| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
5. අචෙලකවග්‌ගො
5. Acelakavaggo
94. අචෙලකස්‌ස වා පරිබ්‌බාජකස්‌ස වා පරිබ්‌බාජිකාය වා සහත්‌ථා ඛාදනීයං වා භොජනීයං වා දෙන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? වෙසාලියං පඤ්‌ඤත්‌තං. කං ආරබ්‌භාති? ආයස්‌මන්‌තං ආනන්‌දං ආරබ්‌භ. කිස්‌මිං වත්‌ථුස්‌මින්‌ති? ආයස්‌මා ආනන්‌දො අඤ්‌ඤතරිස්‌සා පරිබ්‌බාජිකාය එකං මඤ්‌ඤමානො ද්‌වෙ පූවෙ අදාසි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති එළකලොමකෙ…පෙ.….
94. Acelakassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dentassa pācittiyaṃ kattha paññattanti? Vesāliyaṃ paññattaṃ. Kaṃ ārabbhāti? Āyasmantaṃ ānandaṃ ārabbha. Kismiṃ vatthusminti? Āyasmā ānando aññatarissā paribbājikāya ekaṃ maññamāno dve pūve adāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti eḷakalomake…pe….
95. භික්‌ඛුං ‘‘එහාවුසො, ගාමං වා නිගමං වා පිණ්‌ඩාය පවිසිස්‌සාමා’’ති තස්‌ස දාපෙත්‌වා වා අදාපෙත්‌වා වා උය්‍යොජෙන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ආයස්‌මන්‌තං උපනන්‌දං සක්‍යපුත්‌තං ආරබ්‌භ. කිස්‌මිං වත්‌ථුස්‌මින්‌ති ? ආයස්‌මා උපනන්‌දො සක්‍යපුත්‌තො භික්‌ඛුං ‘‘එහාවුසො, ගාමං පිණ්‌ඩාය පවිසිස්‌සාමා’’ති, තස්‌ස අදාපෙත්‌වා උය්‍යොජෙසි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
95. Bhikkhuṃ ‘‘ehāvuso, gāmaṃ vā nigamaṃ vā piṇḍāya pavisissāmā’’ti tassa dāpetvā vā adāpetvā vā uyyojentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti ? Āyasmā upanando sakyaputto bhikkhuṃ ‘‘ehāvuso, gāmaṃ piṇḍāya pavisissāmā’’ti, tassa adāpetvā uyyojesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
96. සභොජනෙ කුලෙ අනුපඛජ්‌ජ නිසජ්‌ජං කප්‌පෙන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ආයස්‌මන්‌තං උපනන්‌දං සක්‍යපුත්‌තං ආරබ්‌භ. කිස්‌මිං වත්‌ථුස්‌මින්‌ති? ආයස්‌මා උපනන්‌දො සක්‍යපුත්‌තො සභොජනෙ කුලෙ අනුපඛජ්‌ජ නිසජ්‌ජං කප්‌පෙසි, තස්‌මිං වත්‌ථුස්‌මිං. එකා පඤ්‌ඤත්‌ති . ඡන්‌නං ආපත්‌තිසමුට්‌ඨානානං එකෙන සමුට්‌ඨානෙන සමුට්‌ඨාති – කායතො ච චිත්‌තතො ච සමුට්‌ඨාති, න වාචතො…පෙ.….
96. Sabhojane kule anupakhajja nisajjaṃ kappentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto sabhojane kule anupakhajja nisajjaṃ kappesi, tasmiṃ vatthusmiṃ. Ekā paññatti . Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
97. මාතුගාමෙන සද්‌ධිං රහො පටිච්‌ඡන්‌නෙ ආසනෙ නිසජ්‌ජං කප්‌පෙන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ආයස්‌මන්‌තං උපනන්‌දං සක්‍යපුත්‌තං ආරබ්‌භ. කිස්‌මිං වත්‌ථුස්‌මින්‌ති? ආයස්‌මා උපනන්‌දො සක්‍යපුත්‌තො මාතුගාමෙන සද්‌ධිං රහො පටිච්‌ඡන්‌නෙ ආසනෙ නිසජ්‌ජං කප්‌පෙසි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං එකෙන සමුට්‌ඨානෙන සමුට්‌ඨාති – කායතො ච චිත්‌තතො ච සමුට්‌ඨාති, න වාචතො…පෙ.….
