| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
5. அசேலகவக்³கோ³
5. Acelakavaggo
1. அசேலகஸிக்கா²பத³வண்ணனா
1. Acelakasikkhāpadavaṇṇanā
அசேலகவக்³க³ஸ்ஸ பட²மே ஏதேஸங் அசேலகாதீ³னங் அஞ்ஞதித்தி²யானங் யங்கிஞ்சி ஆமிஸங் ஏகப்பயோகே³ன தெ³ந்தஸ்ஸ ஏகங் பாசித்தியங், அவச்சி²ந்தி³த்வா அவச்சி²ந்தி³த்வா தெ³ந்தஸ்ஸ பயோகே³ பயோகே³ பாசித்தியங்.
Acelakavaggassa paṭhame etesaṃ acelakādīnaṃ aññatitthiyānaṃ yaṃkiñci āmisaṃ ekappayogena dentassa ekaṃ pācittiyaṃ, avacchinditvā avacchinditvā dentassa payoge payoge pācittiyaṃ.
வேஸாலியங் ஆயஸ்மந்தங் ஆனந்த³ங் ஆரப்³ப⁴ பரிப்³பா³ஜிகாய த்³வே பூவே தா³னவத்து²ஸ்மிங் பஞ்ஞத்தங், அஸாதா⁴ரணபஞ்ஞத்தி, அனாணத்திகங், திகபாசித்தியங், உத³கத³ந்தபோனங் தெ³ந்தஸ்ஸ, அதித்தி²யே தித்தி²யஸஞ்ஞிஸ்ஸ, வேமதிகஸ்ஸ ச து³க்கடங். அதித்தி²யே அதித்தி²யஸஞ்ஞிஸ்ஸ, அனுபஸம்பன்னேன தா³பெந்தஸ்ஸ, தேஸங் ஸந்திகே பா⁴ஜனங் நிக்கி²பித்வா ‘‘இத³ங் க³ண்ஹதா²’’தி ப⁴ணந்தஸ்ஸ, தேஸங் வா நிக்கி²த்தபா⁴ஜனே தெ³ந்தஸ்ஸ, பா³ஹிரலேபங் தெ³ந்தஸ்ஸ, உம்மத்தகாதீ³னஞ்ச அனாபத்தி. அஞ்ஞதித்தி²யதா, அனநுஞ்ஞாததா, அஜ்ஜோ²ஹரணீயங் அஜ்ஜோ²ஹரணத்தா²ய ஸஹத்தா² அனிக்கி²த்தபா⁴ஜனே தா³னந்தி இமானெத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானீதி.
Vesāliyaṃ āyasmantaṃ ānandaṃ ārabbha paribbājikāya dve pūve dānavatthusmiṃ paññattaṃ, asādhāraṇapaññatti, anāṇattikaṃ, tikapācittiyaṃ, udakadantaponaṃ dentassa, atitthiye titthiyasaññissa, vematikassa ca dukkaṭaṃ. Atitthiye atitthiyasaññissa, anupasampannena dāpentassa, tesaṃ santike bhājanaṃ nikkhipitvā ‘‘idaṃ gaṇhathā’’ti bhaṇantassa, tesaṃ vā nikkhittabhājane dentassa, bāhiralepaṃ dentassa, ummattakādīnañca anāpatti. Aññatitthiyatā, ananuññātatā, ajjhoharaṇīyaṃ ajjhoharaṇatthāya sahatthā anikkhittabhājane dānanti imānettha tīṇi aṅgāni. Samuṭṭhānādīni eḷakalomasadisānīti.
அசேலகஸிக்கா²பத³வண்ணனா நிட்டி²தா.
Acelakasikkhāpadavaṇṇanā niṭṭhitā.
2. உய்யோஜனஸிக்கா²பத³வண்ணனா
2. Uyyojanasikkhāpadavaṇṇanā
து³தியே தா³பெத்வா வா அதா³பெத்வா வாதி யங்கிஞ்சி ஆமிஸங் தா³பெத்வா வா ந தா³பெத்வா வா. உய்யோஜெய்யாதி மாதுகா³மேன ஸத்³தி⁴ங் ஹஸனகீளனரஹோனிஸஜ்ஜாதீ³னி கத்துகாமோ ‘க³ச்சா²’திஆதீ³னி வத்வா உய்யோஜெய்ய. ஏததே³வாதி ஏதங் அனாசாரமேவ பச்சயங் கரித்வா, ந அஞ்ஞங் பதிரூபங் காரணங். பாசித்தியந்தி உய்யோஜனமத்தே தாவ து³க்கடங், யதா³ பனஸ்ஸ ஸோ த³ஸ்ஸனூபசாரங் வா ஸவனூபசாரங் வா ஏகேன பாதே³ன விஜஹதி, அபரங் து³க்கடங், து³தியேன விஜஹிதே பாசித்தியங். எத்த² ச த³ஸ்ஸனூபசாரஸ்ஸ அஜ்ஜோ²காஸே ட²த்வா த்³வாத³ஸஹத்த²ப்பமாணங், ததா² ஸவனூபசாரஸ்ஸ. ஸசே பன அந்தரா குட்டத்³வாரபாகாராத³யோ ஹொந்தி, தேஹி அந்தரிதபா⁴வோயேவ உபசாராதிக்கமோ.
