| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
৫. অচেলকৰগ্গো
5. Acelakavaggo
১. অচেলকসিক্খাপদং
1. Acelakasikkhāpadaṃ
২৬৯. তেন সমযেন বুদ্ধো ভগৰা ৰেসালিযং ৰিহরতি মহাৰনে কূটাগারসালাযং। তেন খো পন সমযেন সঙ্ঘস্স খাদনীযং উস্সন্নং হোতি। অথ খো আযস্মা আনন্দো ভগৰতো এতমত্থং আরোচেসি। ‘‘তেনহানন্দ, ৰিঘাসাদানং পূৰং দেহী’’তি। ‘‘এৰং ভন্তে’’তি খো আযস্মা আনন্দো ভগৰতো পটিস্সুণিত্ৰা ৰিঘাসাদে পটিপাটিযা নিসীদাপেত্ৰা একেকং পূৰং দেন্তো অঞ্ঞতরিস্সা পরিব্বাজিকায একং মঞ্ঞমানো দ্ৰে পূৰে অদাসি। সামন্তা পরিব্বাজিকাযো তং পরিব্বাজিকং এতদৰোচুং – ‘‘জারো তে এসো সমণো’’তি। ‘‘ন মে সো সমণো জারো, একং মঞ্ঞমানো দ্ৰে পূৰে অদাসী’’তি। দুতিযম্পি খো…পে॰… ততিযম্পি খো আযস্মা আনন্দো একেকং পূৰং দেন্তো তস্সাযেৰ পরিব্বাজিকায একং মঞ্ঞমানো দ্ৰে পূৰে অদাসি। সামন্তা পরিব্বাজিকাযো তং পরিব্বাজিকং এতদৰোচুং – ‘‘জারো তে এসো সমণো’’তি। ‘‘ন মে সো সমণো জারো, একং মঞ্ঞমানো দ্ৰে পূৰে অদাসী’’তি। ‘‘জারো ন জারো’’তি ভণ্ডিংসু। অঞ্ঞতরোপি আজীৰকো পরিৰেসনং অগমাসি। অঞ্ঞতরো ভিক্খু পহূতেন সপ্পিনা ওদনং মদ্দিত্ৰা তস্স আজীৰকস্স মহন্তং পিণ্ডং অদাসি। অথ খো সো আজীৰকো তং পিণ্ডং আদায অগমাসি। অঞ্ঞতরো আজীৰকো তং আজীৰকং এতদৰোচ – ‘‘কুতো তযা, আৰুসো, পিণ্ডো লদ্ধো’’তি? ‘‘তস্সাৰুসো, সমণস্স গোতমস্স মুণ্ডগহপতিকস্স পরিৰেসনায লদ্ধো’’তি।
269. Tena samayena buddho bhagavā vesāliyaṃ viharati mahāvane kūṭāgārasālāyaṃ. Tena kho pana samayena saṅghassa khādanīyaṃ ussannaṃ hoti. Atha kho āyasmā ānando bhagavato etamatthaṃ ārocesi. ‘‘Tenahānanda, vighāsādānaṃ pūvaṃ dehī’’ti. ‘‘Evaṃ bhante’’ti kho āyasmā ānando bhagavato paṭissuṇitvā vighāsāde paṭipāṭiyā nisīdāpetvā ekekaṃ pūvaṃ dento aññatarissā paribbājikāya ekaṃ maññamāno dve pūve adāsi. Sāmantā paribbājikāyo taṃ paribbājikaṃ etadavocuṃ – ‘‘jāro te eso samaṇo’’ti. ‘‘Na me so samaṇo jāro, ekaṃ maññamāno dve pūve adāsī’’ti. Dutiyampi kho…pe… tatiyampi kho āyasmā ānando ekekaṃ pūvaṃ dento tassāyeva paribbājikāya ekaṃ maññamāno dve pūve adāsi. Sāmantā paribbājikāyo taṃ paribbājikaṃ etadavocuṃ – ‘‘jāro te eso samaṇo’’ti. ‘‘Na me so samaṇo jāro, ekaṃ maññamāno dve pūve adāsī’’ti. ‘‘Jāro na jāro’’ti bhaṇḍiṃsu. Aññataropi ājīvako parivesanaṃ agamāsi. Aññataro bhikkhu pahūtena sappinā odanaṃ madditvā tassa ājīvakassa mahantaṃ piṇḍaṃ adāsi. Atha kho so ājīvako taṃ piṇḍaṃ ādāya agamāsi. Aññataro ājīvako taṃ ājīvakaṃ etadavoca – ‘‘kuto tayā, āvuso, piṇḍo laddho’’ti? ‘‘Tassāvuso, samaṇassa gotamassa muṇḍagahapatikassa parivesanāya laddho’’ti.
অস্সোসুং খো উপাসকা তেসং আজীৰকানং ইমং কথাসল্লাপং। অথ খো তে উপাসকা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে উপাসকা ভগৰন্তং এতদৰোচুং – ‘‘ইমে, ভন্তে, তিত্থিযা অৰণ্ণকামা বুদ্ধস্স অৰণ্ণকামা ধম্মস্স অৰণ্ণকামা সঙ্ঘস্স। সাধু, ভন্তে, অয্যা তিত্থিযানং সহত্থা ন দদেয্যু’’ন্তি। অথ খো ভগৰা তে উপাসকে ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো তে উপাসকা ভগৰতা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কমিংসু। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, ভিক্খূনং সিক্খাপদং পঞ্ঞপেস্সামি দস অত্থৰসে পটিচ্চ – সঙ্ঘসুট্ঠুতায, সঙ্ঘফাসুতায …পে॰… সদ্ধম্মট্ঠিতিযা, ৰিনযানুগ্গহায। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Assosuṃ kho upāsakā tesaṃ ājīvakānaṃ imaṃ kathāsallāpaṃ. Atha kho te upāsakā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te upāsakā bhagavantaṃ etadavocuṃ – ‘‘ime, bhante, titthiyā avaṇṇakāmā buddhassa avaṇṇakāmā dhammassa avaṇṇakāmā saṅghassa. Sādhu, bhante, ayyā titthiyānaṃ sahatthā na dadeyyu’’nti. Atha kho bhagavā te upāsake dhammiyā kathāya sandassesi samādapesi samuttejesi sampahaṃsesi. Atha kho te upāsakā bhagavatā dhammiyā kathāya sandassitā samādapitā samuttejitā sampahaṃsitā uṭṭhāyāsanā bhagavantaṃ abhivādetvā padakkhiṇaṃ katvā pakkamiṃsu. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhūnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya, saṅghaphāsutāya …pe… saddhammaṭṭhitiyā, vinayānuggahāya. Evañca pana, bhikkhave, imaṃ sikkhāpadaṃ uddiseyyātha –
২৭০. ‘‘যো পন ভিক্খু অচেলকস্স ৰা পরিব্বাজকস্স ৰা পরিব্বাজিকায ৰা সহত্থা খাদনীযং ৰা ভোজনীযং ৰা দদেয্য, পাচিত্তিয’’ন্তি।
270.‘‘Yo pana bhikkhu acelakassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dadeyya, pācittiya’’nti.
২৭১. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
271.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
অচেলকো নাম যো কোচি পরিব্বাজকসমাপন্নো নগ্গো।
Acelako nāma yo koci paribbājakasamāpanno naggo.
পরিব্বাজকো নাম ভিক্খুঞ্চ সামণেরঞ্চ ঠপেত্ৰা যো কোচি পরিব্বাজকসমাপন্নো।
Paribbājako nāma bhikkhuñca sāmaṇerañca ṭhapetvā yo koci paribbājakasamāpanno.
পরিব্বাজিকা নাম ভিক্খুনিঞ্চ সিক্খমানঞ্চ সামণেরিঞ্চ ঠপেত্ৰা যা কাচি পরিব্বাজিকসমাপন্না।
Paribbājikā nāma bhikkhuniñca sikkhamānañca sāmaṇeriñca ṭhapetvā yā kāci paribbājikasamāpannā.
খাদনীযং নাম পঞ্চ ভোজনানি – উদকদন্তপোনং ঠপেত্ৰা অৰসেসং খাদনীযং নাম।
Khādanīyaṃ nāma pañca bhojanāni – udakadantaponaṃ ṭhapetvā avasesaṃ khādanīyaṃ nāma.
ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং।
Bhojanīyaṃ nāma pañca bhojanāni – odano, kummāso, sattu, maccho, maṃsaṃ.
দদেয্যাতি কাযেন ৰা কাযপটিবদ্ধেন ৰা নিস্সগ্গিযেন ৰা দেতি, আপত্তি পাচিত্তিযস্স।
Dadeyyāti kāyena vā kāyapaṭibaddhena vā nissaggiyena vā deti, āpatti pācittiyassa.
২৭২. তিত্থিযে তিত্থিযসঞ্ঞী সহত্থা খাদনীযং ৰা ভোজনীযং ৰা দেতি, আপত্তি পাচিত্তিযস্স। তিত্থিযে ৰেমতিকো সহত্থা খাদনীযং ৰা ভোজনীযং ৰা দেতি, আপত্তি পাচিত্তিযস্স। তিত্থিযে অতিত্থিযসঞ্ঞী সহত্থা খাদনীযং ৰা ভোজনীযং ৰা দেতি, আপত্তি পাচিত্তিযস্স।
272. Titthiye titthiyasaññī sahatthā khādanīyaṃ vā bhojanīyaṃ vā deti, āpatti pācittiyassa. Titthiye vematiko sahatthā khādanīyaṃ vā bhojanīyaṃ vā deti, āpatti pācittiyassa. Titthiye atitthiyasaññī sahatthā khādanīyaṃ vā bhojanīyaṃ vā deti, āpatti pācittiyassa.
উদকদন্তপোনং দেতি, আপত্তি দুক্কটস্স। অতিত্থিযে তিত্থিযসঞ্ঞী, আপত্তি দুক্কটস্স। অতিত্থিযে ৰেমতিকো, আপত্তি দুক্কটস্স। অতিত্থিযে অতিত্থিযসঞ্ঞী, অনাপত্তি।
Udakadantaponaṃ deti, āpatti dukkaṭassa. Atitthiye titthiyasaññī, āpatti dukkaṭassa. Atitthiye vematiko, āpatti dukkaṭassa. Atitthiye atitthiyasaññī, anāpatti.
২৭৩. অনাপত্তি দাপেতি ন দেতি, উপনিক্খিপিত্ৰা দেতি, বাহিরালেপং দেতি, উম্মত্তকস্স, আদিকম্মিকস্সাতি।
273. Anāpatti dāpeti na deti, upanikkhipitvā deti, bāhirālepaṃ deti, ummattakassa, ādikammikassāti.
অচেলকসিক্খাপদং নিট্ঠিতং পঠমং।
Acelakasikkhāpadaṃ niṭṭhitaṃ paṭhamaṃ.
২. উয্যোজনসিক্খাপদং
2. Uyyojanasikkhāpadaṃ
২৭৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা উপনন্দো সক্যপুত্তো ভাতুনো সদ্ধিৰিহারিকং ভিক্খুং এতদৰোচ – ‘‘এহাৰুসো, গামং পিণ্ডায পৰিসিস্সামা’’তি। তস্স অদাপেত্ৰা উয্যোজেসি – ‘‘গচ্ছাৰুসো, ন মে তযা সদ্ধিং কথা ৰা নিসজ্জা ৰা ফাসু হোতি, এককস্স মে কথা ৰা নিসজ্জা ৰা ফাসু হোতী’’তি। অথ খো সো ভিক্খু উপকট্ঠে কালে নাসক্খি পিণ্ডায চরিতুং, পটিক্কমনেপি ভত্তৰিস্সগ্গং ন সম্ভাৰেসি, ছিন্নভত্তো অহোসি। অথ খো সো ভিক্খু আরামং গন্ত্ৰা ভিক্খূনং এতমত্থং আরোচেসি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো ভিক্খুং – ‘এহাৰুসো, গামং পিণ্ডায পৰিসিস্সামা’তি তস্স অদাপেত্ৰা উয্যোজেস্সতী’’তি …পে॰… সচ্চং কির ত্ৰং, উপনন্দ, ভিক্খুং – ‘‘এহাৰুসো, গামং পিণ্ডায পৰিসিস্সামা’’তি তস্স অদাপেত্ৰা উয্যোজেসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, ভিক্খুং – ‘‘এহাৰুসো, গামং পিণ্ডায পৰিসিস্সামা’’তি তস্স অদাপেত্ৰা উয্যোজেস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে , ইমং সিক্খাপদং উদ্দিসেয্যাথ –
274. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā upanando sakyaputto bhātuno saddhivihārikaṃ bhikkhuṃ etadavoca – ‘‘ehāvuso, gāmaṃ piṇḍāya pavisissāmā’’ti. Tassa adāpetvā uyyojesi – ‘‘gacchāvuso, na me tayā saddhiṃ kathā vā nisajjā vā phāsu hoti, ekakassa me kathā vā nisajjā vā phāsu hotī’’ti. Atha kho so bhikkhu upakaṭṭhe kāle nāsakkhi piṇḍāya carituṃ, paṭikkamanepi bhattavissaggaṃ na sambhāvesi, chinnabhatto ahosi. Atha kho so bhikkhu ārāmaṃ gantvā bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto bhikkhuṃ – ‘ehāvuso, gāmaṃ piṇḍāya pavisissāmā’ti tassa adāpetvā uyyojessatī’’ti …pe… saccaṃ kira tvaṃ, upananda, bhikkhuṃ – ‘‘ehāvuso, gāmaṃ piṇḍāya pavisissāmā’’ti tassa adāpetvā uyyojesīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, bhikkhuṃ – ‘‘ehāvuso, gāmaṃ piṇḍāya pavisissāmā’’ti tassa adāpetvā uyyojessasi! Netaṃ, moghapurisa, appasannānaṃ vā pasādāya…pe… evañca pana, bhikkhave , imaṃ sikkhāpadaṃ uddiseyyātha –
২৭৫. ‘‘যো পন ভিক্খু ভিক্খুং – ‘‘এহাৰুসো, গামং ৰা নিগমং ৰা পিণ্ডায পৰিসিস্সামা’তি তস্স দাপেত্ৰা ৰা অদাপেত্ৰা ৰা উয্যোজেয্য – ‘গচ্ছাৰুসো, ন মে তযা সদ্ধিং কথা ৰা নিসজ্জা ৰা ফাসু হোতি, এককস্স মে কথা ৰা নিসজ্জা ৰা ফাসু হোতী’তি, এতদেৰ পচ্চযং করিত্ৰা অনঞ্ঞং, পাচিত্তিয’’ন্তি।
275.‘‘Yo pana bhikkhu bhikkhuṃ – ‘‘ehāvuso, gāmaṃ vā nigamaṃ vā piṇḍāya pavisissāmā’ti tassa dāpetvā vā adāpetvā vā uyyojeyya – ‘gacchāvuso, na me tayā saddhiṃ kathā vā nisajjā vā phāsu hoti, ekakassa me kathā vā nisajjā vā phāsu hotī’ti, etadeva paccayaṃ karitvā anaññaṃ, pācittiya’’nti.
