗਣ੍ਹਨ੍ਤਂ ਏਤਂ ਸਸ੍ਸਤਂ ਉਪਗਚ੍ਛਤੀਤਿ ਅਤ੍ਥੋ।
So karotītiādi, ‘‘sayaṃkataṃ dukkha’’nti laddhiyā paṭisedhanatthaṃ vuttaṃ. Ettha ca satoti idaṃ bhummatthe sāmivacanaṃ, tasmā evamattho daṭṭhabbo – so karoti so paṭisaṃvedayatīti kho, kassapa, ādimhiyeva evaṃ sati pacchā sayaṃkataṃ dukkhanti ayaṃ laddhi hoti. Ettha ca dukkhanti vaṭṭadukkhaṃ adhippetaṃ. Iti vadanti etassa purimena ādisaddena anantarena ca sassatasaddena sambandho hoti. ‘‘Dīpeti gaṇhātī’’ti ayaṃ panettha pāṭhaseso. Idañhi vuttaṃ hoti – iti evaṃ vadanto āditova sassataṃ dīpeti, sassataṃ gaṇhāti. Kasmā? Tassa hi taṃ dassanaṃ etaṃ pareti, kārakañca vedakañca ekameva gaṇhantaṃ etaṃ sassataṃ upagacchatīti attho.
ਅਞ੍ਞੋ ਕਰੋਤੀਤਿਆਦਿ ਪਨ ‘‘ਪਰਂਕਤਂ ਦੁਕ੍ਖ’’ਨ੍ਤਿ ਲਦ੍ਧਿਯਾ ਪਟਿਸੇਧਨਤ੍ਥਂ વੁਤ੍ਤਂ। ‘‘ਆਦਿਤੋ ਸਤੋ’’ਤਿ ਇਦਂ ਪਨ ਇਧਾਪਿ ਆਹਰਿਤਬ੍ਬਂ। ਅਯਞ੍ਹੇਤ੍ਥ ਅਤ੍ਥੋ – ਅਞ੍ਞੋ ਕਰੋਤਿ ਅਞ੍ਞੋ ਪਟਿਸਂવੇਦਿਯਤੀਤਿ ਖੋ ਪਨ, ਕਸ੍ਸਪ, ਆਦਿਮ੍ਹਿਯੇવ ਏવਂ ਸਤਿ, ਪਚ੍ਛਾ ‘‘ਕਾਰਕੋ ਇਧੇવ ਉਚ੍ਛਿਜ੍ਜਤਿ, ਤੇਨ ਕਤਂ ਅਞ੍ਞੋ ਪਟਿਸਂવੇਦਿਯਤੀ’’ਤਿ ਏવਂ ਉਪ੍ਪਨ੍ਨਾਯ ਉਚ੍ਛੇਦਦਿਟ੍ਠਿਯਾ ਸਦ੍ਧਿਂ ਸਮ੍ਪਯੁਤ੍ਤਾਯ વੇਦਨਾਯ ਅਭਿਤੁਨ੍ਨਸ੍ਸ વਿਦ੍ਧਸ੍ਸ ਸਤੋ ‘‘ਪਰਂਕਤਂ ਦੁਕ੍ਖ’’ਨ੍ਤਿ ਅਯਂ ਲਦ੍ਧਿ ਹੋਤੀਤਿ। ਇਤਿ વਦਨ੍ਤਿਆਦਿ વੁਤ੍ਤਨਯੇਨੇવ ਯੋਜੇਤਬ੍ਬਂ। ਤਤ੍ਰਾਯਂ ਯੋਜਨਾ – ਏવਞ੍ਚ વਦਨ੍ਤੋ ਆਦਿਤੋવ ਉਚ੍ਛੇਦਂ ਦੀਪੇਤਿ, ਉਚ੍ਛੇਦਂ ਗਣ੍ਹਾਤਿ। ਕਸ੍ਮਾ? ਤਸ੍ਸ ਹਿ ਤਂ ਦਸ੍ਸਨਂ ਏਤਂ ਪਰੇਤਿ, ਏਤਂ ਉਚ੍ਛੇਦਂ ਉਪਗਚ੍ਛਤੀਤਿ ਅਤ੍ਥੋ।
Añño karotītiādi pana ‘‘paraṃkataṃ dukkha’’nti laddhiyā paṭisedhanatthaṃ vuttaṃ. ‘‘Ādito sato’’ti idaṃ pana idhāpi āharitabbaṃ. Ayañhettha attho – añño karoti añño paṭisaṃvediyatīti kho pana, kassapa, ādimhiyeva evaṃ sati, pacchā ‘‘kārako