Dutiye dāpetvā vā adāpetvā vāti yaṃkiñci āmisaṃ dāpetvā vā na dāpetvā vā. Uyyojeyyāti mātugāmena saddhiṃ hasanakīḷanarahonisajjādīni kattukāmo ‘gacchā’tiādīni vatvā uyyojeyya. Etadevāti etaṃ anācārameva paccayaṃ karitvā, na aññaṃ patirūpaṃ kāraṇaṃ. Pācittiyanti uyyojanamatte tāva dukkaṭaṃ, yadā panassa so dassanūpacāraṃ vā savanūpacāraṃ vā ekena pādena vijahati, aparaṃ dukkaṭaṃ, dutiyena vijahite pācittiyaṃ. Ettha ca dassanūpacārassa ajjhokāse ṭhatvā dvādasahatthappamāṇaṃ, tathā savanūpacārassa. Sace pana antarā kuṭṭadvārapākārādayo honti, tehi antaritabhāvoyeva upacārātikkamo.
ஸாவத்தி²யங் உபனந்த³ங் ஆரப்³ப⁴ உய்யோஜனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, உய்யோஜனாணத்திகாய ஸாணத்திகங், திகபாசித்தியங், அனுபஸம்பன்னே திகது³க்கடங், உபி⁴ன்னம்பி கலிஸாஸனாரோபனே து³க்கடமேவ, ‘‘உபோ⁴ ஏகதோ ந யாபெஸ்ஸாமா’’தி ஏவமாதீ³ஹி பதிரூபகாரணேஹி உய்யோஜெந்தஸ்ஸ, உம்மத்தகாதீ³னஞ்ச அனாபத்தி. அனாசாரங் ஆசரிதுகாமதா, தத³த்த²மேவ உபஸம்பன்னஸ்ஸ உய்யோஜனங், ஏவங் உய்யோஜிதஸ்ஸ உபசாராதிக்கமோதி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானீதி.
Sāvatthiyaṃ upanandaṃ ārabbha uyyojanavatthusmiṃ paññattaṃ, sādhāraṇapaññatti, uyyojanāṇattikāya sāṇattikaṃ, tikapācittiyaṃ, anupasampanne tikadukkaṭaṃ, ubhinnampi kalisāsanāropane dukkaṭameva, ‘‘ubho ekato na yāpessāmā’’ti evamādīhi patirūpakāraṇehi uyyojentassa, ummattakādīnañca anāpatti. Anācāraṃ ācaritukāmatā, tadatthameva upasampannassa uyyojanaṃ, evaṃ uyyojitassa upacārātikkamoti imānettha tīṇi aṅgāni. Samuṭṭhānādīni adinnādānasadisānīti.
உய்யோஜனஸிக்கா²பத³வண்ணனா நிட்டி²தா.
Uyyojanasikkhāpadavaṇṇanā niṭṭhitā.
3. ஸபோ⁴ஜனஸிக்கா²பத³வண்ணனா
3. Sabhojanasikkhāpadavaṇṇanā
ததியே ஸஹ உபோ⁴ஹி ஜனேஹீதி ஸபோ⁴ஜனங், தஸ்மிங் ஸபோ⁴ஜனே. அத² வா ஸபோ⁴ஜனேதி ஸபோ⁴கே³, ராக³பரியுட்டி²தபுரிஸஸ்ஸ ஹி இத்தீ² போ⁴கோ³, இத்தி²யா ச புரிஸோ, தேனேவஸ்ஸ பத³பா⁴ஜனே ‘‘இத்தீ² சேவ ஹோதி, புரிஸோ சா’’திஆதி³ (பாசி॰ 281) வுத்தங். அனுபக²ஜ்ஜ நிஸஜ்ஜங் கப்பெய்யாதி அனுபவிஸித்வா நிஸீதெ³ய்ய, யங் தஸ்மிங் குலே ஸயனிக⁴ரங், தஸ்ஸ மஹாசதுஸ்ஸாலாதீ³ஸு கதஸ்ஸ மஹல்லகஸ்ஸ பிட்ட²ஸங்கா⁴டதோ ஹத்த²பாஸங் விஜஹித்வா அந்தோஸயனஸ்ஸ ஆஸன்னே டா²னே, கு²த்³த³கஸ்ஸ வா வேமஜ்ஜ²ங் அதிக்கமித்வா நிஸீதெ³ய்யாதி அத்தோ², ஏவங் நிஸின்னஸ்ஸ பாசித்தியங்.