২৭৬. যো পনাতি যো, যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
276.Yo panāti yo, yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ভিক্খুন্তি অঞ্ঞং ভিক্খুং।
Bhikkhunti aññaṃ bhikkhuṃ.
এহাৰুসো, গামং ৰা নিগমং ৰাতি গামোপি নিগমোপি নগরম্পি, গামো চেৰ নিগমো চ।
Ehāvuso, gāmaṃ vā nigamaṃ vāti gāmopi nigamopi nagarampi, gāmo ceva nigamo ca.
তস্স দাপেত্ৰাতি যাগুং ৰা ভত্তং ৰা খাদনীযং ৰা ভোজনীযং ৰা দাপেত্ৰা।
Tassa dāpetvāti yāguṃ vā bhattaṃ vā khādanīyaṃ vā bhojanīyaṃ vā dāpetvā.
অদাপেত্ৰাতি ন কিঞ্চি দাপেত্ৰা।
Adāpetvāti na kiñci dāpetvā.
উয্যোজেয্যাতি মাতুগামেন সদ্ধিং হসিতুকামো কীল়িতুকামো রহো নিসীদিতুকামো অনাচারং আচরিতুকামো এৰং ৰদেতি – ‘‘গচ্ছাৰুসো, ন মে তযা সদ্ধিং কথা ৰা নিসজ্জা ৰা ফাসু হোতি, এককস্স মে কথা ৰা নিসজ্জা ৰা ফাসু হোতী’’তি উয্যোজেতি, আপত্তি দুক্কটস্স। দস্সনূপচারং ৰা সৰনূপচারং ৰা ৰিজহন্তস্স আপত্তি দুক্কটস্স। ৰিজহিতে, আপত্তি পাচিত্তিযস্স।
Uyyojeyyāti mātugāmena saddhiṃ hasitukāmo kīḷitukāmo raho nisīditukāmo anācāraṃ ācaritukāmo evaṃ vadeti – ‘‘gacchāvuso, na me tayā saddhiṃ kathā vā nisajjā vā phāsu hoti, ekakassa me kathā vā nisajjā vā phāsu hotī’’ti uyyojeti, āpatti dukkaṭassa. Dassanūpacāraṃ vā savanūpacāraṃ vā vijahantassa āpatti dukkaṭassa. Vijahite, āpatti pācittiyassa.
এতদেৰ পচ্চযং করিত্ৰা অনঞ্ঞন্তি ন অঞ্ঞো কোচি পচ্চযো হোতি উয্যোজেতুং।
Etadeva paccayaṃ karitvā anaññanti na añño koci paccayo hoti uyyojetuṃ.
২৭৭. উপসম্পন্নে উপসম্পন্নসঞ্ঞী উয্যোজেতি, আপত্তি পাচিত্তিযস্স । উপসম্পন্নে ৰেমতিকো উয্যোজেতি, আপত্তি পাচিত্তিযস্স। উপসম্পন্নে অনুপসম্পন্নসঞ্ঞী উয্যোজেতি, আপত্তি পাচিত্তিযস্স।
277. Upasampanne upasampannasaññī uyyojeti, āpatti pācittiyassa . Upasampanne vematiko uyyojeti, āpatti pācittiyassa. Upasampanne anupasampannasaññī uyyojeti, āpatti pācittiyassa.
কলিসাসনং আরোপেতি, আপত্তি দুক্কটস্স। অনুপসম্পন্নং উয্যোজেতি, আপত্তি দুক্কটস্স। কলিসাসনং আরোপেতি, আপত্তি দুক্কটস্স। অনুপসম্পন্নে উপসম্পন্নসঞ্ঞী, আপত্তি দুক্কটস্স। অনুপসম্পন্নে ৰেমতিকো, আপত্তি দুক্কটস্স। অনুপসম্পন্নে অনুপসম্পন্নসঞ্ঞী, আপত্তি দুক্কটস্স।
Kalisāsanaṃ āropeti, āpatti dukkaṭassa. Anupasampannaṃ uyyojeti, āpatti dukkaṭassa. Kalisāsanaṃ āropeti, āpatti dukkaṭassa. Anupasampanne upasampannasaññī, āpatti dukkaṭassa. Anupasampanne vematiko, āpatti dukkaṭassa. Anupasampanne anupasampannasaññī, āpatti dukkaṭassa.
২৭৮. অনাপত্তি ‘‘উভো একতো ন যাপেস্সামা’’তি উয্যোজেতি, ‘‘মহগ্ঘং ভণ্ডং পস্সিত্ৰা লোভধম্মং উপ্পাদেস্সতী’’তি উয্যোজেতি, ‘‘মাতুগামং পস্সিত্ৰা অনভিরতিং উপ্পাদেস্সতী’’তি উয্যোজেতি, ‘‘গিলানস্স ৰা ওহিয্যকস্স ৰা ৰিহারপালস্স ৰা যাগুং ৰা ভত্তং ৰা খাদনীযং ৰা ভোজনীযং ৰা নীহরা’’তি উয্যোজেতি, ন অনাচারং আচরিতুকামো, সতি করণীযে উয্যোজেতি, উম্মত্তকস্স, আদিকম্মিকস্সাতি।
278. Anāpatti ‘‘ubho ekato na yāpessāmā’’ti uyyojeti, ‘‘mahagghaṃ bhaṇḍaṃ passitvā lobhadhammaṃ uppādessatī’’ti uyyojeti, ‘‘mātugāmaṃ passitvā anabhiratiṃ uppādessatī’’ti uyyojeti, ‘‘gilānassa vā ohiyyakassa vā vihārapālassa vā yāguṃ vā bhattaṃ vā khādanīyaṃ vā bhojanīyaṃ vā nīharā’’ti uyyojeti, na anācāraṃ ācaritukāmo, sati karaṇīye uyyojeti, ummattakassa, ādikammikassāti.
উয্যোজনসিক্খাপদং নিট্ঠিতং দুতিযং।
Uyyojanasikkhāpadaṃ niṭṭhitaṃ dutiyaṃ.
৩. সভোজনসিক্খাপদং
3. Sabhojanasikkhāpadaṃ
২৭৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা উপনন্দো সক্যপুত্তো সহাযকস্স ঘরং গন্ত্ৰা তস্স পজাপতিযা সদ্ধিং সযনিঘরে 1 নিসজ্জং কপ্পেসি। অথ খো সো পুরিসো যেনাযস্মা উপনন্দো সক্যপুত্তো তেনুপসঙ্কমি; উপসঙ্কমিত্ৰা আযস্মন্তং উপনন্দং সক্যপুত্তং অভিৰাদেত্ৰা একমন্তং নিসীদি। একমন্তং নিসিন্নো খো সো পুরিসো পজাপতিং এতদৰোচ – ‘‘দদেহায্যস্স ভিক্খ’’ন্তি। অথ খো সা ইত্থী আযস্মতো উপনন্দস্স সক্যপুত্তস্স ভিক্খং অদাসি। অথ খো সো পুরিসো আযস্মন্তং উপনন্দং সক্যপুত্তং এতদৰোচ – ‘‘গচ্ছথ, ভন্তে, যতো অয্যস্স ভিক্খা দিন্না’’তি। অথ খো সা ইত্থী সল্লক্খেত্ৰা – ‘‘পরিযুট্ঠিতো অযং পুরিসো’’তি, আযস্মন্তং উপনন্দং সক্যপুত্তং এতদৰোচ – ‘‘নিসীদথ, ভন্তে, মা অগমিত্থা’’তি। দুতিযম্পি খো সো পুরিসো…পে॰… ততিযম্পি খো সো পুরিসো আযস্মন্তং উপনন্দং সক্যপুত্তং এতদৰোচ – ‘‘গচ্ছথ, ভন্তে, যতো অয্যস্স ভিক্খা দিন্না’’তি। ততিযম্পি খো সা ইত্থী আযস্মন্তং উপনন্দং সক্যপুত্তং এতদৰোচ – ‘‘নিসীদথ, ভন্তে, মা অগমিত্থা’’তি।
279. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā upanando sakyaputto sahāyakassa gharaṃ gantvā tassa pajāpatiyā saddhiṃ sayanighare 2 nisajjaṃ kappesi. Atha kho so puriso yenāyasmā upanando sakyaputto tenupasaṅkami; upasaṅkamitvā āyasmantaṃ upanandaṃ sakyaputtaṃ abhivādetvā ekamantaṃ nisīdi. Ekamantaṃ nisinno kho so puriso pajāpatiṃ etadavoca – ‘‘dadehāyyassa bhikkha’’nti. Atha kho sā itthī āyasmato upanandassa sakyaputtassa bhikkhaṃ adāsi. Atha kho so puriso āyasmantaṃ upanandaṃ sakyaputtaṃ etadavoca – ‘‘gacchatha, bhante, yato ayyassa bhikkhā dinnā’’ti. Atha kho sā itthī sallakkhetvā – ‘‘pariyuṭṭhito ayaṃ puriso’’ti, āyasmantaṃ upanandaṃ sakyaputtaṃ etadavoca – ‘‘nisīdatha, bhante, mā agamitthā’’ti. Dutiyampi kho so puriso…pe… tatiyampi kho so puriso āyasmantaṃ upanandaṃ sakyaputtaṃ etadavoca – ‘‘gacchatha, bhante, yato ayyassa bhikkhā dinnā’’ti. Tatiyampi kho sā itthī āyasmantaṃ upanandaṃ sakyaputtaṃ etadavoca – ‘‘nisīdatha, bhante, mā agamitthā’’ti.
অথ খো সো পুরিসো নিক্খমিত্ৰা ভিক্খূ উজ্ঝাপেসি – ‘‘অযং, ভন্তে, অয্যো উপনন্দো ময্হং পজাপতিযা সদ্ধিং সযনিঘরে নিসিন্নো। সো মযা উয্যোজীযমানো ন ইচ্ছতি গন্তুং। বহুকিচ্চা মযং বহুকরণীযা’’তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো সভোজনে কুলে অনুপখজ্জ নিসজ্জং কপ্পেস্সতী’’তি…পে॰… সচ্চং কির ত্ৰং, উপনন্দ, সভোজনে কুলে অনুপখজ্জ নিসজ্জং কপ্পেসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, সভোজনে কুলে অনুপখজ্জ নিসজ্জং কপ্পেস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Atha kho so puriso nikkhamitvā bhikkhū ujjhāpesi – ‘‘ayaṃ, bhante, ayyo upanando mayhaṃ pajāpatiyā saddhiṃ sayanighare nisinno. So mayā uyyojīyamāno na icchati gantuṃ. Bahukiccā mayaṃ bahukaraṇīyā’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto sabhojane kule anupakhajja nisajjaṃ kappessatī’’ti…pe… saccaṃ kira tvaṃ, upananda, sabhojane kule anupakhajja nisajjaṃ kappesīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, sabhojane kule anupakhajja nisajjaṃ kappessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
২৮০. ‘‘যো পন ভিক্খু সভোজনে কুলে অনুপখজ্জ নিসজ্জং কপ্পেয্য, পাচিত্তিয’’ন্তি।
280.‘‘Yo pana bhikkhu sabhojane kule anupakhajja nisajjaṃ kappeyya, pācittiya’’nti.
২৮১. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
281.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
সভোজনং নাম কুলং ইত্থী চেৰ হোতি পুরিসো চ, ইত্থী চ পুরিসো চ উভো অনিক্খন্তা হোন্তি, উভো অৰীতরাগা।
Sabhojanaṃ nāma kulaṃ itthī ceva hoti puriso ca, itthī ca puriso ca ubho anikkhantā honti, ubho avītarāgā.
অনুপখজ্জাতি অনুপৰিসিত্ৰা।
Anupakhajjāti anupavisitvā.
নিসজ্জং কপ্পেয্যাতি মহল্লকে ঘরে পিট্ঠসঙ্ঘাটস্স 3 হত্থপাসং ৰিজহিত্ৰা নিসীদতি, আপত্তি পাচিত্তিযস্স। খুদ্দকে ঘরে পিট্ঠিৰংসং অতিক্কমিত্ৰা নিসীদতি, আপত্তি পাচিত্তিযস্স।
Nisajjaṃ kappeyyāti mahallake ghare piṭṭhasaṅghāṭassa 4 hatthapāsaṃ vijahitvā nisīdati, āpatti pācittiyassa. Khuddake ghare piṭṭhivaṃsaṃ atikkamitvā nisīdati, āpatti pācittiyassa.
২৮২. সযনিঘরে সযনিঘরসঞ্ঞী সভোজনে কুলে অনুপখজ্জ নিসজ্জং কপ্পেতি, আপত্তি পাচিত্তিযস্স। সযনিঘরে ৰেমতিকো সভোজনে কুলে অনুপখজ্জ নিসজ্জং কপ্পেতি, আপত্তি পাচিত্তিযস্স। সযনিঘরে নসযনিঘরসঞ্ঞী সভোজনে কুলে অনুপখজ্জ নিসজ্জং কপ্পেতি, আপত্তি পাচিত্তিযস্স।
282. Sayanighare sayanigharasaññī sabhojane kule anupakhajja nisajjaṃ kappeti, āpatti pācittiyassa. Sayanighare vematiko sabhojane kule anupakhajja nisajjaṃ kappeti, āpatti pācittiyassa. Sayanighare nasayanigharasaññī sabhojane kule anupakhajja nisajjaṃ kappeti, āpatti pācittiyassa.
