| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. ஸளவக்³கோ³
10. Saḷavaggo
1. அத³ந்தஅகு³த்தவண்ணனா
1. Adantaaguttavaṇṇanā
94. ஸளவக்³க³ஸ்ஸ பட²மே அத³ந்தாதி அத³மிதா. அகு³த்தாதி அகோ³பிதா. அரக்கி²தாதி ந ரக்கி²தா. அஸங்வுதாதி அபிஹிதா. து³க்கா²தி⁴வாஹா ஹொந்தீதி நேரயிகாதி³பே⁴த³ங் அதி⁴கது³க்க²ங் ஆவஹனகா ஹொந்தி. ஸுகா²தி⁴வாஹா ஹொந்தீதி ஜா²னமக்³க³ப²லபபே⁴த³ங் அதி⁴கஸுக²ங் ஆவஹனகா ஹொந்தி. அதி⁴வஹாதிபி பாடோ², ஏஸேவத்தோ².
94. Saḷavaggassa paṭhame adantāti adamitā. Aguttāti agopitā. Arakkhitāti na rakkhitā. Asaṃvutāti apihitā. Dukkhādhivāhā hontīti nerayikādibhedaṃ adhikadukkhaṃ āvahanakā honti. Sukhādhivāhā hontīti jhānamaggaphalapabhedaṃ adhikasukhaṃ āvahanakā honti. Adhivahātipi pāṭho, esevattho.
ஸளேவாதி ச² ஏவ. அஸங்வுதோ யத்த² து³க்க²ங் நிக³ச்ச²தீதி யேஸு ஆயதனேஸு ஸங்வரவிரஹிதோ து³க்க²ங் பாபுணாதி. தேஸஞ்ச யே ஸங்வரணங் அவேதி³ஸுந்தி யே தேஸங் ஆயதனானங் ஸங்வரங் விந்தி³ங்ஸு படிலபி⁴ங்ஸு. விஹரந்தானவஸ்ஸுதாதி விஹரந்தி அனவஸ்ஸுதா அதிந்தா.
Saḷevāti cha eva. Asaṃvuto yattha dukkhaṃ nigacchatīti yesu āyatanesu saṃvaravirahito dukkhaṃ pāpuṇāti. Tesañca ye saṃvaraṇaṃ avedisunti ye tesaṃ āyatanānaṃ saṃvaraṃ vindiṃsu paṭilabhiṃsu. Viharantānavassutāti viharanti anavassutā atintā.
அஸாதி³தஞ்ச ஸாது³ந்தி அஸ்ஸாத³வந்தஞ்ச மது⁴ரஞ்ச. ப²ஸ்ஸத்³வயங் ஸுக²து³க்கே² உபெக்கே²தி ஸுக²ப²ஸ்ஸஞ்ச து³க்க²ப²ஸ்ஸஞ்சாதி இத³ங் ப²ஸ்ஸத்³வயங் உபெக்கே², உபெக்கா²மேவெத்த² உப்பாதெ³ய்யாதி அத்தோ². ப²ஸ்ஸத்³வயங் ஸுக²து³க்க²ங் உபெக்கோ²தி வா பாடோ², ப²ஸ்ஸஹேதுகங் ஸுக²து³க்க²ங் உபெக்கோ², ஸுகே² அனுரோத⁴ங் து³க்கே² ச விரோத⁴ங் அனுப்பாதெ³ந்தோ உபெக்க²கோ ப⁴வெய்யாதிபி அத்தோ². அனானுருத்³தோ⁴ அவிருத்³தோ⁴ கேனசீதி கேனசி ஸத்³தி⁴ங் நேவ அனுருத்³தோ⁴ ந விருத்³தோ⁴ ப⁴வெய்ய.
Asāditañca sādunti assādavantañca madhurañca. Phassadvayaṃ sukhadukkhe upekkheti sukhaphassañca dukkhaphassañcāti idaṃ phassadvayaṃ upekkhe, upekkhāmevettha uppādeyyāti attho. Phassadvayaṃ sukhadukkhaṃ upekkhoti vā pāṭho, phassahetukaṃ sukhadukkhaṃ upekkho, sukhe anurodhaṃ dukkhe ca virodhaṃ anuppādento upekkhako bhaveyyātipi attho. Anānuruddhoaviruddho kenacīti kenaci saddhiṃ neva anuruddho na viruddho bhaveyya.
பபஞ்சஸஞ்ஞாதி கிலேஸஸஞ்ஞாய பபஞ்சஸஞ்ஞா நாம ஹுத்வா. இதரீதரா நராதி லாமகஸத்தா பபஞ்சயந்தா உபயந்தீதி பபஞ்சயமானா வட்டங் உபக³ச்ச²ந்தி. ஸஞ்ஞினோதி ஸஸஞ்ஞா ஸத்தா. மனோமயங் கே³ஹஸிதஞ்ச ஸப்³ப³ந்தி ஸப்³ப³மேவ பஞ்சகாமகு³ணகே³ஹனிஸ்ஸிதங் மனோமயங் விதக்கங். பனுஜ்ஜாதி பனுதி³த்வா நீஹரித்வா. நெக்க²ம்மஸிதங் இரீயதீதி த³ப்³ப³ஜாதிகோ பி⁴க்கு² நெக்க²ம்மஸிதங் இரியேன இரீயதி.
Papañcasaññāti kilesasaññāya papañcasaññā nāma hutvā. Itarītarā narāti lāmakasattā papañcayantā upayantīti papañcayamānā vaṭṭaṃ upagacchanti. Saññinoti sasaññā sattā. Manomayaṃ gehasitañca sabbanti sabbameva pañcakāmaguṇagehanissitaṃ manomayaṃ vitakkaṃ. Panujjāti panuditvā nīharitvā. Nekkhammasitaṃ irīyatīti dabbajātiko bhikkhu nekkhammasitaṃ iriyena irīyati.
ச²ஸ்ஸு யதா³ ஸுபா⁴விதோதி ச²ஸு ஆரம்மணேஸு யதா³ ஸுட்டு² பா⁴விதோ. பு²ட்ட²ஸ்ஸ சித்தங் ந விகம்பதே க்வசீதி ஸுக²ப²ஸ்ஸேன வா து³க்க²ப²ஸ்ஸேன வா பு²ட்ட²ஸ்ஸ கிஸ்மிஞ்சி சித்தங் ந கம்பதி ந வேத⁴தி. ப⁴வத்த² ஜாதிமரணஸ்ஸ பாரகா³தி ஜாதிமரணானங் பாரங் நிப்³பா³னங் க³மகா ஹோத².
Chassu yadāsubhāvitoti chasu ārammaṇesu yadā suṭṭhu bhāvito. Phuṭṭhassa cittaṃ na vikampatekvacīti sukhaphassena vā dukkhaphassena vā phuṭṭhassa kismiñci cittaṃ na kampati na vedhati. Bhavattha jātimaraṇassa pāragāti jātimaraṇānaṃ pāraṃ nibbānaṃ gamakā hotha.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. அத³ந்தஅகு³த்தஸுத்தங் • 1. Adantaaguttasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. அத³ந்தஅகு³த்தஸுத்தவண்ணனா • 1. Adantaaguttasuttavaṇṇanā