Tatiye saha ubhohi janehīti sabhojanaṃ, tasmiṃ sabhojane. Atha vā sabhojaneti sabhoge, rāgapariyuṭṭhitapurisassa hi itthī bhogo, itthiyā ca puriso, tenevassa padabhājane ‘‘itthī ceva hoti, puriso cā’’tiādi (pāci. 281) vuttaṃ. Anupakhajja nisajjaṃ kappeyyāti anupavisitvā nisīdeyya, yaṃ tasmiṃ kule sayanigharaṃ, tassa mahācatussālādīsu katassa mahallakassa piṭṭhasaṅghāṭato hatthapāsaṃ vijahitvā antosayanassa āsanne ṭhāne, khuddakassa vā vemajjhaṃ atikkamitvā nisīdeyyāti attho, evaṃ nisinnassa pācittiyaṃ.
ஸாவத்தி²யங் உபனந்த³ங் ஆரப்³ப⁴ அனுபக²ஜ்ஜ நிஸஜ்ஜனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், திகபாசித்தியங், அஸயனிக⁴ரே ஸயனிக⁴ரஸஞ்ஞினோ, வேமதிகஸ்ஸ வா து³க்கடங். நஸயனிக⁴ரஸஞ்ஞிஸ்ஸ, வுத்தலக்க²ணங் பதே³ஸங் அனதிக்கமித்வா நிஸின்னஸ்ஸ, பி⁴க்கு²ஸ்மிங் து³தியகே ஸதி, உபோ⁴ஸு நிக்க²ந்தேஸு வா, வீதராகே³ஸு வா நிஸீத³ந்தஸ்ஸ, உம்மத்தகாதீ³னஞ்ச அனாபத்தி. அவீதராக³ஜாயம்பதிகானங் ஸன்னிஹிததா, ஸயனிக⁴ரதா, து³தியஸ்ஸ பி⁴க்கு²னோ அபா⁴வோ, அனுபக²ஜ்ஜ நிஸீத³னந்தி இமானெத்த² சத்தாரி அங்கா³னி. ஸமுட்டா²னாதீ³னி பட²மபாராஜிகஸதி³ஸானீதி.
Sāvatthiyaṃ upanandaṃ ārabbha anupakhajja nisajjanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, asayanighare sayanigharasaññino, vematikassa vā dukkaṭaṃ. Nasayanigharasaññissa, vuttalakkhaṇaṃ padesaṃ anatikkamitvā nisinnassa, bhikkhusmiṃ dutiyake sati, ubhosu nikkhantesu vā, vītarāgesu vā nisīdantassa, ummattakādīnañca anāpatti. Avītarāgajāyampatikānaṃ sannihitatā, sayanigharatā, dutiyassa bhikkhuno abhāvo, anupakhajja nisīdananti imānettha cattāri aṅgāni. Samuṭṭhānādīni paṭhamapārājikasadisānīti.
ஸபோ⁴ஜனஸிக்கா²பத³வண்ணனா நிட்டி²தா.
Sabhojanasikkhāpadavaṇṇanā niṭṭhitā.
4-5. ரஹோபடிச்ச²ன்ன-ரஹோனிஸஜ்ஜஸிக்கா²பத³வண்ணனா
4-5. Rahopaṭicchanna-rahonisajjasikkhāpadavaṇṇanā
சதுத்த²பஞ்சமானி ஸாவத்தி²யங் உபனந்த³ங் ஆரப்³ப⁴ படிச்ச²ன்னாஸனே ச, ரஹோ ச நிஸஜ்ஜனவத்து²ஸ்மிங் பஞ்ஞத்தானி, ஸாதா⁴ரணபஞ்ஞத்தியோ, ஏதேஸம்பி ஸமுட்டா²னாதீ³னி பட²மபாராஜிகஸதி³ஸானேவ. ஸேஸோ கதா²னயோ அனியதத்³வயே வுத்தனயேனேவ வேதி³தப்³போ³.
Catutthapañcamāni sāvatthiyaṃ upanandaṃ ārabbha paṭicchannāsane ca, raho ca nisajjanavatthusmiṃ paññattāni, sādhāraṇapaññattiyo, etesampi samuṭṭhānādīni paṭhamapārājikasadisāneva. Seso kathānayo aniyatadvaye vuttanayeneva veditabbo.
ரஹோபடிச்ச²ன்ன-ரஹோனிஸஜ்ஜஸிக்கா²பத³வண்ணனா நிட்டி²தா.