নসযনিঘরে সযনিঘরসঞ্ঞী, আপত্তি দুক্কটস্স। নসযনিঘরে ৰেমতিকো, আপত্তি দুক্কটস্স। নসযনিঘরে নসযনিঘরসঞ্ঞী, অনাপত্তি।
Nasayanighare sayanigharasaññī, āpatti dukkaṭassa. Nasayanighare vematiko, āpatti dukkaṭassa. Nasayanighare nasayanigharasaññī, anāpatti.
২৮৩. অনাপত্তি মহল্লকে ঘরে পিট্ঠসঙ্ঘাটস্স হত্থপাসং অৰিজহিত্ৰা নিসীদতি, খুদ্দকে ঘরে পিট্ঠিৰংসং অনতিক্কমিত্ৰা নিসীদতি, ভিক্খু দুতিযো হোতি, উভো নিক্খন্তা হোন্তি, উভো ৰীতরাগা, নসযনিঘরে, উম্মত্তকস্স, আদিকম্মিকস্সাতি।
283. Anāpatti mahallake ghare piṭṭhasaṅghāṭassa hatthapāsaṃ avijahitvā nisīdati, khuddake ghare piṭṭhivaṃsaṃ anatikkamitvā nisīdati, bhikkhu dutiyo hoti, ubho nikkhantā honti, ubho vītarāgā, nasayanighare, ummattakassa, ādikammikassāti.
সভোজনসিক্খাপদং নিট্ঠিতং ততিযং।
Sabhojanasikkhāpadaṃ niṭṭhitaṃ tatiyaṃ.
৪. রহোপটিচ্ছন্নসিক্খাপদং
4. Rahopaṭicchannasikkhāpadaṃ
২৮৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা উপনন্দো সক্যপুত্তো সহাযকস্স ঘরং গন্ত্ৰা তস্স পজাপতিযা সদ্ধিং রহো পটিচ্ছন্নে আসনে নিসজ্জং কপ্পেসি। অথ খো সো পুরিসো উজ্ঝাযতি খিয্যতি ৰিপাচেতি – ‘‘কথঞ্হি নাম অয্যো উপনন্দো ময্হং পজাপতিযা সদ্ধিং রহো পটিচ্ছন্নে আসনে নিসজ্জং কপ্পেস্সতী’’তি! অস্সোসুং খো ভিক্খূ তস্স পুরিসস্স উজ্ঝাযন্তস্স খিয্যন্তস্স ৰিপাচেন্তস্স। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – কথঞ্হি নাম আযস্মা উপনন্দো সক্যপুত্তো মাতুগামেন সদ্ধিং রহো পটিচ্ছন্নে আসনে নিসজ্জং কপ্পেস্সতীতি…পে॰… সচ্চং কির ত্ৰং, উপনন্দ, মাতুগামেন সদ্ধিং রহো পটিচ্ছন্নে আসনে নিসজ্জং কপ্পেসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, মাতুগামেন সদ্ধিং রহো পটিচ্ছন্নে আসনে নিসজ্জং কপ্পেস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
284. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā upanando sakyaputto sahāyakassa gharaṃ gantvā tassa pajāpatiyā saddhiṃ raho paṭicchanne āsane nisajjaṃ kappesi. Atha kho so puriso ujjhāyati khiyyati vipāceti – ‘‘kathañhi nāma ayyo upanando mayhaṃ pajāpatiyā saddhiṃ raho paṭicchanne āsane nisajjaṃ kappessatī’’ti! Assosuṃ kho bhikkhū tassa purisassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – kathañhi nāma āyasmā upanando sakyaputto mātugāmena saddhiṃ raho paṭicchanne āsane nisajjaṃ kappessatīti…pe… saccaṃ kira tvaṃ, upananda, mātugāmena saddhiṃ raho paṭicchanne āsane nisajjaṃ kappesīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, mātugāmena saddhiṃ raho paṭicchanne āsane nisajjaṃ kappessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
২৮৫. ‘‘যো পন ভিক্খু মাতুগামেন সদ্ধিং রহো পটিচ্ছন্নে আসনে নিসজ্জং কপ্পেয্য, পাচিত্তিয’’ন্তি।
285.‘‘Yopana bhikkhu mātugāmena saddhiṃ raho paṭicchanne āsane nisajjaṃ kappeyya, pācittiya’’nti.
২৮৬. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
286.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
মাতুগামো নাম মনুস্সিত্থী, ন যক্খী ন পেতী ন তিরচ্ছানগতা, অন্তমসো তদহুজাতাপি দারিকা, পগেৰ মহত্তরী।
Mātugāmo nāma manussitthī, na yakkhī na petī na tiracchānagatā, antamaso tadahujātāpi dārikā, pageva mahattarī.
সদ্ধিন্তি একতো।
Saddhinti ekato.
5 রহো নাম চক্খুস্স রহো সোতস্স রহো। চক্খুস্স রহো নাম ন সক্কা হোতি অক্খিং ৰা নিখণীযমানে ভমুকং ৰা উক্খিপীযমানে সীসং ৰা উক্খিপীযমানে পস্সিতুং। সোতস্স রহো নাম ন সক্কা হোতি পকতিকথা সোতুং।
6Raho nāma cakkhussa raho sotassa raho. Cakkhussa raho nāma na sakkā hoti akkhiṃ vā nikhaṇīyamāne bhamukaṃ vā ukkhipīyamāne sīsaṃ vā ukkhipīyamāne passituṃ. Sotassa raho nāma na sakkā hoti pakatikathā sotuṃ.
নিসজ্জং কপ্পেয্যাতি মাতুগামে নিসিন্নে ভিক্খু উপনিসিন্নো ৰা হোতি উপনিপন্নো ৰা, আপত্তি পাচিত্তিযস্স। ভিক্খু নিসিন্নে মাতুগামো উপনিসিন্নো ৰা হোতি উপনিপন্নো ৰা, আপত্তি পাচিত্তিযস্স। উভো ৰা নিসিন্না হোন্তি উভো ৰা নিপন্না, আপত্তি পাচিত্তিযস্স।
Nisajjaṃ kappeyyāti mātugāme nisinne bhikkhu upanisinno vā hoti upanipanno vā, āpatti pācittiyassa. Bhikkhu nisinne mātugāmo upanisinno vā hoti upanipanno vā, āpatti pācittiyassa. Ubho vā nisinnā honti ubho vā nipannā, āpatti pācittiyassa.
২৮৭. মাতুগামে মাতুগামসঞ্ঞী রহো পটিচ্ছন্নে আসনে নিসজ্জং কপ্পেতি, আপত্তি পাচিত্তিযস্স। মাতুগামে ৰেমতিকো রহো পটিচ্ছন্নে আসনে নিসজ্জং কপ্পেতি, আপত্তি পাচিত্তিযস্স। মাতুগামে অমাতুগামসঞ্ঞী রহো পটিচ্ছন্নে আসনে নিসজ্জং কপ্পেতি, আপত্তি পাচিত্তিযস্স।
287. Mātugāme mātugāmasaññī raho paṭicchanne āsane nisajjaṃ kappeti, āpatti pācittiyassa. Mātugāme vematiko raho paṭicchanne āsane nisajjaṃ kappeti, āpatti pācittiyassa. Mātugāme amātugāmasaññī raho paṭicchanne āsane nisajjaṃ kappeti, āpatti pācittiyassa.
যক্খিযা ৰা পেতিযা ৰা পণ্ডকেন ৰা তিরচ্ছানগতায ৰা মনুস্সৰিগ্গহিত্থিযা ৰা সদ্ধিং রহো পটিচ্ছন্নে আসনে নিসজ্জং কপ্পেতি, আপত্তি দুক্কটস্স। অমাতুগামে মাতুগামসঞ্ঞী, আপত্তি দুক্কটস্স। অমাতুগামে ৰেমতিকো, আপত্তি দুক্কটস্স। অমাতুগামে অমাতুগামসঞ্ঞী, অনাপত্তি।
Yakkhiyā vā petiyā vā paṇḍakena vā tiracchānagatāya vā manussaviggahitthiyā vā saddhiṃ raho paṭicchanne āsane nisajjaṃ kappeti, āpatti dukkaṭassa. Amātugāme mātugāmasaññī, āpatti dukkaṭassa. Amātugāme vematiko, āpatti dukkaṭassa. Amātugāme amātugāmasaññī, anāpatti.
২৮৮. অনাপত্তি যো কোচি ৰিঞ্ঞূ পুরিসো দুতিযো হোতি, তিট্ঠতি ন নিসীদতি, অরহোপেক্খো, অঞ্ঞৰিহিতো নিসীদতি, উম্মত্তকস্স, আদিকম্মিকস্সাতি।
288. Anāpatti yo koci viññū puriso dutiyo hoti, tiṭṭhati na nisīdati, arahopekkho, aññavihito nisīdati, ummattakassa, ādikammikassāti.
রহোপটিচ্ছন্নসিক্খাপদং নিট্ঠিতং চতুত্থং।
Rahopaṭicchannasikkhāpadaṃ niṭṭhitaṃ catutthaṃ.
৫. রহোনিসজ্জসিক্খাপদং
5. Rahonisajjasikkhāpadaṃ
২৮৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা উপনন্দো সক্যপুত্তো সহাযকস্স ঘরং গন্ত্ৰা তস্স পজাপতিযা সদ্ধিং একো একায রহো নিসজ্জং কপ্পেসি। অথ খো সো পুরিসো উজ্ঝাযতি খিয্যতি ৰিপাচেতি – ‘‘কথঞ্হি নাম অয্যো উপনন্দো ময্হং পজাপতিযা সদ্ধিং একো একায রহো নিসজ্জং কপ্পেস্সতী’’তি! অস্সোসুং খো ভিক্খূ তস্স পুরিসস্স উজ্ঝাযন্তস্স খিয্যন্তস্স ৰিপাচেন্তস্স। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো মাতুগামেন সদ্ধিং একো একায রহো নিসজ্জং কপ্পেস্সতী’’তি…পে॰… সচ্চং কির ত্ৰং, উপনন্দ, মাতুগামেন সদ্ধিং একো একায রহো নিসজ্জং কপ্পেসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, মাতুগামেন সদ্ধিং একো একায রহো নিসজ্জং কপ্পেস্সসি! নেতং, মোঘপুরিস, অপ্পসন্নানং ৰা পাসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
289. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā upanando sakyaputto sahāyakassa gharaṃ gantvā tassa pajāpatiyā saddhiṃ eko ekāya raho nisajjaṃ kappesi. Atha kho so puriso ujjhāyati khiyyati vipāceti – ‘‘kathañhi nāma ayyo upanando mayhaṃ pajāpatiyā saddhiṃ eko ekāya raho nisajjaṃ kappessatī’’ti! Assosuṃ kho bhikkhū tassa purisassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto mātugāmena saddhiṃ eko ekāya raho nisajjaṃ kappessatī’’ti…pe… saccaṃ kira tvaṃ, upananda, mātugāmena saddhiṃ eko ekāya raho nisajjaṃ kappesīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, mātugāmena saddhiṃ eko ekāya raho nisajjaṃ kappessasi! Netaṃ, moghapurisa, appasannānaṃ vā pāsādāya…pe… evañca pana, bhikkhave, imaṃ sikkhāpadaṃ uddiseyyātha –
২৯০. ‘‘যো পন ভিক্খু মাতুগামেন সদ্ধিং একো একায রহো নিসজ্জং কপ্পেয্য, পাচিত্তিয’’ন্তি।
290.‘‘Yo pana bhikkhu mātugāmena saddhiṃ eko ekāya raho nisajjaṃ kappeyya, pācittiya’’nti.
২৯১. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
291.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
মাতুগামো নাম মনুস্সিত্থী, ন যক্খী ন পেতী ন তিরচ্ছানগতা, ৰিঞ্ঞূ পটিবলা সুভাসিতদুব্ভাসিতং দুট্ঠুল্লাদুট্ঠুল্লং আজানিতুং।
Mātugāmo nāma manussitthī, na yakkhī na petī na tiracchānagatā, viññū paṭibalā subhāsitadubbhāsitaṃ duṭṭhullāduṭṭhullaṃ ājānituṃ.
সদ্ধিন্তি একতো।
Saddhinti ekato.
একো একাযাতি ভিক্খু চেৰ হোতি মাতুগামো চ।
Ekoekāyāti bhikkhu ceva hoti mātugāmo ca.
13 রহো নাম চক্খুস্স রহো, সোতস্স রহো। চক্খুস্স রহো নাম ন সক্কা হোতি অক্খিং ৰা নিখণীযমানে ভমুকং ৰা উক্খিপীযমানে সীসং ৰা উক্খিপীযমানে পস্সিতুং। সোতস্স রহো নাম ন সক্কা হোতি পকতিকথা সোতুং।
14Raho nāma cakkhussa raho, sotassa raho. Cakkhussa raho nāma na sakkā hoti akkhiṃ vā nikhaṇīyamāne bhamukaṃ vā ukkhipīyamāne sīsaṃ vā ukkhipīyamāne passituṃ. Sotassa raho nāma na sakkā hoti pakatikathā sotuṃ.
নিসজ্জং কপ্পেয্যাতি মাতুগামে নিসিন্নে ভিক্খু উপনিসিন্নো ৰা হোতি উপনিপন্নো ৰা, আপত্তি পাচিত্তিযস্স। ভিক্খু নিসিন্নে মাতুগামো উপনিসিন্নো ৰা হোতি উপনিপন্নো ৰা, আপত্তি পাচিত্তিযস্স। উভো ৰা নিসিন্না হোন্তি উভো ৰা নিপন্না, আপত্তি পাচিত্তিযস্স।
Nisajjaṃ kappeyyāti mātugāme nisinne bhikkhu upanisinno vā hoti upanipanno vā, āpatti pācittiyassa. Bhikkhu nisinne mātugāmo upanisinno vā hoti upanipanno vā, āpatti pācittiyassa. Ubho vā nisinnā honti ubho vā nipannā, āpatti pācittiyassa.
