| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
១០. សឡវគ្គោ
10. Saḷavaggo
១. អទន្តអគុត្តវណ្ណនា
1. Adantaaguttavaṇṇanā
៩៤. សឡវគ្គស្ស បឋមេ អទន្តាតិ អទមិតា។ អគុត្តាតិ អគោបិតា។ អរក្ខិតាតិ ន រក្ខិតា។ អសំវុតាតិ អបិហិតា។ ទុក្ខាធិវាហា ហោន្តីតិ នេរយិកាទិភេទំ អធិកទុក្ខំ អាវហនកា ហោន្តិ។ សុខាធិវាហា ហោន្តីតិ ឈានមគ្គផលបភេទំ អធិកសុខំ អាវហនកា ហោន្តិ។ អធិវហាតិបិ បាឋោ, ឯសេវត្ថោ។
94. Saḷavaggassa paṭhame adantāti adamitā. Aguttāti agopitā. Arakkhitāti na rakkhitā. Asaṃvutāti apihitā. Dukkhādhivāhā hontīti nerayikādibhedaṃ adhikadukkhaṃ āvahanakā honti. Sukhādhivāhā hontīti jhānamaggaphalapabhedaṃ adhikasukhaṃ āvahanakā honti. Adhivahātipi pāṭho, esevattho.
សឡេវាតិ ឆ ឯវ។ អសំវុតោ យត្ថ ទុក្ខំ និគច្ឆតីតិ យេសុ អាយតនេសុ សំវរវិរហិតោ ទុក្ខំ បាបុណាតិ។ តេសញ្ច យេ សំវរណំ អវេទិសុន្តិ យេ តេសំ អាយតនានំ សំវរំ វិន្ទិំសុ បដិលភិំសុ។ វិហរន្តានវស្សុតាតិ វិហរន្តិ អនវស្សុតា អតិន្តា។
Saḷevāti cha eva. Asaṃvuto yattha dukkhaṃ nigacchatīti yesu āyatanesu saṃvaravirahito dukkhaṃ pāpuṇāti. Tesañca ye saṃvaraṇaṃ avedisunti ye tesaṃ āyatanānaṃ saṃvaraṃ vindiṃsu paṭilabhiṃsu. Viharantānavassutāti viharanti anavassutā atintā.
អសាទិតញ្ច សាទុន្តិ អស្សាទវន្តញ្ច មធុរញ្ច។ ផស្សទ្វយំ សុខទុក្ខេ ឧបេក្ខេតិ សុខផស្សញ្ច ទុក្ខផស្សញ្ចាតិ ឥទំ ផស្សទ្វយំ ឧបេក្ខេ, ឧបេក្ខាមេវេត្ថ ឧប្បាទេយ្យាតិ អត្ថោ។ ផស្សទ្វយំ សុខទុក្ខំ ឧបេក្ខោតិ វា បាឋោ, ផស្សហេតុកំ សុខទុក្ខំ ឧបេក្ខោ, សុខេ អនុរោធំ ទុក្ខេ ច វិរោធំ អនុប្បាទេន្តោ ឧបេក្ខកោ ភវេយ្យាតិបិ អត្ថោ។ អនានុរុទ្ធោ អវិរុទ្ធោ កេនចីតិ កេនចិ សទ្ធិំ នេវ អនុរុទ្ធោ ន វិរុទ្ធោ ភវេយ្យ។
Asāditañca sādunti assādavantañca madhurañca. Phassadvayaṃ sukhadukkhe upekkheti sukhaphassañca dukkhaphassañcāti idaṃ phassadvayaṃ upekkhe, upekkhāmevettha uppādeyyāti attho. Phassadvayaṃ sukhadukkhaṃ upekkhoti vā pāṭho, phassahetukaṃ sukhadukkhaṃ upekkho, sukhe anurodhaṃ dukkhe ca virodhaṃ anuppādento upekkhako bhaveyyātipi attho. Anānuruddhoaviruddho kenacīti kenaci saddhiṃ neva anuruddho na viruddho bhaveyya.
បបញ្ចសញ្ញាតិ កិលេសសញ្ញាយ បបញ្ចសញ្ញា នាម ហុត្វា។ ឥតរីតរា នរាតិ លាមកសត្តា បបញ្ចយន្តា ឧបយន្តីតិ បបញ្ចយមានា វដ្ដំ ឧបគច្ឆន្តិ។ សញ្ញិនោតិ សសញ្ញា សត្តា។ មនោមយំ គេហសិតញ្ច សព្ពន្តិ សព្ពមេវ បញ្ចកាមគុណគេហនិស្សិតំ មនោមយំ វិតក្កំ។ បនុជ្ជាតិ បនុទិត្វា នីហរិត្វា។ នេក្ខម្មសិតំ ឥរីយតីតិ ទព្ពជាតិកោ ភិក្ខុ នេក្ខម្មសិតំ ឥរិយេន ឥរីយតិ។
Papañcasaññāti kilesasaññāya papañcasaññā nāma hutvā. Itarītarā narāti lāmakasattā papañcayantā upayantīti papañcayamānā vaṭṭaṃ upagacchanti. Saññinoti sasaññā sattā. Manomayaṃ gehasitañca sabbanti sabbameva pañcakāmaguṇagehanissitaṃ manomayaṃ vitakkaṃ. Panujjāti panuditvā nīharitvā. Nekkhammasitaṃ irīyatīti dabbajātiko bhikkhu nekkhammasitaṃ iriyena irīyati.
ឆស្សុ យទា សុភាវិតោតិ ឆសុ អារម្មណេសុ យទា សុដ្ឋុ ភាវិតោ។ ផុដ្ឋស្ស ចិត្តំ ន វិកម្បតេ ក្វចីតិ សុខផស្សេន វា ទុក្ខផស្សេន វា ផុដ្ឋស្ស កិស្មិញ្ចិ ចិត្តំ ន កម្បតិ ន វេធតិ។ ភវត្ថ ជាតិមរណស្ស បារគាតិ ជាតិមរណានំ បារំ និព្ពានំ គមកា ហោថ។
Chassu yadāsubhāvitoti chasu ārammaṇesu yadā suṭṭhu bhāvito. Phuṭṭhassa cittaṃ na vikampatekvacīti sukhaphassena vā dukkhaphassena vā phuṭṭhassa kismiñci cittaṃ na kampati na vedhati. Bhavattha jātimaraṇassa pāragāti jātimaraṇānaṃ pāraṃ nibbānaṃ gamakā hotha.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. អទន្តអគុត្តសុត្តំ • 1. Adantaaguttasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១. អទន្តអគុត្តសុត្តវណ្ណនា • 1. Adantaaguttasuttavaṇṇanā
