| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(16) 6. அசேலகவக்³க³வண்ணனா
(16) 6. Acelakavaggavaṇṇanā
157-163. இதோ பரேஸு பன ஸுத்தபதே³ஸு ‘‘கா³ள்ஹா’’தி வுத்தமத்த²ங் விவரந்தோ ‘‘கக்க²ளா’’தி ஆஹ. கக்க²ளசாரோ சஸ்ஸா ந லூக²ஸபா⁴வோ. அத² கோ² தண்ஹாவஸேன தி²ரக்³க³ஹணந்தி ஆஹ ‘‘லோப⁴வஸேன தி²ரக்³க³ஹணா’’தி. அகா³ள்ஹா படிபதா³தி வா காமானங் ஓகா³ஹனங் படிபத்தி, காமஸுகா²னுயோகோ³தி அத்தோ². நிஜ்ஜா²மா படிபதா³தி காயஸ்ஸ நிஜ்ஜா²பனவஸேன கே²பனவஸேன பவத்தா படிபத்தி, அத்தகிலமதா²னுயோகோ³தி அத்தோ². நிச்சேலோதி நிஸ்ஸட்ட²சேலோ ஸப்³பே³ன ஸப்³ப³ங் படிக்கி²த்தசேலோ. நக்³கி³யவதஸமாதா³னேன நக்³கோ³. டி²தகோவ உச்சாரங் கரோதீதிஆதி³ நித³ஸ்ஸனமத்தங் வமித்வா முக²விக்கா²லனாதி³ஆசாரஸ்ஸபி தேன விஸ்ஸட்ட²த்தா. ஜிவ்ஹாய ஹத்த²ங் அபலேக²தி அவலேக²தி உத³கேன அதோ⁴வனதோ. து³தியவிகப்பேபி ஏஸேவ நயோ. ‘‘ஏஹி, ப⁴த³ந்தே’’தி வுத்தே உபக³மனஸங்கா²தோ விதி⁴ ஏஹிப⁴த³ந்தோ, தங் சரதீதி ஏஹிப⁴த³ந்திகோ, தப்படிக்கே²பேன ந ஏஹிப⁴த³ந்திகோ. ந கரோதி ‘‘ஸமணேன நாம பரஸ்ஸ வசனகரேன ந ப⁴விதப்³ப³’’ந்தி அதி⁴ப்பாயேன.
157-163. Ito paresu pana suttapadesu ‘‘gāḷhā’’ti vuttamatthaṃ vivaranto ‘‘kakkhaḷā’’ti āha. Kakkhaḷacāro cassā na lūkhasabhāvo. Atha kho taṇhāvasena thiraggahaṇanti āha ‘‘lobhavasena thiraggahaṇā’’ti. Agāḷhā paṭipadāti vā kāmānaṃ ogāhanaṃ paṭipatti, kāmasukhānuyogoti attho. Nijjhāmā paṭipadāti kāyassa nijjhāpanavasena khepanavasena pavattā paṭipatti, attakilamathānuyogoti attho. Nicceloti nissaṭṭhacelo sabbena sabbaṃ paṭikkhittacelo. Naggiyavatasamādānena naggo. Ṭhitakova uccāraṃ karotītiādi nidassanamattaṃ vamitvā mukhavikkhālanādiācārassapi tena vissaṭṭhattā. Jivhāya hatthaṃ apalekhati avalekhati udakena adhovanato. Dutiyavikappepi eseva nayo. ‘‘Ehi, bhadante’’ti vutte upagamanasaṅkhāto vidhi ehibhadanto, taṃ caratīti ehibhadantiko, tappaṭikkhepena na ehibhadantiko. Na karoti ‘‘samaṇena nāma parassa vacanakarena na bhavitabba’’nti adhippāyena.