Rahopaṭicchanna-rahonisajjasikkhāpadavaṇṇanā niṭṭhitā.
6. சாரித்தஸிக்கா²பத³வண்ணனா
6. Cārittasikkhāpadavaṇṇanā
ச²ட்டே² நிமந்திதோதி பஞ்சன்னங் போ⁴ஜனானங் அஞ்ஞதரேன நிமந்திதோ. ஸப⁴த்தோ ஸமானோதி தேனேவ நிமந்தனப⁴த்தேன ஸப⁴த்தோ ஸமானோ. ஸந்தங் பி⁴க்கு²ங் அனாபுச்சா²தி அந்தோஉபசாரஸீமாய த³ஸ்ஸனூபசாரே பி⁴க்கு²ங் தி³ஸ்வா யங் ஸக்கா ஹோதி பகதிவசனேன ஆபுச்சி²துங், தாதி³ஸங் ‘‘அஹங் இத்த²ன்னாமஸ்ஸ க⁴ரங் க³ச்சா²மீ’’தி வா ‘‘சாரித்தங் ஆபஜ்ஜாமீ’’தி வா ஈதி³ஸேன வசனேன அனாபுச்சி²த்வா. புரேப⁴த்தங் வா பச்சா²ப⁴த்தங் வாதி யேன ப⁴த்தேன நிமந்திதோ, தஸ்மிங் பு⁴த்தே வா அபு⁴த்தே வா. குலேஸு சாரித்தங் ஆபஜ்ஜெய்யாதி யஸ்மிங் குலே நிமந்திதோ, ததோ அஞ்ஞானி குலானி பவிஸெய்ய. அஞ்ஞத்ர ஸமயா பாசித்தியந்தி ஸசே ஸோ பி⁴க்கு² வுத்தலக்க²ணங் து³வித⁴ம்பி ஸமயங் ட²பெத்வா அவீதிவத்தே மஜ்ஜ²ன்ஹிகே அஞ்ஞங் குலங் பவிஸதி, அத²ஸ்ஸ க⁴ரூபசாரோக்கமனே து³க்கடங், பட²மபாதே³ன உம்மாரங் அதிக்கமந்தஸ்ஸ அபரம்பி து³க்கடங், து³தியபாதே³ன அதிக்கமே பாசித்தியங்.
Chaṭṭhe nimantitoti pañcannaṃ bhojanānaṃ aññatarena nimantito. Sabhatto samānoti teneva nimantanabhattena sabhatto samāno. Santaṃ bhikkhuṃ anāpucchāti antoupacārasīmāya dassanūpacāre bhikkhuṃ disvā yaṃ sakkā hoti pakativacanena āpucchituṃ, tādisaṃ ‘‘ahaṃ itthannāmassa gharaṃ gacchāmī’’ti vā ‘‘cārittaṃ āpajjāmī’’ti vā īdisena vacanena anāpucchitvā. Purebhattaṃ vā pacchābhattaṃ vāti yena bhattena nimantito, tasmiṃ bhutte vā abhutte vā. Kulesu cārittaṃ āpajjeyyāti yasmiṃ kule nimantito, tato aññāni kulāni paviseyya. Aññatra samayā pācittiyanti sace so bhikkhu vuttalakkhaṇaṃ duvidhampi samayaṃ ṭhapetvā avītivatte majjhanhike aññaṃ kulaṃ pavisati, athassa gharūpacārokkamane dukkaṭaṃ, paṭhamapādena ummāraṃ atikkamantassa aparampi dukkaṭaṃ, dutiyapādena atikkame pācittiyaṃ.
