| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༡༠. སལ༹ཝགྒོ
10. Saḷavaggo
༡. ཨདནྟཨགུཏྟསུཏྟཝཎྞནཱ
1. Adantaaguttasuttavaṇṇanā
༩༤. ཨདམིཏཱཏི དམཾ ནིབྦིསེཝནབྷཱཝཾ ཨནཱིཏཱ། ཨགོཔིཏཱཏི སཏིསངྑཱཏཱཡ ཝཏིཡཱ ན རཀྑིཏཱ། ཨཔིཧིཏཱཏི སཏིཀཝཱཊེན ན པིཧིཏཱ། ཙཏཱུཧིཔི པདེཧི ཨིནྡྲིཡཱནཾ ཨནཱཝརཎམེཝཱཧ། ཨདྷིཀཾ ཝཧནྟཱིཏི ཨདྷིཝཱཧཱ, དུཀྑསྶ ཨདྷིཝཱཧཱ དུཀྑཱདྷིཝཱཧཱ། ནིརཡེསུ ཨུཔྤཛྫནཀཾ ནེརཡིཀཾ། ཨཱདི-སདྡེན སེསཔཱལི༹ཾ སངྒཎྷཱཏི།
94.Adamitāti damaṃ nibbisevanabhāvaṃ anītā. Agopitāti satisaṅkhātāya vatiyā na rakkhitā. Apihitāti satikavāṭena na pihitā. Catūhipi padehi indriyānaṃ anāvaraṇamevāha. Adhikaṃ vahantīti adhivāhā, dukkhassa adhivāhā dukkhādhivāhā. Nirayesu uppajjanakaṃ nerayikaṃ. Ādi-saddena sesapāḷiṃ saṅgaṇhāti.
སལེ༹ཝཱཏི ཚ-ཀཱརསྶ ས-ཀཱརོ, ལ༹-ཀཱརོ པདསནྡྷིཀརོ། ཡཏྠཱཏི ནིམིཏྟཏྠེ བྷུམྨཾ། ཨནཝསྶུཏཱ ཨཏིནྟཱཏི རཱགེན ཨཏེམིཏཱ།
Saḷevāti cha-kārassa sa-kāro, ḷa-kāro padasandhikaro. Yatthāti nimittatthe bhummaṃ. Anavassutā atintāti rāgena atemitā.
ཨསྶཱདིཏནྟི ཨསྶཱདཾ ཨིཏཾ ཨུཔགཏཾ། ཏེནཱཧ ‘‘ཨསྶཱདཝནྟ’’ནྟི། སུཁདུཀྑནྟི ཨིཊྛཱནིཊྛཾ། ཨནྭཡཏཱིཏི ཨནྭཡོ, ཧེཏུ། ཕསྶོཏི ཨནྭཡོ ཨེཏསྶཱཏི ཕསྶནྭཡནྟི ཨཱཧ – ‘‘ཕསྶཧེཏུཀ’’ནྟི། ‘‘ཨཝིརུདྡྷ’’ཨིཏི ཝིབྷཏྟིལོཔེན ནིདྡེསོ།
Assāditanti assādaṃ itaṃ upagataṃ. Tenāha ‘‘assādavanta’’nti. Sukhadukkhanti iṭṭhāniṭṭhaṃ. Anvayatīti anvayo, hetu. Phassoti anvayo etassāti phassanvayanti āha – ‘‘phassahetuka’’nti. ‘‘Aviruddha’’iti vibhattilopena niddeso.
པཔཉྩསཉྙཱཏི ཏཎྷཱདིསམདྷཱུཔསཾཧཏསཉྙཱ། ཏེནཱཧ ‘‘ཀིལེསསཉྙཱཡ པཔཉྩསཉྙཱ ནཱམ ཧུཏྭཱ’’ཏི། པཔཉྩསཉྙཱ ཨེཏེསཾ ཨཏྠཱིཏི པཔཉྩསཉྙཱ, ཨིཏརཱིཏརཱ ནརཱ། པཔཉྩཡནྟཱཏི སཾསཱརེ པཔཉྩཾ ཙིརཱཡནཾ ཀརོནྟཱ། སཉྙིནོཏི གེཧསྶིཏསཉྙཱཡ སཉྙཱཝནྟོ། མནོམཡཾ ཝིཏཀྐནྟི ཀེཝལཾ མནསཱ སམྦྷཱཝིཏཾ མིཙྪཱཝིཏཀྐཾ། ཨིརཱིཡཏཱིཏི ཨིརིཡཾ པཊིཔཏྟིཾ ཨིརཱིཡཏི པཊིཔཛྫཏི།
Papañcasaññāti taṇhādisamadhūpasaṃhatasaññā. Tenāha ‘‘kilesasaññāya papañcasaññā nāma hutvā’’ti. Papañcasaññā etesaṃ atthīti papañcasaññā, itarītarā narā. Papañcayantāti saṃsāre papañcaṃ cirāyanaṃ karontā. Saññinoti gehassitasaññāya saññāvanto. Manomayaṃ vitakkanti kevalaṃ manasā sambhāvitaṃ micchāvitakkaṃ. Irīyatīti iriyaṃ paṭipattiṃ irīyati paṭipajjati.
སུཊྛུ བྷཱཝིཏོཏི སུཊྛུབྷཱཝཾ སུབྷཱཝནཾ ཨིཏོ བྷཱཝིཏབྷཱཝིཏོ། ཕུཊྛསྶ ཙིཏྟནྟི ཏེན ཡཐཱཝུཏྟཕསྶེན ཕུཊྛཾ ཨསྶ ཙིཏྟཾ། ན ཝིཀམྤཏེ ཀྭཙཱིཏི ཀིསྨིཉྩི ཨིཊྛཱནིཊྛཱརམྨཎེ ན ཀམྤཏི། པཱརགཱཏི པཱརགཱམིནོ བྷཝཐ།
Suṭṭhu bhāvitoti suṭṭhubhāvaṃ subhāvanaṃ ito bhāvitabhāvito. Phuṭṭhassa cittanti tena yathāvuttaphassena phuṭṭhaṃ assa cittaṃ. Na vikampate kvacīti kismiñci iṭṭhāniṭṭhārammaṇe na kampati. Pāragāti pāragāmino bhavatha.
ཨདནྟཨགུཏྟསུཏྟཝཎྞནཱ ནིཊྛིཏཱ།
Adantaaguttasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡. ཨདནྟཨགུཏྟསུཏྟཾ • 1. Adantaaguttasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. ཨདནྟཨགུཏྟཝཎྞནཱ • 1. Adantaaguttavaṇṇanā