idheva ucchijjati, tena kataṃ añño paṭisaṃvediyatī’’ti evaṃ uppannāya ucchedadiṭṭhiyā saddhiṃ sampayuttāya vedanāya abhitunnassa viddhassa sato ‘‘paraṃkataṃ dukkha’’nti ayaṃ laddhi hotīti. Iti vadantiādi vuttanayeneva yojetabbaṃ. Tatrāyaṃ yojanā – evañca vadanto āditova ucchedaṃ dīpeti, ucchedaṃ gaṇhāti. Kasmā? Tassa hi taṃ dassanaṃ etaṃ pareti, etaṃ ucchedaṃ upagacchatīti attho.
ਏਤੇ ਤੇਤਿ ਯੇ ਸਸ੍ਸਤੁਚ੍ਛੇਦਸਙ੍ਖਾਤੇ ਉਭੋ ਅਨ੍ਤੇ (ਅਨੁਪਗਮ੍ਮ ਤਥਾਗਤੋ ਧਮ੍ਮਂ ਦੇਸੇਤਿ, ਏਤੇ ਤੇ, ਕਸ੍ਸਪ, ਉਭੋ ਅਨ੍ਤੇ) ਅਨੁਪਗਮ੍ਮ ਪਹਾਯ ਅਨਲ੍ਲੀਯਿਤ੍વਾ ਮਜ੍ਝੇਨ ਤਥਾਗਤੋ ਧਮ੍ਮਂ ਦੇਸੇਤਿ, ਮਜ੍ਝਿਮਾਯ ਪਟਿਪਦਾਯ ਠਿਤੋ ਦੇਸੇਤੀਤਿ ਅਤ੍ਥੋ। ਕਤਰਂ ਧਮ੍ਮਨ੍ਤਿ ਚੇ? ਯਦਿਦਂ ਅવਿਜ੍ਜਾਪਚ੍ਚਯਾ ਸਙ੍ਖਾਰਾਤਿ। ਏਤ੍ਥ ਹਿ ਕਾਰਣਤੋ ਫਲਂ, ਕਾਰਣਨਿਰੋਧੇਨ ਚਸ੍ਸ ਨਿਰੋਧੋ ਦੀਪਿਤੋ, ਨ ਕੋਚਿ ਕਾਰਕੋ વਾ વੇਦਕੋ વਾ ਨਿਦ੍ਦਿਟ੍ਠੋ। ਏਤ੍ਤਾવਤਾ ਸੇਸਪਞ੍ਹਾ ਪਟਿਸੇਧਿਤਾ ਹੋਨ੍ਤਿ। ਉਭੋ ਅਨ੍ਤੇ ਅਨੁਪਗਮ੍ਮਾਤਿ ਇਮਿਨਾ ਹਿ ਤਤਿਯਪਞ੍ਹੋ ਪਟਿਕ੍ਖਿਤ੍ਤੋ। ਅવਿਜ੍ਜਾਪਚ੍ਚਯਾ ਸਙ੍ਖਾਰਾਤਿ ਇਮਿਨਾ ਅਧਿਚ੍ਚਸਮੁਪ੍ਪਨ੍ਨਤਾ ਚੇવ ਅਜਾਨਨਞ੍ਚ ਪਟਿਕ੍ਖਿਤ੍ਤਨ੍ਤਿ વੇਦਿਤਬ੍ਬਂ।
Ete teti ye sassatucchedasaṅkhāte ubho ante (anupagamma tathāgato dhammaṃ deseti, ete te, kassapa, ubho ante) anupagamma pahāya anallīyitvā majjhena tathāgato dhammaṃ deseti, majjhimāya paṭipadāya ṭhito desetīti attho. Kataraṃ dhammanti ce? Yadidaṃ avijjāpaccayā saṅkhārāti. Ettha hi kāraṇato phalaṃ, kāraṇanirodhena cassa nirodho dīpito, na koci kārako vā vedako vā niddiṭṭho. Ettāvatā sesapañhā paṭisedhitā honti. Ubho ante anupagammāti iminā hi tatiyapañho paṭikkhitto. Avijjāpaccayā saṅkhārāti iminā adhiccasamuppannatā ceva ajānanañca paṭikkhittanti veditabbaṃ.