புரேதரந்தி தங் டா²னங் அத்தனோ உபக³மனதோ புரேதரங். தங் கிர ஸோ ‘‘பி⁴க்கு²னா நாம யதி³ச்ச²கா ஏவ பி⁴க்கா² க³ஹேதப்³பா³’’தி அதி⁴ப்பாயேன ந க³ண்ஹாதி. உத்³தி³ஸ்ஸ கதங் மம நிமித்தபா⁴வேன ப³ஹூ கு²த்³த³கா பாணா ஸங்கா⁴தங் ஆபாதி³தாதி ந க³ண்ஹாதி. நிமந்தனங் ந ஸாதி³யதி ஏவங் தேஸங் வசனங் கதங் ப⁴விஸ்ஸதீதி. கும்பி⁴ ஆதீ³ஸுபி ஸோ ஸத்தஸஞ்ஞீதி ஆஹ ‘‘கும்பி⁴-களோபியோ’’திஆதி³. கப³ளந்தராயோ ஹோதீதி உட்டி²தஸ்ஸ த்³வின்னம்பி கப³ளந்தராயோ ஹோதி. கா³மஸபா⁴கா³தி³வஸேன ஸங்க³ம்ம கித்தெந்தி ஏதிஸ்ஸாதி ஸங்கித்தி, யதா²ஸங்ஹததண்டு³லாதி³ஸஞ்சயோ. மானுஸகானீதி வெய்யாவச்சகரா மனுஸ்ஸா.
Puretaranti taṃ ṭhānaṃ attano upagamanato puretaraṃ. Taṃ kira so ‘‘bhikkhunā nāma yadicchakā eva bhikkhā gahetabbā’’ti adhippāyena na gaṇhāti. Uddissa kataṃ mama nimittabhāvena bahū khuddakā pāṇā saṅghātaṃ āpāditāti na gaṇhāti. Nimantanaṃ na sādiyati evaṃ tesaṃ vacanaṃ kataṃ bhavissatīti. Kumbhi ādīsupi so sattasaññīti āha ‘‘kumbhi-kaḷopiyo’’tiādi. Kabaḷantarāyo hotīti uṭṭhitassa dvinnampi kabaḷantarāyo hoti. Gāmasabhāgādivasena saṅgamma kittenti etissāti saṅkitti, yathāsaṃhatataṇḍulādisañcayo. Mānusakānīti veyyāvaccakarā manussā.
ஸுராபானமேவாதி மஜ்ஜலக்க²ணப்பத்தாய ஸுராய பானமேவ. ஸுராக³ஹணேனேவெத்த² மேரயம்பி ஸங்க³ஹிதங். ஏகாகா³ரமேவ உஞ்ச²தீதி ஏகாகா³ரிகோ. ஏகாலோபேனேவ வத்ததீதி ஏகாலோபிகோ. தீ³யதி ஏதாயாதி த³த்தி, த்³வத்திஆலோபமத்தக்³கா³ஹி கு²த்³த³கங் பி⁴க்கா²தா³னபா⁴ஜனங். தேனாஹ ‘‘கு²த்³த³கபாதீ’’தி. அபு⁴ஞ்ஜனவஸேன ஏகோ அஹோ ஏதஸ்ஸ அத்தீ²தி ஏகாஹிகோ, ஆஹாரோ, தங் ஏகாஹிகங். ஸோ பன அத்த²தோ ஏகதி³வஸங் லங்க⁴கோ ஹோதீதி ஆஹ ‘‘ஏகாதி³வஸந்தரிக’’ந்தி. த்³வாஹிகந்திஆதீ³ஸுபி ஏஸேவ நயோ. ஏகாஹங் அபு⁴ஞ்ஜித்வா ஏகாஹங் பு⁴ஞ்ஜனங் ஏகாஹவாரோ, தங் ஏகாஹிகமேவ அத்த²தோ. த்³வீஹங் அபு⁴ஞ்ஜித்வா த்³வீஹங் பு⁴ஞ்ஜனங் த்³வீஹவாரோ. ஸேஸபத³த்³வயேபி ஏஸேவ நயோ. உக்கட்டோ² பன பரியாயப⁴த்தபோ⁴ஜனிகோ த்³வீஹங் அபு⁴ஞ்ஜித்வா ஏகாஹமேவ பு⁴ஞ்ஜதி. ஸேஸத்³வயேபி ஏஸேவ நயோ.
