| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
4. අදන්‌තවග්‌ගවණ්‌ණනා
4. Adantavaggavaṇṇanā
31. චතුත්‌ථස්‌ස පඨමෙ අදන්‌තන්‌ති සවිසෙවනං අදන්‌තහත්‌ථිඅස්‌සාදිසදිසං. චිත්‌තන්‌ති වට්‌ටවසෙන උප්‌පන්‌නචිත්‌තමෙව.
31. Catutthassa paṭhame adantanti savisevanaṃ adantahatthiassādisadisaṃ. Cittanti vaṭṭavasena uppannacittameva.
32. දුතියෙ දන්‌තන්‌ති නිබ්‌බිසෙවනං දන්‌තහත්‌ථිඅස්‌සාදිසදිසං. ඉමස්‌මිම්‌පි සුත්‌තද්‌වයෙ වට්‌ටවිවට්‌ටවසෙන උප්‌පන්‌නචිත්‌තමෙව කථිතං. යථා චෙත්‌ථ, එවං ඉතො පරෙසුපීති.
32. Dutiye dantanti nibbisevanaṃ dantahatthiassādisadisaṃ. Imasmimpi suttadvaye vaṭṭavivaṭṭavasena uppannacittameva kathitaṃ. Yathā cettha, evaṃ ito paresupīti.
33. තතියෙ අගුත්‌තන්‌ති අගොපිතං සතිසංවරරහිතං අගුත්‌තහත්‌ථිඅස්‌සාදිසදිසං.
33. Tatiye aguttanti agopitaṃ satisaṃvararahitaṃ aguttahatthiassādisadisaṃ.
34. චතුත්‌ථෙ ගුත්‌තන්‌ති ගොපිතං අවිස්‌සට්‌ඨසතිසංවරං ගුත්‌තහත්‌ථිඅස්‌සාදිසදිසං.
34. Catutthe guttanti gopitaṃ avissaṭṭhasatisaṃvaraṃ guttahatthiassādisadisaṃ.
35-36. පඤ්‌චමඡට්‌ඨානි අරක්‌ඛිතං රක්‌ඛිතන්‌ති පදවසෙන බුජ්‌ඣනකානං අජ්‌ඣාසයෙන වුත්‌තානි. අත්‌ථො පනෙත්‌ථ පුරිමසදිසොයෙව.
35-36. Pañcamachaṭṭhāni arakkhitaṃ rakkhitanti padavasena bujjhanakānaṃ ajjhāsayena vuttāni. Attho panettha purimasadisoyeva.
37-38. සත්‌තමට්‌ඨමෙසුපි එසෙව නයො. උපමා පනෙත්‌ථ අසංවුතඝරද්‌වාරාදිවසෙන වෙදිතබ්‌බා.
37-38. Sattamaṭṭhamesupi eseva nayo. Upamā panettha asaṃvutagharadvārādivasena veditabbā.
39-40. නවමදසමානි චතූහිපි පදෙහි යොජෙත්‌වා වුත්‌තානි. ඉමස්‌මිම්‌පි වග්‌ගෙ වට්‌ටවිවට්‌ටමෙව කථිතන්‌ති.
39-40. Navamadasamāni catūhipi padehi yojetvā vuttāni. Imasmimpi vagge vaṭṭavivaṭṭameva kathitanti.
අදන්‌තවග්‌ගවණ්‌ණනා.
Adantavaggavaṇṇanā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 4. අදන්‌තවග්‌ගො • 4. Adantavaggo
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4. අදන්‌තවග්‌ගවණ්‌ණනා • 4. Adantavaggavaṇṇanā