২৯২. মাতুগামে মাতুগামসঞ্ঞী একো একায রহো নিসজ্জং কপ্পেতি, আপত্তি পাচিত্তিযস্স। মাতুগামে ৰেমতিকো একো একায রহো নিসজ্জং কপ্পেতি, আপত্তি পাচিত্তিযস্স। মাতুগামে অমাতুগামসঞ্ঞী একো একায রহো নিসজ্জং কপ্পেতি, আপত্তি পাচিত্তিযস্স।
292. Mātugāme mātugāmasaññī eko ekāya raho nisajjaṃ kappeti, āpatti pācittiyassa. Mātugāme vematiko eko ekāya raho nisajjaṃ kappeti, āpatti pācittiyassa. Mātugāme amātugāmasaññī eko ekāya raho nisajjaṃ kappeti, āpatti pācittiyassa.
যক্খিযা ৰা পেতিযা ৰা পণ্ডকেন ৰা তিরচ্ছানগতমনুস্সৰিগ্গহিত্থিযা ৰা 15 সদ্ধিং একো একায রহো নিসজ্জং কপ্পেতি, আপত্তি দুক্কটস্স। অমাতুগামে মাতুগামসঞ্ঞী, আপত্তি দুক্কটস্স। অমাতুগামে ৰেমতিকো, আপত্তি দুক্কটস্স। অমাতুগামে অমাতুগামসঞ্ঞী, অনাপত্তি।
Yakkhiyā vā petiyā vā paṇḍakena vā tiracchānagatamanussaviggahitthiyā vā 16 saddhiṃ eko ekāya raho nisajjaṃ kappeti, āpatti dukkaṭassa. Amātugāme mātugāmasaññī, āpatti dukkaṭassa. Amātugāme vematiko, āpatti dukkaṭassa. Amātugāme amātugāmasaññī, anāpatti.
২৯৩. অনাপত্তি যো কোচি ৰিঞ্ঞূ পুরিসো দুতিযো হোতি, তিট্ঠতি ন নিসীদতি, অরহোপেক্খো অঞ্ঞৰিহিতো নিসীদতি, উম্মত্তকস্স, আদিকম্মিকস্সাতি।
293. Anāpatti yo koci viññū puriso dutiyo hoti, tiṭṭhati na nisīdati, arahopekkho aññavihito nisīdati, ummattakassa, ādikammikassāti.
রহোনিসজ্জসিক্খাপদং নিট্ঠিতং পঞ্চমং।
Rahonisajjasikkhāpadaṃ niṭṭhitaṃ pañcamaṃ.
৬. চারিত্তসিক্খাপদং
6. Cārittasikkhāpadaṃ
২৯৪. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন আযস্মতো উপনন্দস্স সক্যপুত্তস্স উপট্ঠাককুলং আযস্মন্তং উপনন্দং সক্যপুত্তং ভত্তেন নিমন্তেসি। অঞ্ঞেপি ভিক্খূ ভত্তেন নিমন্তেসি। তেন খো পন সমযেন আযস্মা উপনন্দো সক্যপুত্তো পুরেভত্তং, কুলানি পযিরুপাসতি। অথ খো তে ভিক্খূ তে মনুস্সে এতদৰোচুং – ‘‘দেথাৰুসো ভত্ত’’ন্তি। ‘‘আগমেথ, ভন্তে, যাৰায্যো উপনন্দো আগচ্ছতী’’তি। দুতিযম্পি খো তে ভিক্খূ…পে॰… ততিযম্পি খো তে ভিক্খূ তে মনুস্সে এতদৰোচুং – ‘‘দেথাৰুসো, ভত্তং; পুরে কালো অতিক্কমতী’’তি। ‘‘যম্পি মযং, ভন্তে, ভত্তং করিম্হা অয্যস্স উপনন্দস্স কারণা। আগমেথ, ভন্তে, যাৰায্যো উপনন্দো আগচ্ছতী’’তি।
294. Tena samayena buddho bhagavā rājagahe viharati veḷuvane kalandakanivāpe. Tena kho pana samayena āyasmato upanandassa sakyaputtassa upaṭṭhākakulaṃ āyasmantaṃ upanandaṃ sakyaputtaṃ bhattena nimantesi. Aññepi bhikkhū bhattena nimantesi. Tena kho pana samayena āyasmā upanando sakyaputto purebhattaṃ, kulāni payirupāsati. Atha kho te bhikkhū te manusse etadavocuṃ – ‘‘dethāvuso bhatta’’nti. ‘‘Āgametha, bhante, yāvāyyo upanando āgacchatī’’ti. Dutiyampi kho te bhikkhū…pe… tatiyampi kho te bhikkhū te manusse etadavocuṃ – ‘‘dethāvuso, bhattaṃ; pure kālo atikkamatī’’ti. ‘‘Yampi mayaṃ, bhante, bhattaṃ karimhā ayyassa upanandassa kāraṇā. Āgametha, bhante, yāvāyyo upanando āgacchatī’’ti.
অথ খো আযস্মা উপনন্দো সক্যপুত্তো পুরেভত্তং কুলানি পযিরুপাসিত্ৰা দিৰা আগচ্ছতি। ভিক্খূ ন চিত্তরূপং ভুঞ্জিংসু। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো নিমন্তিতো সভত্তো সমানো পুরেভত্তং কুলেসু চারিত্তং আপজ্জিস্সতী’’তি…পে॰… সচ্চং কির ত্ৰং, উপনন্দ, নিমন্তিতো সভত্তো সমানো পুরেভত্তং কুলেসু চারিত্তং আপজ্জসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, নিমন্তিতো সভত্তো সমানো পুরেভত্তং কুলেসু চারিত্তং আপজ্জিস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Atha kho āyasmā upanando sakyaputto purebhattaṃ kulāni payirupāsitvā divā āgacchati. Bhikkhū na cittarūpaṃ bhuñjiṃsu. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto nimantito sabhatto samāno purebhattaṃ kulesu cārittaṃ āpajjissatī’’ti…pe… saccaṃ kira tvaṃ, upananda, nimantito sabhatto samāno purebhattaṃ kulesu cārittaṃ āpajjasīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, nimantito sabhatto samāno purebhattaṃ kulesu cārittaṃ āpajjissasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
‘‘যো পন ভিক্খু নিমন্তিতো সভত্তো সমানো পুরেভত্তং কুলেসু চারিত্তং আপজ্জেয্য, পাচিত্তিয’’ন্তি।
‘‘Yo pana bhikkhu nimantito sabhatto samāno purebhattaṃ kulesu cārittaṃ āpajjeyya, pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২৯৫. 17 তেন খো পন সমযেন আযস্মতো উপনন্দস্স সক্যপুত্তস্স উপট্ঠাককুলং সঙ্ঘস্সত্থায খাদনীযং পাহেসি – ‘‘অয্যস্স উপনন্দস্স দস্সেত্ৰা সঙ্ঘস্স দাতব্ব’’ন্তি। তেন খো পন সমযেন আযস্মা উপনন্দো সক্যপুত্তো গামং পিণ্ডায পৰিট্ঠো হোতি। অথ খো তে মনুস্সা আরামং গন্ত্ৰা ভিক্খূ পুচ্ছিংসু – ‘‘কহং, ভন্তে, অয্যো উপনন্দো’’তি ? ‘‘এসাৰুসো, আযস্মা উপনন্দো সক্যপুত্তো গামং পিণ্ডায পৰিট্ঠো’’তি। ‘‘ইদং, ভন্তে, খাদনীযং অয্যস্স উপনন্দস্স দস্সেত্ৰা সঙ্ঘস্স দাতব্ব’’ন্তি। ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, পটিগ্গহেত্ৰা নিক্খিপথ যাৰ উপনন্দো আগচ্ছতী’’তি।
295.18 Tena kho pana samayena āyasmato upanandassa sakyaputtassa upaṭṭhākakulaṃ saṅghassatthāya khādanīyaṃ pāhesi – ‘‘ayyassa upanandassa dassetvā saṅghassa dātabba’’nti. Tena kho pana samayena āyasmā upanando sakyaputto gāmaṃ piṇḍāya paviṭṭho hoti. Atha kho te manussā ārāmaṃ gantvā bhikkhū pucchiṃsu – ‘‘kahaṃ, bhante, ayyo upanando’’ti ? ‘‘Esāvuso, āyasmā upanando sakyaputto gāmaṃ piṇḍāya paviṭṭho’’ti. ‘‘Idaṃ, bhante, khādanīyaṃ ayyassa upanandassa dassetvā saṅghassa dātabba’’nti. Bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘tena hi, bhikkhave, paṭiggahetvā nikkhipatha yāva upanando āgacchatī’’ti.
অথ খো আযস্মা উপনন্দো সক্যপুত্তো – ‘‘ভগৰতা পটিক্খিত্তং পুরেভত্তং কুলেসু চারিত্তং আপজ্জিতু’’ন্তি পচ্ছাভত্তং কুলানি পযিরুপাসিত্ৰা দিৰা পটিক্কমি, খাদনীযং উস্সারিযিত্থ। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো পচ্ছাভত্তং কুলেসু চারিত্তং আপজ্জিস্সতী’’তি…পে॰… সচ্চং কির ত্ৰং, উপনন্দ, পচ্ছাভত্তং কুলেসু চারিত্তং আপজ্জসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, পচ্ছাভত্তং কুলেসু চারিত্তং আপজ্জিস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন ভিক্খৰে ইমং সিক্খাপদং উদ্দিসেয্যাথ –
Atha kho āyasmā upanando sakyaputto – ‘‘bhagavatā paṭikkhittaṃ purebhattaṃ kulesu cārittaṃ āpajjitu’’nti pacchābhattaṃ kulāni payirupāsitvā divā paṭikkami, khādanīyaṃ ussāriyittha. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto pacchābhattaṃ kulesu cārittaṃ āpajjissatī’’ti…pe… saccaṃ kira tvaṃ, upananda, pacchābhattaṃ kulesu cārittaṃ āpajjasīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, pacchābhattaṃ kulesu cārittaṃ āpajjissasi! Netaṃ, moghapurisa, appasannānaṃ vā pasādāya…pe… evañca pana bhikkhave imaṃ sikkhāpadaṃ uddiseyyātha –
‘‘যো পন ভিক্খু নিমন্তিতো সভত্তো সমানো পুরেভত্তং ৰা পচ্ছাভত্তং ৰা কুলেসু চারিত্তং আপজ্জেয্য, পাচিত্তিয’’ন্তি।
‘‘Yo pana bhikkhu nimantito sabhatto samāno purebhattaṃ vā pacchābhattaṃ vā kulesu cārittaṃ āpajjeyya, pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২৯৬. তেন খো পন সমযেন ভিক্খূ চীৰরদানসমযে কুক্কুচ্চাযন্তা কুলানি ন পযিরুপাসন্তি। চীৰরং পরিত্তং উপ্পজ্জতি। ভগৰতো এতমত্থং আরোচেসুং…পে॰… অনুজানামি, ভিক্খৰে, চীৰরদানসমযে কুলানি পযিরুপাসিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
296. Tena kho pana samayena bhikkhū cīvaradānasamaye kukkuccāyantā kulāni na payirupāsanti. Cīvaraṃ parittaṃ uppajjati. Bhagavato etamatthaṃ ārocesuṃ…pe… anujānāmi, bhikkhave, cīvaradānasamaye kulāni payirupāsituṃ. Evañca pana, bhikkhave, imaṃ sikkhāpadaṃ uddiseyyātha –
‘‘যো পন ভিক্খু নিমন্তিতো সভত্তো সমানো পুরেভত্তং ৰা পচ্ছাভত্তং ৰা কুলেসু চারিত্তং আপজ্জেয্য, অঞ্ঞত্র সমযা, পাচিত্তিযং। তত্থাযং সমযো। চীৰরদানসমযো – অযং তত্থ সমযো’’তি।
‘‘Yo pana bhikkhu nimantito sabhatto samāno purebhattaṃ vā pacchābhattaṃ vā kulesu cārittaṃ āpajjeyya, aññatra samayā, pācittiyaṃ. Tatthāyaṃ samayo. Cīvaradānasamayo – ayaṃ tattha samayo’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২৯৭. তেন খো পন সমযেন ভিক্খূ চীৰরকম্মং করোন্তি, অত্থো চ হোতি সূচিযাপি সুত্তেনপি সত্থকেনপি। ভিক্খূ কুক্কুচ্চাযন্তা কুলানি ন পযিরুপাসন্তি। ভগৰতো এতমত্থং আরোচেসুং…পে॰… অনুজানামি, ভিক্খৰে, চীৰরকারসমযে কুলানি পযিরুপাসিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
297. Tena kho pana samayena bhikkhū cīvarakammaṃ karonti, attho ca hoti sūciyāpi suttenapi satthakenapi. Bhikkhū kukkuccāyantā kulāni na payirupāsanti. Bhagavato etamatthaṃ ārocesuṃ…pe… anujānāmi, bhikkhave, cīvarakārasamaye kulāni payirupāsituṃ. Evañca pana, bhikkhave, imaṃ sikkhāpadaṃ uddiseyyātha –
‘‘যো পন ভিক্খু নিমন্তিতো সভত্তো সমানো পুরেভত্তং ৰা পচ্ছাভত্তং ৰা কুলেসু চারিত্তং আপজ্জেয্য , অঞ্ঞত্র সমযা, পাচিত্তিযং । তত্থাযং সমযো। চীৰরদানসমযো, চীৰরকারসমযো – অযং তত্থ সমযো’’তি।
‘‘Yopana bhikkhu nimantito sabhatto samāno purebhattaṃ vā pacchābhattaṃ vā kulesu cārittaṃ āpajjeyya , aññatra samayā, pācittiyaṃ. Tatthāyaṃ samayo. Cīvaradānasamayo, cīvarakārasamayo – ayaṃ tattha samayo’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২৯৮. তেন খো পন সমযেন ভিক্খূ গিলানা হোন্তি, অত্থো চ হোতি ভেসজ্জেহি। ভিক্খূ কুক্কুচ্চাযন্তা কুলানি ন পযিরুপাসন্তি। ভগৰতো এতমত্থং আরোচেসুং…পে॰… অনুজানামি, ভিক্খৰে, সন্তং ভিক্খুং আপুচ্ছা কুলানি পযিরুপাসিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
298. Tena kho pana samayena bhikkhū gilānā honti, attho ca hoti bhesajjehi. Bhikkhū kukkuccāyantā kulāni na payirupāsanti. Bhagavato etamatthaṃ ārocesuṃ…pe… anujānāmi, bhikkhave, santaṃ bhikkhuṃ āpucchā kulāni payirupāsituṃ. Evañca pana, bhikkhave, imaṃ sikkhāpadaṃ uddiseyyātha –
২৯৯. ‘‘যো পন ভিক্খু নিমন্তিতো সভত্তো সমানো সন্তং ভিক্খুং অনাপুচ্ছা পুরেভত্তং ৰা পচ্ছাভত্তং ৰা কুলেসু চারিত্তং আপজ্জেয্য, অঞ্ঞত্র সমযা, পাচিত্তিযং। তত্থাযং সমযো। চীৰরদানসমযো, চীৰরকারসমযো – অযং তত্থ সমযো’’তি।
299.‘‘Yo pana bhikkhu nimantito sabhatto samāno santaṃ bhikkhuṃ anāpucchā purebhattaṃ vā pacchābhattaṃ vā kulesu cārittaṃ āpajjeyya, aññatra samayā, pācittiyaṃ. Tatthāyaṃ samayo. Cīvaradānasamayo, cīvarakārasamayo – ayaṃ tattha samayo’’ti.
