| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೧೦. ಸಳವಗ್ಗೋ
10. Saḷavaggo
೧. ಅದನ್ತಅಗುತ್ತವಣ್ಣನಾ
1. Adantaaguttavaṇṇanā
೯೪. ಸಳವಗ್ಗಸ್ಸ ಪಠಮೇ ಅದನ್ತಾತಿ ಅದಮಿತಾ। ಅಗುತ್ತಾತಿ ಅಗೋಪಿತಾ। ಅರಕ್ಖಿತಾತಿ ನ ರಕ್ಖಿತಾ। ಅಸಂವುತಾತಿ ಅಪಿಹಿತಾ। ದುಕ್ಖಾಧಿವಾಹಾ ಹೋನ್ತೀತಿ ನೇರಯಿಕಾದಿಭೇದಂ ಅಧಿಕದುಕ್ಖಂ ಆವಹನಕಾ ಹೋನ್ತಿ। ಸುಖಾಧಿವಾಹಾ ಹೋನ್ತೀತಿ ಝಾನಮಗ್ಗಫಲಪಭೇದಂ ಅಧಿಕಸುಖಂ ಆವಹನಕಾ ಹೋನ್ತಿ। ಅಧಿವಹಾತಿಪಿ ಪಾಠೋ, ಏಸೇವತ್ಥೋ।
94. Saḷavaggassa paṭhame adantāti adamitā. Aguttāti agopitā. Arakkhitāti na rakkhitā. Asaṃvutāti apihitā. Dukkhādhivāhā hontīti nerayikādibhedaṃ adhikadukkhaṃ āvahanakā honti. Sukhādhivāhā hontīti jhānamaggaphalapabhedaṃ adhikasukhaṃ āvahanakā honti. Adhivahātipi pāṭho, esevattho.
ಸಳೇವಾತಿ ಛ ಏವ। ಅಸಂವುತೋ ಯತ್ಥ ದುಕ್ಖಂ ನಿಗಚ್ಛತೀತಿ ಯೇಸು ಆಯತನೇಸು ಸಂವರವಿರಹಿತೋ ದುಕ್ಖಂ ಪಾಪುಣಾತಿ। ತೇಸಞ್ಚ ಯೇ ಸಂವರಣಂ ಅವೇದಿಸುನ್ತಿ ಯೇ ತೇಸಂ ಆಯತನಾನಂ ಸಂವರಂ ವಿನ್ದಿಂಸು ಪಟಿಲಭಿಂಸು। ವಿಹರನ್ತಾನವಸ್ಸುತಾತಿ ವಿಹರನ್ತಿ ಅನವಸ್ಸುತಾ ಅತಿನ್ತಾ।
Saḷevāti cha eva. Asaṃvuto yattha dukkhaṃ nigacchatīti yesu āyatanesu saṃvaravirahito dukkhaṃ pāpuṇāti. Tesañca ye saṃvaraṇaṃ avedisunti ye tesaṃ āyatanānaṃ saṃvaraṃ vindiṃsu paṭilabhiṃsu. Viharantānavassutāti viharanti anavassutā atintā.
ಅಸಾದಿತಞ್ಚ ಸಾದುನ್ತಿ ಅಸ್ಸಾದವನ್ತಞ್ಚ ಮಧುರಞ್ಚ। ಫಸ್ಸದ್ವಯಂ ಸುಖದುಕ್ಖೇ ಉಪೇಕ್ಖೇತಿ ಸುಖಫಸ್ಸಞ್ಚ ದುಕ್ಖಫಸ್ಸಞ್ಚಾತಿ ಇದಂ ಫಸ್ಸದ್ವಯಂ ಉಪೇಕ್ಖೇ, ಉಪೇಕ್ಖಾಮೇವೇತ್ಥ ಉಪ್ಪಾದೇಯ್ಯಾತಿ ಅತ್ಥೋ। ಫಸ್ಸದ್ವಯಂ ಸುಖದುಕ್ಖಂ ಉಪೇಕ್ಖೋತಿ ವಾ ಪಾಠೋ, ಫಸ್ಸಹೇತುಕಂ ಸುಖದುಕ್ಖಂ ಉಪೇಕ್ಖೋ, ಸುಖೇ ಅನುರೋಧಂ ದುಕ್ಖೇ ಚ ವಿರೋಧಂ ಅನುಪ್ಪಾದೇನ್ತೋ ಉಪೇಕ್ಖಕೋ ಭವೇಯ್ಯಾತಿಪಿ ಅತ್ಥೋ। ಅನಾನುರುದ್ಧೋ ಅವಿರುದ್ಧೋ ಕೇನಚೀತಿ ಕೇನಚಿ ಸದ್ಧಿಂ ನೇವ ಅನುರುದ್ಧೋ ನ ವಿರುದ್ಧೋ ಭವೇಯ್ಯ।
Asāditañca sādunti assādavantañca madhurañca. Phassadvayaṃ sukhadukkhe upekkheti sukhaphassañca dukkhaphassañcāti idaṃ phassadvayaṃ upekkhe, upekkhāmevettha uppādeyyāti attho. Phassadvayaṃ sukhadukkhaṃ upekkhoti vā pāṭho, phassahetukaṃ sukhadukkhaṃ upekkho, sukhe anurodhaṃ dukkhe ca virodhaṃ anuppādento upekkhako bhaveyyātipi attho. Anānuruddhoaviruddho kenacīti kenaci saddhiṃ neva anuruddho na viruddho bhaveyya.