ராஜக³ஹே உபனந்த³ங் ஆரப்³ப⁴ சாரித்தாபஜ்ஜனவத்து²ஸ்மிங் பஞ்ஞத்தங், ‘‘ஸந்தங் பி⁴க்கு²ங், அனாபுச்சா², புரேப⁴த்தங் பச்சா²ப⁴த்தங், அஞ்ஞத்ர ஸமயா’’தி அயமெத்த² சதுப்³பி³தா⁴ அனுபஞ்ஞத்தி, ஸாதா⁴ரணபஞ்ஞத்தி, அனாணத்திகங், திகபாசித்தியங், அனிமந்திதே நிமந்திதஸஞ்ஞிஸ்ஸ, வேமதிகஸ்ஸ வா து³க்கடங். தஸ்மிங் அனிமந்திதஸஞ்ஞிஸ்ஸ, ஸமயே ஸந்தங் பி⁴க்கு²ங் ஆபுச்சி²த்வா, அஸந்தங் பி⁴க்கு²ங் அனாபுச்சி²த்வா பவிஸதோ, அஞ்ஞஸ்ஸ க⁴ரேன வா க⁴ரூபசாரேன வா மக்³கோ³ ஹோதி, தேன க³ச்ச²தோ, அந்தராராமபி⁴க்கு²னுபஸ்ஸயதித்தி²யஸெய்யபடிக்கமனப⁴த்தியக⁴ரானி க³ச்ச²தோ, ஆபதா³ஸு, உம்மத்தகாதீ³னஞ்ச அனாபத்தி. பஞ்சன்னங் போ⁴ஜனானங் அஞ்ஞதரேன நிமந்தனஸாதி³யனங், ஸந்தங் பி⁴க்கு²ங் அனாபுச்ச²னா, ப⁴த்தியக⁴ரதோ அஞ்ஞக⁴ரப்பவிஸனங், மஜ்ஜ²ன்ஹிகானதிக்கமோ, ஸமயஸ்ஸ வா ஆபதா³னங் வா அபா⁴வோதி இமானெத்த² பஞ்ச அங்கா³னி. ஸமுட்டா²னாதீ³னி பட²மகதி²னஸதி³ஸானேவ, இத³ங் பன கிரியாகிரியந்தி.
Rājagahe upanandaṃ ārabbha cārittāpajjanavatthusmiṃ paññattaṃ, ‘‘santaṃ bhikkhuṃ, anāpucchā, purebhattaṃ pacchābhattaṃ, aññatra samayā’’ti ayamettha catubbidhā anupaññatti, sādhāraṇapaññatti, anāṇattikaṃ, tikapācittiyaṃ, animantite nimantitasaññissa, vematikassa vā dukkaṭaṃ. Tasmiṃ animantitasaññissa, samaye santaṃ bhikkhuṃ āpucchitvā, asantaṃ bhikkhuṃ anāpucchitvā pavisato, aññassa gharena vā gharūpacārena vā maggo hoti, tena gacchato, antarārāmabhikkhunupassayatitthiyaseyyapaṭikkamanabhattiyagharāni gacchato, āpadāsu, ummattakādīnañca anāpatti. Pañcannaṃ bhojanānaṃ aññatarena nimantanasādiyanaṃ, santaṃ bhikkhuṃ anāpucchanā, bhattiyagharato aññagharappavisanaṃ, majjhanhikānatikkamo, samayassa vā āpadānaṃ vā abhāvoti imānettha pañca aṅgāni. Samuṭṭhānādīni paṭhamakathinasadisāneva, idaṃ pana kiriyākiriyanti.
சாரித்தஸிக்கா²பத³வண்ணனா நிட்டி²தா.
Cārittasikkhāpadavaṇṇanā niṭṭhitā.
7. மஹானாமஸிக்கா²பத³வண்ணனா
7. Mahānāmasikkhāpadavaṇṇanā
ஸத்தமே சதுமாஸப்பச்சயபவாரணாதி சத்தாரோ மாஸே கி³லானப்பச்சயபவாரணா, ஸப்³ப³ஞ்சேதங் வத்து²வஸேன வுத்தங். அயங் பனெத்த² அத்தோ² – சதுமாஸபவாரணா வா ஹோது, புனபவாரணா வா, நிச்சபவாரணா வா, ஸப்³பா³பி ஸாதி³தப்³பா³, ‘‘இதா³னி மம ரோகோ³ நத்தீ²’’தி ந படிக்கி²பிதப்³பா³, ‘‘ரோகே³ பன ஸதி விஞ்ஞாபெஸ்ஸாமீ’’தி அதி⁴வாஸேதப்³பா³தி. ததோ சே உத்தரி ஸாதி³யெய்யாதி எத்த² ஸசே தத்த² ரத்தீஹி வா பே⁴ஸஜ்ஜேஹி வா பரிச்சே²தோ³ கதோ ஹோதி ‘‘எத்தகாயேவ ரத்தியோ, எத்தகானி வா பே⁴ஸஜ்ஜானி விஞ்ஞாபேதப்³பா³னீ’’தி, அத² ததோ ரத்திபரியந்ததோ வா பே⁴ஸஜ்ஜபரியந்ததோ வா உத்தரி, ந பே⁴ஸஜ்ஜகரணீயேன வா பே⁴ஸஜ்ஜங், அஞ்ஞபே⁴ஸஜ்ஜகரணீயேன வா அஞ்ஞங் பே⁴ஸஜ்ஜங் விஞ்ஞாபெந்தஸ்ஸ பாசித்தியங்.
