| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೧೦. ಸಳವಗ್ಗೋ
10. Saḷavaggo
೧. ಅದನ್ತಅಗುತ್ತಸುತ್ತವಣ್ಣನಾ
1. Adantaaguttasuttavaṇṇanā
೯೪. ಅದಮಿತಾತಿ ದಮಂ ನಿಬ್ಬಿಸೇವನಭಾವಂ ಅನೀತಾ। ಅಗೋಪಿತಾತಿ ಸತಿಸಙ್ಖಾತಾಯ ವತಿಯಾ ನ ರಕ್ಖಿತಾ। ಅಪಿಹಿತಾತಿ ಸತಿಕವಾಟೇನ ನ ಪಿಹಿತಾ। ಚತೂಹಿಪಿ ಪದೇಹಿ ಇನ್ದ್ರಿಯಾನಂ ಅನಾವರಣಮೇವಾಹ। ಅಧಿಕಂ ವಹನ್ತೀತಿ ಅಧಿವಾಹಾ, ದುಕ್ಖಸ್ಸ ಅಧಿವಾಹಾ ದುಕ್ಖಾಧಿವಾಹಾ। ನಿರಯೇಸು ಉಪ್ಪಜ್ಜನಕಂ ನೇರಯಿಕಂ। ಆದಿ-ಸದ್ದೇನ ಸೇಸಪಾಳಿಂ ಸಙ್ಗಣ್ಹಾತಿ।
94.Adamitāti damaṃ nibbisevanabhāvaṃ anītā. Agopitāti satisaṅkhātāya vatiyā na rakkhitā. Apihitāti satikavāṭena na pihitā. Catūhipi padehi indriyānaṃ anāvaraṇamevāha. Adhikaṃ vahantīti adhivāhā, dukkhassa adhivāhā dukkhādhivāhā. Nirayesu uppajjanakaṃ nerayikaṃ. Ādi-saddena sesapāḷiṃ saṅgaṇhāti.
ಸಳೇವಾತಿ ಛ-ಕಾರಸ್ಸ ಸ-ಕಾರೋ, ಳ-ಕಾರೋ ಪದಸನ್ಧಿಕರೋ। ಯತ್ಥಾತಿ ನಿಮಿತ್ತತ್ಥೇ ಭುಮ್ಮಂ। ಅನವಸ್ಸುತಾ ಅತಿನ್ತಾತಿ ರಾಗೇನ ಅತೇಮಿತಾ।
Saḷevāti cha-kārassa sa-kāro, ḷa-kāro padasandhikaro. Yatthāti nimittatthe bhummaṃ. Anavassutā atintāti rāgena atemitā.
ಅಸ್ಸಾದಿತನ್ತಿ ಅಸ್ಸಾದಂ ಇತಂ ಉಪಗತಂ। ತೇನಾಹ ‘‘ಅಸ್ಸಾದವನ್ತ’’ನ್ತಿ। ಸುಖದುಕ್ಖನ್ತಿ ಇಟ್ಠಾನಿಟ್ಠಂ। ಅನ್ವಯತೀತಿ ಅನ್ವಯೋ, ಹೇತು। ಫಸ್ಸೋತಿ ಅನ್ವಯೋ ಏತಸ್ಸಾತಿ ಫಸ್ಸನ್ವಯನ್ತಿ ಆಹ – ‘‘ಫಸ್ಸಹೇತುಕ’’ನ್ತಿ। ‘‘ಅವಿರುದ್ಧ’’ಇತಿ ವಿಭತ್ತಿಲೋಪೇನ ನಿದ್ದೇಸೋ।
Assāditanti assādaṃ itaṃ upagataṃ. Tenāha ‘‘assādavanta’’nti. Sukhadukkhanti iṭṭhāniṭṭhaṃ. Anvayatīti anvayo, hetu. Phassoti anvayo etassāti phassanvayanti āha – ‘‘phassahetuka’’nti. ‘‘Aviruddha’’iti vibhattilopena niddeso.