ಪಪಞ್ಚಸಞ್ಞಾತಿ ಕಿಲೇಸಸಞ್ಞಾಯ ಪಪಞ್ಚಸಞ್ಞಾ ನಾಮ ಹುತ್ವಾ। ಇತರೀತರಾ ನರಾತಿ ಲಾಮಕಸತ್ತಾ ಪಪಞ್ಚಯನ್ತಾ ಉಪಯನ್ತೀತಿ ಪಪಞ್ಚಯಮಾನಾ ವಟ್ಟಂ ಉಪಗಚ್ಛನ್ತಿ। ಸಞ್ಞಿನೋತಿ ಸಸಞ್ಞಾ ಸತ್ತಾ। ಮನೋಮಯಂ ಗೇಹಸಿತಞ್ಚ ಸಬ್ಬನ್ತಿ ಸಬ್ಬಮೇವ ಪಞ್ಚಕಾಮಗುಣಗೇಹನಿಸ್ಸಿತಂ ಮನೋಮಯಂ ವಿತಕ್ಕಂ। ಪನುಜ್ಜಾತಿ ಪನುದಿತ್ವಾ ನೀಹರಿತ್ವಾ। ನೇಕ್ಖಮ್ಮಸಿತಂ ಇರೀಯತೀತಿ ದಬ್ಬಜಾತಿಕೋ ಭಿಕ್ಖು ನೇಕ್ಖಮ್ಮಸಿತಂ ಇರಿಯೇನ ಇರೀಯತಿ।
Papañcasaññāti kilesasaññāya papañcasaññā nāma hutvā. Itarītarā narāti lāmakasattā papañcayantā upayantīti papañcayamānā vaṭṭaṃ upagacchanti. Saññinoti sasaññā sattā. Manomayaṃ gehasitañca sabbanti sabbameva pañcakāmaguṇagehanissitaṃ manomayaṃ vitakkaṃ. Panujjāti panuditvā nīharitvā. Nekkhammasitaṃ irīyatīti dabbajātiko bhikkhu nekkhammasitaṃ iriyena irīyati.
ಛಸ್ಸು ಯದಾ ಸುಭಾವಿತೋತಿ ಛಸು ಆರಮ್ಮಣೇಸು ಯದಾ ಸುಟ್ಠು ಭಾವಿತೋ। ಫುಟ್ಠಸ್ಸ ಚಿತ್ತಂ ನ ವಿಕಮ್ಪತೇ ಕ್ವಚೀತಿ ಸುಖಫಸ್ಸೇನ ವಾ ದುಕ್ಖಫಸ್ಸೇನ ವಾ ಫುಟ್ಠಸ್ಸ ಕಿಸ್ಮಿಞ್ಚಿ ಚಿತ್ತಂ ನ ಕಮ್ಪತಿ ನ ವೇಧತಿ। ಭವತ್ಥ ಜಾತಿಮರಣಸ್ಸ ಪಾರಗಾತಿ ಜಾತಿಮರಣಾನಂ ಪಾರಂ ನಿಬ್ಬಾನಂ ಗಮಕಾ ಹೋಥ।
Chassu yadāsubhāvitoti chasu ārammaṇesu yadā suṭṭhu bhāvito. Phuṭṭhassa cittaṃ na vikampatekvacīti sukhaphassena vā dukkhaphassena vā phuṭṭhassa kismiñci cittaṃ na kampati na vedhati. Bhavattha jātimaraṇassa pāragāti jātimaraṇānaṃ pāraṃ nibbānaṃ gamakā hotha.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧. ಅದನ್ತಅಗುತ್ತಸುತ್ತಂ • 1. Adantaaguttasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೧. ಅದನ್ತಅಗುತ್ತಸುತ್ತವಣ್ಣನಾ • 1. Adantaaguttasuttavaṇṇanā
