| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
១០. សឡវគ្គោ
10. Saḷavaggo
១. អទន្តអគុត្តសុត្តវណ្ណនា
1. Adantaaguttasuttavaṇṇanā
៩៤. អទមិតាតិ ទមំ និព្ពិសេវនភាវំ អនីតា។ អគោបិតាតិ សតិសង្ខាតាយ វតិយា ន រក្ខិតា។ អបិហិតាតិ សតិកវាដេន ន បិហិតា។ ចតូហិបិ បទេហិ ឥន្ទ្រិយានំ អនាវរណមេវាហ។ អធិកំ វហន្តីតិ អធិវាហា, ទុក្ខស្ស អធិវាហា ទុក្ខាធិវាហា។ និរយេសុ ឧប្បជ្ជនកំ នេរយិកំ។ អាទិ-សទ្ទេន សេសបាឡិំ សង្គណ្ហាតិ។
94.Adamitāti damaṃ nibbisevanabhāvaṃ anītā. Agopitāti satisaṅkhātāya vatiyā na rakkhitā. Apihitāti satikavāṭena na pihitā. Catūhipi padehi indriyānaṃ anāvaraṇamevāha. Adhikaṃ vahantīti adhivāhā, dukkhassa adhivāhā dukkhādhivāhā. Nirayesu uppajjanakaṃ nerayikaṃ. Ādi-saddena sesapāḷiṃ saṅgaṇhāti.
សឡេវាតិ ឆ-ការស្ស ស-ការោ, ឡ-ការោ បទសន្ធិករោ។ យត្ថាតិ និមិត្តត្ថេ ភុម្មំ។ អនវស្សុតា អតិន្តាតិ រាគេន អតេមិតា។
Saḷevāti cha-kārassa sa-kāro, ḷa-kāro padasandhikaro. Yatthāti nimittatthe bhummaṃ. Anavassutā atintāti rāgena atemitā.
អស្សាទិតន្តិ អស្សាទំ ឥតំ ឧបគតំ។ តេនាហ ‘‘អស្សាទវន្ត’’ន្តិ។ សុខទុក្ខន្តិ ឥដ្ឋានិដ្ឋំ។ អន្វយតីតិ អន្វយោ, ហេតុ។ ផស្សោតិ អន្វយោ ឯតស្សាតិ ផស្សន្វយន្តិ អាហ – ‘‘ផស្សហេតុក’’ន្តិ។ ‘‘អវិរុទ្ធ’’ឥតិ វិភត្តិលោបេន និទ្ទេសោ។
Assāditanti assādaṃ itaṃ upagataṃ. Tenāha ‘‘assādavanta’’nti. Sukhadukkhanti iṭṭhāniṭṭhaṃ. Anvayatīti anvayo, hetu. Phassoti anvayo etassāti phassanvayanti āha – ‘‘phassahetuka’’nti. ‘‘Aviruddha’’iti vibhattilopena niddeso.
បបញ្ចសញ្ញាតិ តណ្ហាទិសមធូបសំហតសញ្ញា។ តេនាហ ‘‘កិលេសសញ្ញាយ បបញ្ចសញ្ញា នាម ហុត្វា’’តិ។ បបញ្ចសញ្ញា ឯតេសំ អត្ថីតិ បបញ្ចសញ្ញា, ឥតរីតរា នរា។ បបញ្ចយន្តាតិ សំសារេ បបញ្ចំ ចិរាយនំ ករោន្តា។ សញ្ញិនោតិ គេហស្សិតសញ្ញាយ សញ្ញាវន្តោ។ មនោមយំ វិតក្កន្តិ កេវលំ មនសា សម្ភាវិតំ មិច្ឆាវិតក្កំ។ ឥរីយតីតិ ឥរិយំ បដិបត្តិំ ឥរីយតិ បដិបជ្ជតិ។
Papañcasaññāti taṇhādisamadhūpasaṃhatasaññā. Tenāha ‘‘kilesasaññāya papañcasaññā nāma hutvā’’ti. Papañcasaññā etesaṃ atthīti papañcasaññā, itarītarā narā. Papañcayantāti saṃsāre papañcaṃ cirāyanaṃ karontā. Saññinoti gehassitasaññāya saññāvanto. Manomayaṃ vitakkanti kevalaṃ manasā sambhāvitaṃ micchāvitakkaṃ. Irīyatīti iriyaṃ paṭipattiṃ irīyati paṭipajjati.
សុដ្ឋុ ភាវិតោតិ សុដ្ឋុភាវំ សុភាវនំ ឥតោ ភាវិតភាវិតោ។ ផុដ្ឋស្ស ចិត្តន្តិ តេន យថាវុត្តផស្សេន ផុដ្ឋំ អស្ស ចិត្តំ។ ន វិកម្បតេ ក្វចីតិ កិស្មិញ្ចិ ឥដ្ឋានិដ្ឋារម្មណេ ន កម្បតិ។ បារគាតិ បារគាមិនោ ភវថ។
Suṭṭhu bhāvitoti suṭṭhubhāvaṃ subhāvanaṃ ito bhāvitabhāvito. Phuṭṭhassa cittanti tena yathāvuttaphassena phuṭṭhaṃ assa cittaṃ. Na vikampate kvacīti kismiñci iṭṭhāniṭṭhārammaṇe na kampati. Pāragāti pāragāmino bhavatha.
អទន្តអគុត្តសុត្តវណ្ណនា និដ្ឋិតា។
Adantaaguttasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. អទន្តអគុត្តសុត្តំ • 1. Adantaaguttasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. អទន្តអគុត្តវណ្ណនា • 1. Adantaaguttavaṇṇanā
