| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
246. අදස්‌සනෙ උක්‌ඛෙපනීයකම්‌මකථා
246. Adassane ukkhepanīyakammakathā
415. ඉධ පන, භික්‌ඛවෙ, භික්‌ඛු ආපත්‌තිං ආපජ්‌ජිත්‌වා න ඉච්‌ඡති ආපත්‌තිං පස්‌සිතුං. තත්‍ර චෙ භික්‌ඛූනං එවං හොති – ‘‘අයං ඛො, ආවුසො, භික්‌ඛු ආපත්‌තිං ආපජ්‌ජිත්‌වා න ඉච්‌ඡති ආපත්‌තිං පස්‌සිතුං. හන්‌දස්‌ස මයං ආපත්‌තියා අදස්‌සනෙ උක්‌ඛෙපනීයකම්‌මං කරොමා’’ති. තෙ තස්‌ස ආපත්‌තියා අදස්‌සනෙ උක්‌ඛෙපනීයකම්‌මං කරොන්‌ති – අධම්‌මෙන වග්‌ගා. සො තම්‌හා ආවාසා අඤ්‌ඤං ආවාසං ගච්‌ඡති. තත්‌ථපි භික්‌ඛූනං එවං හොති – ‘‘අයං ඛො, ආවුසො, භික්‌ඛු සඞ්‌ඝෙන ආපත්‌තියා අදස්‌සනෙ උක්‌ඛෙපනීයකම්‌මකතො අධම්‌මෙන වග්‌ගෙහි. හන්‌දස්‌ස මයං ආපත්‌තියා අදස්‌සනෙ උක්‌ඛෙපනීයකම්‌මං කරොමා’’ති. තෙ තස්‌ස ආපත්‌තියා අදස්‌සනෙ උක්‌ඛෙපනීයකම්‌මං කරොන්‌ති – අධම්‌මෙන සමග්‌ගා…පෙ.… ධම්‌මෙන වග්‌ගා… ධම්‌මපතිරූපකෙන වග්‌ගා… ධම්‌මපතිරූපකෙන සමග්‌ගා…පෙ.….
415. Idha pana, bhikkhave, bhikkhu āpattiṃ āpajjitvā na icchati āpattiṃ passituṃ. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu āpattiṃ āpajjitvā na icchati āpattiṃ passituṃ. Handassa mayaṃ āpattiyā adassane ukkhepanīyakammaṃ karomā’’ti. Te tassa āpattiyā adassane ukkhepanīyakammaṃ karonti – adhammena vaggā. So tamhā āvāsā aññaṃ āvāsaṃ gacchati. Tatthapi bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena āpattiyā adassane ukkhepanīyakammakato adhammena vaggehi. Handassa mayaṃ āpattiyā adassane ukkhepanīyakammaṃ karomā’’ti. Te tassa āpattiyā adassane ukkhepanīyakammaṃ karonti – adhammena samaggā…pe… dhammena vaggā… dhammapatirūpakena vaggā… dhammapatirūpakena samaggā…pe….
චක්‌කං කාතබ්‌බං.
Cakkaṃ kātabbaṃ.
අදස්‌සනෙ උක්‌ඛෙපනීයකම්‌මකථා නිට්‌ඨිතා.
Adassane ukkhepanīyakammakathā niṭṭhitā.