ਲਭੇਯ੍ਯਨ੍ਤਿ ਇਦਂ ਸੋ ਭਗવਤੋ ਸਨ੍ਤਿਕੇ ਭਿਕ੍ਖੁਭਾવਂ ਪਤ੍ਥਯਮਾਨੋ ਆਹ। ਅਥ ਭਗવਾ ਯੋਨੇਨ ਖਨ੍ਧਕੇ ਤਿਤ੍ਥਿਯਪਰਿવਾਸੋ (ਮਹਾવ॰ ੮੬) ਪਞ੍ਞਤ੍ਤੋ, ਯਂ ਅਞ੍ਞਤਿਤ੍ਥਿਯਪੁਬ੍ਬੋ ਸਾਮਣੇਰਭੂਮਿਯਂ ਠਿਤੋ ‘‘ਅਹਂ, ਭਨ੍ਤੇ, ਇਤ੍ਥਨ੍ਨਾਮੋ ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮવਿਨਯੇ ਆਕਙ੍ਖਾਮਿ ਉਪਸਮ੍ਪਦਂ। ਸ੍વਾਹਂ, ਭਨ੍ਤੇ, ਸਙ੍ਘਂ ਚਤ੍ਤਾਰੋ ਮਾਸੇ ਪਰਿવਾਸਂ ਯਾਚਾਮੀ’’ਤਿਆਦਿਨਾ ਨਯੇਨ ਸਮਾਦਿਯਿਤ੍વਾ ਪਰਿવਸਤਿ, ਤਂ ਸਨ੍ਧਾਯ ਯੋ ਖੋ, ਕਸ੍ਸਪ, ਅਞ੍ਞਤਿਤ੍ਥਿਯਪੁਬ੍ਬੋਤਿਆਦਿਮਾਹ। ਤਤ੍ਥ ਪਬ੍ਬਜ੍ਜਨ੍ਤਿ વਚਨਸਿਲਿਟ੍ਠਤਾવਸੇਨ વੁਤ੍ਤਂ। ਅਪਰਿવਸਿਤ੍વਾਯੇવ ਹਿ ਪਬ੍ਬਜ੍ਜਂ ਲਭਤਿ। ਉਪਸਮ੍ਪਦਤ੍ਥਿਕੇਨ ਪਨ ਨਾਤਿਕਾਲੇਨ ਗਾਮਪ੍ਪવੇਸਨਾਦੀਨਿ ਅਟ੍ਠ વਤ੍ਤਾਨਿ ਪੂਰੇਨ੍ਤੇਨ ਪਰਿવਸਿਤਬ੍ਬਂ। ਆਰਦ੍ਧਚਿਤ੍ਤਾਤਿ ਅਟ੍ਠવਤ੍ਤਪੂਰਣੇਨ ਤੁਟ੍ਠਚਿਤ੍ਤਾ। ਅਯਮੇਤ੍ਥ ਸਙ੍ਖੇਪੋ, વਿਤ੍ਥਾਰਤੋ ਪਨੇਸ ਤਿਤ੍ਥਿਯਪਰਿવਾਸੋ ਸਮਨ੍ਤਪਾਸਾਦਿਕਾਯ વਿਨਯਟ੍ਠਕਥਾਯ ਪਬ੍ਬਜ੍ਜਕ੍ਖਨ੍ਧਕવਣ੍ਣਨਾਯਂ (ਮਹਾવ॰ ਅਟ੍ਠ॰ ੮੬) વੁਤ੍ਤਨਯੇਨੇવ વੇਦਿਤਬ੍ਬੋ।
Labheyyanti idaṃ so bhagavato santike bhikkhubhāvaṃ patthayamāno āha. Atha bhagavā yonena khandhake titthiyaparivāso (mahāva. 86) paññatto, yaṃ aññatitthiyapubbo sāmaṇerabhūmiyaṃ ṭhito ‘‘ahaṃ, bhante, itthannāmo aññatitthiyapubbo imasmiṃ dhammavinaye ākaṅkhāmi upasampadaṃ. Svāhaṃ, bhante, saṅghaṃ cattāro māse parivāsaṃ yācāmī’’tiādinā nayena samādiyitvā parivasati, taṃ sandhāya