৩০০. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
300.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
নিমন্তিতো নাম পঞ্চন্নং ভোজনানং অঞ্ঞতরেন ভোজনেন নিমন্তিতো।
Nimantito nāma pañcannaṃ bhojanānaṃ aññatarena bhojanena nimantito.
সভত্তো নাম যেন নিমন্তিতো তেন সভত্তো।
Sabhatto nāma yena nimantito tena sabhatto.
সন্তং নাম ভিক্খুং সক্কা হোতি আপুচ্ছা পৰিসিতুং।
Santaṃ nāma bhikkhuṃ sakkā hoti āpucchā pavisituṃ.
অসন্তং নাম ভিক্খুং ন সক্কা হোতি আপুচ্ছা পৰিসিতুং।
Asantaṃ nāma bhikkhuṃ na sakkā hoti āpucchā pavisituṃ.
পুরেভত্তং নাম যেন নিমন্তিতো তং অভুত্তাৰী।
Purebhattaṃ nāma yena nimantito taṃ abhuttāvī.
পচ্ছাভত্তং নাম যেন নিমন্তিতো তং অন্তমসো কুসগ্গেনপি 19 ভুত্তং হোতি।
Pacchābhattaṃ nāma yena nimantito taṃ antamaso kusaggenapi 20 bhuttaṃ hoti.
কুলং নাম চত্তারি কুলানি – খত্তিযকুলং, ব্রাহ্মণকুলং, ৰেস্সকুলং, সুদ্দকুলং।
Kulaṃ nāma cattāri kulāni – khattiyakulaṃ, brāhmaṇakulaṃ, vessakulaṃ, suddakulaṃ.
কুলেসু চারিত্তং আপজ্জেয্যাতি অঞ্ঞস্স ঘরূপচারং ওক্কমন্তস্স আপত্তি দুক্কটস্স। পঠমং পাদং উম্মারং অতিক্কামেতি, আপত্তি দুক্কটস্স। দুতিযং পাদং অতিক্কামেতি, আপত্তি পাচিত্তিযস্স।
Kulesucārittaṃ āpajjeyyāti aññassa gharūpacāraṃ okkamantassa āpatti dukkaṭassa. Paṭhamaṃ pādaṃ ummāraṃ atikkāmeti, āpatti dukkaṭassa. Dutiyaṃ pādaṃ atikkāmeti, āpatti pācittiyassa.
অঞ্ঞত্র সমযাতি ঠপেত্ৰা সমযং।
Aññatrasamayāti ṭhapetvā samayaṃ.
চীৰরদানসমযো নাম অনত্থতে কথিনে ৰস্সানস্স পচ্ছিমো মাসো, অত্থতে কথিনে পঞ্চ মাসা।
Cīvaradānasamayo nāma anatthate kathine vassānassa pacchimo māso, atthate kathine pañca māsā.
চীৰরকারসমযো নাম চীৰরে কযিরমানে।
Cīvarakārasamayo nāma cīvare kayiramāne.
৩০১. নিমন্তিতে নিমন্তিতসঞ্ঞী সন্তং ভিক্খুং অনাপুচ্ছা পুরেভত্তং ৰা পচ্ছাভত্তং ৰা কুলেসু চারিত্তং আপজ্জতি, অঞ্ঞত্র সমযা, আপত্তি পাচিত্তিযস্স। নিমন্তিতে ৰেমতিকো সন্তং ভিক্খুং অনাপুচ্ছা পুরেভত্তং ৰা পচ্ছাভত্তং ৰা কুলেসু চারিত্তং আপজ্জতি, অঞ্ঞত্র সমযা, আপত্তি পাচিত্তিযস্স। নিমন্তিতে অনিমন্তিতসঞ্ঞী সন্তং ভিক্খুং অনাপুচ্ছা পুরেভত্তং ৰা পচ্ছাভত্তং ৰা কুলেসু চারিত্তং আপজ্জতি, অঞ্ঞত্র সমযা, আপত্তি পাচিত্তিযস্স।
301. Nimantite nimantitasaññī santaṃ bhikkhuṃ anāpucchā purebhattaṃ vā pacchābhattaṃ vā kulesu cārittaṃ āpajjati, aññatra samayā, āpatti pācittiyassa. Nimantite vematiko santaṃ bhikkhuṃ anāpucchā purebhattaṃ vā pacchābhattaṃ vā kulesu cārittaṃ āpajjati, aññatra samayā, āpatti pācittiyassa. Nimantite animantitasaññī santaṃ bhikkhuṃ anāpucchā purebhattaṃ vā pacchābhattaṃ vā kulesu cārittaṃ āpajjati, aññatra samayā, āpatti pācittiyassa.
অনিমন্তিতে নিমন্তিতসঞ্ঞী, আপত্তি দুক্কটস্স। অনিমন্তিতে ৰেমতিকো , আপত্তি দুক্কটস্স। অনিমন্তিতে অনিমন্তিতসঞ্ঞী, অনাপত্তি।
Animantite nimantitasaññī, āpatti dukkaṭassa. Animantite vematiko , āpatti dukkaṭassa. Animantite animantitasaññī, anāpatti.
৩০২. অনাপত্তি সমযে, সন্তং ভিক্খুং আপুচ্ছা পৰিসতি, অসন্তং ভিক্খুং অনাপুচ্ছা পৰিসতি, অঞ্ঞস্স ঘরেন মগ্গো হোতি, ঘরূপচারেন মগ্গো হোতি, অন্তরারামং গচ্ছতি, ভিক্খুনুপস্সযং গচ্ছতি, তিত্থিযসেয্যং গচ্ছতি, পটিক্কমনং গচ্ছতি, ভত্তিযঘরং গচ্ছতি, আপদাসু, উম্মত্তকস্স, আদিকম্মিকস্সাতি।
302. Anāpatti samaye, santaṃ bhikkhuṃ āpucchā pavisati, asantaṃ bhikkhuṃ anāpucchā pavisati, aññassa gharena maggo hoti, gharūpacārena maggo hoti, antarārāmaṃ gacchati, bhikkhunupassayaṃ gacchati, titthiyaseyyaṃ gacchati, paṭikkamanaṃ gacchati, bhattiyagharaṃ gacchati, āpadāsu, ummattakassa, ādikammikassāti.
চারিত্তসিক্খাপদং নিট্ঠিতং ছট্ঠং।
Cārittasikkhāpadaṃ niṭṭhitaṃ chaṭṭhaṃ.
৭. মহানামসিক্খাপদং
7. Mahānāmasikkhāpadaṃ
৩০৩. তেন সমযেন বুদ্ধো ভগৰা সক্কেসু ৰিহরতি কপিলৰত্থুস্মিং নিগ্রোধারামে। তেন খো পন সমযেন মহানামস্স সক্কস্স ভেসজ্জং উস্সন্নং হোতি। অথ খো মহানামো সক্কো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো মহানামো সক্কো ভগৰন্তং এতদৰোচ – ‘‘ইচ্ছামহং, ভন্তে, সঙ্ঘং চতুমাসং 21 ভেসজ্জেন পৰারেতু’’ন্তি। ‘‘সাধু সাধু , মহানাম! তেন হি ত্ৰং, মহানাম, সঙ্ঘং চতুমাসং ভেসজ্জেন পৰারেহী’’তি। ভিক্খূ কুক্কুচ্চাযন্তা নাধিৰাসেন্তি। ভগৰতো এতমত্থং আরোচেসুং…পে॰… অনুজানামি, ভিক্খৰে, চতুমাসং ভেসজ্জপ্পচ্চযপৰারণং সাদিতুন্তি।
303. Tena samayena buddho bhagavā sakkesu viharati kapilavatthusmiṃ nigrodhārāme. Tena kho pana samayena mahānāmassa sakkassa bhesajjaṃ ussannaṃ hoti. Atha kho mahānāmo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho mahānāmo sakko bhagavantaṃ etadavoca – ‘‘icchāmahaṃ, bhante, saṅghaṃ catumāsaṃ 22 bhesajjena pavāretu’’nti. ‘‘Sādhu sādhu , mahānāma! Tena hi tvaṃ, mahānāma, saṅghaṃ catumāsaṃ bhesajjena pavārehī’’ti. Bhikkhū kukkuccāyantā nādhivāsenti. Bhagavato etamatthaṃ ārocesuṃ…pe… anujānāmi, bhikkhave, catumāsaṃ bhesajjappaccayapavāraṇaṃ sāditunti.
৩০৪. তেন খো পন সমযেন ভিক্খূ মহানামং সক্কং পরিত্তং ভেসজ্জং ৰিঞ্ঞাপেন্তি। তথেৰ মহানামস্স সক্কস্স ভেসজ্জং উস্সন্নং হোতি। দুতিযম্পি খো মহানামো সক্কো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো মহানামো সক্কো ভগৰন্তং এতদৰোচ – ‘‘ইচ্ছামহং, ভন্তে, সঙ্ঘং অপরম্পি চতুমাসং ভেসজ্জেন পৰারেতু’’ন্তি। ‘‘সাধু সাধু, মহানাম! তেন হি ত্ৰং, মহানাম, সঙ্ঘং অপরম্পি চতুমাসং ভেসজ্জেন পৰারেহী’’তি। ভিক্খূ কুক্কুচ্চাযন্তা নাধিৰাসেন্তি। ভগৰতো এতমত্থং আরোচেসুং…পে॰… অনুজানামি, ভিক্খৰে, পুন পৰারণম্পি সাদিতুন্তি।
304. Tena kho pana samayena bhikkhū mahānāmaṃ sakkaṃ parittaṃ bhesajjaṃ viññāpenti. Tatheva mahānāmassa sakkassa bhesajjaṃ ussannaṃ hoti. Dutiyampi kho mahānāmo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho mahānāmo sakko bhagavantaṃ etadavoca – ‘‘icchāmahaṃ, bhante, saṅghaṃ aparampi catumāsaṃ bhesajjena pavāretu’’nti. ‘‘Sādhu sādhu, mahānāma! Tena hi tvaṃ, mahānāma, saṅghaṃ aparampi catumāsaṃ bhesajjena pavārehī’’ti. Bhikkhū kukkuccāyantā nādhivāsenti. Bhagavato etamatthaṃ ārocesuṃ…pe… anujānāmi, bhikkhave, puna pavāraṇampi sāditunti.
৩০৫. তেন খো পন সমযেন ভিক্খূ মহানামং সক্কং পরিত্তংযেৰ ভেসজ্জং ৰিঞ্ঞাপেন্তি। তথেৰ মহানামস্স সক্কস্স ভেসজ্জং উস্সন্নং হোতি। ততিযম্পি খো মহানামো সক্কো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো মহানামো সক্কো ভগৰন্তং এতদৰোচ – ‘‘ইচ্ছামহং, ভন্তে, সঙ্ঘং যাৰজীৰং ভেসজ্জেন পৰারেতু’’ন্তি। ‘‘সাধু সাধু, মহানাম! তেন হি ত্ৰং, মহানাম, সঙ্ঘং যাৰজীৰং ভেসজ্জেন পৰারেহী’’তি। ভিক্খূ কুক্কুচ্চাযন্তা নাধিৰাসেন্তি। ভগৰতো এতমত্থং আরোচেসুং…পে॰… অনুজানামি, ভিক্খৰে, নিচ্চপৰারণম্পি সাদিতুন্তি।
305. Tena kho pana samayena bhikkhū mahānāmaṃ sakkaṃ parittaṃyeva bhesajjaṃ viññāpenti. Tatheva mahānāmassa sakkassa bhesajjaṃ ussannaṃ hoti. Tatiyampi kho mahānāmo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho mahānāmo sakko bhagavantaṃ etadavoca – ‘‘icchāmahaṃ, bhante, saṅghaṃ yāvajīvaṃ bhesajjena pavāretu’’nti. ‘‘Sādhu sādhu, mahānāma! Tena hi tvaṃ, mahānāma, saṅghaṃ yāvajīvaṃ bhesajjena pavārehī’’ti. Bhikkhū kukkuccāyantā nādhivāsenti. Bhagavato etamatthaṃ ārocesuṃ…pe… anujānāmi, bhikkhave, niccapavāraṇampi sāditunti.