Sattame catumāsappaccayapavāraṇāti cattāro māse gilānappaccayapavāraṇā, sabbañcetaṃ vatthuvasena vuttaṃ. Ayaṃ panettha attho – catumāsapavāraṇā vā hotu, punapavāraṇā vā, niccapavāraṇā vā, sabbāpi sāditabbā, ‘‘idāni mama rogo natthī’’ti na paṭikkhipitabbā, ‘‘roge pana sati viññāpessāmī’’ti adhivāsetabbāti. Tato ce uttari sādiyeyyāti ettha sace tattha rattīhi vā bhesajjehi vā paricchedo kato hoti ‘‘ettakāyeva rattiyo, ettakāni vā bhesajjāni viññāpetabbānī’’ti, atha tato rattipariyantato vā bhesajjapariyantato vā uttari, na bhesajjakaraṇīyena vā bhesajjaṃ, aññabhesajjakaraṇīyena vā aññaṃ bhesajjaṃ viññāpentassa pācittiyaṃ.
ஸக்கேஸு ச²ப்³ப³க்³கி³யே ஆரப்³ப⁴ பே⁴ஸஜ்ஜவிஞ்ஞாபனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், திகபாசித்தியங், நததுத்தரி ததுத்தரிஸஞ்ஞினோ, வேமதிகஸ்ஸ வா து³க்கடங். நததுத்தரி நததுத்தரிஸஞ்ஞிஸ்ஸ, யேஹி பே⁴ஸஜ்ஜேஹி பவாரிதோ, ததோ அஞ்ஞேஹி வா அதி⁴கதரேஹி வா அத்தே² ஸதி, யாஸு ச ரத்தீஸு பவாரிதோ, தா அதிக்கமித்வாபி அத்தே² ஸதி யதா²பூ⁴தங் ஆசிக்கி²த்வா விஞ்ஞாபெந்தஸ்ஸ, யே ச ஞாதகே வா புக்³க³லிகப்பவாரணாய பவாரிதே வா அபரியந்தபவாரணாய வா பவாரிதே, அஞ்ஞஸ்ஸ வா அத்தா²ய, அத்தனோ வா த⁴னேன விஞ்ஞாபெந்தி, தேஸங், உம்மத்தகாதீ³னஞ்ச அனாபத்தி. ஸங்க⁴பவாரணதா, ததோ பே⁴ஸஜ்ஜவிஞ்ஞத்தி, அகி³லானதா, பரியந்தாதிக்கமோதி இமானெத்த² சத்தாரி அங்கா³னி. ஸமுட்டா²னாதீ³னி ஸஞ்சரித்தஸதி³ஸானீதி.
Sakkesu chabbaggiye ārabbha bhesajjaviññāpanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, natatuttari tatuttarisaññino, vematikassa vā dukkaṭaṃ. Natatuttari natatuttarisaññissa, yehi bhesajjehi pavārito, tato aññehi vā adhikatarehi vā atthe sati, yāsu ca rattīsu pavārito, tā atikkamitvāpi atthe sati yathābhūtaṃ ācikkhitvā viññāpentassa, ye ca ñātake vā puggalikappavāraṇāya pavārite vā apariyantapavāraṇāya vā pavārite, aññassa vā atthāya, attano vā dhanena viññāpenti, tesaṃ, ummattakādīnañca anāpatti. Saṅghapavāraṇatā, tato bhesajjaviññatti, agilānatā, pariyantātikkamoti imānettha cattāri aṅgāni. Samuṭṭhānādīni sañcarittasadisānīti.
மஹானாமஸிக்கா²பத³வண்ணனா நிட்டி²தா.
Mahānāmasikkhāpadavaṇṇanā niṭṭhitā.
8. உய்யுத்தஸேனாஸிக்கா²பத³வண்ணனா
8. Uyyuttasenāsikkhāpadavaṇṇanā
அட்ட²மே உய்யுத்தந்தி கதஉய்யோக³ங், கா³மதோ நிக்க²ந்தந்தி அத்தோ². ஸேனந்தி சதுரங்கி³னிங். அஞ்ஞத்ர ததா²ரூபப்பச்சயாதி ததா²ரூபே காரணே அஸதி கேவலங் ஸேனங் த³ஸ்ஸனத்தா²ய க³ச்ச²தோ பதே³ பதே³ து³க்கடங், த³ஸ்ஸனூபசாரே ட²த்வா பஸ்ஸதோ பாசித்தியங். த³ஸ்ஸனூபசாரோ நாம யத்த² டி²தோ பஸ்ஸதி, தங் பன விஜஹித்வா புனப்புனங் பஸ்ஸதோ பயோகே³ பயோகே³ பாசித்தியங்.
Aṭṭhame uyyuttanti katauyyogaṃ, gāmato nikkhantanti attho. Senanti caturaṅginiṃ. Aññatra tathārūpappaccayāti tathārūpe kāraṇe asati kevalaṃ senaṃ dassanatthāya gacchato pade pade dukkaṭaṃ, dassanūpacāre ṭhatvā passato pācittiyaṃ. Dassanūpacāro nāma yattha ṭhito passati, taṃ pana vijahitvā punappunaṃ passato payoge payoge pācittiyaṃ.
