| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৫. অচেলকৰগ্গো
5. Acelakavaggo
৯৪. অচেলকস্স ৰা পরিব্বাজকস্স ৰা পরিব্বাজিকায ৰা সহত্থা খাদনীযং ৰা ভোজনীযং ৰা দেন্তস্স পাচিত্তিযং কত্থ পঞ্ঞত্তন্তি? ৰেসালিযং পঞ্ঞত্তং। কং আরব্ভাতি? আযস্মন্তং আনন্দং আরব্ভ। কিস্মিং ৰত্থুস্মিন্তি? আযস্মা আনন্দো অঞ্ঞতরিস্সা পরিব্বাজিকায একং মঞ্ঞমানো দ্ৰে পূৰে অদাসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি এল়কলোমকে…পে॰…।
94. Acelakassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dentassa pācittiyaṃ kattha paññattanti? Vesāliyaṃ paññattaṃ. Kaṃ ārabbhāti? Āyasmantaṃ ānandaṃ ārabbha. Kismiṃ vatthusminti? Āyasmā ānando aññatarissā paribbājikāya ekaṃ maññamāno dve pūve adāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti eḷakalomake…pe….
৯৫. ভিক্খুং ‘‘এহাৰুসো, গামং ৰা নিগমং ৰা পিণ্ডায পৰিসিস্সামা’’তি তস্স দাপেত্ৰা ৰা অদাপেত্ৰা ৰা উয্যোজেন্তস্স পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি? আযস্মন্তং উপনন্দং সক্যপুত্তং আরব্ভ। কিস্মিং ৰত্থুস্মিন্তি ? আযস্মা উপনন্দো সক্যপুত্তো ভিক্খুং ‘‘এহাৰুসো, গামং পিণ্ডায পৰিসিস্সামা’’তি, তস্স অদাপেত্ৰা উয্যোজেসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে॰…।
95. Bhikkhuṃ ‘‘ehāvuso, gāmaṃ vā nigamaṃ vā piṇḍāya pavisissāmā’’ti tassa dāpetvā vā adāpetvā vā uyyojentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti ? Āyasmā upanando sakyaputto bhikkhuṃ ‘‘ehāvuso, gāmaṃ piṇḍāya pavisissāmā’’ti, tassa adāpetvā uyyojesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
৯৬. সভোজনে কুলে অনুপখজ্জ নিসজ্জং কপ্পেন্তস্স পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি? আযস্মন্তং উপনন্দং সক্যপুত্তং আরব্ভ। কিস্মিং ৰত্থুস্মিন্তি? আযস্মা উপনন্দো সক্যপুত্তো সভোজনে কুলে অনুপখজ্জ নিসজ্জং কপ্পেসি, তস্মিং ৰত্থুস্মিং। একা পঞ্ঞত্তি । ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে॰…।
96. Sabhojane kule anupakhajja nisajjaṃ kappentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto sabhojane kule anupakhajja nisajjaṃ kappesi, tasmiṃ vatthusmiṃ. Ekā paññatti . Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
৯৭. মাতুগামেন সদ্ধিং রহো পটিচ্ছন্নে আসনে নিসজ্জং কপ্পেন্তস্স পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি? আযস্মন্তং উপনন্দং সক্যপুত্তং আরব্ভ। কিস্মিং ৰত্থুস্মিন্তি? আযস্মা উপনন্দো সক্যপুত্তো মাতুগামেন সদ্ধিং রহো পটিচ্ছন্নে আসনে নিসজ্জং কপ্পেসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে॰…।
97. Mātugāmena saddhiṃ raho paṭicchanne āsane nisajjaṃ kappentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto mātugāmena saddhiṃ raho paṭicchanne āsane nisajjaṃ kappesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
৯৮. মাতুগামেন সদ্ধিং একো একায রহো নিসজ্জং কপ্পেন্তস্স পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি? আযস্মন্তং উপনন্দং সক্যপুত্তং আরব্ভ। কিস্মিং ৰত্থুস্মিন্তি? আযস্মা উপনন্দো সক্যপুত্তো মাতুগামেন সদ্ধিং একো একায রহো নিসজ্জং কপ্পেসি, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো…পে॰…।
98. Mātugāmena saddhiṃ eko ekāya raho nisajjaṃ kappentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto mātugāmena saddhiṃ eko ekāya raho nisajjaṃ kappesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
