| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. সল়ৰগ্গো
10. Saḷavaggo
১. অদন্তঅগুত্তসুত্তৰণ্ণনা
1. Adantaaguttasuttavaṇṇanā
৯৪. অদমিতাতি দমং নিব্বিসেৰনভাৰং অনীতা। অগোপিতাতি সতিসঙ্খাতায ৰতিযা ন রক্খিতা। অপিহিতাতি সতিকৰাটেন ন পিহিতা। চতূহিপি পদেহি ইন্দ্রিযানং অনাৰরণমেৰাহ। অধিকং ৰহন্তীতি অধিৰাহা, দুক্খস্স অধিৰাহা দুক্খাধিৰাহা। নিরযেসু উপ্পজ্জনকং নেরযিকং। আদি-সদ্দেন সেসপাল়িং সঙ্গণ্হাতি।
94.Adamitāti damaṃ nibbisevanabhāvaṃ anītā. Agopitāti satisaṅkhātāya vatiyā na rakkhitā. Apihitāti satikavāṭena na pihitā. Catūhipi padehi indriyānaṃ anāvaraṇamevāha. Adhikaṃ vahantīti adhivāhā, dukkhassa adhivāhā dukkhādhivāhā. Nirayesu uppajjanakaṃ nerayikaṃ. Ādi-saddena sesapāḷiṃ saṅgaṇhāti.
সল়েৰাতি ছ-কারস্স স-কারো, ল়-কারো পদসন্ধিকরো। যত্থাতি নিমিত্তত্থে ভুম্মং। অনৰস্সুতা অতিন্তাতি রাগেন অতেমিতা।
Saḷevāti cha-kārassa sa-kāro, ḷa-kāro padasandhikaro. Yatthāti nimittatthe bhummaṃ. Anavassutā atintāti rāgena atemitā.
অস্সাদিতন্তি অস্সাদং ইতং উপগতং। তেনাহ ‘‘অস্সাদৰন্ত’’ন্তি। সুখদুক্খন্তি ইট্ঠানিট্ঠং। অন্ৰযতীতি অন্ৰযো, হেতু। ফস্সোতি অন্ৰযো এতস্সাতি ফস্সন্ৰযন্তি আহ – ‘‘ফস্সহেতুক’’ন্তি। ‘‘অৰিরুদ্ধ’’ইতি ৰিভত্তিলোপেন নিদ্দেসো।
Assāditanti assādaṃ itaṃ upagataṃ. Tenāha ‘‘assādavanta’’nti. Sukhadukkhanti iṭṭhāniṭṭhaṃ. Anvayatīti anvayo, hetu. Phassoti anvayo etassāti phassanvayanti āha – ‘‘phassahetuka’’nti. ‘‘Aviruddha’’iti vibhattilopena niddeso.
পপঞ্চসঞ্ঞাতি তণ্হাদিসমধূপসংহতসঞ্ঞা। তেনাহ ‘‘কিলেসসঞ্ঞায পপঞ্চসঞ্ঞা নাম হুত্ৰা’’তি। পপঞ্চসঞ্ঞা এতেসং অত্থীতি পপঞ্চসঞ্ঞা, ইতরীতরা নরা। পপঞ্চযন্তাতি সংসারে পপঞ্চং চিরাযনং করোন্তা। সঞ্ঞিনোতি গেহস্সিতসঞ্ঞায সঞ্ঞাৰন্তো। মনোমযং ৰিতক্কন্তি কেৰলং মনসা সম্ভাৰিতং মিচ্ছাৰিতক্কং। ইরীযতীতি ইরিযং পটিপত্তিং ইরীযতি পটিপজ্জতি।
Papañcasaññāti taṇhādisamadhūpasaṃhatasaññā. Tenāha ‘‘kilesasaññāya papañcasaññā nāma hutvā’’ti. Papañcasaññā etesaṃ atthīti papañcasaññā, itarītarā narā. Papañcayantāti saṃsāre papañcaṃ cirāyanaṃ karontā. Saññinoti gehassitasaññāya saññāvanto. Manomayaṃ vitakkanti kevalaṃ manasā sambhāvitaṃ micchāvitakkaṃ. Irīyatīti iriyaṃ paṭipattiṃ irīyati paṭipajjati.
সুট্ঠু ভাৰিতোতি সুট্ঠুভাৰং সুভাৰনং ইতো ভাৰিতভাৰিতো। ফুট্ঠস্স চিত্তন্তি তেন যথাৰুত্তফস্সেন ফুট্ঠং অস্স চিত্তং। ন ৰিকম্পতে ক্ৰচীতি কিস্মিঞ্চি ইট্ঠানিট্ঠারম্মণে ন কম্পতি। পারগাতি পারগামিনো ভৰথ।
Suṭṭhu bhāvitoti suṭṭhubhāvaṃ subhāvanaṃ ito bhāvitabhāvito. Phuṭṭhassa cittanti tena yathāvuttaphassena phuṭṭhaṃ assa cittaṃ. Na vikampate kvacīti kismiñci iṭṭhāniṭṭhārammaṇe na kampati. Pāragāti pāragāmino bhavatha.
অদন্তঅগুত্তসুত্তৰণ্ণনা নিট্ঠিতা।
Adantaaguttasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. অদন্তঅগুত্তসুত্তং • 1. Adantaaguttasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. অদন্তঅগুত্তৰণ্ণনা • 1. Adantaaguttavaṇṇanā