ಪಪಞ್ಚಸಞ್ಞಾತಿ ತಣ್ಹಾದಿಸಮಧೂಪಸಂಹತಸಞ್ಞಾ। ತೇನಾಹ ‘‘ಕಿಲೇಸಸಞ್ಞಾಯ ಪಪಞ್ಚಸಞ್ಞಾ ನಾಮ ಹುತ್ವಾ’’ತಿ। ಪಪಞ್ಚಸಞ್ಞಾ ಏತೇಸಂ ಅತ್ಥೀತಿ ಪಪಞ್ಚಸಞ್ಞಾ, ಇತರೀತರಾ ನರಾ। ಪಪಞ್ಚಯನ್ತಾತಿ ಸಂಸಾರೇ ಪಪಞ್ಚಂ ಚಿರಾಯನಂ ಕರೋನ್ತಾ। ಸಞ್ಞಿನೋತಿ ಗೇಹಸ್ಸಿತಸಞ್ಞಾಯ ಸಞ್ಞಾವನ್ತೋ। ಮನೋಮಯಂ ವಿತಕ್ಕನ್ತಿ ಕೇವಲಂ ಮನಸಾ ಸಮ್ಭಾವಿತಂ ಮಿಚ್ಛಾವಿತಕ್ಕಂ। ಇರೀಯತೀತಿ ಇರಿಯಂ ಪಟಿಪತ್ತಿಂ ಇರೀಯತಿ ಪಟಿಪಜ್ಜತಿ।
Papañcasaññāti taṇhādisamadhūpasaṃhatasaññā. Tenāha ‘‘kilesasaññāya papañcasaññā nāma hutvā’’ti. Papañcasaññā etesaṃ atthīti papañcasaññā, itarītarā narā. Papañcayantāti saṃsāre papañcaṃ cirāyanaṃ karontā. Saññinoti gehassitasaññāya saññāvanto. Manomayaṃ vitakkanti kevalaṃ manasā sambhāvitaṃ micchāvitakkaṃ. Irīyatīti iriyaṃ paṭipattiṃ irīyati paṭipajjati.
ಸುಟ್ಠು ಭಾವಿತೋತಿ ಸುಟ್ಠುಭಾವಂ ಸುಭಾವನಂ ಇತೋ ಭಾವಿತಭಾವಿತೋ। ಫುಟ್ಠಸ್ಸ ಚಿತ್ತನ್ತಿ ತೇನ ಯಥಾವುತ್ತಫಸ್ಸೇನ ಫುಟ್ಠಂ ಅಸ್ಸ ಚಿತ್ತಂ। ನ ವಿಕಮ್ಪತೇ ಕ್ವಚೀತಿ ಕಿಸ್ಮಿಞ್ಚಿ ಇಟ್ಠಾನಿಟ್ಠಾರಮ್ಮಣೇ ನ ಕಮ್ಪತಿ। ಪಾರಗಾತಿ ಪಾರಗಾಮಿನೋ ಭವಥ।
Suṭṭhu bhāvitoti suṭṭhubhāvaṃ subhāvanaṃ ito bhāvitabhāvito. Phuṭṭhassa cittanti tena yathāvuttaphassena phuṭṭhaṃ assa cittaṃ. Na vikampate kvacīti kismiñci iṭṭhāniṭṭhārammaṇe na kampati. Pāragāti pāragāmino bhavatha.
ಅದನ್ತಅಗುತ್ತಸುತ್ತವಣ್ಣನಾ ನಿಟ್ಠಿತಾ।
Adantaaguttasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧. ಅದನ್ತಅಗುತ್ತಸುತ್ತಂ • 1. Adantaaguttasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧. ಅದನ್ತಅಗುತ್ತವಣ್ಣನಾ • 1. Adantaaguttavaṇṇanā