তেন খো পন সমযেন ছব্বগ্গিযা ভিক্খূ দুন্নিৰত্থা হোন্তি দুপ্পারুতা অনাকপ্পসম্পন্না। মহানামো সক্কো ৰত্তা হোতি – ‘‘কিস্স তুম্হে, ভন্তে, দুন্নিৰত্থা দুপ্পারুতা অনাকপ্পসম্পন্না? ননু নাম পব্বজিতেন সুনিৰত্থেন ভৰিতব্বং সুপারুতেন আকপ্পসম্পন্নেনা’’তি? ছব্বগ্গিযা ভিক্খূ মহানামে সক্কে উপনন্ধিংসু। অথ খো ছব্বগ্গিযানং ভিক্খূনং এতদহোসি – ‘‘কেন নু খো মযং উপাযেন মহানামং সক্কং মঙ্কু করেয্যামা’’তি? অথ খো ছব্বগ্গিযানং ভিক্খূনং এতদহোসি – ‘‘মহানামেন খো, আৰুসো, সক্কেন সঙ্ঘো ভেসজ্জেন পৰারিতো। হন্দ মযং, আৰুসো, মহানামং সক্কং সপ্পিং ৰিঞ্ঞাপেমা’’তি। অথ খো ছব্বগ্গিযা ভিক্খূ যেন মহানামো সক্কো তেনুপসঙ্কমিংসু; উপসঙ্কমিত্ৰা মহানামং সক্কং এতদৰোচুং – ‘‘দোণেন, আৰুসো, সপ্পিনা অত্থো’’তি। ‘‘অজ্জণ্হো, ভন্তে, আগমেথ। মনুস্সা ৰজং গতা সপ্পিং আহরিতুং। কালং আহরিস্সথা’’তি 23।
Tena kho pana samayena chabbaggiyā bhikkhū dunnivatthā honti duppārutā anākappasampannā. Mahānāmo sakko vattā hoti – ‘‘kissa tumhe, bhante, dunnivatthā duppārutā anākappasampannā? Nanu nāma pabbajitena sunivatthena bhavitabbaṃ supārutena ākappasampannenā’’ti? Chabbaggiyā bhikkhū mahānāme sakke upanandhiṃsu. Atha kho chabbaggiyānaṃ bhikkhūnaṃ etadahosi – ‘‘kena nu kho mayaṃ upāyena mahānāmaṃ sakkaṃ maṅku kareyyāmā’’ti? Atha kho chabbaggiyānaṃ bhikkhūnaṃ etadahosi – ‘‘mahānāmena kho, āvuso, sakkena saṅgho bhesajjena pavārito. Handa mayaṃ, āvuso, mahānāmaṃ sakkaṃ sappiṃ viññāpemā’’ti. Atha kho chabbaggiyā bhikkhū yena mahānāmo sakko tenupasaṅkamiṃsu; upasaṅkamitvā mahānāmaṃ sakkaṃ etadavocuṃ – ‘‘doṇena, āvuso, sappinā attho’’ti. ‘‘Ajjaṇho, bhante, āgametha. Manussā vajaṃ gatā sappiṃ āharituṃ. Kālaṃ āharissathā’’ti 24.
দুতিযম্পি খো…পে॰… ততিযম্পি খো ছব্বগ্গিযা ভিক্খূ মহানামং সক্কং এতদৰোচুং – ‘‘দোণেন, আৰুসো, সপ্পিনা অত্থো’’তি। ‘‘অজ্জণ্হো, ভন্তে, আগমেথ। মনুস্সা ৰজং গতা সপ্পিং আহরিতুং। কালং আহরিস্সথা’’তি। ‘‘কিং পন তযা, আৰুসো, অদাতুকামেন পৰারিতেন, যং ত্ৰং পৰারেত্ৰা ন দেসী’’তি! অথ খো মহানামো সক্কো উজ্ঝাযতি খিয্যতি ৰিপাচেতি – ‘‘কথঞ্হি নাম ভদন্তা – ‘অজ্জণ্হো, ভন্তে, আগমেথা’তি ৰুচ্চমানা নাগমেস্সন্তী’’তি! অস্সোসুং খো ভিক্খূ মহানামস্স সক্কস্স উজ্ঝাযন্তস্স খিয্যন্তস্স ৰিপাচেন্তস্স। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ মহানামেন সক্কেন – ‘অজ্জণ্হো, ভন্তে, আগমেথা’তি ৰুচ্চমানা নাগমেস্সন্তী’’তি…পে॰… সচ্চং কির তুম্হে, ভিক্খৰে, মহানামেন সক্কেন – ‘‘অজ্জণ্হো, ভন্তে, আগমেথা’’তি ৰুচ্চমানা নাগমেথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, মহানামেন সক্কেন – ‘‘অজ্জণ্হো, ভন্তে আগমেথা’’তি ৰুচ্চমানা নাগমেস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে ইমং সিক্খাপদং উদ্দিসেয্যাথ –
Dutiyampi kho…pe… tatiyampi kho chabbaggiyā bhikkhū mahānāmaṃ sakkaṃ etadavocuṃ – ‘‘doṇena, āvuso, sappinā attho’’ti. ‘‘Ajjaṇho, bhante, āgametha. Manussā vajaṃ gatā sappiṃ āharituṃ. Kālaṃ āharissathā’’ti. ‘‘Kiṃ pana tayā, āvuso, adātukāmena pavāritena, yaṃ tvaṃ pavāretvā na desī’’ti! Atha kho mahānāmo sakko ujjhāyati khiyyati vipāceti – ‘‘kathañhi nāma bhadantā – ‘ajjaṇho, bhante, āgamethā’ti vuccamānā nāgamessantī’’ti! Assosuṃ kho bhikkhū mahānāmassa sakkassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū mahānāmena sakkena – ‘ajjaṇho, bhante, āgamethā’ti vuccamānā nāgamessantī’’ti…pe… saccaṃ kira tumhe, bhikkhave, mahānāmena sakkena – ‘‘ajjaṇho, bhante, āgamethā’’ti vuccamānā nāgamethāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, mahānāmena sakkena – ‘‘ajjaṇho, bhante āgamethā’’ti vuccamānā nāgamessatha! Netaṃ, moghapurisā, appasannānaṃ vā pasādāya…pe… evañca pana, bhikkhave imaṃ sikkhāpadaṃ uddiseyyātha –
৩০৬. ‘‘অগিলানেন ভিক্খুনা চতুমাসপ্পচ্চযপৰারণা সাদিতব্বা , অঞ্ঞত্র পুনপৰারণায, অঞ্ঞত্র নিচ্চপৰারণায; ততো চে উত্তরি সাদিযেয্য, পাচিত্তিয’’ন্তি।
306.‘‘Agilānena bhikkhunā catumāsappaccayapavāraṇā sāditabbā, aññatra punapavāraṇāya, aññatra niccapavāraṇāya; tato ce uttari sādiyeyya, pācittiya’’nti.
৩০৭. অগিলানেন ভিক্খুনা চতুমাসপ্পচ্চযপৰারণা সাদিতব্বাতি গিলানপ্পচ্চযপৰারণা সাদিতব্বা।
307.Agilānena bhikkhunā catumāsappaccayapavāraṇā sāditabbāti gilānappaccayapavāraṇā sāditabbā.
পুনপৰারণাপি সাদিতব্বাতি যদা গিলানো ভৰিস্সামি তদা ৰিঞ্ঞাপেস্সামীতি।
Punapavāraṇāpi sāditabbāti yadā gilāno bhavissāmi tadā viññāpessāmīti.
নিচ্চপৰারণাপি সাদিতব্বাতি যদা গিলানো ভৰিস্সামি তদা ৰিঞ্ঞাপেস্সামীতি।
Niccapavāraṇāpi sāditabbāti yadā gilāno bhavissāmi tadā viññāpessāmīti.
ততো চে উত্তরি সাদিযেয্যাতি অত্থি পৰারণা ভেসজ্জপরিযন্তা ন রত্তিপরিযন্তা, অত্থি পৰারণা রত্তিপরিযন্তা ন ভেসজ্জপরিযন্তা, অত্থি পৰারণা ভেসজ্জপরিযন্তা চ রত্তিপরিযন্তা চ, অত্থি পৰারণা নেৰ ভেসজ্জপরিযন্তা ন রত্তিপরিযন্তা।
Tatoce uttari sādiyeyyāti atthi pavāraṇā bhesajjapariyantā na rattipariyantā, atthi pavāraṇā rattipariyantā na bhesajjapariyantā, atthi pavāraṇā bhesajjapariyantā ca rattipariyantā ca, atthi pavāraṇā neva bhesajjapariyantā na rattipariyantā.
ভেসজ্জপরিযন্তা নাম ভেসজ্জানি পরিগ্গহিতানি হোন্তি – ‘‘এত্তকেহি ভেসজ্জেহি পৰারেমী’’তি। রত্তিপরিযন্তা নাম রত্তিযো পরিগ্গহিতাযো হোন্তি – ‘‘এত্তকাসু রত্তীসু পৰারেমী’’তি। ভেসজ্জপরিযন্তা চ রত্তিপরিযন্তা চ নাম ভেসজ্জানি চ পরিগ্গহিতানি হোন্তি রত্তিযো চ পরিগ্গহিতাযো হোন্তি – ‘‘এত্তকেহি ভেসজ্জেহি এত্তকাসু রত্তীসু পৰারেমী’’তি। নেৰ ভেসজ্জপরিযন্তা ন রত্তিপরিযন্তা নাম ভেসজ্জানি চ অপরিগ্গহিতানি হোন্তি রত্তিযো চ অপরিগ্গহিতাযো হোন্তি।
Bhesajjapariyantā nāma bhesajjāni pariggahitāni honti – ‘‘ettakehi bhesajjehi pavāremī’’ti. Rattipariyantā nāma rattiyo pariggahitāyo honti – ‘‘ettakāsu rattīsu pavāremī’’ti. Bhesajjapariyantā ca rattipariyantā ca nāma bhesajjāni ca pariggahitāni honti rattiyo ca pariggahitāyo honti – ‘‘ettakehi bhesajjehi ettakāsu rattīsu pavāremī’’ti. Neva bhesajjapariyantā na rattipariyantā nāma bhesajjāni ca apariggahitāni honti rattiyo ca apariggahitāyo honti.
৩০৮. ভেসজ্জপরিযন্তে – যেহি ভেসজ্জেহি পৰারিতো হোতি তানি ভেসজ্জানি ঠপেত্ৰা অঞ্ঞানি ভেসজ্জানি ৰিঞ্ঞাপেতি, আপত্তি পাচিত্তিযস্স। রত্তিপরিযন্তে – যাসু রত্তীসু পৰারিতো হোতি, তা রত্তিযো ঠপেত্ৰা অঞ্ঞাসু রত্তীসু ৰিঞ্ঞাপেতি, আপত্তি পাচিত্তিযস্স। ভেসজ্জপরিযন্তে চ রত্তিপরিযন্তে চ – যেহি ভেসজ্জেহি পৰারিতো হোতি, তানি ভেসজ্জানি ঠপেত্ৰা যাসু রত্তীসু পৰারিতো হোতি, তা রত্তিযো ঠপেত্ৰা অঞ্ঞানি ভেসজ্জানি অঞ্ঞাসু রত্তীসু ৰিঞ্ঞাপেতি, আপত্তি পাচিত্তিযস্স। নেৰ ভেসজ্জপরিযন্তে ন রত্তিপরিযন্তে, অনাপত্তি।
308. Bhesajjapariyante – yehi bhesajjehi pavārito hoti tāni bhesajjāni ṭhapetvā aññāni bhesajjāni viññāpeti, āpatti pācittiyassa. Rattipariyante – yāsu rattīsu pavārito hoti, tā rattiyo ṭhapetvā aññāsu rattīsu viññāpeti, āpatti pācittiyassa. Bhesajjapariyante ca rattipariyante ca – yehi bhesajjehi pavārito hoti, tāni bhesajjāni ṭhapetvā yāsu rattīsu pavārito hoti, tā rattiyo ṭhapetvā aññāni bhesajjāni aññāsu rattīsu viññāpeti, āpatti pācittiyassa. Neva bhesajjapariyante na rattipariyante, anāpatti.
৩০৯. ন ভেসজ্জেন করণীযেন 25 ভেসজ্জং ৰিঞ্ঞাপেতি, আপত্তি পাচিত্তিযস্স। অঞ্ঞেন ভেসজ্জেন করণীযেন অঞ্ঞং ভেসজ্জং ৰিঞ্ঞাপেতি, আপত্তি পাচিত্তিযস্স। ততুত্তরি ততুত্তরিসঞ্ঞী ভেসজ্জং ৰিঞ্ঞাপেতি, আপত্তি পাচিত্তিযস্স। ততুত্তরি ৰেমতিকো ভেসজ্জং ৰিঞ্ঞাপেতি, আপত্তি পাচিত্তিযস্স। ততুত্তরি নততুত্তরিসঞ্ঞী ভেসজ্জং ৰিঞ্ঞাপেতি, আপত্তি পাচিত্তিযস্স।
309. Na bhesajjena karaṇīyena 26 bhesajjaṃ viññāpeti, āpatti pācittiyassa. Aññena bhesajjena karaṇīyena aññaṃ bhesajjaṃ viññāpeti, āpatti pācittiyassa. Tatuttari tatuttarisaññī bhesajjaṃ viññāpeti, āpatti pācittiyassa. Tatuttari vematiko bhesajjaṃ viññāpeti, āpatti pācittiyassa. Tatuttari natatuttarisaññī bhesajjaṃ viññāpeti, āpatti pācittiyassa.
নততুত্তরি ততুত্তরিসঞ্ঞী, আপত্তি দুক্কটস্স। নততুত্তরি ৰেমতিকো, আপত্তি দুক্কটস্স। নততুত্তরি নততুত্তরিসঞ্ঞী, অনাপত্তি।
Natatuttari tatuttarisaññī, āpatti dukkaṭassa. Natatuttari vematiko, āpatti dukkaṭassa. Natatuttari natatuttarisaññī, anāpatti.
