| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৭. অচিন্তেয্যসুত্তং
7. Acinteyyasuttaṃ
৭৭. ‘‘চত্তারিমানি, ভিক্খৰে, অচিন্তেয্যানি, ন চিন্তেতব্বানি; যানি চিন্তেন্তো উম্মাদস্স ৰিঘাতস্স ভাগী অস্স। কতমানি চত্তারি? বুদ্ধানং, ভিক্খৰে, বুদ্ধৰিসযো অচিন্তেয্যো, ন চিন্তেতব্বো; যং চিন্তেন্তো উম্মাদস্স ৰিঘাতস্স ভাগী অস্স। ঝাযিস্স, ভিক্খৰে, ঝানৰিসযো অচিন্তেয্যো, ন চিন্তেতব্বো; যং চিন্তেন্তো উম্মাদস্স ৰিঘাতস্স ভাগী অস্স। কম্মৰিপাকো, ভিক্খৰে, অচিন্তেয্যো, ন চিন্তেতব্বো; যং চিন্তেন্তো উম্মাদস্স ৰিঘাতস্স ভাগী অস্স। লোকচিন্তা, ভিক্খৰে, অচিন্তেয্যা, ন চিন্তেতব্বা; যং চিন্তেন্তো উম্মাদস্স ৰিঘাতস্স ভাগী অস্স। ইমানি খো, ভিক্খৰে, চত্তারি অচিন্তেয্যানি, ন চিন্তেতব্বানি; যানি চিন্তেন্তো উম্মাদস্স ৰিঘাতস্স ভাগী অস্সা’’তি। সত্তমং।
77. ‘‘Cattārimāni, bhikkhave, acinteyyāni, na cintetabbāni; yāni cintento ummādassa vighātassa bhāgī assa. Katamāni cattāri? Buddhānaṃ, bhikkhave, buddhavisayo acinteyyo, na cintetabbo; yaṃ cintento ummādassa vighātassa bhāgī assa. Jhāyissa, bhikkhave, jhānavisayo acinteyyo, na cintetabbo; yaṃ cintento ummādassa vighātassa bhāgī assa. Kammavipāko, bhikkhave, acinteyyo, na cintetabbo; yaṃ cintento ummādassa vighātassa bhāgī assa. Lokacintā, bhikkhave, acinteyyā, na cintetabbā; yaṃ cintento ummādassa vighātassa bhāgī assa. Imāni kho, bhikkhave, cattāri acinteyyāni, na cintetabbāni; yāni cintento ummādassa vighātassa bhāgī assā’’ti. Sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৭. অচিন্তেয্যসুত্তৰণ্ণনা • 7. Acinteyyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭. অচিন্তেয্যসুত্তৰণ্ণনা • 7. Acinteyyasuttavaṇṇanā
