| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
১০. সল়ৰগ্গো
10. Saḷavaggo
১. অদন্তঅগুত্তৰণ্ণনা
1. Adantaaguttavaṇṇanā
৯৪. সল়ৰগ্গস্স পঠমে অদন্তাতি অদমিতা। অগুত্তাতি অগোপিতা। অরক্খিতাতি ন রক্খিতা। অসংৰুতাতি অপিহিতা। দুক্খাধিৰাহা হোন্তীতি নেরযিকাদিভেদং অধিকদুক্খং আৰহনকা হোন্তি। সুখাধিৰাহা হোন্তীতি ঝানমগ্গফলপভেদং অধিকসুখং আৰহনকা হোন্তি। অধিৰহাতিপি পাঠো, এসেৰত্থো।
94. Saḷavaggassa paṭhame adantāti adamitā. Aguttāti agopitā. Arakkhitāti na rakkhitā. Asaṃvutāti apihitā. Dukkhādhivāhā hontīti nerayikādibhedaṃ adhikadukkhaṃ āvahanakā honti. Sukhādhivāhā hontīti jhānamaggaphalapabhedaṃ adhikasukhaṃ āvahanakā honti. Adhivahātipi pāṭho, esevattho.
সল়েৰাতি ছ এৰ। অসংৰুতো যত্থ দুক্খং নিগচ্ছতীতি যেসু আযতনেসু সংৰরৰিরহিতো দুক্খং পাপুণাতি। তেসঞ্চ যে সংৰরণং অৰেদিসুন্তি যে তেসং আযতনানং সংৰরং ৰিন্দিংসু পটিলভিংসু। ৰিহরন্তানৰস্সুতাতি ৰিহরন্তি অনৰস্সুতা অতিন্তা।
Saḷevāti cha eva. Asaṃvuto yattha dukkhaṃ nigacchatīti yesu āyatanesu saṃvaravirahito dukkhaṃ pāpuṇāti. Tesañca ye saṃvaraṇaṃ avedisunti ye tesaṃ āyatanānaṃ saṃvaraṃ vindiṃsu paṭilabhiṃsu. Viharantānavassutāti viharanti anavassutā atintā.
অসাদিতঞ্চ সাদুন্তি অস্সাদৰন্তঞ্চ মধুরঞ্চ। ফস্সদ্ৰযং সুখদুক্খে উপেক্খেতি সুখফস্সঞ্চ দুক্খফস্সঞ্চাতি ইদং ফস্সদ্ৰযং উপেক্খে, উপেক্খামেৰেত্থ উপ্পাদেয্যাতি অত্থো। ফস্সদ্ৰযং সুখদুক্খং উপেক্খোতি ৰা পাঠো, ফস্সহেতুকং সুখদুক্খং উপেক্খো, সুখে অনুরোধং দুক্খে চ ৰিরোধং অনুপ্পাদেন্তো উপেক্খকো ভৰেয্যাতিপি অত্থো। অনানুরুদ্ধো অৰিরুদ্ধো কেনচীতি কেনচি সদ্ধিং নেৰ অনুরুদ্ধো ন ৰিরুদ্ধো ভৰেয্য।
Asāditañca sādunti assādavantañca madhurañca. Phassadvayaṃ sukhadukkhe upekkheti sukhaphassañca dukkhaphassañcāti idaṃ phassadvayaṃ upekkhe, upekkhāmevettha uppādeyyāti attho. Phassadvayaṃ sukhadukkhaṃ upekkhoti vā pāṭho, phassahetukaṃ sukhadukkhaṃ upekkho, sukhe anurodhaṃ dukkhe ca virodhaṃ anuppādento upekkhako bhaveyyātipi attho. Anānuruddhoaviruddho kenacīti kenaci saddhiṃ neva anuruddho na viruddho bhaveyya.
পপঞ্চসঞ্ঞাতি কিলেসসঞ্ঞায পপঞ্চসঞ্ঞা নাম হুত্ৰা। ইতরীতরা নরাতি লামকসত্তা পপঞ্চযন্তা উপযন্তীতি পপঞ্চযমানা ৰট্টং উপগচ্ছন্তি। সঞ্ঞিনোতি সসঞ্ঞা সত্তা। মনোমযং গেহসিতঞ্চ সব্বন্তি সব্বমেৰ পঞ্চকামগুণগেহনিস্সিতং মনোমযং ৰিতক্কং। পনুজ্জাতি পনুদিত্ৰা নীহরিত্ৰা। নেক্খম্মসিতং ইরীযতীতি দব্বজাতিকো ভিক্খু নেক্খম্মসিতং ইরিযেন ইরীযতি।
Papañcasaññāti kilesasaññāya papañcasaññā nāma hutvā. Itarītarā narāti lāmakasattā papañcayantā upayantīti papañcayamānā vaṭṭaṃ upagacchanti. Saññinoti sasaññā sattā. Manomayaṃ gehasitañca sabbanti sabbameva pañcakāmaguṇagehanissitaṃ manomayaṃ vitakkaṃ. Panujjāti panuditvā nīharitvā. Nekkhammasitaṃ irīyatīti dabbajātiko bhikkhu nekkhammasitaṃ iriyena irīyati.
ছস্সু যদা সুভাৰিতোতি ছসু আরম্মণেসু যদা সুট্ঠু ভাৰিতো। ফুট্ঠস্স চিত্তং ন ৰিকম্পতে ক্ৰচীতি সুখফস্সেন ৰা দুক্খফস্সেন ৰা ফুট্ঠস্স কিস্মিঞ্চি চিত্তং ন কম্পতি ন ৰেধতি। ভৰত্থ জাতিমরণস্স পারগাতি জাতিমরণানং পারং নিব্বানং গমকা হোথ।
Chassu yadāsubhāvitoti chasu ārammaṇesu yadā suṭṭhu bhāvito. Phuṭṭhassa cittaṃ na vikampatekvacīti sukhaphassena vā dukkhaphassena vā phuṭṭhassa kismiñci cittaṃ na kampati na vedhati. Bhavattha jātimaraṇassa pāragāti jātimaraṇānaṃ pāraṃ nibbānaṃ gamakā hotha.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. অদন্তঅগুত্তসুত্তং • 1. Adantaaguttasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. অদন্তঅগুত্তসুত্তৰণ্ণনা • 1. Adantaaguttasuttavaṇṇanā