97. Mātugāmena saddhiṃ raho paṭicchanne āsane nisajjaṃ kappentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto mātugāmena saddhiṃ raho paṭicchanne āsane nisajjaṃ kappesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
98. මාතුගාමෙන සද්‌ධිං එකො එකාය රහො නිසජ්‌ජං කප්‌පෙන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ආයස්‌මන්‌තං උපනන්‌දං සක්‍යපුත්‌තං ආරබ්‌භ. කිස්‌මිං වත්‌ථුස්‌මින්‌ති? ආයස්‌මා උපනන්‌දො සක්‍යපුත්‌තො මාතුගාමෙන සද්‌ධිං එකො එකාය රහො නිසජ්‌ජං කප්‌පෙසි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං එකෙන සමුට්‌ඨානෙන සමුට්‌ඨාති – කායතො ච චිත්‌තතො ච සමුට්‌ඨාති, න වාචතො…පෙ.….
98. Mātugāmena saddhiṃ eko ekāya raho nisajjaṃ kappentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto mātugāmena saddhiṃ eko ekāya raho nisajjaṃ kappesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
99. නිමන්‌තිතෙන සභත්‌තෙන සන්‌තං භික්‌ඛුං අනාපුච්‌ඡා පුරෙභත්‌තං පච්‌ඡාභත්‌තං කුලෙසු චාරිත්‌තං ආපජ්‌ජන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? රාජගහෙ පඤ්‌ඤත්‌තං. කං ආරබ්‌භාති? ආයස්‌මන්‌තං උපනන්‌දං සක්‍යපුත්‌තං ආරබ්‌භ. කිස්‌මිං වත්‌ථුස්‌මින්‌ති? ආයස්‌මා උපනන්‌දො සක්‍යපුත්‌තො නිමන්‌තිතො සභත්‌තො සමානො පුරෙභත්‌තං පච්‌ඡාභත්‌තං කුලෙසු චාරිත්‌තං ආපජ්‌ජි, තස්‌මිං වත්‌ථුස්‌මිං. එකා පඤ්‌ඤත්‌ති, චතස්‌සො අනුපඤ්‌ඤත්‌තියො. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති කථිනකෙ…පෙ.….
99. Nimantitena sabhattena santaṃ bhikkhuṃ anāpucchā purebhattaṃ pacchābhattaṃ kulesu cārittaṃ āpajjantassa pācittiyaṃ kattha paññattanti? Rājagahe paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto nimantito sabhatto samāno purebhattaṃ pacchābhattaṃ kulesu cārittaṃ āpajji, tasmiṃ vatthusmiṃ. Ekā paññatti, catasso anupaññattiyo. Channaṃ āpattisamuṭṭhānānaṃ dvīhi samuṭṭhānehi samuṭṭhāti kathinake…pe….
100. තතුත්‌තරි භෙසජ්‌ජං විඤ්‌ඤාපෙන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සක්‌කෙසු පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ මහානාමෙන සක්‌කෙන ‘‘අජ්‌ජණ්‌හො, භන්‌තෙ, ආගමෙථා’’ති වුච්‌චමානා නාගමෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
100. Tatuttari bhesajjaṃ viññāpentassa pācittiyaṃ kattha paññattanti? Sakkesu paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū mahānāmena sakkena ‘‘ajjaṇho, bhante, āgamethā’’ti vuccamānā nāgamesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
101. උය්‍යුත්‌තං සෙනං දස්‌සනාය ගච්‌ඡන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති ? සාවත්‌ථියං පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ උය්‍යුත්‌තං සෙනං දස්‌සනාය අගමංසු, තස්‌මිං වත්‌ථුස්‌මිං. එකා පඤ්‌ඤත්‌ති, එකා අනුපඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති එළකලොමකෙ…පෙ.….
101. Uyyuttaṃ senaṃ dassanāya gacchantassa pācittiyaṃ kattha paññattanti ? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū uyyuttaṃ senaṃ dassanāya agamaṃsu, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti eḷakalomake…pe….
102. අතිරෙකතිරත්‌තං සෙනාය වසන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ අතිරෙකතිරත්‌තං සෙනාය වසිංසු, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති එළකලොමකෙ…පෙ.….
102. Atirekatirattaṃ senāya vasantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū atirekatirattaṃ senāya vasiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti eḷakalomake…pe….
103. උය්‍යොධිකං ගච්‌ඡන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං . කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ උය්‍යොධිකං අගමංසු, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති එළකලොමකෙ…පෙ.….
103. Uyyodhikaṃ gacchantassa pācittiyaṃ kattha paññattanti? Sāvatthiyaṃ paññattaṃ . Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū uyyodhikaṃ agamaṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti eḷakalomake…pe….
අචෙලකවග්‌ගො පඤ්‌චමො.
Acelakavaggo pañcamo.