৩১০. অনাপত্তি যেহি ভেসজ্জেহি পৰারিতো হোতি তানি ভেসজ্জানি ৰিঞ্ঞাপেতি, যাসু রত্তীসু পৰারিতো হোতি তাসু রত্তীসু ৰিঞ্ঞাপেতি , ‘‘ইমেহি তযা ভেসজ্জেহি পৰারিতাম্হ , অম্হাকঞ্চ ইমিনা চ ইমিনা চ ভেসজ্জেন অত্থো’’তি আচিক্খিত্ৰা ৰিঞ্ঞাপেতি, ‘‘যাসু তযা রত্তীসু পৰারিতাম্হ তাযো চ রত্তিযো ৰীতিৰত্তা অম্হাকঞ্চ ভেসজ্জেন অত্থো’’তি আচিক্খিত্ৰা ৰিঞ্ঞাপেতি, ঞাতকানং পৰারিতানং, অঞ্ঞস্সত্থায, অত্তনো ধনেন, উম্মত্তকস্স, আদিকম্মিকস্সাতি।
310. Anāpatti yehi bhesajjehi pavārito hoti tāni bhesajjāni viññāpeti, yāsu rattīsu pavārito hoti tāsu rattīsu viññāpeti , ‘‘imehi tayā bhesajjehi pavāritāmha , amhākañca iminā ca iminā ca bhesajjena attho’’ti ācikkhitvā viññāpeti, ‘‘yāsu tayā rattīsu pavāritāmha tāyo ca rattiyo vītivattā amhākañca bhesajjena attho’’ti ācikkhitvā viññāpeti, ñātakānaṃ pavāritānaṃ, aññassatthāya, attano dhanena, ummattakassa, ādikammikassāti.
মহানামসিক্খাপদং নিট্ঠিতং সত্তমং।
Mahānāmasikkhāpadaṃ niṭṭhitaṃ sattamaṃ.
৮. উয্যুত্তসেনাসিক্খাপদং
8. Uyyuttasenāsikkhāpadaṃ
৩১১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন রাজা পসেনদি কোসলো সেনায অব্ভুয্যাতো হোতি। ছব্বগ্গিযা ভিক্খূ উয্যুত্তং সেনং দস্সনায অগমংসু। অদ্দসা খো রাজা পসেনদি কোসলো ছব্বগ্গিযে ভিক্খূ দূরতোৰ আগচ্ছন্তে। দিস্ৰান পক্কোসাপেত্ৰা এতদৰোচ – ‘‘কিস্স তুম্হে, ভন্তে, আগতত্থা’’তি? ‘‘মহারাজানং মযং দট্ঠুকামা’’ 27 তি। ‘‘কিং, ভন্তে, মং দিট্ঠেন যুদ্ধাভিনন্দিনং 28; ননু ভগৰা পস্সিতব্বো’’তি? মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা উয্যুত্তং সেনং দস্সনায আগচ্ছিস্সন্তি! অম্হাকম্পি অলাভা, অম্হাকম্পি দুল্লদ্ধং, যে মযং আজীৰস্স হেতু পুত্তদারস্স কারণা সেনায আগচ্ছামা’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ উয্যুত্তং সেনং দস্সনায গচ্ছিস্সন্তী’’তি…পে॰… সচ্চং কির তুম্হে, ভিক্খৰে, উয্যুত্তং সেনং দস্সনায গচ্ছথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, উয্যুত্তং সেনং দস্সনায গচ্ছিস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
311. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena rājā pasenadi kosalo senāya abbhuyyāto hoti. Chabbaggiyā bhikkhū uyyuttaṃ senaṃ dassanāya agamaṃsu. Addasā kho rājā pasenadi kosalo chabbaggiye bhikkhū dūratova āgacchante. Disvāna pakkosāpetvā etadavoca – ‘‘kissa tumhe, bhante, āgatatthā’’ti? ‘‘Mahārājānaṃ mayaṃ daṭṭhukāmā’’ 29 ti. ‘‘Kiṃ, bhante, maṃ diṭṭhena yuddhābhinandinaṃ 30; nanu bhagavā passitabbo’’ti? Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā uyyuttaṃ senaṃ dassanāya āgacchissanti! Amhākampi alābhā, amhākampi dulladdhaṃ, ye mayaṃ ājīvassa hetu puttadārassa kāraṇā senāya āgacchāmā’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū uyyuttaṃ senaṃ dassanāya gacchissantī’’ti…pe… saccaṃ kira tumhe, bhikkhave, uyyuttaṃ senaṃ dassanāya gacchathāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, uyyuttaṃ senaṃ dassanāya gacchissatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
‘‘যো পন ভিক্খু উয্যুত্তং সেনং দস্সনায গচ্ছেয্য, পাচিত্তিয’’ন্তি।
‘‘Yopana bhikkhu uyyuttaṃ senaṃ dassanāya gaccheyya, pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
৩১২. তেন খো পন সমযেন অঞ্ঞতরস্স ভিক্খুনো মাতুলো সেনায গিলানো হোতি । সো তস্স ভিক্খুনো সন্তিকে দূতং পাহেসি – ‘‘অহঞ্হি সেনায গিলানো। আগচ্ছতু ভদন্তো। ইচ্ছামি ভদন্তস্স আগত’’ন্তি। অথ খো তস্স ভিক্খুনো এতদহোসি – ‘‘ভগৰতা সিক্খাপদং পঞ্ঞত্তং – ‘ন উয্যুত্তং সেনং দস্সনায গন্তব্ব’ন্তি। অযঞ্চ মে মাতুলো সেনায গিলানো। কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, তথারূপপ্পচ্চযা সেনায গন্তুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
312. Tena kho pana samayena aññatarassa bhikkhuno mātulo senāya gilāno hoti . So tassa bhikkhuno santike dūtaṃ pāhesi – ‘‘ahañhi senāya gilāno. Āgacchatu bhadanto. Icchāmi bhadantassa āgata’’nti. Atha kho tassa bhikkhuno etadahosi – ‘‘bhagavatā sikkhāpadaṃ paññattaṃ – ‘na uyyuttaṃ senaṃ dassanāya gantabba’nti. Ayañca me mātulo senāya gilāno. Kathaṃ nu kho mayā paṭipajjitabba’’nti? Bhagavato etamatthaṃ ārocesi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, tathārūpappaccayā senāya gantuṃ. Evañca pana, bhikkhave, imaṃ sikkhāpadaṃ uddiseyyātha –
৩১৩. ‘‘যো পন ভিক্খু উয্যুত্তং সেনং দস্সনায গচ্ছেয্য, অঞ্ঞত্র তথারূপপ্পচ্চযা, পাচিত্তিয’’ন্তি।
313.‘‘Yo pana bhikkhu uyyuttaṃ senaṃ dassanāya gaccheyya, aññatra tathārūpappaccayā, pācittiya’’nti.
৩১৪. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
314.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
উয্যুত্তা নাম সেনা গামতো নিক্খমিত্ৰা নিৰিট্ঠা ৰা হোতি পযাতা ৰা।
Uyyuttā nāma senā gāmato nikkhamitvā niviṭṭhā vā hoti payātā vā.
সেনা নাম হত্থী অস্সা রথা পত্তী। দ্ৰাদসপুরিসো হত্থী, তিপুরিসো অস্সো, চতুপুরিসো রথো, চত্তারো পুরিসা সরহত্থা পত্তি। দস্সনায গচ্ছতি, আপত্তি দুক্কটস্স। যত্থ ঠিতো পস্সতি, আপত্তি পাচিত্তিযস্স। দস্সনূপচারং ৰিজহিত্ৰা পুনপ্পুনং পস্সতি, আপত্তি পাচিত্তিযস্স।
Senā nāma hatthī assā rathā pattī. Dvādasapuriso hatthī, tipuriso asso, catupuriso ratho, cattāro purisā sarahatthā patti. Dassanāya gacchati, āpatti dukkaṭassa. Yattha ṭhito passati, āpatti pācittiyassa. Dassanūpacāraṃ vijahitvā punappunaṃ passati, āpatti pācittiyassa.
অঞ্ঞত্র তথারূপপ্পচ্চযাতি ঠপেত্ৰা তথারূপপ্পচ্চযং।
Aññatra tathārūpappaccayāti ṭhapetvā tathārūpappaccayaṃ.
৩১৫. উয্যুত্তে উয্যুত্তসঞ্ঞী দস্সনায গচ্ছতি, অঞ্ঞত্র তথারূপপ্পচ্চযা, আপত্তি পাচিত্তিযস্স। উয্যুত্তে ৰেমতিকো দস্সনায গচ্ছতি, অঞ্ঞত্র তথারূপপ্পচ্চযা, আপত্তি পাচিত্তিযস্স। উয্যুত্তে অনুয্যুত্তসঞ্ঞী দস্সনায গচ্ছতি, অঞ্ঞত্র তথারূপপ্পচ্চযা, আপত্তি পাচিত্তিযস্স।
315. Uyyutte uyyuttasaññī dassanāya gacchati, aññatra tathārūpappaccayā, āpatti pācittiyassa. Uyyutte vematiko dassanāya gacchati, aññatra tathārūpappaccayā, āpatti pācittiyassa. Uyyutte anuyyuttasaññī dassanāya gacchati, aññatra tathārūpappaccayā, āpatti pācittiyassa.
একমেকং দস্সনায গচ্ছতি, আপত্তি দুক্কটস্স। যত্থ ঠিতো পস্সতি, আপত্তি দুক্কটস্স। দস্সনূপচারং ৰিজহিত্ৰা পুনপ্পুনং পস্সতি, আপত্তি দুক্কটস্স। অনুয্যুত্তে উয্যুত্তসঞ্ঞী , আপত্তি দুক্কটস্স। অনুয্যুত্তে ৰেমতিকো, আপত্তি দুক্কটস্স। অনুয্যুত্তে অনুয্যুত্তসঞ্ঞী, অনাপত্তি।
Ekamekaṃ dassanāya gacchati, āpatti dukkaṭassa. Yattha ṭhito passati, āpatti dukkaṭassa. Dassanūpacāraṃ vijahitvā punappunaṃ passati, āpatti dukkaṭassa. Anuyyutte uyyuttasaññī , āpatti dukkaṭassa. Anuyyutte vematiko, āpatti dukkaṭassa. Anuyyutte anuyyuttasaññī, anāpatti.
৩১৬. অনাপত্তি আরামে ঠিতো পস্সতি, ভিক্খুস্স ঠিতোকাসং ৰা নিসিন্নোকাসং ৰা নিপন্নোকাসং ৰা আগচ্ছতি, পটিপথং গচ্ছন্তো পস্সতি, তথারূপপ্পচ্চযা, আপদাসু, উম্মত্তকস্স, আদিকম্মিকস্সাতি।
316. Anāpatti ārāme ṭhito passati, bhikkhussa ṭhitokāsaṃ vā nisinnokāsaṃ vā nipannokāsaṃ vā āgacchati, paṭipathaṃ gacchanto passati, tathārūpappaccayā, āpadāsu, ummattakassa, ādikammikassāti.
উয্যুত্তসেনাসিক্খাপদং নিট্ঠিতং অট্ঠমং।
Uyyuttasenāsikkhāpadaṃ niṭṭhitaṃ aṭṭhamaṃ.
৯. সেনাৰাসসিক্খাপদং
9. Senāvāsasikkhāpadaṃ
৩১৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ সতি করণীযে সেনং গন্ত্ৰা অতিরেকতিরত্তং সেনায ৰসন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা সেনায ৰসিস্সন্তি! অম্হাকম্পি অলাভা, অম্হাকম্পি দুল্লদ্ধং, যে মযং আজীৰস্স হেতু পুত্তদারস্স কারণা সেনায পটিৰসামা’’তি। অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ অতিরেকতিরত্তং সেনায ৰসিস্সন্তী’’তি…পে॰… সচ্চং কির তুম্হে, ভিক্খৰে, অতিরেকতিরত্তং সেনায ৰসথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, অতিরেকতিরত্তং সেনায ৰসিস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
317. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū sati karaṇīye senaṃ gantvā atirekatirattaṃ senāya vasanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā senāya vasissanti! Amhākampi alābhā, amhākampi dulladdhaṃ, ye mayaṃ ājīvassa hetu puttadārassa kāraṇā senāya paṭivasāmā’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū atirekatirattaṃ senāya vasissantī’’ti…pe… saccaṃ kira tumhe, bhikkhave, atirekatirattaṃ senāya vasathāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, atirekatirattaṃ senāya vasissatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
৩১৮. ‘‘সিযা চ তস্স ভিক্খুনো কোচিদেৰ পচ্চযো সেনং গমনায, দিরত্ততিরত্তং তেন ভিক্খুনা সেনায ৰসিতব্বং। ততো চে উত্তরিং ৰসেয্য, পাচিত্তিয’’ন্তি।
318.‘‘Siyā ca tassa bhikkhuno kocideva paccayo senaṃ gamanāya, dirattatirattaṃ tena bhikkhunā senāya vasitabbaṃ. Tato ce uttariṃ vaseyya, pācittiya’’nti.
৩১৯. সিযা চ তস্স ভিক্খুনো কোচিদেৰ পচ্চযো সেনং গমনাযাতি সিযা পচ্চযো সিযা করণীযং।
319.Siyā ca tassa bhikkhuno kocideva paccayo senaṃ gamanāyāti siyā paccayo siyā karaṇīyaṃ.
দিরত্ততিরত্তং তেন ভিক্খুনা সেনায ৰসিতব্বন্তি দ্ৰেতিস্সো রত্তিযো ৰসিতব্বং।
Dirattatirattaṃtena bhikkhunā senāya vasitabbanti dvetisso rattiyo vasitabbaṃ.
ততো চে উত্তরি ৰসেয্যাতি চতুত্থে দিৰসে অত্থঙ্গতে সূরিযে সেনায ৰসতি, আপত্তি পাচিত্তিযস্স।
Tato ce uttari vaseyyāti catutthe divase atthaṅgate sūriye senāya vasati, āpatti pācittiyassa.
৩২০. অতিরেকতিরত্তে অতিরেকসঞ্ঞী সেনায ৰসতি, আপত্তি পাচিত্তিযস্স। অতিরেকতিরত্তে ৰেমতিকো সেনায ৰসতি, আপত্তি পাচিত্তিযস্স। অতিরেকতিরত্তে ঊনকসঞ্ঞী সেনায ৰসতি, আপত্তি পাচিত্তিযস্স।
320. Atirekatiratte atirekasaññī senāya vasati, āpatti pācittiyassa. Atirekatiratte vematiko senāya vasati, āpatti pācittiyassa. Atirekatiratte ūnakasaññī senāya vasati, āpatti pācittiyassa.