ஸாவத்தி²யங் ச²ப்³ப³க்³கி³யே ஆரப்³ப⁴ ஸேனாத³ஸ்ஸனவத்து²ஸ்மிங் பஞ்ஞத்தங், ‘‘அஞ்ஞத்ர ததா²ரூபப்பச்சயா’’தி அயமெத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகங், திகபாசித்தியங், ஹத்தி²ஆதீ³ஸு ஏகமேகங் த³ஸ்ஸனாய க³மனே வுத்தனயேனேவ து³க்கடங், ததா² அனுய்யுத்தே உய்யுத்தஸஞ்ஞினோ, வேமதிகஸ்ஸ ச து³க்கடங். அனுய்யுத்தஸஞ்ஞினோ பன, ஆராமே ட²த்வா அத்தனோ டி²தோகாஸங் ஆக³தங், படிபத²ங் ஆக³ச்ச²ந்தஞ்ச பஸ்ஸதோ, ததா²ரூபப்பச்சயே, ஆபதா³ஸு, உம்மத்தகாதீ³னஞ்ச அனாபத்தி. உய்யுத்தஸேனங் த³ஸ்ஸனத்தா²ய க³மனங், அனுஞ்ஞாதோகாஸதோ அஞ்ஞத்ர த³ஸ்ஸனங், ததா²ரூபப்பச்சயஸ்ஸ ஆபதா³ய வா அபா⁴வோதி இமானெத்த² சத்தாரி அங்கா³னி. ஸமுட்டா²னாதீ³னி ஏளகலோமஸதி³ஸானி, இத³ங் பன லோகவஜ்ஜங், அகுஸலசித்தங், திவேத³னந்தி.
Sāvatthiyaṃ chabbaggiye ārabbha senādassanavatthusmiṃ paññattaṃ, ‘‘aññatra tathārūpappaccayā’’ti ayamettha anupaññatti, sādhāraṇapaññatti, anāṇattikaṃ, tikapācittiyaṃ, hatthiādīsu ekamekaṃ dassanāya gamane vuttanayeneva dukkaṭaṃ, tathā anuyyutte uyyuttasaññino, vematikassa ca dukkaṭaṃ. Anuyyuttasaññino pana, ārāme ṭhatvā attano ṭhitokāsaṃ āgataṃ, paṭipathaṃ āgacchantañca passato, tathārūpappaccaye, āpadāsu, ummattakādīnañca anāpatti. Uyyuttasenaṃ dassanatthāya gamanaṃ, anuññātokāsato aññatra dassanaṃ, tathārūpappaccayassa āpadāya vā abhāvoti imānettha cattāri aṅgāni. Samuṭṭhānādīni eḷakalomasadisāni, idaṃ pana lokavajjaṃ, akusalacittaṃ, tivedananti.
உய்யுத்தஸேனாஸிக்கா²பத³வண்ணனா நிட்டி²தா.
Uyyuttasenāsikkhāpadavaṇṇanā niṭṭhitā.
9. ஸேனாவாஸஸிக்கா²பத³வண்ணனா
9. Senāvāsasikkhāpadavaṇṇanā
நவமே ததோ சே உத்தரீதி திரத்ததோ உத்தரி சதுத்த²தி³வஸே அத்த²ங்க³தே ஸூரியே ஸேனாய திட்ட²து வா நிஸீத³து வா ஸயது வா, ஸசேபி ஆகாஸே இத்³தி⁴யா கஞ்சி இரியாபத²ங் கப்பேதி, பாசித்தியமேவ.
Navame tato ce uttarīti tirattato uttari catutthadivase atthaṅgate sūriye senāya tiṭṭhatu vā nisīdatu vā sayatu vā, sacepi ākāse iddhiyā kañci iriyāpathaṃ kappeti, pācittiyameva.
ஸாவத்தி²யங் ச²ப்³ப³க்³கி³யே ஆரப்³ப⁴ அதிரேகதிரத்தங் ஸேனாய வஸனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், திகபாசித்தியங், ஊனகதிரத்தே அதிரேகஸஞ்ஞினோ, வேமதிகஸ்ஸ வா து³க்கடங். ஊனகஸஞ்ஞிஸ்ஸ, ததியாய ரத்தியா புராருணா நிக்க²மித்வா புன வஸதோ, கி³லானஸ்ஸ வா கி³லானகரணீயேன வா வஸதோ, படிஸேனாருத்³தா⁴ய ஸேனாய, கேனசி பலிபு³த்³த⁴ஸ்ஸ, ஆபதா³ஸு, உம்மத்தகாதீ³னஞ்ச அனாபத்தி. திரத்தாதிக்கமோ, ஸேனாய ஸூரியஸ்ஸ அத்த²ங்க³மோ, கி³லானதாதீ³னங் அபா⁴வோதி இமானெத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானேவாதி.