yo kho, kassapa, aññatitthiyapubbotiādimāha. Tattha pabbajjanti vacanasiliṭṭhatāvasena vuttaṃ. Aparivasitvāyeva hi pabbajjaṃ labhati. Upasampadatthikena pana nātikālena gāmappavesanādīni aṭṭha vattāni pūrentena parivasitabbaṃ. Āraddhacittāti aṭṭhavattapūraṇena tuṭṭhacittā. Ayamettha saṅkhepo, vitthārato panesa titthiyaparivāso samantapāsādikāya vinayaṭṭhakathāya pabbajjakkhandhakavaṇṇanāyaṃ (mahāva. aṭṭha. 86) vuttanayeneva veditabbo.
ਅਪਿਚ ਮਯਾਤਿ ਅਯਮੇਤ੍ਥ ਪਾਠੋ, ਅਞ੍ਞਤ੍ਥ ਪਨ ‘‘ਅਪਿਚ ਮੇਤ੍ਥਾ’’ਤਿ। ਪੁਗ੍ਗਲવੇਮਤ੍ਤਤਾ વਿਦਿਤਾਤਿ ਪੁਗ੍ਗਲਨਾਨਤ੍ਤਂ વਿਦਿਤਂ। ‘‘ਅਯਂ ਪੁਗ੍ਗਲੋ ਪਰਿવਾਸਾਰਹੋ, ਅਯਂ ਨ ਪਰਿવਾਸਾਰਹੋ’’ਤਿ ਇਦਂ ਮਯ੍ਹਂ ਪਾਕਟਨ੍ਤਿ ਦਸ੍ਸੇਤਿ। ਤਤੋ ਕਸ੍ਸਪੋ ਚਿਨ੍ਤੇਸਿ – ‘‘ਅਹੋ ਅਚ੍ਛਰਿਯਂ ਬੁਦ੍ਧਸਾਸਨਂ, ਯਤ੍ਥ ਏવਂ ਘਂਸਿਤ੍વਾ ਕੋਟ੍ਟੇਤ੍વਾ ਯੁਤ੍ਤਮੇવ ਗਣ੍ਹਨ੍ਤਿ, ਅਯੁਤ੍ਤਂ ਛਡ੍ਡੇਨ੍ਤੀ’’ਤਿ। ਤਤੋ ਸੁਟ੍ਠੁਤਰਂ ਪਬ੍ਬਜ੍ਜਾਯ ਸਞ੍ਜਾਤੁਸ੍ਸਾਹੋ ਸਚੇ, ਭਨ੍ਤੇਤਿਆਦਿਮਾਹ। ਅਥ ਭਗવਾ ਤਸ੍ਸ ਤਿਬ੍ਬਚ੍ਛਨ੍ਦਤਂ વਿਦਿਤ੍વਾ ‘‘ਨ ਕਸ੍ਸਪੋ ਪਰਿવਾਸਂ ਅਰਹਤੀ’’ਤਿ ਅਞ੍ਞਤਰਂ ਭਿਕ੍ਖੁਂ ਆਮਨ੍ਤੇਸਿ – ‘‘ਗਚ੍ਛ, ਭਿਕ੍ਖੁ, ਕਸ੍ਸਪਂ ਨਹਾਪੇਤ੍વਾ ਪਬ੍ਬਾਜੇਤ੍વਾ ਆਨੇਹੀ’’ਤਿ। ਸੋ ਤਥਾ ਕਤ੍વਾ ਤਂ ਪਬ੍ਬਾਜੇਤ੍વਾ ਭਗવਤੋ ਸਨ੍ਤਿਕਂ ਅਗਮਾਸਿ। ਭਗવਾ ਗਣੇ ਨਿਸੀਦਿਤ੍વਾ ਉਪਸਮ੍ਪਾਦੇਸਿ। ਤੇਨ વੁਤ੍ਤਂ ਅਲਤ੍ਥ ਖੋ ਅਚੇਲੋ ਕਸ੍ਸਪੋ ਭਗવਤੋ ਸਨ੍ਤਿਕੇ ਪਬ੍ਬਜ੍ਜਂ, ਅਲਤ੍ਥ ਉਪਸਮ੍ਪਦਨ੍ਤਿ। ਅਚਿਰੂਪਸਮ੍ਪਨ੍ਨੋਤਿਆਦਿ ਸੇਸਂ ਬ੍ਰਾਹ੍ਮਣਸਂਯੁਤ੍ਤੇ (ਸਂ॰ ਨਿ॰ ੧.੧੮੭) વੁਤ੍ਤਮੇવਾਤਿ। ਸਤ੍ਤਮਂ।
