| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
267. அத³ஸ்ஸனே உக்கே²பனீயகம்மபடிப்பஸ்ஸத்³தி⁴கதா²
267. Adassane ukkhepanīyakammapaṭippassaddhikathā
448. இத⁴ பன, பி⁴க்க²வே, பி⁴க்கு² ஸங்கே⁴ன ஆபத்தியா அத³ஸ்ஸனே உக்கே²பனீயகம்மகதோ ஸம்மா வத்ததி, லோமங் பாதேதி, நெத்தா²ரங் வத்ததி, ஆபத்தியா அத³ஸ்ஸனே உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴ங் யாசதி. தத்ர சே பி⁴க்கூ²னங் ஏவங் ஹோதி – ‘‘அயங் கோ², ஆவுஸோ, பி⁴க்கு² ஸங்கே⁴ன ஆபத்தியா அத³ஸ்ஸனே உக்கே²பனீயகம்மகதோ ஸம்மா வத்ததி, லோமங் பாதேதி, நெத்தா²ரங் வத்ததி, ஆபத்தியா அத³ஸ்ஸனே உக்கே²பனீயஸ்ஸ கம்மஸ்ஸ படிப்பஸ்ஸத்³தி⁴ங் யாசதி. ஹந்த³ஸ்ஸ மயங் ஆபத்தியா அத³ஸ்ஸனே உக்கே²பனீயகம்மங் படிப்பஸ்ஸம்பே⁴மா’’தி. தே தஸ்ஸ ஆபத்தியா அத³ஸ்ஸனே உக்கே²பனீயகம்மங் படிப்பஸ்ஸம்பெ⁴ந்தி – அத⁴ம்மேன வக்³கா³…பே॰… அத⁴ம்மேன ஸமக்³கா³… த⁴ம்மேன வக்³கா³… த⁴ம்மபதிரூபகேன வக்³கா³… த⁴ம்மபதிரூபகேன ஸமக்³கா³. தத்ரட்டோ² ஸங்கோ⁴ விவத³தி – ‘‘அத⁴ம்மேன வக்³க³கம்மங், அத⁴ம்மேன ஸமக்³க³கம்மங், த⁴ம்மேன வக்³க³கம்மங், த⁴ம்மபதிரூபகேன வக்³க³கம்மங், த⁴ம்மபதிரூபகேன ஸமக்³க³கம்மங், அகதங் கம்மங் து³க்கடங் கம்மங் புன காதப்³ப³ங் கம்ம’’ந்தி. தத்ர, பி⁴க்க²வே, யே தே பி⁴க்கூ² ஏவமாஹங்ஸு – ‘‘த⁴ம்மபதிரூபகேன ஸமக்³க³கம்ம’’ந்தி, யே ச தே பி⁴க்கூ² ஏவமாஹங்ஸு – ‘‘அகதங் கம்மங் து³க்கடங் கம்மங் புன காதப்³ப³ங் கம்ம’’ந்தி, இமே தத்த² பி⁴க்கூ² த⁴ம்மவாதி³னோ. இமேபி பஞ்ச வாரா ஸங்கி²த்தா.
448. Idha pana, bhikkhave, bhikkhu saṅghena āpattiyā adassane ukkhepanīyakammakato sammā vattati, lomaṃ pāteti, netthāraṃ vattati, āpattiyā adassane ukkhepanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena āpattiyā adassane ukkhepanīyakammakato sammā vattati, lomaṃ pāteti, netthāraṃ vattati, āpattiyā adassane ukkhepanīyassa kammassa paṭippassaddhiṃ yācati. Handassa mayaṃ āpattiyā adassane ukkhepanīyakammaṃ paṭippassambhemā’’ti. Te tassa āpattiyā adassane ukkhepanīyakammaṃ paṭippassambhenti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Imepi pañca vārā saṃkhittā.
அத³ஸ்ஸனே உக்கே²பனீயகம்மபடிப்பஸ்ஸத்³தி⁴கதா² நிட்டி²தா.
Adassane ukkhepanīyakammapaṭippassaddhikathā niṭṭhitā.