Surāpānamevāti majjalakkhaṇappattāya surāya pānameva. Surāgahaṇenevettha merayampi saṅgahitaṃ. Ekāgārameva uñchatīti ekāgāriko. Ekālopeneva vattatīti ekālopiko. Dīyati etāyāti datti, dvattiālopamattaggāhi khuddakaṃ bhikkhādānabhājanaṃ. Tenāha ‘‘khuddakapātī’’ti. Abhuñjanavasena eko aho etassa atthīti ekāhiko, āhāro, taṃ ekāhikaṃ. So pana atthato ekadivasaṃ laṅghako hotīti āha ‘‘ekādivasantarika’’nti. Dvāhikantiādīsupi eseva nayo. Ekāhaṃ abhuñjitvā ekāhaṃ bhuñjanaṃ ekāhavāro, taṃ ekāhikameva atthato. Dvīhaṃ abhuñjitvā dvīhaṃ bhuñjanaṃ dvīhavāro. Sesapadadvayepi eseva nayo. Ukkaṭṭho pana pariyāyabhattabhojaniko dvīhaṃ abhuñjitvā ekāhameva bhuñjati. Sesadvayepi eseva nayo.
மிச்சா²வாயாமவஸேனேவ உக்குடிகவதானுயோகோ³தி ஆஹ ‘‘உக்குடிகவீரியமனுயுத்தோ’’தி. அத்தகிலமதா²னுயோக³ந்தி அத்தனோ கிலமதா²னுயோக³ங், ஸரீரது³க்க²காரணந்தி அத்தோ². ஸரீரபரியாயோ ஹி இத⁴ அத்தஸத்³தோ³ ‘‘அத்தந்தபோ’’திஆதீ³ஸு (ம॰ நி॰ 2.413) விய. த்³வே அந்தேதி உபோ⁴ கோடியோ, உபோ⁴ லாமகபடிபத்தியோதி அத்தோ². லாமகம்பி ஹி அந்தோதி வுச்சதி ‘‘அந்தமித³ங், பி⁴க்க²வே, ஜீவிகானங் (ஸங்॰ நி॰ 3.80; இதிவு॰ 61), கொட்ட²கோ அந்தோ’’தி ஏவமாதீ³ஸு. மஜ்ஜி²மபடிபதா³ய உப்பத²பா⁴வேன அமனீயா க³ந்தப்³பா³ ஞாதப்³பா³தி அந்தா. ததோ ஏவ லாமகா.
Micchāvāyāmavaseneva ukkuṭikavatānuyogoti āha ‘‘ukkuṭikavīriyamanuyutto’’ti. Attakilamathānuyoganti attano kilamathānuyogaṃ, sarīradukkhakāraṇanti attho. Sarīrapariyāyo hi idha attasaddo ‘‘attantapo’’tiādīsu (ma. ni. 2.413) viya. Dve anteti ubho koṭiyo, ubho lāmakapaṭipattiyoti attho. Lāmakampi hi antoti vuccati ‘‘antamidaṃ, bhikkhave, jīvikānaṃ (saṃ. ni. 3.80; itivu. 61), koṭṭhako anto’’ti evamādīsu. Majjhimapaṭipadāya uppathabhāvena amanīyā gantabbā ñātabbāti antā. Tato eva lāmakā.
அசேலகவக்³க³வண்ணனா நிட்டி²தா.
Acelakavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / (16) 6. அசேலகவக்³கோ³ • (16) 6. Acelakavaggo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / (16) 6. அசேலகவக்³க³வண்ணனா • (16) 6. Acelakavaggavaṇṇanā