Apica mayāti ayamettha pāṭho, aññattha pana ‘‘apica metthā’’ti. Puggalavemattatā viditāti puggalanānattaṃ viditaṃ. ‘‘Ayaṃ puggalo parivāsāraho, ayaṃ na parivāsāraho’’ti idaṃ mayhaṃ pākaṭanti dasseti. Tato kassapo cintesi – ‘‘aho acchariyaṃ buddhasāsanaṃ, yattha evaṃ ghaṃsitvā koṭṭetvā yuttameva gaṇhanti, ayuttaṃ chaḍḍentī’’ti. Tato suṭṭhutaraṃ pabbajjāya sañjātussāho sace, bhantetiādimāha. Atha bhagavā tassa tibbacchandataṃ viditvā ‘‘na kassapo parivāsaṃ arahatī’’ti aññataraṃ bhikkhuṃ āmantesi – ‘‘gaccha, bhikkhu, kassapaṃ nahāpetvā pabbājetvā ānehī’’ti. So tathā katvā taṃ pabbājetvā bhagavato santikaṃ agamāsi. Bhagavā gaṇe nisīditvā upasampādesi. Tena vuttaṃ alattha kho acelo kassapo bhagavato santike pabbajjaṃ, alattha upasampadanti. Acirūpasampannotiādi sesaṃ brāhmaṇasaṃyutte (saṃ. ni. 1.187) vuttamevāti. Sattamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੭. ਅਚੇਲਕਸ੍ਸਪਸੁਤ੍ਤਂ • 7. Acelakassapasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੭. ਅਚੇਲਕਸ੍ਸਪਸੁਤ੍ਤવਣ੍ਣਨਾ • 7. Acelakassapasuttavaṇṇanā
