| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
10. සළවග්‌ගො
10. Saḷavaggo
1. අදන්‌තඅගුත්‌තසුත්‌තවණ්‌ණනා
1. Adantaaguttasuttavaṇṇanā
94. අදමිතාති දමං නිබ්‌බිසෙවනභාවං අනීතා. අගොපිතාති සතිසඞ්‌ඛාතාය වතියා න රක්‌ඛිතා. අපිහිතාති සතිකවාටෙන න පිහිතා. චතූහිපි පදෙහි ඉන්‌ද්‍රියානං අනාවරණමෙවාහ. අධිකං වහන්‌තීති අධිවාහා, දුක්‌ඛස්‌ස අධිවාහා දුක්‌ඛාධිවාහා. නිරයෙසු උප්‌පජ්‌ජනකං නෙරයිකං. ආදි-සද්‌දෙන සෙසපාළිං සඞ්‌ගණ්‌හාති.
94.Adamitāti damaṃ nibbisevanabhāvaṃ anītā. Agopitāti satisaṅkhātāya vatiyā na rakkhitā. Apihitāti satikavāṭena na pihitā. Catūhipi padehi indriyānaṃ anāvaraṇamevāha. Adhikaṃ vahantīti adhivāhā, dukkhassa adhivāhā dukkhādhivāhā. Nirayesu uppajjanakaṃ nerayikaṃ. Ādi-saddena sesapāḷiṃ saṅgaṇhāti.
සළෙවාති ඡ-කාරස්‌ස ස-කාරො, ළ-කාරො පදසන්‌ධිකරො. යත්‌ථාති නිමිත්‌තත්‌ථෙ භුම්‌මං. අනවස්‌සුතා අතින්‌තාති රාගෙන අතෙමිතා.
Saḷevāti cha-kārassa sa-kāro, ḷa-kāro padasandhikaro. Yatthāti nimittatthe bhummaṃ. Anavassutā atintāti rāgena atemitā.
අස්‌සාදිතන්‌ති අස්‌සාදං ඉතං උපගතං. තෙනාහ ‘‘අස්‌සාදවන්‌ත’’න්‌ති. සුඛදුක්‌ඛන්‌ති ඉට්‌ඨානිට්‌ඨං. අන්‌වයතීති අන්‌වයො, හෙතු. ඵස්‌සොති අන්‌වයො එතස්‌සාති ඵස්‌සන්‌වයන්‌ති ආහ – ‘‘ඵස්‌සහෙතුක’’න්‌ති. ‘‘අවිරුද්‌ධ’’ඉති විභත්‌තිලොපෙන නිද්‌දෙසො.
Assāditanti assādaṃ itaṃ upagataṃ. Tenāha ‘‘assādavanta’’nti. Sukhadukkhanti iṭṭhāniṭṭhaṃ. Anvayatīti anvayo, hetu. Phassoti anvayo etassāti phassanvayanti āha – ‘‘phassahetuka’’nti. ‘‘Aviruddha’’iti vibhattilopena niddeso.
පපඤ්‌චසඤ්‌ඤාති තණ්‌හාදිසමධූපසංහතසඤ්‌ඤා. තෙනාහ ‘‘කිලෙසසඤ්‌ඤාය පපඤ්‌චසඤ්‌ඤා නාම හුත්‌වා’’ති. පපඤ්‌චසඤ්‌ඤා එතෙසං අත්‌ථීති පපඤ්‌චසඤ්‌ඤා, ඉතරීතරා නරා. පපඤ්‌චයන්‌තාති සංසාරෙ පපඤ්‌චං චිරායනං කරොන්‌තා. සඤ්‌ඤිනොති ගෙහස්‌සිතසඤ්‌ඤාය සඤ්‌ඤාවන්‌තො. මනොමයං විතක්‌කන්‌ති කෙවලං මනසා සම්‌භාවිතං මිච්‌ඡාවිතක්‌කං. ඉරීයතීති ඉරියං පටිපත්‌තිං ඉරීයති පටිපජ්‌ජති.
Papañcasaññāti taṇhādisamadhūpasaṃhatasaññā. Tenāha ‘‘kilesasaññāya papañcasaññā nāma hutvā’’ti. Papañcasaññā etesaṃ atthīti papañcasaññā, itarītarā narā. Papañcayantāti saṃsāre papañcaṃ cirāyanaṃ karontā. Saññinoti gehassitasaññāya saññāvanto. Manomayaṃ vitakkanti kevalaṃ manasā sambhāvitaṃ micchāvitakkaṃ. Irīyatīti iriyaṃ paṭipattiṃ irīyati paṭipajjati.
සුට්‌ඨු භාවිතොති සුට්‌ඨුභාවං සුභාවනං ඉතො භාවිතභාවිතො. ඵුට්‌ඨස්‌ස චිත්‌තන්‌ති තෙන යථාවුත්‌තඵස්‌සෙන ඵුට්‌ඨං අස්‌ස චිත්‌තං. න විකම්‌පතෙ ක්‌වචීති කිස්‌මිඤ්‌චි ඉට්‌ඨානිට්‌ඨාරම්‌මණෙ න කම්‌පති. පාරගාති පාරගාමිනො භවථ.
Suṭṭhu bhāvitoti suṭṭhubhāvaṃ subhāvanaṃ ito bhāvitabhāvito. Phuṭṭhassa cittanti tena yathāvuttaphassena phuṭṭhaṃ assa cittaṃ. Na vikampate kvacīti kismiñci iṭṭhāniṭṭhārammaṇe na kampati. Pāragāti pāragāmino bhavatha.
අදන්‌තඅගුත්‌තසුත්‌තවණ්‌ණනා නිට්‌ඨිතා.
Adantaaguttasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 1. අදන්‌තඅගුත්‌තසුත්‌තං • 1. Adantaaguttasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. අදන්‌තඅගුත්‌තවණ්‌ණනා • 1. Adantaaguttavaṇṇanā