ঊনকতিরত্তে অতিরেকসঞ্ঞী, আপত্তি দুক্কটস্স। ঊনকতিরত্তে ৰেমতিকো, আপত্তি দুক্কটস্স। ঊনকতিরত্তে ঊনকসঞ্ঞী, অনাপত্তি।
Ūnakatiratte atirekasaññī, āpatti dukkaṭassa. Ūnakatiratte vematiko, āpatti dukkaṭassa. Ūnakatiratte ūnakasaññī, anāpatti.
৩২১. অনাপত্তি দ্ৰেতিস্সো রত্তিযো ৰসতি, ঊনকদ্ৰেতিস্সো রত্তিযো ৰসতি, দ্ৰে রত্তিযো ৰসিত্ৰা ততিযায রত্তিযা পুরারুণা নিক্খমিত্ৰা পুন ৰসতি, গিলানো ৰসতি, গিলানস্স করণীযেন ৰসতি, সেনা ৰা পটিসেনায রুদ্ধা হোতি, কেনচি পলিবুদ্ধো হোতি, আপদাসু, উম্মত্তকস্স, আদিকম্মিকস্সাতি।
321. Anāpatti dvetisso rattiyo vasati, ūnakadvetisso rattiyo vasati, dve rattiyo vasitvā tatiyāya rattiyā purāruṇā nikkhamitvā puna vasati, gilāno vasati, gilānassa karaṇīyena vasati, senā vā paṭisenāya ruddhā hoti, kenaci palibuddho hoti, āpadāsu, ummattakassa, ādikammikassāti.
সেনাৰাসসিক্খাপদং নিট্ঠিতং নৰমং।
Senāvāsasikkhāpadaṃ niṭṭhitaṃ navamaṃ.
১০. উয্যোধিকসিক্খাপদং
10. Uyyodhikasikkhāpadaṃ
৩২২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ দিরত্ততিরত্তং সেনায ৰসমানা উয্যোধিকম্পি বলগ্গম্পি সেনাব্যূহম্পি অনীকদস্সনম্পি গচ্ছন্তি। অঞ্ঞতরোপি ছব্বগ্গিযো ভিক্খু উয্যোধিকং গন্ত্ৰা কণ্ডেন পটিৰিদ্ধো হোতি। মনুস্সা তং ভিক্খুং উপ্পণ্ডেসুং – ‘‘কচ্চি, ভন্তে, সুযুদ্ধং অহোসি, কতি তে লক্খানি লদ্ধানী’’তি? সো ভিক্খু তেহি মনুস্সেহি উপ্পণ্ডীযমানো মঙ্কু অহোসি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা উয্যোধিকং দস্সনায আগচ্ছিস্সন্তি! অম্হাকম্পি অলাভা, অম্হাকম্পি দুল্লদ্ধং, যে মযং আজীৰস্স হেতু পুত্তদারস্স কারণা উয্যোধিকং আগচ্ছামা’’তি। অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং । যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ উয্যোধিকং দস্সনায গচ্ছিস্সন্তী’’তি…পে॰… সচ্চং কির তুম্হে, ভিক্খৰে, উয্যোধিকং দস্সনায গচ্ছথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, উয্যোধিকং দস্সনায গচ্ছিস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে , ইমং সিক্খাপদং উদ্দিসেয্যাথ –
322. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū dirattatirattaṃ senāya vasamānā uyyodhikampi balaggampi senābyūhampi anīkadassanampi gacchanti. Aññataropi chabbaggiyo bhikkhu uyyodhikaṃ gantvā kaṇḍena paṭividdho hoti. Manussā taṃ bhikkhuṃ uppaṇḍesuṃ – ‘‘kacci, bhante, suyuddhaṃ ahosi, kati te lakkhāni laddhānī’’ti? So bhikkhu tehi manussehi uppaṇḍīyamāno maṅku ahosi. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā uyyodhikaṃ dassanāya āgacchissanti! Amhākampi alābhā, amhākampi dulladdhaṃ, ye mayaṃ ājīvassa hetu puttadārassa kāraṇā uyyodhikaṃ āgacchāmā’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ . Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū uyyodhikaṃ dassanāya gacchissantī’’ti…pe… saccaṃ kira tumhe, bhikkhave, uyyodhikaṃ dassanāya gacchathāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, uyyodhikaṃ dassanāya gacchissatha! Netaṃ, moghapurisā, appasannānaṃ vā pasādāya…pe… evañca pana, bhikkhave , imaṃ sikkhāpadaṃ uddiseyyātha –
৩২৩. ‘‘দিরত্ততিরত্তং চে ভিক্খু সেনায ৰসমানো উয্যোধিকং ৰা বলগ্গং ৰা সেনাব্যূহং ৰা অনীকদস্সনং ৰা গচ্ছেয্য, পাচিত্তিয’’ন্তি।
323.‘‘Dirattatirattaṃ ce bhikkhu senāya vasamāno uyyodhikaṃ vā balaggaṃ vā senābyūhaṃ vā anīkadassanaṃ vā gaccheyya, pācittiya’’nti.
৩২৪. দিরত্ততিরত্তং চে ভিক্খু সেনায ৰসমানোতি দ্ৰেতিস্সো রত্তিযো ৰসমানো।
324.Dirattatirattaṃ ce bhikkhu senāya vasamānoti dvetisso rattiyo vasamāno.
উয্যোধিকং নাম যত্থ সম্পহারো দিস্সতি।
Uyyodhikaṃ nāma yattha sampahāro dissati.
বলগ্গং নাম এত্তকা হত্থী, এত্তকা অস্সা, এত্তকা রথা, এত্তকা পত্তী।
Balaggaṃ nāma ettakā hatthī, ettakā assā, ettakā rathā, ettakā pattī.
সেনাব্যূহং নাম ইতো হত্থী হোন্তু, ইতো অস্সা হোন্তু, ইতো রথা হোন্তু, ইতো পত্তিকা হোন্তু।
Senābyūhaṃ nāma ito hatthī hontu, ito assā hontu, ito rathā hontu, ito pattikā hontu.
অনীকং নাম হত্থানীকং, অস্সানীকং , রথানীকং, পত্তানীকং। তযো হত্থী পচ্ছিমং হত্থানীকং, তযো অস্সা পচ্ছিমং অস্সানীকং, তযো রথা পচ্ছিমং রথানীকং, চত্তারো পুরিসা সরহত্থা পত্তী পচ্ছিমং পত্তানীকং। দস্সনায গচ্ছতি, আপত্তি দুক্কটস্স। যত্থ ঠিতো পস্সতি, আপত্তি পাচিত্তিযস্স। দস্সনূপচারং ৰিজহিত্ৰা পুনপ্পুনং পস্সতি, আপত্তি পাচিত্তিযস্স।
Anīkaṃ nāma hatthānīkaṃ, assānīkaṃ , rathānīkaṃ, pattānīkaṃ. Tayo hatthī pacchimaṃ hatthānīkaṃ, tayo assā pacchimaṃ assānīkaṃ, tayo rathā pacchimaṃ rathānīkaṃ, cattāro purisā sarahatthā pattī pacchimaṃ pattānīkaṃ. Dassanāya gacchati, āpatti dukkaṭassa. Yattha ṭhito passati, āpatti pācittiyassa. Dassanūpacāraṃ vijahitvā punappunaṃ passati, āpatti pācittiyassa.
একমেকং দস্সনায গচ্ছতি, আপত্তি দুক্কটস্স। যত্থ ঠিতো পস্সতি, আপত্তি দুক্কটস্স। দস্সনূপচারং ৰিজহিত্ৰা পুনপ্পুনং পস্সতি, আপত্তি দুক্কটস্স।
Ekamekaṃ dassanāya gacchati, āpatti dukkaṭassa. Yattha ṭhito passati, āpatti dukkaṭassa. Dassanūpacāraṃ vijahitvā punappunaṃ passati, āpatti dukkaṭassa.
৩২৫. অনাপত্তি আরামে ঠিতো পস্সতি, ভিক্খুস্স ঠিতোকাসং ৰা নিসিন্নোকাসং ৰা নিপন্নোকাসং ৰা আগন্ত্ৰা সম্পহারো দিস্সতি, পটিপথং গচ্ছন্তো পস্সতি, সতি করণীযে গন্ত্ৰা পস্সতি , আপদাসু, উম্মত্তকস্স, আদিকম্মিকস্সাতি।
325. Anāpatti ārāme ṭhito passati, bhikkhussa ṭhitokāsaṃ vā nisinnokāsaṃ vā nipannokāsaṃ vā āgantvā sampahāro dissati, paṭipathaṃ gacchanto passati, sati karaṇīye gantvā passati , āpadāsu, ummattakassa, ādikammikassāti.
উয্যোধিকসিক্খাপদং নিট্ঠিতং দসমং।
Uyyodhikasikkhāpadaṃ niṭṭhitaṃ dasamaṃ.
অচেলকৰগ্গো পঞ্চমো।
Acelakavaggo pañcamo.
তস্সুদ্দানং –
Tassuddānaṃ –
পূৰং কথোপনন্দস্স, তযংপট্ঠাকমেৰ চ।
Pūvaṃ kathopanandassa, tayaṃpaṭṭhākameva ca;
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā
১. অচেলকসিক্খাপদৰণ্ণনা • 1. Acelakasikkhāpadavaṇṇanā
২. উয্যোজনসিক্খাপদৰণ্ণনা • 2. Uyyojanasikkhāpadavaṇṇanā
৩. সভোজনসিক্খাপদৰণ্ণনা • 3. Sabhojanasikkhāpadavaṇṇanā
৬. চারিত্তসিক্খাপদৰণ্ণনা • 6. Cārittasikkhāpadavaṇṇanā
৭. মহানামসিক্খাপদৰণ্ণনা • 7. Mahānāmasikkhāpadavaṇṇanā
৮. উয্যুত্তসেনাসিক্খাপদৰণ্ণনা • 8. Uyyuttasenāsikkhāpadavaṇṇanā
৯. সেনাৰাসসিক্খাপদৰণ্ণনা • 9. Senāvāsasikkhāpadavaṇṇanā
১০. উয্যোধিকসিক্খাপদৰণ্ণনা • 10. Uyyodhikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
১. অচেলকসিক্খাপদৰণ্ণনা • 1. Acelakasikkhāpadavaṇṇanā
২. উয্যোজনসিক্খাপদৰণ্ণনা • 2. Uyyojanasikkhāpadavaṇṇanā
৩. সভোজনসিক্খাপদৰণ্ণনা • 3. Sabhojanasikkhāpadavaṇṇanā
৬. চারিত্তসিক্খাপদৰণ্ণনা • 6. Cārittasikkhāpadavaṇṇanā
৭. মহানামসিক্খাপদৰণ্ণনা • 7. Mahānāmasikkhāpadavaṇṇanā
৮. উয্যুত্তসেনাসিক্খাপদৰণ্ণনা • 8. Uyyuttasenāsikkhāpadavaṇṇanā
৯. সেনাৰাসসিক্খাপদৰণ্ণনা • 9. Senāvāsasikkhāpadavaṇṇanā
১০. উয্যোধিকসিক্খাপদৰণ্ণনা • 10. Uyyodhikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
১. অচেলকসিক্খাপদৰণ্ণনা • 1. Acelakasikkhāpadavaṇṇanā
২. উয্যোজনসিক্খাপদৰণ্ণনা • 2. Uyyojanasikkhāpadavaṇṇanā
৩. সভোজনসিক্খাপদৰণ্ণনা • 3. Sabhojanasikkhāpadavaṇṇanā
৪. রহোপটিচ্ছন্নসিক্খাপদৰণ্ণনা • 4. Rahopaṭicchannasikkhāpadavaṇṇanā
৫. রহোনিসজ্জসিক্খাপদৰণ্ণনা • 5. Rahonisajjasikkhāpadavaṇṇanā
৬. চারিত্তসিক্খাপদৰণ্ণনা • 6. Cārittasikkhāpadavaṇṇanā
৭. মহানামসিক্খাপদৰণ্ণনা • 7. Mahānāmasikkhāpadavaṇṇanā
৮. উয্যুত্তসেনাসিক্খাপদৰণ্ণনা • 8. Uyyuttasenāsikkhāpadavaṇṇanā
৯. সেনাৰাসসিক্খাপদৰণ্ণনা • 9. Senāvāsasikkhāpadavaṇṇanā
১০. উয্যোধিকসিক্খাপদৰণ্ণনা • 10. Uyyodhikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā
১. অচেলকসিক্খাপদৰণ্ণনা • 1. Acelakasikkhāpadavaṇṇanā
২. উয্যোজনসিক্খাপদৰণ্ণনা • 2. Uyyojanasikkhāpadavaṇṇanā
৩. সভোজনসিক্খাপদৰণ্ণনা • 3. Sabhojanasikkhāpadavaṇṇanā
৬. চারিত্তসিক্খাপদৰণ্ণনা • 6. Cārittasikkhāpadavaṇṇanā
৭. মহানামসিক্খাপদৰণ্ণনা • 7. Mahānāmasikkhāpadavaṇṇanā
৮. উয্যুত্তসেনাসিক্খাপদৰণ্ণনা • 8. Uyyuttasenāsikkhāpadavaṇṇanā
৯. সেনাৰাসসিক্খাপদৰণ্ণনা • 9. Senāvāsasikkhāpadavaṇṇanā
১০. উয্যোধিকসিক্খাপদৰণ্ণনা • 10. Uyyodhikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
১. অচেলকসিক্খাপদ-অত্থযোজনা • 1. Acelakasikkhāpada-atthayojanā
২. উয্যোজনসিক্খাপদং • 2. Uyyojanasikkhāpadaṃ
৩. সভোজনসিক্খাপদং • 3. Sabhojanasikkhāpadaṃ
৬. চারিত্তসিক্খাপদং • 6. Cārittasikkhāpadaṃ
৭. মহানামসিক্খাপদং • 7. Mahānāmasikkhāpadaṃ
৮. উয্যুত্তসেনাসিক্খাপদং • 8. Uyyuttasenāsikkhāpadaṃ
৯. সেনাৰাসসিক্খাপদং • 9. Senāvāsasikkhāpadaṃ
১০. উয্যোধিকসিক্খাপদং • 10. Uyyodhikasikkhāpadaṃ