Sāvatthiyaṃ chabbaggiye ārabbha atirekatirattaṃ senāya vasanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, ūnakatiratte atirekasaññino, vematikassa vā dukkaṭaṃ. Ūnakasaññissa, tatiyāya rattiyā purāruṇā nikkhamitvā puna vasato, gilānassa vā gilānakaraṇīyena vā vasato, paṭisenāruddhāya senāya, kenaci palibuddhassa, āpadāsu, ummattakādīnañca anāpatti. Tirattātikkamo, senāya sūriyassa atthaṅgamo, gilānatādīnaṃ abhāvoti imānettha tīṇi aṅgāni. Samuṭṭhānādīni eḷakalomasadisānevāti.
ஸேனாவாஸஸிக்கா²பத³வண்ணனா நிட்டி²தா.
Senāvāsasikkhāpadavaṇṇanā niṭṭhitā.
10. உய்யோதி⁴கஸிக்கா²பத³வண்ணனா
10. Uyyodhikasikkhāpadavaṇṇanā
த³ஸமே உக்³க³ந்த்வா உக்³க³ந்த்வா எத்த² யுஜ்ஜ²ந்தீதி உய்யோதி⁴கங், ஸம்பஹாரட்டா²னஸ்ஸேதங் நாமங். ப³லஸ்ஸ அக்³க³ங் ஜானந்தி எத்தா²தி ப³லக்³க³ங், ப³லக³ணனட்டா²னந்தி அத்தோ². ஸேனாய வியூஹங் ஸேனாப்³யூஹங், ஸேனானிவேஸஸ்ஸேதங் நாமங். அனீகஸ்ஸ த³ஸ்ஸனங் அனீகத³ஸ்ஸனங். அனீகங் நாம ‘‘த்³வாத³ஸபுரிஸோ ஹத்தீ², திபுரிஸோ அஸ்ஸோ, சதுப்புரிஸோ ரதோ²’’திஇமினா (பாசி॰ 314) லக்க²ணேன தயோ ஹத்தீ² பச்சி²மகங் ஹத்தா²னீகங், அஸ்ஸானீகரதா²னீகேஸுபி ஏஸேவ நயோ. சத்தாரோ பன ஆவுத⁴ஹத்தா² புரிஸா பச்சி²மகங் பத்தானீகங். ஏதேஸு யங்கிஞ்சி த³ஸ்ஸனாய க³ச்ச²தோ பதே³ பதே³ து³க்கடங், த³ஸ்ஸனூபசாரே ட²த்வா பஸ்ஸதோ பாசித்தியங், உபசாரங் பன விஜஹித்வா புனப்புனங் பஸ்ஸதோ பயோகே³ பயோகே³ பாசித்தியங். ஸேஸங் உய்யுத்தஸேனாஸிக்கா²பதே³ வுத்தனயேனேவ வேதி³தப்³ப³ங், ஆபத்திபே⁴தோ³ பனெத்த² நத்தே²வாதி.
Dasame uggantvā uggantvā ettha yujjhantīti uyyodhikaṃ, sampahāraṭṭhānassetaṃ nāmaṃ. Balassa aggaṃ jānanti etthāti balaggaṃ, balagaṇanaṭṭhānanti attho. Senāya viyūhaṃ senābyūhaṃ, senānivesassetaṃ nāmaṃ. Anīkassa dassanaṃ anīkadassanaṃ. Anīkaṃ nāma ‘‘dvādasapuriso hatthī, tipuriso asso, catuppuriso ratho’’tiiminā (pāci. 314) lakkhaṇena tayo hatthī pacchimakaṃ hatthānīkaṃ, assānīkarathānīkesupi eseva nayo. Cattāro pana āvudhahatthā purisā pacchimakaṃ pattānīkaṃ. Etesu yaṃkiñci dassanāya gacchato pade pade dukkaṭaṃ, dassanūpacāre ṭhatvā passato pācittiyaṃ, upacāraṃ pana vijahitvā punappunaṃ passato payoge payoge pācittiyaṃ. Sesaṃ uyyuttasenāsikkhāpade vuttanayeneva veditabbaṃ, āpattibhedo panettha natthevāti.
உய்யோதி⁴கஸிக்கா²பத³வண்ணனா நிட்டி²தா.
Uyyodhikasikkhāpadavaṇṇanā niṭṭhitā.
அசேலகவக்³கோ³ பஞ்சமோ.
Acelakavaggo pañcamo.