৯৯. নিমন্তিতেন সভত্তেন সন্তং ভিক্খুং অনাপুচ্ছা পুরেভত্তং পচ্ছাভত্তং কুলেসু চারিত্তং আপজ্জন্তস্স পাচিত্তিযং কত্থ পঞ্ঞত্তন্তি? রাজগহে পঞ্ঞত্তং। কং আরব্ভাতি? আযস্মন্তং উপনন্দং সক্যপুত্তং আরব্ভ। কিস্মিং ৰত্থুস্মিন্তি? আযস্মা উপনন্দো সক্যপুত্তো নিমন্তিতো সভত্তো সমানো পুরেভত্তং পচ্ছাভত্তং কুলেসু চারিত্তং আপজ্জি, তস্মিং ৰত্থুস্মিং। একা পঞ্ঞত্তি, চতস্সো অনুপঞ্ঞত্তিযো। ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি কথিনকে…পে॰…।
99. Nimantitena sabhattena santaṃ bhikkhuṃ anāpucchā purebhattaṃ pacchābhattaṃ kulesu cārittaṃ āpajjantassa pācittiyaṃ kattha paññattanti? Rājagahe paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto nimantito sabhatto samāno purebhattaṃ pacchābhattaṃ kulesu cārittaṃ āpajji, tasmiṃ vatthusmiṃ. Ekā paññatti, catasso anupaññattiyo. Channaṃ āpattisamuṭṭhānānaṃ dvīhi samuṭṭhānehi samuṭṭhāti kathinake…pe….
১০০. ততুত্তরি ভেসজ্জং ৰিঞ্ঞাপেন্তস্স পাচিত্তিযং কত্থ পঞ্ঞত্তন্তি? সক্কেসু পঞ্ঞত্তং। কং আরব্ভাতি? ছব্বগ্গিযে ভিক্খূ আরব্ভ। কিস্মিং ৰত্থুস্মিন্তি? ছব্বগ্গিযা ভিক্খূ মহানামেন সক্কেন ‘‘অজ্জণ্হো, ভন্তে, আগমেথা’’তি ৰুচ্চমানা নাগমেসুং, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে॰…।
100. Tatuttari bhesajjaṃ viññāpentassa pācittiyaṃ kattha paññattanti? Sakkesu paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū mahānāmena sakkena ‘‘ajjaṇho, bhante, āgamethā’’ti vuccamānā nāgamesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
১০১. উয্যুত্তং সেনং দস্সনায গচ্ছন্তস্স পাচিত্তিযং কত্থ পঞ্ঞত্তন্তি ? সাৰত্থিযং পঞ্ঞত্তং। কং আরব্ভাতি? ছব্বগ্গিযে ভিক্খূ আরব্ভ। কিস্মিং ৰত্থুস্মিন্তি? ছব্বগ্গিযা ভিক্খূ উয্যুত্তং সেনং দস্সনায অগমংসু, তস্মিং ৰত্থুস্মিং। একা পঞ্ঞত্তি, একা অনুপঞ্ঞত্তি। ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি এল়কলোমকে…পে॰…।
101. Uyyuttaṃ senaṃ dassanāya gacchantassa pācittiyaṃ kattha paññattanti ? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū uyyuttaṃ senaṃ dassanāya agamaṃsu, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti eḷakalomake…pe….
১০২. অতিরেকতিরত্তং সেনায ৰসন্তস্স পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং। কং আরব্ভাতি? ছব্বগ্গিযে ভিক্খূ আরব্ভ। কিস্মিং ৰত্থুস্মিন্তি? ছব্বগ্গিযা ভিক্খূ অতিরেকতিরত্তং সেনায ৰসিংসু, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি এল়কলোমকে…পে॰…।
102. Atirekatirattaṃ senāya vasantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū atirekatirattaṃ senāya vasiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti eḷakalomake…pe….
১০৩. উয্যোধিকং গচ্ছন্তস্স পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং । কং আরব্ভাতি? ছব্বগ্গিযে ভিক্খূ আরব্ভ। কিস্মিং ৰত্থুস্মিন্তি? ছব্বগ্গিযা ভিক্খূ উয্যোধিকং অগমংসু, তস্মিং ৰত্থুস্মিং। একা পঞ্ঞত্তি। ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি এল়কলোমকে…পে॰…।
103. Uyyodhikaṃ gacchantassa pācittiyaṃ kattha paññattanti? Sāvatthiyaṃ paññattaṃ . Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū uyyodhikaṃ agamaṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti eḷakalomake…pe….
অচেলকৰগ্গো পঞ্চমো।
Acelakavaggo pañcamo.
